“Hulyo 5–11. Doktrina ug mga Pakigsaad 76: ‘Dako ang Ilang Ganti ug Walay Katapusan ang Ilang Himaya,’” Dali, Sunod Kanako—Alang sa mga Indibidwal ug mga Pamilya: Doktrina ug mga Pakigsaad 2021 (2020)
“Hulyo 5–11. Doktrina ug mga Pakigsaad 76,” Dali, Sunod Kanako—Alang sa mga Indibidwal ug mga Pamilya: 2021
Dangpanan, ni Shaelynn Abel
Hulyo 5–11
Doktrina ug mga Pakigsaad 76
“Dako ang Ilang Ganti ug Walay Katapusan ang Ilang Himaya”
Diha sa seksyon 76, gipahayag sa Ginoo kon unsa kadako ang Iyang gusto nga mopadayag sa kamatuoran ngari nato (tan-awa sa mga bersikulo 7–10). Basaha ang mga kasulatan nga adunay hugot nga pagtuo nga Siya makahimo ug mopadayag nganha nimo “sa mga butang sa Dios” (bersikulo 12) nga kinahanglan nimong masayran. Dayon irekord ang mga ideya nga imong madawat “samtang [ikaw] diha pa ubos sa gahum sa Espiritu” (mga bersikulo 28, 80, 113).
Irekord ang Imong mga Impresyon
“Unsa ang mahitabo kanako human ako mamatay?” Hapit tanang relihiyon sa kalibutan motubag niining pangutana sa pipila ka paagi o sa lain. Sulod sa mga siglo, daghang mga tradisyong Kristiyano, nga nagsalig sa mga pagtulun-an sa Biblia, nagtudlo bahin sa langit ug impyerno, bahin sa paraiso alang sa mga matarung ug pag-antus alang sa mga dautan. Apan ang tibuok tawhanong pamilya pagabahinon ba gayud sa ingon ka higpit nga paagi ngadto sa maayo ug sa dili maayo? Ug unsa man gayud ang tinuod nga kahulugan sa langit? Niadtong Pebrero 1832, sila si Joseph Smith ug Sidney Rigdon naghunahuna kon wala na bay lain pa nga angayang masayran bahin sa hilisgutan (tan-awa sa Doktrina ug mga Pakigsaad 76, ulohan sa seksyon).
Sigurado gayud nga aduna. Samtang namalandong niining mga butanga, ang Ginoo “mihikap sa mga mata sa [ilang] mga pagsabut ug sila nabuksan” (bersikulo 19). Sila si Joseph ug Sidney nakadawat og pagpadayag nga ingon ka makapahingangha, ingon ka malukpanon, ingon ka makapadan-ag, nga ang mga Santos yanong mitawag niini og “ang Panan-awon.” Giablihan niini ang mga bintana sa langit ug mihatag sa mga anak sa Dios og makapalambo sa panabut nga panglantaw bahin sa kahangturan. Ang panan-awon mipadayag nga ang langit mas halangdon ug mas halapad ug mas inklusibo kay sa gituohan kaniadto sa mga tawo. Ang Dios mas maloloy-on ug makiangayon kay sa atong masabtan. Ug ang mga anak sa Dios adunay mahangturong padulngan nga mas mahimayaon kay sa atong mahunahunaan.
Tan-awa sa Mga Santos, 1:167–71.
Mga Ideya alang sa Personal nga Pagtuon sa Kasulatan
Ang kaluwasan moabut pinaagi ni Jesukristo, ang Anak sa Dios.
Sa dihang gibasa ni Wilford Woodruff ang panan-awon nga gihulagway diha sa seksyon 76, miingon siya, “Gibati ko ang labaw nga paghigugma sa Ginoo sukad masukad sa akong kinabuhi” (tan-awa sa “Mga Tingog sa Pagpahiuli” sa katapusan niining outline). Siguro ikaw adunay susama nga mga pagbati samtang nagbasa ka niining pagpadayag. Kay walay usa sa mahimayaong mga panalangin nga gihulagway diha sa seksyon 76 ang mahimong posible kon wala ang Manluluwas. Siguro mahimo nimong matino ang matag bersikulo diha sa seksyon 76 nga naghisgot ni Ginoong Jesukristo. Unsa ang gitudlo niining mga bersikulo kanimo mahitungod Kaniya ug sa Iyang tahas diha sa plano sa Dios? Sa unsang paagi kini makaimpluwensya sa imong pagbati mahitungod Kaniya? Samtang magbasa ug mamalandong ka, mahimo kang makadawat og mga impresyon kon sa unsang paagi ka “[makadawat] sa pagpamatuod ni Jesus” ug mahimong mas “maisug” diha niini (mga bersikulo 51, 79).
Doktrina ug mga Pakigsaad 76:39–44, 50–112
Nagtinguha ang Dios sa pagluwas sa “tanan nga mga binuhat sa iyang mga kamot.”
