Dangpanan, ni Shaelynn Abel

Hulyo 5–11

Doktrina ug mga Pakigsaad 76

“Dako ang Ilang Ganti ug Walay Katapusan ang Ilang Himaya”

Samtang magtuon ka sa Doktrina ug mga Pakigsaad 76, palandunga unsa ang gusto sa Langitnong Amahan nga mahibaloan sa mga bata sa imong klase mahitungod Kaniya, sa Manluluwas, sa ilang kaugalingon, ug sa ilang mahangturong kapalaran.

Irekord ang Imong mga Impresyon

Dapita ang Pagpaambit

Ipakita sa mga bata ang mga litrato o mga pahina sa kalihokan gikan sa outline niining semanaha o sa nangaging mga outline. Tuguti sila nga mosulti nimo unsay ilang nakita niini nga mga litrato ug unsay ilang nahinumduman nga nakat-unan gikan kanila.

Itudlo ang Doktrina: Mas Gagmay nga mga Bata

Doktrina ug mga Pakigsaad 76:24

Kitang tanan mga anak sa Dios.

Si Presidente Dallin H. Oaks miingon nga kon kita motudlo “sa usa ka batan-on sa gamhanang ideya nga siya usa ka anak sa Dios,” kita naghatag kaniya sa “pagtahud sa kaugalingon ug pag-aghat sa paglihok batok sa mga problema sa kinabuhi” (“Powerful Ideas,” Ensign, Nob. 1995, 25).

Posible nga mga Kalihokan

• Aron matabangan ang mga bata nga makasabut sa ilang potensyal nga mahimong sama sa Dios, pangita og mga paagi sa pagpakita kanila nga ang masuso nga mga hayop motubo aron mahimong sama sa ilang mga ginikanan—tingali ang mga bata mahimong mopatukma og mga litrato sa mga hayop uban sa mga litrato sa mga masuso nga hayop. Ablihi ang mga kasulatan ngadto sa Doktrina ug mga Pakigsaad 76:24, ug sultihi ang mga bata nga kitang tanan “anak nga mga lalaki ug anak nga mga babaye sa Dios.” Ihatag ang imong pagpamatuod nga ang Dios mao ang atong Amahan ug nga kita motubo aron mahimong sama sa atong Langitnong mga Ginikanan.

• Kantaha pagdungan ang “Ako Anak sa Dios” (Songbook sa mga Bata, 2–3), ug dapita ang mga bata sa pagtudlo sa ilang kaugalingon kon sila mokanta sa “Ako.” Hangyoa sila sa pagkanta sa kanta pag-usab, pulihan ang “Ako” sa “ikaw” ug magtudlo ngadto sa laing tawo diha sa klase.

Doktrina ug mga Pakigsaad 76:40–42

Si Jesukristo mao ang Manluluwas sa kalibutan.

Ang pulong ebanghelyo nagpasabut nga maayong balita. Ang maayong balita nga gidala sa ebanghelyo mao nga si Jesukristo “mianhi sa kalibutan … sa paghugas niini gikan sa tanan nga dili matarung” (bersikulo 41).

Posible nga mga Kalihokan

• Sultihi ang mga bata mahitungod sa pipila ka maayong balita nga imong nadunggan karong bag-o. Hangyoa sila sa pagpakigbahin og maayong balita nga ilang nadunggan. Dayon ipakigbahin nila ang maayong balita sa ebanghelyo pinaagi sa pagbasa sa Doktrina ug mga Pakigsaad 76:41–42. Hangyoa ang mga bata kon sa unsa nga paagi nga kini nga maayong balita mopabati kanila. Ipakigbahin nila ang kalipay nga ikahatag niini nga maayong balita nganha kanimo.

• Pagpakita og hulagway ni Jesukristo. Pangutan-a ang mga bata kon sila nakahibalo unsa ang gibuhat ni Jesukristo alang kanato. Ipakita sa mga bata ang butang nga hugaw ug butang nga limpyo (sama sa usa ka panyo o palid sa papel), ug ipasabut nga ang sala sama sa hugaw sa atong mga espiritu, apan si Jesukristo miabut aron sa pagtabang nato nga mahimong limpyo pag-usab.

