si Joseph Smith nga nakadawat sa Melchizedek nga Pagkapari

Pagpahiuli, ni Liz Lemon Swindle

Hulyo 26–Agosto 1

Doktrina ug mga Pakigsaad 84

“Ang Gahum sa Pagka-diosnon”

Samtang magbasa ka sa Doktrina ug mga Pakigsaad 84, pamalandunga ang tambag nga “mabuhi pinaagi sa matag pulong nga mogula gikan sa ba-ba sa Dios” (bersikulo 44). Unsaon nimo sa pagkabuhi pinaagi sa mga pulong nga anaa niini nga pagpadayag?

Irekord ang Imong mga Impresyon

Sukad nga napahiuli ang pagkapari niadtong 1829, ang mga Santos sa Ulahing mga Adlaw napanalanginan pinaagi nianang sagradong gahum. Sila nabunyagan, nakumpirmahan, ug natawag nga moserbisyo pinaagi sa awtoridad sa pagkapari, sama gayud kanato karon. Apan ang pagkaadunay access sa gahum sa pagkapari dili sama nga butang sa hingpit nga pagkasabut niini, ug ang Dios adunay dugang pa nga gusto Niya nga masabtan sa Iyang mga Santos—ilabi na sa umaabut nga pagpahiuli sa mga ordinansa sa templo. Ang 1832 nga pagpadayag bahin sa pagkapari, nga karon mao ang Doktrina ug mga Pakigsaad 84, mipalapad sa panglantaw sa mga Santos kon unsa gayud ang pagkapari. Ug makahimo kini sa samang butang ngari nato karon. Kay adunay daghang angayang makat-unan mahitungod sa balaanong gahum nga naghupot “[sa] yawe sa kahibalo sa Dios,” nga makapakita “[sa] gahum sa pagka-diosnon,” ug nag-andam kanato nga “makakita sa nawong sa Dios, gani sa Amahan, ug mabuhi” (mga bersikulo 19–22).

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 84:1–5, 17–28

Ako adunay access sa gahum ug sa mga panalangin sa pagkapari sa Dios.

Kon maghunahuna ka sa pulong nga pagkapari, unsay mosantup sa imong hunahuna? Kapila man ka maghunahuna mahitungod sa pagkapari ug sa impluwensya niini sa imong inadlaw-adlaw nga kinabuhi? Human makapamalandong niining mga pangutana, tun-i ang Doktrina ug mga Pakigsaad 84:1–5, 17–28, ug ikonsiderar kon unsay gusto sa Ginoo nga imong masabtan mahitungod sa Iyang gahum sa pagkapari. Sa unsang paagi man nimo magamit kining mga bersikulo aron sa paghulagway sa pagkapari ngadto sa usa ka tawo ug ipasabut ang mga katuyoan niini?

Mahimo usab nga imong pamalandungan ang mga ordinansa sa pagkapari nga imong giapilan. Sa unsang paagi nga imong nakita “ang gahum sa pagka-diosnon” (bersikulo 20) nga napakita diha niini? Ikonsiderar kon unsay gusto sa Ginoo nga imong buhaton aron makadawat og dugang sa Iyang gahum nganha sa imong kinabuhi.

Tan-awa usab sa M. Russell Ballard, “Mga Lalaki ug mga Babaye ug ang Gahum sa Priesthood,” Liahona, Sept. 2014, 28–33; Gospel Topics, “Priesthood,” topics.ChurchofJesusChrist.org.

Doktrina ug mga Pakigsaad 84:31–42

Kon akong dawaton ang Ginoo ug ang Iyang mga sulugoon, akong madawat ang tanan nga anaa sa Amahan.

Si Elder Paul B. Pieper nagtudlo: “Makapainteres nga diha sa panumpa ug pakigsaad sa priesthood [Doktrina ug mga Pakigsaad 84:31–42], ang Ginoo migamit sa mga verb nga pag-angkon ug pagdawat. Siya wala mogamit sa verb nga orden. Diha sa templo nga ang mga lalaki ug babaye—mag-uban—moangkon ug modawat sa mga panalangin ug gahum sa Aaronic ug Melchizedek Priesthood” (“Gipadayag nga mga Reyalidad sa Pagkamortal,” Liahona, Ene. 2016, 47).

Samtang magtuon ka sa Doktrina ug mga Pakigsaad 84:31–42, pangitaa ang mga pulong nga “pag-angkon” ug “pagdawat.” Pamalandunga kon unsa kaha ang gipasabut niini sa niining konteksto. Giunsa nimo “pagdawat” ang Ginoo ug ang Iyang mga sulugoon?

Mahimo usab nimong hinumduman ang mga saad niining mga bersikulo nga may kalabutan sa panumpa ug pakigsaad sa pagkapari, nga ang Dios “dili makalapas” (bersikulo 40). Unsay imong nakita nga nakapadasig nimo nga mahimong mas matinud-anon sa pagdawat sa Amahan, sa Iyang mga sulugoon, ug sa Iyang gahum sa pagkapari?

Tan-awa usab sa Giya ngadto sa mga Kasulatan, “Pakigsaad,” “Panumpa,” scriptures.ChurchofJesusChrist.org.

Doktrina ug mga Pakigsaad 84:43–58

Moduol ko kang Kristo samtang mopatalinghug ko sa Iyang mga pulong ug maminaw sa Iyang Espiritu.

