Gimahal sa Magbalantay, ni Simon Dewey

Hunyo 28–Hulyo 4

Doktrina ug mga Pakigsaad 71–75

“Walay Hinagiban Nga Gihimo batok Kaninyo Nga Mouswag”

Si Elder Quentin L. Cook nagtudlo, “Ang impluwensya sa Espiritu Santo kasagaran nag-uban sa indibidwal nga pagtuon sa kasulatan ug pag-ampo diha sa panimalay.” (“Lig-on ug Malungtarong Pagkakabig ngadto sa Langitnong Amahan ug kang Ginoong Jesukristo,” Liahona, Nob. 2018, 10).

Irekord ang Imong mga Impresyon

Sukad sa bata pa siya, nag-atubang si Joseph Smith og mga kritiko—gani mga kaaway—sa pagsulay niya sa paghimo sa buhat sa Dios. Apan makapaguol gayud siguro kadto sa ulahing bahin sa 1831 sa dihang si Ezra Booth nagsugod sa pagsaway sa Simbahan, tungod kay niini nga sitwasyon ang kritiko usa ka kanhi tumutuo. Nakita ni Ezra ang paggamit ni Joseph sa gahum sa Dios aron ayuhon ang usa ka babaye. Gidapit siya nga mouban ni Joseph sa unang pag-survey sa yuta sa Zion didto sa Missouri. Apan sukad niana nawad-an siya og pagtuo ug, sa pagsulay nga dauton ang Propeta, mimantala og sunod-sunod nga mga sulat sa usa ka pamantalaan sa Ohio. Ug ang iyang mga paningkamot daw misalir: “dili mahigalaon nga mga pagbati … milambo batok sa Simbahan” diha sa dapit (Doktrina ug mga Pakigsaad 71, ulohan sa seksyon). Unsay angay nga buhaton sa mga tumutuo sa sitwasyon nga sama niana? Samtang walay usa ka husto nga tubag alang sa matag sitwasyon, morag kasagaran—lakip na niining sitwasyon niadtong 1831—kabahin sa tubag sa Ginoo mao ang pagpanalipod sa kamatuoran ug pagkorihir sa mga sayop pinaagi sa “pagpahayag sa ebanghelyo” (bersikulo 1). Oo, ang buhat sa Ginoo kanunay nga adunay mga kritiko, apan sa katapusan, “walay hinagiban nga gihimo batok [niini] nga mouswag” (bersikulo 9).

Mga Ideya alang sa Personal nga Pagtuon sa Kasulatan

Doktrina ug mga Pakigsaad 71

Ang Ginoo molibug sa Iyang mga kritiko sa kaugalingon Niyang panahon.

Mahimong mabalaka kita kon makadungog kita sa mga tawo nga mosaway o mobiay-biay sa Simbahan o sa mga lider niini, ilabi na kon mahadlok kita nga ang mga tawo nga atong nailhan ug gihigugma maimpluwensyahan niana nga pagsaway. Sa diha nga ang usa ka susama nga butang nahitabo didto sa Ohio niadtong 1831 (tan-awa sa ulohan nga seksyon sa Doktrina ug mga Pakigsaad 71), ang mensahe sa Ginoo ngadto nila ni Joseph Smith ug Sidney Rigdon mao ang bahin sa hugot nga pagtuo, dili ang kahadlok. Samtang nagtuon ka sa Doktrina ug mga Pakigsaad 71, unsay imong nakit-an nga makapaugmad sa imong pagtuo diha sa Ginoo ug sa Iyang buhat? Unsay nakapatandog nimo mahitungod sa instruksyon nga gihatag sa Ginoo sa Iyang mga sulugoon niini nga sitwasyon?

Tan-awa usab sa Robert D. Hales, “Kristohanong Kaisug: Ang Bugti sa Pagkadisipulo,” Liahona, Nob. 2008, 72–75; Jörg Klebingat, “Pagpanalipod sa Tinuohan,” Liahona, Sept. 2017, 49–53.

Doktrina ug mga Pakigsaad 72

Ang mga bishop mao ang mga tinugyanan sa espiritwal ug temporal nga mga kalihokan sa gingharian sa Ginoo.

Sa dihang si Newel K. Whitney gitawag nga moserbisyo isip ikaduhang bishop sa Simbahan, ang iyang mga katungdanan medyo lahi og gamay sa mga bishop karon. Pananglitan, si Bishop Whitney midumala sa pagpahinungod sa kabtangan ug sa pagtugot nga mopuyo sa Missouri, sa yuta sa Zion. Apan samtang magbasa ka mahitungod sa iyang calling ug mga katungdanan diha sa Doktrina ug mga Pakigsaad 72, mahimong mabantayan nimo ang pipila ka mga koneksyon sa unsay gibuhat sa mga bishop karon—bisan sa intensyon lang, dili sa mga pihong butang, bahin sa ilang mga katungdanan. Pananglitan, sa unsang mga paagi nga ikaw “mohatag og husay” ngadto sa imong bishop? (bersikulo 5). Sa unsang paagi nga ang imong bishop “[n]agbantay sa balay tipiganan sa Ginoo” ug nagdumala sa mga pagpahinungod sa mga miyembro sa ward? (tan-awa sa mga bersikulo 10, 12). Sa unsang paagi nga ang bishop nakatabang kanimo?

Tan-awa usab sa Giya ngadto sa mga Kasulatan, “Obispo,” scriptures.ChurchofJesusChrist.org.