  

  Tuguti ang Gagmayng mga Bata, ni J Kirk Richards

Doktrina ug mga Pakigsaad 76:62

Ang Langitnong Amahan gusto nga ako mobalik sa pagpuyo uban Kaniya sa kahangturan.

Ang panan-awon nila ni Joseph Smith ug Sidney Rigdon sa celestial nga gingharian nagpadayag sa daghang mga panalangin nga giandam sa Dios alang sa Iyang mga anak, ingon man usab sa mga butang nga kinahanglan nga atong buhaton aron madawat kadto nga mga panalangin.

Posible nga mga Kalihokan

• Sultihi ang mga bata mahitungod sa tulo ka gingharian sa himaya nga nakita ni Joseph ug ni Sidney sa ilang panan-awon. (Mahimo nimo nga basahon ngadto sa mga bata kabahin o tanan sa “Kapitulo 26: Ang Tulo ka mga Gingharian sa Langit” [Mga Istorya sa Doktrina ug mga Pakigsaad, 97–103] o ipakita ang nagtakdo nga video sa ChurchofJesusChrist.org.) Pangutan-a ang mga bata unsa ang ilang nagustuhan sa panan-awon. Tutuki labi na ang paghulagway sa celestial nga gingharian, ug ipamatuod nga mao kini ang gusto sa Langitnong Amahan nga ang matag usa nato mahiadto.

• Basaha ngadto sa mga bata ang Doktrina ug mga Pakigsaad 76:62, ug dapita ang mga bata sa pagdrowing og mga litrato sa ilang kaugalingon uban sa Langitnong Amahan ug ni Jesukristo diha sa celestial nga gingharian.

Itudlo ang Doktrina: Mas Dagko nga mga Bata

Doktrina ug mga Pakigsaad 76:5, 41–42, 69

Si Jesukristo mao ang akong Manluluwas.

Tabangi ang mga bata nga makasabut nga ang mahimayaong mga panalangin nga gisaad sa Dios ngadto sa matinud-anon sa sunod nga kinabuhi posible lamang tungod sa Manluluwas nga si Jesukristo.

Posible nga mga Kalihokan

• Isulat diha sa pisara Unsa ang gibuhat ni Jesukristo alang kanako? Hangyoa ang matag bata sa pagbasa sa hilom sa bersikulo 5, mga bersikulo 41–42, o bersikulo 69 sa seksyon 76, mangita sa posible nga mga tubag sa pangutana diha sa pisara. Tuguti sila nga mopakigbahin sa ilang mga tubag (tan-awa usab sa “Mipadala sa Bugtong Anak,” Songbook sa mga Bata, 20–21). Unsaon nato sa pagpakita sa atong pagpasalamat sa unsay nahimo sa Manluluwas kanato?

• Isulat ang ikatulo nga artikulo sa hugot nga pagtuo diha sa pisara, magbutang og mga blangko puli sa importante nga mga pulong. Hatagi ang mga bata niining nawala nga mga pulong diha sa piraso sa papel, ug dapita sila sa pagbutang sa ilang mga pulong sa sakto nga mga dapit diha sa pisara. Unsa ang gitudlo niini nga artikulo sa pagtuo mahitungod ngano nga kita nagkinahanglan ni Jesukristo? (tan-awa usab sa video “Why We Need a Savior,” ChurchofJesusChrist.org).

Doktrina ug mga Pakigsaad 76:12, 15–19, 114–16

Ang pagtuon sa mga kasulatan makatabang nako nga “makasabut sa mga butang sa Dios.”

Sila si Joseph Smith ug Sidney Rigdon nakadawat sa Doktrina ug mga Pakigsaad 76 sa dihang sila namalandong sa mga kasulatan. Tabangi ang mga bata nga makakita kon sa unsa nga paagi nga ang pagtuon sa mga kasulatan makadapit og pagpadayag pinaagi sa Espiritu Santo.

