Hunyo 21–27

Doktrina ug mga Pakigsaad 67–70

“Bili … sa mga Katigayunan sa Tibuok Yuta”

Sa dili pa nimo basahon ang mga sugyot niini nga outline, tun-i ang Doktrina ug mga Pakigsaad 67–70, ug irekord ang espirituhanong mga impresyon nga imong nadawat. Kini nga mga impresyon makatabang nimo sa paghimo og dinasig nga plano sa pagtudlo. Dayon dugangi kana nga plano sa mga ideya niini nga outline, gikan sa Dali, Sunod Kanako—Alang sa mga Indibidwal ug mga Pamilya, o gikan sa mga magasin sa Simbahan.

Irekord ang Imong mga Impresyon

Dapita ang Pagpaambit

Dapita ang mga bata sa pagdrowing og litrato sa butang nga ilang nakat-unan gikan sa ilang pagtuon sa kasulatan diha sa panimalay o sa Primary. Kon sila maglisud sa paghunahuna unsay drowingon, mahimo kang mopahinumdom kanila sa mga hilisgutan sa Doktrina ug mga Pakigsaad 67–70, sama sa bunyag, pag-angkon og pagpamatuod sa mga kasulatan, o mga ginikanan nga nagtudlo sa mga anak sa ebanghelyo.

Itudlo ang Doktrina: Mas Gagmay nga mga Bata

Doktrina ug mga Pakigsaad 67

Ang Doktrina ug mga Pakigsaad naglangkob sa mga pagpadayag gikan sa Dios.

Niadtong Nobyembre 1831, ang mga lider sa Simbahan nakahukom sa pagbutang sa mga pagpadayag ni Joseph Smith sa usa ka basahon aron ang tanan makabasa. Karon kadto nga mga pagpadayag giimprinta diha sa Doktrina ug mga Pakigsaad.

Posible nga mga Kalihokan

• Sultihi ang mga bata mahitungod kon sa unsa nga paagi nga ang mga pagpadayag ni Joseph Smith naimprinta sa usa ka basahon (tan-awa sa “Kapitulo 23: Ang Doktrina ug mga Pakigsaad,” Mga Istorya sa Doktrina ug mga Pakigsaad, 90–92, o sa tukma nga video sa ChurchofJesusChrist.org). Ipakigbahin ang imong pagpamatuod nga ang Doktrina ug mga Pakigsaad naglangkob sa mga pagpadayag nga makatabang kanato karon. Ipakigbahin ang usa sa imong paborito nga mga bersikulo gikan sa Doktrina ug mga Pakigsaad.

• Ipakita sa mga bata ang matag usa sa mga sumbanan nga mga kasulatan tagsa-tagsa, ug samtang imong gunitan ang matag usa pakigbahin og gamay kon sa unsa nga paagi kini nakuha (tan-awa ang matag gisulat sa basahon diha sa Giya ngadto sa mga Kasulatan). Sa dihang imong ipataas ang Doktrina ug mga Pakigsaad, ipakigbahin sa mga bata unsa ang nakapahimo niini nga basahon sa kasulatan nga talagsaon (sama pananglit, kini naglakip sa mga pagpadayag nga gihatag sa atong panahon).

Doktrina ug mga Pakigsaad 68:25–28

Ako mahimong bunyagan kon ako mag-edad na og otso anyos.

Sa Doktrina ug mga Pakigsaad 68:25–28, ang Ginoo misulti ni Joseph Smith nga ang mga bata kinahanglang makat-on sa pagbaton og hugot nga pagtuo kang Jesukristo, maghinulsol, ug magpabunyag kon sila mag-edad na og otso anyos. Miingon usab siya nga sila kinahanglan nga makat-on sa pag-ampo ug pagtuman sa mga sugo sa Dios.

