Kristo ug ang Datu nga Batan-ong Magmamando, ni Heinrich Hoffman

Hulyo 19–25

Doktrina ug mga Pakigsaad 81–83

Diin “Daghan ang Gihatag, Daghan ang Gikinahanglan”

Sa unsa nga paagi nga ang mga pagpadayag sa Doktrina ug mga Pakigsaad 81–83 makatabang sa mga bata nga imong gitudloan sa pagbuhat og maayo sa ilang pamilya ug mga higala?

Irekord ang Imong mga Impresyon

Dapita ang Pagpaambit

Dapita ang mga bata sa pagpakigbahin og butang nga ilang gihimo sa pagtabang sa usa ka tawo niini nga semana. Sa unsa nga paagi nga ang pagserbisyo sa uban makatabang nato nga mahimong sama sa atong Manluluwas?

Itudlo ang Doktrina: Mas Gagmay nga mga Bata

Doktrina ug mga Pakigsaad 81:3

Kinahanglan kong mag-ampo kanunay.

Sa dihang ang Ginoo mitawag ni Frederick G. Williams nga mahimong usa ka magtatambag ngadto ni Propeta Joseph Smith, Siya mitambag ni Frederick nga “magmatinud-anon … sa pag-ampo kanunay.”

Posible nga mga Kalihokan

• Basaha ngadto sa mga bata ang tambag sa Ginoo nga “magmatinud-anon … sa pag-ampo kanunay, sa dayag ug diha sa imong kasingkasing, diha sa kadaghanan ug diha sa kinaugalingon” (Doktrina ug mga Pakigsaad 81:3). Ipasabut unsa ang gipasabut sa pag-ampo diha sa atong mga kasingkasing, ug pagpakigbahin og personal nga ehemplo. Tabangi ang mga bata sa paghunahuna sa mga panahon sa dihang sila makaampo “diha sa kadaghanan ug sa kinaugalingon.”

• Tudloi ang mga bata unsaon sa pag-ampo. Hatagi og gibug-aton nga sila makapasalamat sa Langitnong Amahan sa ilang mga panalangin ug mangayo Kaniya unsay ilang kinahanglan. Usa ka kanta mahitungod sa pag-ampo, sama sa “Ako Nagpasalamat Kanimo, Mahal nga Amahan” (Songbook sa mga Bata, 9), makatabang sa mga bata nga makahibalo unsa ang isulti sa ilang mga pag-ampo. Hatagi ang matag bata og turno sa paghatag og mubo nga pag-ampo.

• Hangyoa ang mga bata sa paghunahuna sa mga butang nga ilang pasalamatan sa Langitnong Amahan o pangayoon Kaniya. Padrowinga sila og mga litrato niining mga butanga ug ipakigbahin kini sa klase.

Doktrina ug mga Pakigsaad 81:5; 82:19

Ako makaserbisyo niadtong naglibut kanako.

Ang Langitnong Amahan nakahibalo sa mga panginahanglan sa matag usa sa Iyang mga anak, ug Siya kanunay mogamit og laing tawo—sama sa mga bata nga imong gitudloan—sa pagtabang sa pagtubag niadto nga mga panginahanglan. Unsaon ninyo sa pagtabang ang mga bata nga makahibalo sa mga panginahanglan sa uban ug sa pagserbisyo kanila?

Posible nga mga Kalihokan

• Basaha ang Doktrina ug mga Pakgisaad 81:5 ngadto sa mga bata, ug tabangi sila nga makasabut sa mga pulong sama sa “tabang sa maluyahon” ug “ipataas ang mga kamot sa nawad-an og paglaum.” Tuguti sila a pagdrama og mga paagi nga atong mahimo unsa ang gisugo sa Ginoo niini nga bersikulo. Gamit og mga litrato o mga video sa pagsulti og yanong mga istorya ni Jesukristo nga nagserbsiyo sa uban (tan-awa sa Libro sa Hulagway sa Ebanghelyo, nu. 41, 42, 46, 47, 55; biblevideos.ChurchofJesusChrist.org). Unsaon nato sa pagsunod sa ehemplo sa Manluluwas sa pagtabang sa uban?

• Kantaha ang ikaupat nga bersikulo sa “Gibati Ko ang Gugma sa Akong Manluluwas” (Songbook sa mga Bata, 42–43) o laing kanta mahitungod sa pagserbisyo. Isulti ang usa ka panahon sa dihang ang usa ka tawo mitabang kanimo nga mobati sa gugma sa Manluluwas pinaagi sa pagserbisyo kanimo.