Ang ubang mga tawo, lakip na ang pipila sa nag-unang mga miyembro sa Simbahan, misupak sa panan-awon diha sa seksyon 76 tungod kay nagtudlo kini nga hapit tanan maluwas ug makadawat og ang-ang sa himaya. Ang ilang mga pagsupak mahimong moabut, isip kabahin sa sayop nga pagsabut mahitungod sa Dios ug sa Iyang relasyon ngari nato. Samtang nagbasa ka niining pagpadayag, unsay imong nakat-unan mahitungod sa kinaiya sa Dios ug sa Iyang plano alang sa Iyang mga anak?
Ikonsiderar ang kalainan tali sa pagkaluwas (gikan sa pisikal ug espirituhanong kamatayon; tan-awa sa mga bersikulo 39, 43–44) ug pagkahimaya (pagpuyo uban sa Dios ug pagkahimong sama Kaniya; tan-awa sa mga bersikulo 50–70).
Tan-awa usab sa Juan 3:16–17; Doktrina ug mga Pakigsaad 132:20–25.
Doktrina ug mga Pakigsaad 76:50–70, 92–95
Gusto sa Langitnong Amahan nga makadawat ko og kinabuhing dayon didto sa celestial nga gingharian.
Ikaw ba nakahunahuna—o nabalaka—kon mahimo ka bang angayan o dili alang sa celestial nga gingharian? Kon magbasa ka sa deskripsyon niadtong makadawat niining himaya (tan-awa sa mga bersikulo 50–70, 92–95), imbis nga magtan-aw lamang alang sa lista sa mga butang nga kinahanglan gayud nimong buhaton, tan-awa kon unsay nahimo sa Dios—ug ginahimo—aron matabangan ka nga mahisama Kaniya. Ang pagbasa ba sa panan-awon niining paagiha makaapekto sa imong pagbati mahitungod sa imong personal nga mga paningkamot?
Mahimo usab nga maghunahuna ka mahitungod sa dakong panalangin nga masayud niining mga detalye mahitungod sa celestial nga gingharian. Sa unsang paagi nga kining panan-awon bahin sa celestial nga himaya makaapekto sa imong panglantaw ug sa imong inadlaw nga pagpakabuhi?
Tan-awa usab sa Moises 1:39; Joy D. Jones, “Bili nga dili Masukod,” Liahona, Nob. 2017, 13–15; J. Devn Cornish, “Igo Ba Ang Akong Kamaayo? Makasulod Ba Ko Didto?” Liahona, Nob. 2016, 32–34.
Nakita ni Joseph Smith ang panan-awon bahin sa mga ang-ang sa himaya niini nga kwarto.
Mga Ideya alang sa Pamilya nga Pagtuon sa Kasulatan ug Family Home Evening
-
Doktrina ug mga Pakigsaad 76:22–24, 50–52, 78–79, 81–82.Unsa ang atong makat-unan gikan niining mga bersikulo mahitungod sa kaimportante sa atong mga pagpamatuod? Unsa ang tahas sa atong mga pagpamatuod diha sa atong mahangturong padulngan? Siguro makatabang nga mangita sa mga kahulugan sa maisug sa paghisgot kon unsaon nga mahimong “maisug diha sa pagpamatuod ni Jesus” (bersikulo 79). Mahimo kamong mokanta sa “Magmaisugon Ko,” (Songbook sa mga Bata, 85).
-
Doktrina ug mga Pakigsaad 76:24.Ang imong pamilya mahimong makabantay og mga koneksyon tali sa mga kamatuoran diha sa seksyon 76 ug niadtong gitudlo diha sa “Ako Anak sa Dios” (Songbook sa mga Bata, 2–3); usa niining mga kamatuoran makit-an diha sa Doktrina ug mga Pakigsaad 76:24. Sa unsang paagi nga ang kalibutan lahi kon ang tanan nakasabut nga kitang tanan mga anak sa Dios? Sa unsang paagi nga kining kamatuoran makaapekto sa paagi sa atong pagtratar sa uban? Siguro ang pagtan-aw sa mga hulagway sa nagkadaiyang mga anak nga lalaki ug mga anak nga babaye sa Dios niini nga yuta makatabang sa imong pamilya sa pagpamalandong niining pangutana.
Ikonsiderar ang pagkanta og dungan sa “Ako Anak sa Dios” ug pagpangita sa ubang mga koneksyon ngadto sa mga baruganan diha sa seksyon 76 (pananglit, tan-awa sa mga bersikulo 12, 62, 96).
-
Doktrina ug mga Pakigsaad 76:40–41.Kon atong i-summarize ang “maayo nga mga balita” (bersikulo 40), niining mga bersikulo sa mubo nga ulohan sa mantalaan o tweet, unsa may atong isulti? Unsa ang ubang maayo nga mga balita nga atong makit-an diha sa seksyon 76?
-
Doktrina ug mga Pakigsaad 76:50–70.Unsaon nimo pagtabang ang imong pamilya sa pagpaabut ug pagpangandam alang sa kinabuhing dayon diha sa celestial nga gingharian? Mahimo kamong magtinabangay sa pagpangita og mga hulagway, mga kasulatan, ug propetikanhong mga pagtulun-an nga mag-uban sa mga hugpong sa mga pulong diha sa Doktrina ug mga Pakigsaad 76:50–70. Mahimo ninyong makita kining mga butang diha sa magasin sa Simbahan, sa ChurchofJesusChrist.org, o sa mga footnote sa mga kasulatan. Dayon mapundok ninyo kining mga hulagway, mga kasulatan, ug mga pagtulun-an diha sa usa ka poster nga makapahinumdom sa imong pamilya bahin sa inyong mahangturong mga tumong.