Posible nga mga Kalihokan

• Dapita ang mga bata sa pag-ihap hangtud sa otso gamit ang ilang mga tudlo. Unsa ang nakaespesyal mahitungod sa pagka-otso anyos? Tabangi ang mga bata nga makahibalo nga kon sila mag-edad na og otso anyos, sila mahimo nang bunyagan. Gamit ang mga pulong nga anaa sa Doktrina ug mga Pakigsaad 68:25–28, ipakigbahin uban nila ang pipila sa mga butang nga gusto sa Ginoo nga ilang makat-unan sa dili pa sila mag-edad og otso (tan-awa usab sa Mga Artikulo sa Hugot nga Pagtuo 1:4). Tabangi sila nga makasabut sa mga konsepto nga dili nila pamilyar.

• Kantaha uban sa mga bata ang usa ka awit mahitungod sa bunyag, sama sa “Bunyag” o “Kon Ako Bunyagan” (Songbook sa mga Bata, 54–55, 53). Hangyoa ang mga bata sa pagpakigbahin unsay ilang gibati nga mabunyagan ug unsay ilang mahimo sa pag-andam.

Itudlo ang Doktrina: Mas Dagko nga mga Bata

Doktrina ug mga Pakigsaad 67:4, 9

Ang mga pagpadayag nga gihatag pinaagi ni Joseph Smith mga tinuod.

Kadaghanan sa mga instruksyon sa Doktrina ug mga Pakigsaad 67–70 adunay kalabutan sa mga paningkamot sa mga Santos sa pagmantala sa mga pagpadayag ni Joseph Smith. Mahimo kini nga usa ka oportunidad aron matabangan ang mga bata nga makahibalo nga niini nga mga pagpadayag, nga karon namantala sa Doktrina ug mga Pakigsaad, atong makaplagan ang tingog sa Ginoo.

Samtang ikaw mag-andam sa pagtudlo, mahimo nimong ribyuhon ang Mga Santos, 1:140–43 o “Kapitulo 23: Ang Doktrina ug mga Pakigsaad” (Mga istorya sa Doktrina ug mga Pakigsaad, 90–92).

Posible nga mga Kalihokan

• Ipakita sa mga bata ang Biblia, ang Basahon ni Mormon, ang Doktrina ug mga Pakigsaad, ug ang Perlas nga Labing Bililhon. Tabangi ang mga bata nga makahimo og lista diha sa pisara unsa ang nakapalahi sa matag basahon sa kasulatan ug unsa ang nakapareha niini. Kon sila nagkinahanglan og tabang, ipakigbahin nila ang mga deskripsyon niini nga mga basahon nga anaa sa Giya ngadto sa mga Kasulatan. Pangutan-a ang mga bata kon unsaon nato nga makahibalo nga ang mga kasulatan mga tinuod. Unsay atong makat-unan gikan sa Doktrina ug mga Pakigsaad 67:4, 9 mahitungod sa mga pagpadayag nga gihatag sa Ginoo ngadto ni Joseph Smith?

• Pagpakigbahin og usa ka bersikulo gikan sa Doktrina ug mga Pakigsaad nga naglig-on sa inyong “pagpamatuod sa kamatuoran niini nga mga sugo” (verse 4). Hatagi ang mga bata og mga oportunidad sa pagpakigbahin sa usa ka paborito nga bersikulo sa ilang kaugalingon. Ipasabut sa mga bata nga ang mga lider sa Simbahan niining higayuna nakahukom sa pagmantala sa ilang pagpamatuod sa mga pagpadayag nga nadawat ni Joseph Smith. Sa dihang gihimo nila, usa sa mga lider, si Levi Hancock, misulat tupad sa iyang ngalan, “Dili gayud mapapas” (tan-awa sa “Testimony, circa 2 Nobyembre 1831,” Revelation Book 1, 121, josephsmithpapers.org). Ngano nga si Levi Hancock gusto nga ang iyang ngalan “dili gayud mapapas” gikan sa namantala nga pagpamatuod? Hatagi ang mga bata og oportunidad sa pagsulat sa ilang mga pagpamatuod sa unsay ilang nakat-unan hangtud karon sa Doktrina ug mga Pakigsaad.

  

  Ang Dios misugo nato sa pagtuon sa mga kasulatan.

