Jesus uban sa karnero

Gimahal sa Magbalantay, ni Simon Dewey

Hunyo 28–Hulyo 4

Doktrina ug mga Pakigsaad 71–75

“Walay Hinagiban nga Gihimo batok Kaninyo nga Mouswag”

Ang mga bata nga imong gitudloan daghan og makat-unan sa imong klase, apan mas daghan sila og makat-unan kon mopalambo sila og batasan nga magtuon sa mga kasulatan sa panimalay. Hunahunaa kon unsaon nimo sa pagdasig ug pagsuporta ang pagkat-on sa ebanghelyo diha sa panimalay.

Irekord ang Imong mga Impresyon

pagpaambit nga icon

Dapita ang Pagpaambit

Dapita ang mga bata sa paglingkod sa salog nga magporma og lingin, ug pagpaligid og bola ngadto sa usa kanila. Hangyoa kana nga bata sa pagpaambit og usa ka butang nga bag-o lang niyang nakat-unan mahitungod sa ebanghelyo diha sa panimalay o sa Primary. Dayon dapita ang bata sa pagpaligid sa bola ngadto sa laing bata. Balik-balika kini hangtud nga ang matag bata makabaton og kahigayunan sa pagpaambit og usa ka butang.

pagtudlo nga icon

Itudlo ang Doktrina: Mas Gagmay nga mga Bata

Doktrina ug mga Pakigsaad 72:2, 10

Ang Ginoo mitawag og usa ka bishop sa pagtabang kanako.

Ang gagmay nga mga bata wala kaayoy nahibaloan unsay gibuhat sa ilang bishop sa pagserbisyo kanila ug sa ubang mga miyembro sa ward. Ikaw makatabang kanila nga magpasalamat sa serbisyo sa bishop.

Posible nga mga Kalihokan

• Pagdala og mga butang ngadto sa klase nga nagrepresentar sa mga responsibilidad sa usa ka bishop, sama sa tithing slip, sa mga kasulatan, o litrato sa bishop nga nagtambag (tan-awa ang litrato sa katapusan sa outline niining semanaha sa Dali, Sunod Kanako—Alang sa mga Indibidwal ug mga Pamilya). Basaha ang Doktrina ug mga Pakigsaad 72:2, ug ipasabut nga ang Ginoo mitawag og usa ka bishop sa pagtabang nato. Gamita ang mga butang nga imong gidala aron matabangan ang mga bata nga makasabut sa pipila ka mga butang nga gihimo sa bishop sa pagserbisyo sa ward.

• Dad-a ang mga bata ngadto sa opisina sa bishop (mahimo kang makigsabut sa ubang mga magtutudlo). Ihulagway ngadto nila ang pipila ka mga sitwasyon kon mahimamat nila ang bishop sa iyang opisina (sama sa usa ka interbyu sa bunyag o husay sa ikapulo). Sultihi ang mga bata sa unsa nga paagi ikaw napanalanginan tungod sa pagserbisyo sa bishop.

• Tabangi ang mga bata nga maghimo og mga kard nga ihatag ngadto sa bishop, magpasalamat kaniya sa unsay iyang gibuhat aron sa pagtabang sa buhat sa Ginoo.

Doktrina ug mga Pakigsaad 75:3

Akong ihatag ang akong labing maayong paningkamot ngadto sa Ginoo.

Bisan sa linghud nga pangidaron, ang mga bata makakaplag og kalipay sa pagbuhat sa ilang labing maayo sa pagtuman sa mga sugo sa Ginoo.

Posible nga mga Kalihokan

• Dapita ang matag bata sa pagpuli-puli sa pagdrama unsaon nila sa paghimo ang buhat sa pagserbisyo, sama sa paglimpyo sa kwarto sa simbahan o paghugas sa mga plato sa panimalay. Basaha ang Doktrina ug mga Pakigsaad 75:3, ug hangyoa ang mga bata sa pagpakita unsaon nila sa pagbuhat niini sa tinapulan kon ikaw moingon “ni magtinapulan” ug ipakita unsaon sa pagtrabaho kon ikaw moingon “apan maghago uban sa inyong gahum.” Ngano nga importante nga kita mobuhat sa atong labing maayo kon magserbisyo sa Ginoo?

