Si Kristo ug ang Adunahan nga Batan-ong Magmamando, ni Heinrich Hoffman

Hulyo 19–25

Doktrina ug mga Pakigsaad 81–83

Diin “Daghan Ang Gihatag Daghan Ang Gikinahanglan”

Samtang magtuon ka sa Doktrina ug mga Pakigsaad 81–83, hinumdumi ang mga baruganan nga makatabang nimo nga makabuhat og maayo sa imong pamilya, sa imong mga higala, ug sa uban.

Irekord ang Imong mga Impresyon

Niadtong Marso 1832, gitawag sa Ginoo si Jesse Gause nga mahimong magtatambag ngadto ni Joseph Smith sa Kapangulohan sa Halangdon nga Pagkapari (gitawag karon og Unang Kapangulohan). Ang Doktrina ug mga Pakigsaad 81 usa ka pagpadayag ngadto ni Brother Gause, nagmando kaniya sa iyang bag-ong calling ug misaad kaniya og mga panalangin tungod sa matinud-anong pagserbisyo. Apan wala moserbisyo si Jesse Gause sa matinud-anong paagi. Mao nga gitawag si Frederick G. Williams nga mohulip kaniya, ug ang ngalan ni Brother Gause gihulipan sa ngalan ni Brother Williams diha sa pagpadayag.

Morag gamay ra kana nga detalye, apan nagpasabut og mahinungdanong kamatuoran: Kadaghanan sa mga pagpadayag diha sa Doktrina ug mga Pakigsaad gipamulong ngadto sa piho nga mga tawo, apan kanunay kitang makakita og mga paagi sa paggamit niini sa atong kaugalingon (tan-awa sa 1 Nephi 19:23). Ang tambag sa Ginoo ngadto ni Frederick G. Williams nga “lig-una ang mga tuhod nga mahuyang” makagiya sa atong hunahuna ngadto sa mga tawo nga siguro atong mapalig-on (Doktrina ug mga Pakigsaad 81:5). Ang tambag sa Ginoo alang sa mga sakop sa Nagkahiusang Kapunongan [United Firm] nga “bugkosa ninyo ang inyong kaugalingon pinaagi niini nga pakigsaad” aron matubag ang temporal nga mga panginahanglan sa Simbahan makagiya sa atong hunahuna ngadto sa atong kaugalingong mga pakigsaad. Ug ang saad sa Ginoo nga siya “mapugos sa pagtuman kon kamo mobuhat sa unsa nga Ako misulti” makapahinumdom kanato sa Iyang mga saad ngari kanato kon kita motuman (Doktrina ug mga Pakigsaad 82:10, 15). Mahitabo gayud kana, kay ang Ginoo namahayag usab, “Unsa ang akong isulti ngadto sa usa Ako mosulti ngadto sa tanan” (bersikulo 5).

 

Mga Ideya alang sa Personal nga Pagtuon sa Kasulatan

Doktrina ug mga Pakigsaad 81

Mahimo akong magmatinud-anon sa pagbuhat kon unsay ihangyo sa Ginoo kanako.

Naghunahuna ka ba usahay kon unsaon nimo pagtuman ang importante nga mga responsibilidad sa imong kinabuhi? Isip magtatambag ngadto ni Propeta Joseph Smith, si Frederick G. Williams sigurado nga adunay daghang importante nga mga responsibilidad. Diha sa seksyon 81, ang Ginoo mihatag kaniya og tambag kon unsaon kini pagtuman. Unsay imong nakita niining seksyon nga makatabang nimo pagtuman sa mga responsibilidad nga gihatag sa Ginoo nganha kanimo?

Ania ang pipila ka mga pangutana nga motabang nimo sa pagpamalandong sa bersikulo 5:

• Unsa ang pipila ka mga paagi nga ang usa ka tawo mahimong “maluyahon”? Unsay buot ipasabut sa “[mo]tabang” niadtong kinsa maluyahon?

• Unsa kahay hinungdan nga ang mga kamot sa usa ka tawo “nawad-an og paglaum”? Unsaon nato “[pag]pataas” kadtong mga kamot?

• Unsa kaha ang gipasabut sa hugpong sa mga pulong nga “mga tuhod nga mahuyang”? Unsaon nato “[paglig-on]” kadtong adunay mga tuhod nga mahuyang?

Siguro ang pagtuon niining bersikulo nakapahunahuna nimo sa usa ka tawo nga imong “[matabangan],” “[mapataas],” o “[mapalig-on].” Unsay imong buhaton aron makapangalagad nianang tawhana?

Ang Unang Kapangulohan: Sidney Rigdon, Joseph Smith, Frederick G. Williams

Doktrina ug mga Pakigsaad 82:1–7

Ang Ginoo midapit kanako nga maghinulsol ug isalikway ang akong mga sala.

Samtang magbasa ka sa Doktrina ug mga Pakigsaad 82:1–7, ikonsiderar ang paghimo og duha ka lista sa mga butang nga imong nakat-unan: mga pasidaan mahitungod sa sala ug mga kamatuoran mahitungod sa pagpasaylo. Sa unsang paagi nga kining mga kamatuoran makatabang kanimo sa pagbuntog sa mga pagtintal sa kaaway?

Doktrina ug mga Pakigsaad 82:8–10

Ang mga sugo alang sa akong kaluwasan ug proteksyon.