Doktrina ug mga Pakigsaad 68:3–4

Kon ang atong mga lider sa Simbahan namulong pinaagi sa inspirasyon, sila namulong “sa pulong sa Ginoo.”

Kon ang mga sulugoon sa Ginoo mamulong pinaagi sa gahum sa Espiritu Santo, ang ilang mga pulong mopadayag sa kabubut-on, sa hunahuna, sa pulong, ug sa tingog sa Ginoo (tan-awa sa bersikulo 4). Ang pagkahibalo niini nga kamatuoran makatabang sa mga bata nga gusto nga maminaw ug mosunod sa ilang mga pagtulun-an.

Posible nga mga Kalihokan

• Dapita ang mga bata sa pagbasa sa Doktrina ug mga Pakigsaad 68:3–4 sa ginagmay nga mga grupo ug mopakigbahin sa usag usa unsay ilang nakat-unan gikan niini nga mga bersikulo. Dapita ang mga bata sa pagsulat og butang nga ilang nakat-unan diha sa pisara. Ngano nga kining importante nga kamatuoran kinahanglang mahibaloan?

• Human sa pagbasa og dungan sa Doktrina ug mga Pakigsaad 68:3–4 hatagi ang mga bata og mga kopya sa daghang bag-ong mga mensahe gikan sa kinatibuk-ang komperensya. Dapita sila sa pagpangita diha sa mga mensahe sa mga kamatuoran nga gitudlo sa Ginoo kanato pinaagi sa Iyang mga sulugoon.

Doktrina ug mga Pakigsaad 69:1–2

Ako mahimong “magmatinuoron ug magmatinud-anon.”

Sa dihang si Oliver Cowdery kinahanglang mobiyahe ngadto sa Missouri, ang Ginoo mitawag ni John Whitmer, usa ka tawo kinsa “matinuoron ug matinud-anon” (bersikulo 1), nga mouban kaniya. Sa unsa nga paagi nga ang mga bata mahimong matinuoron ug matinud-anon sama ni John Whitmer?

Posible nga mga Kalihokan

• Sultihi ang mga bata nga sa dihang ang Ginoo mipadala ni Oliver Cowdery ngadto sa Missouri, Siya miingon nga usa ka tawo nga “matinuoron ug matinud-anon” (bersikulo 1) kinahanglan nga mouban kaniya, mao nga Siya mipadala ni John Whitmer. Unsay buot ipasabut nga magmatinuoron ug magmatinud-anon? Sa unsa nga paagi kita makasiguro nga kita matinuoron ug matinud-anon aron nga ang Ginoo makagamit nato sa pagpanalangin sa uban?

• Dapita ang pipila ka bata sa paghisgot mahitungod sa usa ka tawo nga ilang nailhan kinsa sa ilang hunahuna “matinuoron ug matinud-anon.” Unsaon nila sa pagkahibalo nga kana nga tawo matinuoron ug matinud-anon? Tabangi sila nga makakita nga ang Ginoo misalig ni John Whitmer tungod kay siya niining higayona, matinuoron ug matinud-anon (tan-awa sa Doktrina ug mga Pakigsaad 69:1–2). Panganta og dungan sa awit nga nag-awhag sa mga bata nga magmatinuoron ug magmatinud-anon sama sa Manluluwas, sama sa “Maninguha Kong Mahimong Mahisama Kang Jesus” (Songbook sa mga Bata, 40–41).

Awhaga ang Pagkat-on diha sa Panimalay

Dapita ang mga bata sa pagpasabut ngadto sa usa ka tawo sa panimalay unsa ang Doktrina ug mga Pakigsaad, diin kini gikan, ug ngano nga importante kini ngadto kanila.

Pagpalambo sa Atong Pagtudlo

Ipahaum ang mga kalihokan sa edad sa mga bata nga imong gitudloan. Ang gagmayng mga bata mahimong magkinahanglan og direksyon kon dapiton sa pagpakigbahin. Ang mas dagko nga mga bata adunay mas daghan og mga kasinatian sa pagpakigbahin sa ilang mga hunahuna. Hinumdumi kini nga mga kalainan samtang magplano ka og mga kalihokan.