• Ipakigbahin uban sa mga bata ang istorya ni Presidente Dieter F. Uchtdorf mahitungod sa trabaho gikan sa “Duha ka mga Baruganan alang sa Bisan Unsang Ekonomiya” ( Liahona, Nob. 2009, 55–58). Unsay atong bation kon kita makahibalo nga nahimo nato ang atong labing maayo?

• Pagkanta og awit mahitungod sa pagtrabaho nga magtinabangay, sama sa “Kon Kita Motabang” (Songbok sa mga Bata, 108). Tabangi ang mga bata sa paghimo og mga aksyon nga motukma sa mga pulong.

  mga baril ug mga sako sa pagkaon

  Ang unang mga miyembro sa Simbahan usahay mohatag og pagkaon ngadto sa Simbahan aron sa pagtabang sa uban.

pagtudlo nga icon

Itudlo ang Doktrina: Mas Dagko nga mga Bata

Doktrina ug mga Pakigsaad 71

Ako makapanalipod sa kamatuoran pinaagi sa pagpakigbahin sa akong pagpamatuod.

Ang Ginoo wala magpaabut sa mga bata nga motubag sa mga kritiko sa Simbahan sama sa Iyang pagtawag ni Joseph Smith ug Sidney Rigdon. Apan ikaw makatabang sa mga bata nga makasabut nga ang ilang yanong pagpamatuod sa kamatuoran adunay gamhanan nga epekto sa uban.

Posible nga mga Kalihokan

• Gamita ang ulohan sa seksyon sa Doktrina ug mga Pakigsaad 71 o “Kapitulo 25: Si Joseph Smith ug Sidney Rigdon Magmisyon” (Mga Istorya sa Doktrina ug mga Pakigsaad, 96) sa pagtudlo sa mga bata mahitungod sa mga sirkumstansya nga midasig sa seksyon 71. Basaha ang Doktrina ug mga Pakigsaad 71:1 uban sa mga bata, ug tabangi sila sa pagpangita unsa ang gusto sa Ginoo nga buhaton nila ni Joseph ug Sidney mahitungod sa “dili mahigalaon nga mga pagbati” sa mga tawo ngadto sa Simbahan (ulohan sa seksyon). Unsa ang Iyang gisulti nga ihatag kanila aron sila matabangan? Sa unsang paagi kita mamahimong sama ni Joseph ug Sidney?

• Dapita ang mga bata sa pagbansay nga magpares unsaon sa pagpakigbahin sa uban unsay ilang nahibaloan mahitungod sa Simbahan. Sama pananglit, sila mahimong makigbahin og yanong pagpamatuod o makigbahin og usa sa Ang mga Artikulo sa Hugot nga Pagtuo.

Doktrina ug mga Pakigsaad 72:8

Ang Ginoo motawag og mga bishop sa pagtabang Kaniya sa paghimo sa Iyang buhat.

Ang usa ka bishop adunay lig-on nga positibo nga impluwensya sa kinabuhi sa usa ka batan-on. Unsay imong mahimo sa pagtabang sa mga bata nga makakita sa bishop isip usa ka representante ni Ginoong Jesukristo?

Posible nga mga Kalihokan

• Ipasabut nga niadtong 1831 ang Ginoo mitawag sa bishop sa Simbahan, nga si Edward Partridge, nga mobalhin ngadto sa Kirtland, Ohio, aron mahimong bishop sa Independence, Missouri (tan-awa sa “Kapitulo 17: Ang Unang mga Bishop sa Simbahan,” Mga Istorya sa Doktrina ug mga Pakigsaad, 64–66). Basaha ang Doktrina ug mga Pakigsaad 72:8 uban sa mga bata, ug hangyoa sila sa pagpaminaw kon kinsa ang tawagon sa Ginoo nga moserbisyo isip bag-ong bishop sa Kirtland. Ngano nga ang Ginoo motawag og mga bishop? Ipakigbahin sa mga bata ang usa ka kasinatian sa dihang ikaw napanalanginan sa pagserbisyo sa bishop.

