Agosto 2–8

Doktrina ug mga Pakigsaad 85–87

“Barug Kamo sa Balaan nga mga Dapit”

Ang Espiritu mahimong mogiya kanimo sa pagtuon sa mga baruganan diha sa mga seksyon 85–87 nga wala ma-highlight niini nga outline. Sunda ang Iyang mga pag-aghat.

Irekord ang Imong mga Impresyon

Ang Adlaw sa Pasko kasagaran usa ka panahon sa pagpamalandong sa mga mensahe sama sa “sa yuta panagdait” ug “sa mga tawo nga iyang gikahimut-an” (tan-awa sa Lucas 2:14). Apan pagka-Disyembre 25, 1832, ang hunahuna ni Joseph Smith napuno sa hulga sa gubat. Ang South Carolina bag-o lang misukol sa gobyerno sa Estados Unidos ug nangandam alang sa gubat. Ug gipadayag sa Ginoo ngadto ni Joseph nga mao pa lamang kini ang sinugdanan: “Ang gubat,” Siya namahayag, “ibu-bu diha sa tanan nga mga nasud” (Doktrina ug mga Pakigsaad 87:2). Morag kini nga panagna matuman sa dili gayud madugay.

Apan wala kini mahitabo. Sulod lang sa pipila ka mga semana, ang South Carolina ug ang gobyerno sa U.S. nagkasabut, ug nalikayan ang gubat. Apan ang pagpadayag dili kanunayng matuman nianang panahona o sa paagi nga atong gusto. Dul-an sa 30 ka tuig human niana, dugay na human gipatay si Joseph Smith ug ang mga Santos namalhin sa kasadpan, mirebelde ang South Carolina ug misunod ang gubat sibil. Sukad niana, ang gubat sa tibuok kalibutan maoy hinungdan nga “[ang] yuta magbangutan” (Doktrina ug mga Pakigsaad 87:6). Samtang ang panagna natuman ra sa katapusan, ang bili niining pagpadayag dili kaayo sa pagpanagna kon kanus-a moabut ang kalamidad ug mas sa pagtudlo kon unsay buhaton kon moabut kini. Ang tambag susama ra niadtong 1831, 1861, ug sa 2021: “Barug kamo sa balaan nga mga dapit, ug ayaw pagbalhin” (bersikulo 8).

Mga Ideya alang sa Personal nga Pagtuon sa Kasulatan

Doktrina ug mga Pakigsaad 85:1–2

Maayo “[ang] paghupot og usa ka kasaysayan.”

Ang “kasaysayan” nga gihulagway diha sa bersikulo 1 mirekord sa mga ngalan niadtong kinsa “[naka]dawat sa mga kabilin sumala sa balaod” diha sa Zion (tan-awa sa Doktrina ug mga Pakigsaad 72:24–26). Hinoon, kini nga kasaysayan mas labaw pa kay sa pang-administratiba—bililhon usab kini nga rekord sa mga Santos bahin sa “paagi sa kinabuhi, ilang hugot nga pagtuo, ug mga buluhaton” (bersikulo 2).

Nagtipig ka ba og usa ka personal nga kasaysayan o journal? Unsa man ang imong marekord mahitungod sa imong paagi sa kinabuhi, hugot nga pagtuo, ug mga buluhaton nga mahimong usa ka panalangin ngadto sa umaabut nga mga henerasyon? Sa unsa kaha nga paagi nga kining kasaysayan mahimong usa ka panalangin alang kanimo?

Tan-awa usab sa “Mga Journal: ‘Mas Bililhon Pa kay sa Bulawan,’” Mga Pagtulun-an sa mga Presidente sa Simbahan: Wilford Woodruff (2011), 139–47; “Turning Hearts” (video, ChurchofJesusChrist.org).

Doktrina ug mga Pakigsaad 85:6

Ang Espiritu Santo mamulong sa usa ka “ligdong nga hinagawhaw nga tingog.”

Pamalandunga ang mga pulong nga gigamit ni Joseph Smith sa paghulagway sa Espiritu diha sa Doktrina ug mga Pakigsaad 85:6. Sa unsang paagi nga ang tingog sa Espiritu “ligdong” ug “hinagawhaw”? Unsa ang pipila ka mga butang nga kini “midulot” sa imong kinabuhi?

Samtang maghunahuna ka kon sa unsang paagi mamulong ang Espiritu nganha nimo, ikonsiderar kining mga deskripsyon nga gihatag pinaagi kang Joseph Smith: Doktrina ug mga Pakigsaad 6:22–24; 8:2–3; 9:7–9; 11:12–13; 128:1. Base sa unsay imong nabasa, unsa sa imong pamati ang kinahanglan nimong buhaton aron mas makasabut sa tingog sa Espiritu?

Tan-awa usab sa 1 Mga Hari 19:11–12; Helaman 5:30.

Ang pagtuon sa mga kasulatan makatabang kanato aron makadungog sa Espiritu Santo.

Doktrina ug mga Pakigsaad 86

Ang mga matarung pundukon sa katapusang mga adlaw.