• Basaha ang Doktrina ug mga Pakigsaad 82:19 ngadto sa mga bata, maghatag og gibug-aton sa mga pulong “nagtinguha sa kaayohan sa iyang silingan.” Ipasabut nga kini nagpasabut sa paghimo sa mga butang nga makatabang sa atong mga silingan—lakip sa atong pamilya. Tabangi ang mga bata sa paghunahuna og mga paagi nga sila makaserbisyo og usa ka tawo niining semanaha.

  

  Ang Dios misugo nato sa pagserbisyo sa uban sa pagpakita og gugma alang Kaniya.

Doktrina ug mga Pakigsaad 82:10

Ang Dios misaad og mga panalangin kon ako mosunod Kaniya.

Samtang sila magtubo, ang mga bata maghunahuna ngano nga ang Dios mihatag og daghan kaayo nga mga sugo. Ikaw makatabang sa mga bata nga makasabut nga Siya mihatag nato og mga sugo aron sa pagpanalangin kanato.

Posible nga mga Kalihokan

• Tabangi ang mga bata sa paghunahuna sa mga sugo nga gihatag sa Dios kanato (tan-awa sa, sama pananglit, Exodo 20:4–17; Mateo 22:37–39; Doktrina ug mga Pakigsaad 89:5–17). Pagdrowing og mga litrato diha sa pisara aron sa pagtabang sa mga bata nga makasabut ug makahinumdom niini nga mga sugo. Paghatag og mga ehemplo kon sa unsa nga paagi nga ang mga sugo sa Dios makapanalangin ug makapanalipod kanato.

• Basaha ngadto sa mga bata, “Ako, ang Ginoo, mapugos sa pagtuman kon kamo mobuhat sa unsa nga Ako misulti” (Doktrina ug mga Pakigsaad 82:10). Hangyoa ang mga bata sa pagsubli niini nga mga pulong sa makadaghang higayon uban nimo, ug paghunahuna og mga paagi sa pagtabang nila nga makahinumdom niini, sama sa pagdapit nila sa pagpakpak sunod sa ritmo sa mga pulong. Ipamatuod nga kon kita mosunod sa mga sugo sa Dios, Siya motuman sa Iyang mga saad kanato.

Itudlo ang Doktrina: Mas Dagko nga mga Bata

Doktrina ug mga Pakigsaad 81:3

Ako makaampo sa “dayag ug diha sa [akong] kasingkasing.”

Sa unsang paagi nga makadasig ka sa mga bata nga moduol ngadto sa Ginoo “sa pag-ampo kanunay” kon sila anaa sa panginahanglan?

Posible nga mga Kalihokan

• Dapita ang usa ka tawo sa pagbasa sa Doktrina ug mga Pakigsaad 81:3, ug pangutan-a ang mga bata kon unsay gipasabut sa pag-ampo “diha sa [inyong] kasingkasing.” Ipakigbahin ang usa ka kasinatian sa dihang ikaw nag-ampo og kusog o sa imong kasingkasing ug ang Ginoo mitabang kanimo. Dapita usab ang mga bata sa pagpakigbahin sa ilang kaugalingong mga kasinatian. Sa unsa nga paagi nga ang pag-ampo makapaduol kanato ngadto sa Langitnong Amahan?

• Basaha o kantaha uban sa mga bata ang usa ka himno mahitungod sa pag-ampo, sama sa “Ikaw Naghunahuna Ba sa Pag-ampo?” o “Hilum nga Pag-ampo” (Mga Himno, nu. 82, 86). Dapita ang mga bata sa pagpakigbahin og mga pulong nga gikan sa himno nga makatabang nila nga makasabut og butang mahitungod sa pag-ampo. Hatagi sila og panahon sa pagpamalandong unsa ang ilang mahimo sa pagpalambo sa ilang mga pag-ampo ug dayon mosulat sa ilang mga ideya.

Doktrina ug mga Pakigsaad 81:5

Ang Dios gusto nga ako moserbisyo ug molig-on niadtong nanginahanglan.

Tabangi ang mga bata nga makasabut nga adunay daghang mga paagi nga sila makaserbisyo sa ilang pamilya, mga higala, ug mga silingan matag adlaw.