Ang kanunay nga pagbasa sa mga kasulatan ug sa mga pulong sa mga propeta mas labaw pa kay sa pagkompleto sa usa ka aytem sa espiritwal nga lista sa mga butang nga angayang buhaton. Unsa nga mga kamatuoran ang imong nakit-an diha sa Doktrina ug mga Pakigsaad 84:43–58 nga makatabang aron imong masabtan kon nganong kinahanglan kang kanunay nga magtuon sa pulong sa Dios? Bantayi ang pagkasukwahi tali sa kahayag ug sa kangitngit niining mga bersikulo; sa unsang paagi nga ang imong “makugihon nga pagsunod sa mga pulong sa kinabuhi nga dayon” nakadala og kahayag, kamatuoran, ug “[sa] Espiritu ni Jesukristo” nganha sa imong kinabuhi? (mga bersikulo 43, 45).

Tan-awa usab sa 2 Nephi 32:3; “Ang Basahon ni Mormon—Sukaranang Bato sa Atong Tinuohan,” Mga Pagtulun-an sa mga Presidente sa Simbahan: Ezra Taft Benson (2014), 151–62.

babaye nga nagtuon sa mga kasulatan

Ang pagtuon sa mga kasulatan nakatabang nako nga mobati sa impluwensya sa Espiritu.

Doktrina ug mga Pakigsaad 84:62–91

Ang Ginoo magauban kanako kon magserbisyo ako Kaniya.

Samtang magbasa ka niining mga bersikulo, maila nimo ang mga paagi nga gisulti sa Ginoo nga Iyang suportahan ang Iyang mga Apostoles ug mga misyonaryo. Sa unsa kaha nga paagi nga kining mga saad magamit ngadto sa buhat nga Iyang gihangyo nga imong buhaton? Pananglitan, sa unsang paagi nga kining mga saad sa bersikulo 88 natuman diha sa imong kinabuhi?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 84:6–18.Human makabasa kon giunsa ni Moises pagkadawat ang iyang awtoridad sa pagkapari, ang usa ka naghupot sa pagkapari diha sa imong pamilya o usa ka tigpangalagad nga brother mahimong mopaambit sa iyang kasinatian nga naordinahan ngadto sa usa ka katungdanan sa pagkapari. Kon posible, mahimo siyang mopaambit ug mohisgot sa iyang linya sa awtoridad sa pagkapari [priesthood line of authority]. Nganong importante man nga atong masubay ang awtoridad sa pagkapari diha sa Simbahan karon balik ngadto sa awtoridad ni Jesukristo? Sa pag-request og usa ka linya sa awtoridad sa pagkapari, pagpadala og email ngadto sa [e-mail].

Doktrina ug mga Pakigsaad 84:20–21.Kanus-a nga ang imong pamilya nakasinati “[sa] gahum sa pagka-diosnon” nga napakita pinaagi sa usa ka ordinansa sama sa bunyag o sa sakrament? Siguro mahisgutan nimo kon sa unsang paagi nga kining mga ordinansa makadala sa gahum sa Dios nganhi sa atong kinabuhi. Mahimo usab nimong ipakita ang litrato sa usa ka templo ug hisguti kon sa unsang paagi nga ang mga ordinansa sa templo makahatag kanato og dugang nga gahum aron mahisama sa Manluluwas. Mahimo kamong manganta og usa ka awit mahitungod sa pagkapari, sama sa “Ang Priesthood Gipahiuli” (Songbook sa mga Bata, 60), ug hisguti kon unsa ang gitudlo niini nga awit mahitungod sa pagkapari.

Doktrina ug mga Pakigsaad 84:43–44.Mahimo kamong magkauban nga mag-andam og pagkaon ug butangi og label ang matag sagol [ingredient] gamit ang usa ka pulong o hugpong sa mga pulong gikan sa bersikulo 44. Nganong importante nga atong i-apil ang tanang sagol? Nganong importante nga magpakabuhi kita pinaagi sa matag pulong sa Dios?

Doktrina ug mga Pakigsaad 84:98–102.Unsay atong makat-unan mahitungod ni Jesukristo gikan sa “bag-o nga awit” (bersikulo 98) niining mga bersikulo? Unsay atong mabuhat sa atong panahon aron makatabang nga ang mga kondisyon nga gihulagway diha niini nga awit mahitabo?

Doktrina ug mga Pakigsaad 84:106–10.Sa unsang paagi nga ang atong pamilya “mahatagan og kaayohan” pinaagi sa mga gasa ug mga paningkamot sa “matag sakop”? (bersikulo 110).

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Ang Priesthood Gipahiuli,” Songbook sa mga Bata, 60; tan-awa usab sa “Mga Ideya sa Pagpalambo sa Inyong Pamilya nga Pagtuon sa Kasulatan.”

Pagpalambo sa Atong Pagtudlo

Ipadangat ug i-follow up ang mga pagdapit sa paglihok. Kon imong dapiton ang imong pamilya sa paglihok sa unsay ilang nakat-unan, imong gipakita kanila nga ang ebanghelyo usa ka butang nga angayang tumanon, dili lang kay hisgutan. Unsay imong madapit nga ilang lihukon gikan sa inyong pagtuon sa Doktrina ug mga Pakigsaad 84?

Rome Italy Temple

Rome Italy Temple