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Gisugyot nga awit: “Buhi ang Akong Manunubos,” Mga Himno, nu. 79.
Mga Tingog sa Pagpahiuli: Mga Pagpamatuod bahin “sa Panan-awon”
Wilford Woodruff
Si Wilford Woodruff mipasakop sa Simbahan niadtong Disyembre 1833, hapit duha ka tuig human nadawat nila ni Joseph Smith ug Sidney Rigdon ang panan-awon nga narekord diha sa Doktrina ug mga Pakigsaad 76. Nagpuyo siya didto sa New York nianang higayuna ug nakahibalo mahitungod “sa Panan-awon” gikan sa mga misyonaryo nga nagserbisyo sa dapit. Mga katuigan human niana namulong siya bahin sa iyang mga impresyon niining pagpadayag:
“Gitudloan ako gikan sa akong pagkabata nga adunay usa ka Langit ug usa ka Impyerno, ug gisultihan nga ang dautan tanan adunay usa ka silot ug ang matarung usa ka himaya. …
“… Sa dihang akong gibasa ang panan-awon … , kini naglamdag sa akong salabutan ug mihatag kanako og dako kaayong hingpit nga kalipay, kini nagpakita kanako nga ang Dios kinsa mipadayag niana nga baruganan ngadto sa tawo maalamon, makiangayon ug matinuoron, naghupot sa labing maayo nga mga hiyas ug maayong panghunahuna ug kahibalo, gibati ko nga Siya makanunayon uban ang gugma, kalooy, hustisya ug paghukom, ug gibati ko ang labaw nga paghigugma sa Ginoo sukad masukad sa akong kinabuhi.”1
“Ang ‘Panan-awon’ [mao] ang usa ka pagpadayag nga naghatag og dugang kahayag, dugang kamatuoran ug dugang baruganan kaysa bisan unsa nga pagpadayag nga anaa sa bisan unsa nga basahon nga atong nabasa. Nakapasayon kini sa atong pagsabut sa atong kahimtang karon, diin kita gikan, nganong ania kita dinhi, ug asa kita paingon. Bisan kinsa nga tawo mahimong mahibalo pinaagi niana nga pagpadayag kon unsa unya ang iyang dangatan ug kahimtang.”2
“Sa wala pa ko makakita ni Joseph miingon ko nga wala koy labut kon unsa siya katigulang, o unsa siya kabata; wala koy labut kon unsay iyang panagway—kon ang iyang buhok taas ba o mubo; ang tawo nga nakadawat ug nagtudlo nianang pagpadayag usa ka propeta sa Dios. Nasayud ko niini sa akong kaugalingon.”3
Phebe Crosby Peck
Sa dihang nakadungog si Phebe Peck kang Joseph ug Sidney nga nagtudlo bahin “sa Panan-awon,” nagpuyo siya didto sa Missouri ug nag-atiman og lima ka mga anak isip nag-inusarang inahan. Ang panan-awon nakapatandog ug nakapadasig gayud kaniya nga siya misulat sa mosunod aron ipaambit kon unsay iyang nakat-unan ngadto sa iyang kaparyentihan:
“Ang Ginoo nagpadayag sa mga misteryo sa langitnong Gingharian ngadto sa iyang mga Anak. … Sila si Joseph Smith ug Sidney Rigdon mibisita kanamo sa miaging tingpamulak, ug aduna kami daghang malipayong mga panagpundok samtang dinhi pa sila, ug daghang mga misteryo ang gibuksan sa among panan-aw, nga nakahatag kanako og dakong kahupayan. Among nakita ang pagpakig-angay sa Dios sa pag-andam og mga mansyon sa kalinaw alang sa iyang mga anak. Ug kadtong dili modawat sa kahingpitan sa ebanghelyo ug dili mobarug isip maisugong mga sundalo diha sa kawsa ni Kristo dili makapuyo sa presensya sa Amahan ug sa Anak. Apan adunay dapit nga giandam alang sa tanan nga dili modawat, apan usa kini ka dapit nga mas ubos ang himaya kay sa pagpuyo diha sa Celestial nga gingharian. Dili na ko mosulay sa pagsulti og dugang pa kalabut niining mga butanga kay gimantala na kini karon ug gipakaylap na sa kalibutan. Ug kamo tingali adunay oportunidad sa pagbasa niini sa inyong kaugalingon, ug kon mabasa ninyo, nanghinaut ko nga basahon ninyo uban sa mabinantayon ug mainampuon nga kasingkasing, kay kining mga butanga angayan sa inyong pagtagad. Ug nagtinguha ko nga inyo kining basahon ug tun-an, kay mao kini ang makahatag kanato og kalipay niini nga kalibutan ug sa kalibutan nga moabut.”4
Himaya pinaagi sa mga Ang-ang, ni Annie Henrie Nader