Posible nga mga Kalihokan

• Pagdrowing og mga litrato sa mga kamot ug mga tuhod diha sa pisara. Dapita ang mga bata sa pagbasa sa Doktrina ug mga Pakigsaad 81:5 aron makat-on unsa ang gisulti sa Ginoo mahitungod niini nga mga bahin sa lawas. Tan-awa ang video “Pass It On” (ChurchofJesusChrist.org), o ipakigbahin sa unsa nga paagi nga ikaw ug mga bata nakakita og mga tawo nga nagserbisyo sa usag usa. Sa unsa nga paagi nga kita mas makahibalo sa mga tawo nga nanginahanglan diha sa atong palibut? Dapita ang mga bata sa pagserbisyo og bisan usa ka tawo niining semanaha. Alang sa mga ideya mahitungod sa mga paagi sa pagserbisyo sa uban, kantaha ang usa ka awit mahitungod sa pagserbisyo, sama sa “Nakabuhat Ba Ako og Maayo Karon?” (Mga Himno, nu. 135).

• Dapita ang mga bata sa pagpuli-puli sa pagpahimutang sa mga domino (o susama nga mga butang) samtang maghingalan og mga paagi nga sila makaserbisyo sa uban. Hangyoa ang usa ka bata sa pagtumba og usa ka domino ug tan-awon kon sa unsa nga paagi kini makaapekto sa uban. Sa unsa nga paagi nga ang atong pagserbisyo adunay susama nga epekto sa mga tawo libut kanato? (Tan-awa usab ang video “Dominoes,” ChurchofJesusChrist.org.) Isulti kon sa unsa nga paagi nga ang mahitungod sa usa ka mahigugmaong pagserbisyo sa usa ka tawo nakaawhag nimo sa pagserbisyo usab sa laing tawo.

Doktrina ug mga Pakigsaad 82:8–10

Ang Dios misaad og mga panalangin kon ako mosunod Kaniya.

Samtang ang mga bata makapalambo og pagsalig sa mga saad sa Dios, ang ilang pagkaandam sa pagsunod sa Iyang mga sugo motubo.

Posible nga mga Kalihokan

• Dapita ang mga bata sa paghunahuna nga sila adunay higala nga naghunahuna nga ang Dios mihatag og daghan kaayo nga mga sugo. Hangyoa sila sa pagsiksik sa Doktrina ug mga Pakigsaad 82:8–10 sa butang nga makatabang sa ilang higala nga makasabut ngano nga ang Dios mihatag og mga sugo. Ipakigbahin kon sa unsa nga paagi nga ang mga sugo sa Dios nakapanalangin kanimo, ug dapita ang mga bata sa pagpakigbahin usab sa ilang hunahuna.

• Aron matabangan ang mga bata nga makasabut sa mga saad sa Langitnong Amahan kanato, bahina ang klase ngadto sa tulo ka grupo, ug hatagi ang matag grupo og usa sa mosunod nga mga kasulatan aron basahon: Doktrina ug mga Pakigsaad 1:37–38; 82:10; 130:20–21. Dapita sila sa pagpakigbahin unsa ang ilang nakat-unan mahitungod sa mga saad sa Langitnong Amahan. Sa unsa nga paagi nga ang atong pagkamasulundon makaapekto sa mga panalangin nga atong madawat? Tabangi ang mga bata sa paghunahuna sa mga ehemplo gikan sa ilang mga kinabuhi o gikan sa mga kasulatan sa dihang ang pagkamasulundon nagdala og mga panalangin gikan sa Dios.

• Ipakigbahin ang personal nga kasinatian nga nagpamatuod sa baruganan nga gitudlo sa Doktrina ug mga Pakigsaad 82:8–10. Sa unsa nga paagi nga ikaw misalig sa Ginoo ug sa Iyang mga saad?

Awhaga ang Pagkat-on diha sa Panimalay

Dapita ang mga bata sa paghunahuna kon sa unsa nga paagi sila gusto nga moserbisyo sa uban diha sa ilang pamilya niining semanaha. Atol sa leksyon sa sunod semana, tuguti sila sa pagpakigbahin unsa ang ilang nahimo.

Pagpalambo sa Atong Pagtudlo

Tabangi ang mga bata nga mahimong mas maayo nga mga tigkat-on. Ang pagtudlo nagpasabut nga mas labaw pa kay sa pagsulti sa kamatuoran. Kini nagpasabut sa pagtabang sa uban nga makapalambo og espirituhanong pagpaningkamot sa kaugalingon. Imbis sa yanong pagsulti sa mga bata unsaon nila nga makaserbisyo sa uban, sama pananglit, awhaga sila sa paghunahuna sa ilang kaugalingong mga ideya.