Kon ikaw—o ang usa ka tawo nga imong nailhan—nakahunahuna gayud kon nganong naghatag ang Ginoo og daghan kaayong mga sugo, ang Doktrina ug mga Pakigsaad 82:8–10 makatabang. Unsa nga mga ideya niining mga bersikulo ang makatabang nimo sa pagpasabut ngadto sa usa ka tawo nganong mipili ka nga mosunod sa mga sugo sa Ginoo? Mahimo siguro nimong ikonsiderar kon sa unsang paagi nga ang mga sugo nakapausab sa imong kinabuhi. Unsay imong nakat-unan mahitungod sa Ginoo samtang nagbasa ka sa bersikulo 10?

Tan-awa usab sa Doktrina ug mga Pakigsaad 130:20–21; Carole M. Stephens, “Kon Nahigugma Kamo Kanako, Inyong Pagatumanon ang Akong mga Sugo,” Liahona, Nob. 2015, 118–20.

Doktrina ug mga Pakigsaad 83

“Ang mga biyuda ug ang walay mga ginikanan pagahatagan.”

Niadtong Abril 1832, sigun sa mando sa Ginoo, mibiyahe si Joseph Smith og dul-an sa 800 ka milya aron bisitahan ang mga Santos nga nagpundok didto sa Missouri (tan-awa sa Doktrina ug Mga Pakigsaad 78:9). Usa ka komunidad nga iyang gibisitahan naglakip sa mga biyuda nga nag-inusarang miatiman sa ilang mga anak. Apil nila mao sila si Phebe Peck ug Anna Rogers, kinsa personal nga nailhan sa Propeta. Didto sa Missouri sa mga 1830, ang mga balaod sa estado naghatag sa mga biyuda og limitado nga mga katungod sa kabtangan sa namatay na nilang mga bana. Unsa ang imong nakat-unan gikan sa seksyon 83 kon unsay gibati sa Ginoo mahitungod sa mga biyuda ug walay mga ginikanan? Aduna ka bay nailhan nga ingon niini ang sitwasyon nga makabenepisyo tungod sa imong gugma ug pag-atiman?

Tan-awa usab sa Isaias 1:17; Santiago 1:27.

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 81:3.Mahimong mohatag ka og mga papel nga nagporma og kasingkasing ngadto sa mga sakop sa pamilya ug dapita sila sa pagdrowing o pagsulat og butang nga gusto nilang i-ampo. Hisguti kon unsay gipasabut sa pag-ampo “kanunay, sa dayag ug diha sa imong kasingkasing.”

Doktrina ug mga Pakigsaad 81:5.Aron makakat-on og mga baruganan diha niini nga bersikulo, siguro makapaambit ang mga sakop sa pamilya og mga ehemplo sa dihang sila mibati nga “maluyahon” o “mahuyang” ug ang usa ka tawo mitabang o mipalig-on kanila.   Hisguti kon sa unsang paagi nga ang imong pamilya kanunay nga makaserbisyo sa usag usa sa yano nga mga paagi.

Doktrina ug mga Pakigsaad 82:8–10.Siguro usa ka yano nga dula makatabang sa imong pamilya nga mobati nga mapasalamaton sa mga sugo sa Dios. Usa ka sakop sa pamilya mahimong mohatag og mga instruksyon aron pagtabang sa gitaptapan og mata [blindfolded] nga sakop sa pamilya nga maghimo og sandwich o moagi sa obstacle course. Paghunahuna og butang nga makalingaw ug mamugnaon! Dayon hisguti kon sa unsang paagi nga ang mga sugo sa Dios susama sa mga instruksyon diha niini nga dula.

Doktrina ug mga Pakigsaad 82:18–19.Unsa may mahimo sa matag sakop sa pamilya aron “mouswag diha sa iyang kahibalo” ug “makaangkon og talagsaon nga mga kahibalo”? Mahimong makalingaw kini kon adunay usa ka pasundayag sa talento sa pamilya. Paghunahuna og mga paagi sa paglakip sa mga talento nga dili sayon mapakita (sama sa espirituhanong mga gasa; tan-awa sa Doktrina ug mga Pakigsaad 46:11–26). Unsaon man nato paggamit ang atong mga talento ug pagpaambit sa mga butang nga kita aduna aron sa pagpanalangin sa atong pamilya ug mga silingan? Unsay gipasabut sa paggamit sa atong mga talento “uban sa usa ka bug-os nga tinguha ngadto sa himaya sa Dios”?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Nakabuhat Ba Ako og Maayo Karon?” Mga Himno, nu. 135; tan-awa usab sa “Mga Ideya sa Pagpalambo sa Inyong Pamilya nga Pagtuon sa Kasulatan.”

Pagpalambo sa Atong Pagtudlo

Pangutana nianang moresulta ngadto sa paglihok. Ikonsiderar ang mga pangutana nga nag-aghat sa mga sakop sa imong pamilya sa pagpamalandong kon sa unsang paagi mas hingpit nilang masunod ang ebanghelyo. “Sa kasagaran dili kini mga pangutana nga pagahisgutan; kini alang sa personal nga pagpamalandong” (Pagtudlo sumala sa Pamaagi sa Manluluwas, 31).

Paghulagway bahin ni Jesus nga nag-ayo og usa ka tawo pinaagi ni Dan Burr