Si Newel K. Whitney midumala sa balay tipiganan sa bishop.

Doktrina ug mga Pakigsaad 73

Makapangita ko og mga oportunidad sa pagpaambit sa ebanghelyo.

Human nakabalik sila si Joseph Smith ug Sidney Rigdon gikan sa ilang mubo nga misyon sa pagsangyaw aron ayuhon ang pipila ka kadaut nga gihimo ni Ezra Booth (tan-awa sa Doktrina ug mga Pakigsaad 71), gisultihan sila sa Ginoo nga mobalik sa buhat sa paghubad sa Biblia (tan-awa sa Giya ngadto sa mga Kasulatan, “Hubad ni Joseph Smith”). Apan gusto usab Niya nga magpadayon sila sa pagsangyaw sa ebanghelyo. Samtang magtuon ka sa Doktrina ug mga Pakigsaad 73, ikonsiderar kon unsaon nimo paghimo sa pagsangyaw sa ebanghelyo nga usa ka nagpadayon, “mahimo [practicable]” (bersikulo 4)—o reyalistiko—nga bahin sa imong kinabuhi apil sa imong uban pang mga responsibilidad.

Doktrina ug mga Pakigsaad 75:1–12

Ang Ginoo nagpanalangin niadtong kinsa matinud-anong misangyaw sa Iyang ebanghelyo.

Nagtubag sa mando nga “panglakaw kamo ngadto sa tibuok kalibutan” aron isangyaw ang ebanghelyo (Doktrina ug mga Pakigsaad 68:8), daghang matinud-anon nga mga elder ang nagtinguha og dugang nga impormasyon kon sa unsang paagi gusto sa Ginoo nga ilang matuman kining mando. Unsa nga mga pulong o mga hugpong sa mga pulong ang imong nakit-an diha sa Doktrina ug mga Pakigsaad 75:1–12 nga makatabang aron imong masabtan kon unsaon pagsangyaw ang ebanghelyo sa epektibong paagi? Unsa nga mga panalangin ang gisaad sa Ginoo niadtong matinud-anong mga misyonaryo? Ikonsiderar kon sa unsang paagi nga kining mga instruksyon ug mga panalangin magamit nganha nimo samtang mopaambit ka sa ebanghelyo.

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 71.Unsa ang gisugo nga ipabuhat nila ni Joseph Smith ug Sidney Rigdon sa dihang ang uban nanaway sa Simbahan ug sa mga lider niini? Sa unsang paagi kita “moandam sa agianan” aron madawat sa mga tawo ang mga pagpadayag sa Dios? (Doktrina ug mga Pakigsaad 71:4).

Doktrina ug mga Pakigsaad 72:2.Sa unsang paagi nga ang mga bishop nakapanalangin sa atong pamilya? Unsa ang gipabuhat sa atong bishop kanato, ug unsaon nato sa pagpaluyo kaniya? Tingali ang imong pamilya makahimo og usa ka kard nga magpasalamat sa inyong bishop alang sa iyang serbisyo.

Doktrina ug mga Pakigsaad 73:3–4.Ang imo bang pamilya makabenepisyo tungod sa pagkat-on mahitungod sa Hubad ni Joseph Smith sa Biblia? (tan-awa sa Ang Giya ngadto sa mga Kasulatan, “Hubad ni Joseph Smith”). Mahimo nimong masusi ang pipila ka mga tudling nga giusab diha sa Hubad ni Joseph Smith ug hisguti ang bililhong mga kamatuoran nga gipadayag sa Ginoo pinaagi sa Propeta. Alang sa pipila ka mga ehemplo, tan-awa ang Hubad ni Joseph Smith sa Genesis 14:25–40 ug Genesis 50:24–38 diha sa Giya ngadto sa mga Kasulatan.

Doktrina ug mga Pakigsaad 74:7.Unsa ang ikatudlo kanato niini nga bersikulo mahitungod ni Jesukristo ug sa gagmayng mga bata?

Doktrina ug mga Pakigsaad 75:3–5, 13, 16.Makatabang ka nga masabtan sa imong pamilya kon sa unsang paagi gusto sa Ginoo nga moserbisyo kita Kaniya pinaagi sa paghisgot bahin sa kalainan tali sa “magtinapulan” ug “maghago uban sa [atong] gahum.” Siguro mahimo kang mopili og pipila ka mga trabahuon sa balay ug dapita ang mga sakop sa pamilya sa pagpakita nga nagbuhat niadtong mga trabahuon sa tinapulan nga paagi ug dayon pinaagi sa tibuok nilang gahum. Unsaon nato pagserbisyo sa Ginoo sa tibuok natong gahum? Sumala sa Doktrina ug mga Pakigsaad 75:3–5, 13, 16, unsa may Iyang gisaad sa Iyang matinud-anong mga sulugoon?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Magpadayon Tang Tanan,” Mga Himno, nu. 150.

Pagpalambo sa Personal nga Pagtuon

Pangita sa dinasig nga mga pulong. Samtang magbasa ka, ang Espiritu mahimong modala sa pihong mga pulong o mga hugpong sa mga pulong sa imong atensyon. Ikonsiderar ang pagtimaan sa mga pulong o mga hugpong sa mga pulong gikan sa Doktrina ug mga Pakigsaad 71–75 nga nakapadasig nimo.

Hulagway sa batan-ong lalaki uban sa usa ka lider sa pagkapari pinaagi ni D. Keith Larson