Posible nga mga Kalihokan

• Pangutan-a ang mga bata kon nakahibalo ba sila unsa ang gibuhat nila ni Joseph Smith ug Sidney Rigdon sa dihang sila nakakita sa panan-awon sa Doktrina ug mga Pakigsaad 76. Dapita sila sa pagbasa sa mga bersikulo 15–19 aron mahibaloan. Ipakigbahin ang usa ka panahon sa dihang ikaw nakadawat og inspirasyon samtang nagbasa sa mga kasulatan, ug hangyoa ang mga bata sa paghisgot mahitungod sa espirituhanong mga pagbati nga ilang gibati sa dihang nagbasa sa mga kasulatan.

• Hangyoa ang mga bata sa pagpiyong sa ilang mga mata ug sulayan ang paghimo sa buluhaton, sama sa pagkolor og litrato o pag-abli sa mga kasulatan ngadto sa piho nga bersikulo. Unsa ang pipila ka butang nga lisud buhaton kon ang atong mga mata sirado sa espirituhanon nga paagi? Basaha pagdungan ang Doktrina ug mga Pakigsaad 76:12, 15–19, 114–16 sa pagsusi unsay angay natong buhaton aron ang atong mga mata maabli sa espirituhanong paagi.

Doktrina ug mga Pakigsaad 76:50–70

Ang Langitnong Amahan miandam og gingharian sa celestial nga himaya alang kanako.

Ang pagkahibalo mahitungod sa celestial nga himaya nga giandam sa Dios makadasig sa mga bata aron “makabuntog pinaagi sa hugot nga pagtuo” (bersikulo 53) sa mga pagsulay ug mga tintasyon nga ilang giatubang.

Posible nga mga Kalihokan

• Kon dunay mangutana kanato, “Ngano nga ako mosunod ni Jesukristo ug motuman sa Iyang mga sugo?” unsay atong isulti? Dapita ang mga bata sa pagpangita og mga tubag naa sa Doktrina ug mga Pakigsaad 76:50–70, nga naghulagway niadtong kinsa nakadawat og kinabuhing dayon sa celestial nga gingharian. Tuguti ang mga bata nga modrama sa pagtubag sa pangutana. Ihatag ang imong pagpamatuod sa importante nga mga panalangin nga giandam sa Langitnong Amahan kanato kon kita mosunod ni Jesukristo.

• Pagdrowing og dako nga litrato sa adlaw diha sa piraso nga papel, ug guntinga kini ngadto sa daghang mga piraso sa puzzle. Hatagi ang matag bata og usa ka piraso, nga adunay usa sa mosunod nga mga tudling sa kasulatan nga basahon: Doktrina ug mga Pakigsaad 76:51; 76:52; 76:53; 131:1–2. Hangyoa ang mga bata sa pagpangita diha sa ilang mga bersikulo og butang nga kinahanglan natong buhaton aron makadawat og kinabuhing dayon sa celestial nga gingharian (pipila ka bersikulo adunay labaw sa usa nga tubag), ug isulat kini sa ilang piraso sa papel. Samtang magtambayayong sa pagporma sa puzzle, ipadayag ang imong pagsalig kanila nga uban sa tabang sa Manluluwas, sila takus alang sa celestial nga gingharian.

Awhaga ang Pagkat-on diha sa Panimalay

Dapita ang mga bata sa paggamit sa pahina sa kalihokan niining semanaha sa pagtudlo sa ilang mga pamilya unsay ilang nakat-unan mahitungod sa panan-awon nga nakita nila ni Joseph Smith ug Sidney Rigdon.

Pagpalambo sa Atong Pagtudlo

Gamita ang mga kasulatan. Bisan kon ang mga bata nga imong gitudloan dili pa makamao nga mobasa, gamita ang mga kasulatan kanunay samtang ikaw magtudlo kanila. Ipakita nila nga ang mga kamatuoran nga imong gipakigbahin nagagikan sa mga kasulatan.