• Dapita ang mga bata sa paghimo og lista sa pipila ka butang nga ilang nakita nga gibuhat sa bishop sa pagtabang sa mga tawo diha sa ward. Hangyoa ang mga bata sa pagdrowing og mga litrato sa bishop nga naghimo sa butang nga ilang gihisgutan. Ihatag ang imong pagpamatuod nga ang inyong bishop gitawag sa Ginoo nga Iyang sulugoon. Ngano nga kita mapasalamaton nga ang Ginoo mitawag og bishop sa atong ward?

Doktrina ug mga Pakigsaad 73:3

Ang Ginoo misugo ni Joseph Smith sa pagpahiuli sa bililhon nga mga kamatuoran nga nawala gikan sa Biblia.

Isip kabahin sa iyang calling isip propeta, si Joseph Smith gisugo sa Ginoo sa paghimo og dinasig nga mga pagbag-o sa Biblia. Kini nga mga pagbag-o, nga gitawag sa Ginoo og “hubad” (Doktrina ug mga Pakigsaad 90:13), mipahiuli sa importante nga mga kamatuoran nga nawala o gikuha gikan sa Biblia sa milabayng mga siglo.

Posible nga mga Kalihokan

• Ipasabut nga sa dihang si Joseph Smith ug Sidney Rigdon mibalik gikan sa mubo nga misyon duol sa Kirtland, Ohio, ang Ginoo gusto nga sila mobalik sa pagtrabaho sa usa ka importante nga proyekto. Dapita ang mga bata sa pagbasa sa Doktrina ug mga Pakigsaad 73:3 sa pagpangita unsa kana nga proyekto. Aron matabangan ang mga bata nga makasabut unsa ang gusto sa Ginoo nga hubaron nila ni Joseph ug Sidney, basaha uban nila ang mga bahin sa gisulat sa Giya ngadto sa mga Kasulatan “Hubad ni Joseph Smith (HST).”

• Pagpasa og kopya sa Biblia, ug tuguti ang mga bata nga moabli niini ug motan-aw pila ka pahina ang anaa niini. Dapita ang mga bata sa paghunahuna nga sila gihangyo sa paghubad sa Biblia ngadto sa laing pinulongan. Unsa ang mga kahigayunan nga sila makahimo og mga sayop? Ipasabut nga kon ang mga tawo mihubad o mikopya sa Biblia sa wala pa ang panahon ni Joseph Smith, sila nakahimo og mga sayop, ug usahay ilang gikuha ang importante nga mga kamatuoran. Ang Ginoo misugo ni Propeta Joseph Smith sa paghimo og dinasig nga mga koreksyon. Ngano nga ang trabaho ni Joseph Smith bililhon kanato?

pagkat-on nga icon

Awhaga ang Pagkat-on diha sa Panimalay

Dapita ang mga bata sa pagpili og butang nga ilang buhaton tungod sa unsay ilang nakat-unan karon, sama sa pagpasalamat sa bishop sa iyang serbisyo o pagpangandam sa pagpanalipod sa ilang mga pagtuo pinaagi sa pagkat-on sa mga Artikulo sa Hugot nga Pagtuo.

Pagpalambo sa Atong Pagtudlo

Paggamit sa mga balatian [senses]. “Kadaghanan sa mga bata (ug mga hamtong) labing makakat-on kon maapil ang daghang mga balatian. Pangita og mga paagi sa pagtabang sa mga bata nga magamit ang ilang mga balatian sa pangtan-aw, pangdungog, ug panghikap samtang sila nagkat-on” (Pagtudlo Sumala sa Pamaagi sa Manluluwas, 25).

pahina sa kalihokan: ang bishop nagserbisyo sa mga miyemro sa ward