Ang Doktrina ug mga Pakigsaad 86:1–7 naglangkob sa pagpasabut sa Ginoo bahin sa sambingay sa trigo ug sa mga sagbut [bunglayon], nga adunay gamayng kalainan nga gihatagan og gibug-aton kay sa Iyang gihatag diha sa Mateo 13:24–30, 37–43. Samtang imong gitandi ang duha, unsa nga mga kalainan ang imong nabantayan? Ikonsiderar kon nganong kini nga sambingay—uban niining mga kalainan—angay nga balik-balikon “diha sa katapusan nga mga adlaw, bisan karon” (Doktrina ug mga Pakigsaad 86:4). Unsa may makat-unan nimo gikan niini nga sambingay ug sa interpretasyon niini sa ulahing mga adlaw?

Sumala sa narekord diha sa mga bersikulo 8–11, ang Ginoo namulong bahin sa pagkapari, pagpahiuli, ug sa kaluwasan sa Iyang katawhan. Unsa nga mga koneksyon ang imong nakita tali niining mga bersikulo ug sa sambingay sa trigo ug sa mga sagbut? Sa unsang paagi nga mahimo kang “usa ka manluluwas ngadto sa mga katawhan [sa Ginoo]”? (bersikulo 11).

Tan-awa usab sa Gospel Topics, “Apostasy,” “Restoration of the Priesthood,” topics.ChurchofJesusChrist.org.

Doktrina ug mga Pakigsaad 87

Ang kalinaw makit-an sa “balaan nga mga dapit.”

Agig dugang sa pisikal nga mga peligro sa “pagpaagas sa dugo … [ug] gutom, ug sa sakit, ug sa linog” (Doktrina ug mga Pakigsaad 87:6), ang tambag diha niini nga pagpadayag magamit usab sa espirituhanong mga peligro nga atubangon natong tanan sa ulahing mga adlaw. Unsa ang imong “balaan nga mga dapit” (bersikulo 8) kon asa makita ang kalinaw ug kasiguroan? Unsa ang makapabalaan sa usa ka dapit? Agig dugang sa pisikal nga mga lokasyon, siguro adunay balaan nga mga panahon, balaan nga mga binuhatan, o balaan nga mga hunahuna nga makahatag og kalinaw. Unsay gipasabut sa “ayaw pagbalhin” gikan niining mga dapit?

Tan-awa usab sa Henry B. Eyring, “Usa ka Panimalay Diin ang Espiritu sa Ginoo Mopuyo,” Liahona, Mayo 2019, 22–25; Mga Santos, 1:186–87.

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 85:6.Unsaon man nimo pagtudlo ang imong pamilya aron makaila sa ligdong, hinagawhaw nga tingog sa Espiritu? Siguro makadula kamo diin ang usa ka tawo mohunghong og importante nga mga instruksyon taliwala sa makabalda nga mga kasaba. Unsa kaha ang makabalda kanato aron madungog ang Espiritu Santo? Siguro ang mga sakop sa pamilya makapaambit sa unsay ilang gibuhat aron makadungog sa tingog sa Espiritu.

Doktrina ug mga Pakigsaad 86.Ang pagdrowing o pagtan-aw sa mga litrato makatabang sa imong pamilya aron masabtan ang sambingay sa trigo ug sa mga sagbut. Mahimo nimong sugdan gamit ang mga litrato sa mga butang nga gihulagway diha sa Mateo 13:24–30. Dayon ang imong pamilya makabutang og label sa mga litrato nga adunay mga pagpasabut gikan sa Doktrina ug mga Pakigsaad 86:1–7. Sa unsang paagi nga kita susama sa trigo? Sa unsang paagi nga kita susama sa mga anghel nga nagpundok sa trigo?

Doktrina ug mga Pakigsaad 87:8.Aron mapaila ang panaghisgutan kon unsaon paghimo sa imong panimalay nga usa ka mas balaan nga dapit, mahimo nimong dapiton ang mga sakop sa pamilya sa pagdesinyo og usa ka panimalay alang sa usa ka tawo nga nahigugma sa Manluluwas. Mahimong moresulta kini sa mga ideya kon unsaon “pagdesinyo pag-usab” sa inyong panimalay aron mahimo kining usa ka dapit sa kalinaw taliwala sa espirituhanong peligro dinhi sa kalibutan. Ang mga awit sama sa “Gugma sa Panimalay,” “Panimalay Mahimo nga Langit sa Yuta” (Mga Himno, nu. 184, 186), o “Kon Asa ang Gugma” (Songbook sa mga Bata, 76–77) makahatag nimo og mga ideya.

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Kon Asa ang Gugma,” Children’s Songbook, 76–77.

Pagpalambo sa Atong Pagtudlo

Gamita ang imong pagkamamugnaon. Kon magtudlo ka sa imong pamilya gikan sa mga kasulatan, ayaw limitahi ang imong kaugalingon sa mga pangutana ug mga ideya sa kalihokan nga gisugyot niini nga outline. Himoa nga kining mga ideya modasig sa imong kaugalingong pagkamamugnaon. Hunahunaa kon unsay makapalingaw sa imong pamilya ug unsay makatabang kanila nga makakita og koneksyon tali sa mga kasulatan ug sa ilang kinabuhi.

Gigamit sa Ginoo ang sambingay sa trigo ug sa mga sagbut [bunglayon] aron sa paghulagway kon unsaon pagpundok ang Iyang katawhan sa katapusang mga adlaw.