Agosto 9–15

Doktrina ug mga Pakigsaad 88

“Pagtukod … og usa ka Balay sa Dios”

Si Presidente Russell M. Nelson miingon, “Ako mosaad nga samtang makugihon kamo nga molihok aron sa pagbag-o sa inyong panimalay ngadto sa usa ka sentro sa pagkat-on sa ebanghelyo, … ang impluwensya sa kaaway sa inyong kinabuhi ug sa inyong panimalay makuhaan” (“Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018, 113).

Irekord ang Imong mga Impresyon

Usahay, ang Ginoo mohatag kanato og gamay nga panabut bahin sa Iyang walay kinutuban nga “pagkahalangdon ug gahum” (Doktrina ug mga Pakigsaad 88:47) pinaagi sa komprehensibong mga pagpadayag pinaagi sa Iyang mga propeta. Ang Doktrina ug mga Pakigsaad 88 usa niana nga pagpadayag—usa ka pagpadayag bahin sa kahayag ug himaya ug mga gingharian nga morag makapawalay bili sa atong yutan-ong mga kabalaka kon itandi niini. Bisan kon dili nato masabtan ang tanan nga gitudlo sa Ginoo kanato, makabantay kita nga adunay mas daghan pa sa kahangturan kay sa unsay atong nasabtan karon. Siyempre, wala mamulong ang Ginoo bahin niining dagkong mga misteryo aron hadlukon kita o mobati kita nga ubos ra. Gani, Siya misaad, “Ang adlaw moabut nga kamo maka sabut bisan sa Dios” (bersikulo 49; italics gidugang). Siguro alang nianang mahinungdanon ug sagradong katuyoan nga giawhag sa Ginoo ang Iyang mga Santos didto sa Kirtland sa pagtukod sa Tulunghaan sa mga Propeta. “Han-aya ninyo ang inyong mga kaugalingon,” miingon Siya. “Andama ang matag butang nga kinahanglanon; ug pagtukod og … usa ka balay sa Dios” (bersikulo 119). Kay sa sulod kini sa balaang balay sa Dios—ug diha sa atong mga panimalay—nga Siya makahimo, labaw pa kay sa bisan asa, sa pagpataas sa atong panglantaw lapas pa sa mortal nga kalibutan, “mopakita sa iyang nawong [ngari kanato],” ug moandam kanato aron “makalahutay sa celestial nga himaya” (mga bersikulo 68, 22).

Mga Ideya alang sa Personal nga Pagtuon sa Kasulatan

Doktrina ug mga Pakigsaad 88

Ang Ginoo mitanyag kanato og paglaum ug kalinaw.

Pipila lang ka adlaw human mipasidaan nga ang gubat “ibu-bu diha sa tanan nga mga nasud” (Doktrina ug mga Pakigsaad 87:2), ang Ginoo mihatag og pagpadayag nga gitawag ni Joseph Smith og “‘dahon sa oliba’ … gikutlo gikan sa Kahoy sa Paraiso, ang mensahe sa Ginoo sa kalinaw alang kanato” (Doktrina ug mga Pakigsaad 88, ulohan sa seksyon). Sa unsang paagi nga kining pagpadayag susama sa dahon sa oliba, usa ka tradisyonal nga simbolo sa kalinaw? (tan-awa usab sa Genesis 8:11). Unsa nga mga kamatuoran niining seksyon ang makatabang nimo nga mobati og paglaum ug kalinaw diha ni Kristo?

Doktrina ug mga Pakigsaad 88:6–67

Ang kahayag ug balaod nagagikan kang Jesukristo.

Ang mga pulong nga kahayag ug balaod gibalik-balik sa daghang mga higayon diha sa seksyon 88. Kining mga pulong gigamit sa laing mga kasulatan sa paghulagway kang Jesukristo ug sa Iyang ebanghelyo (pananglitan, tan-awa sa Isaias 60:19; Juan 1:1–9; 3 Nephi 15:9). Markahi o hinumdumi ang mga bersikulo diin nimo makit-i kining mga pulong diha sa Doktrina ug mga Pakigsaad 88:6–67, ug isulat kon unsay imong nakat-unan mahitungod sa Manluluwas, kahayag, ug balaod. Kining mga bersikulo mahimong modasig kanimo sa paghimo og mga kausaban sa imong kinabuhi aron mas matinud-anong makadawat sa kahayag ug motuman sa “balaod ni Kristo” (bersikulo 21).

Tan-awa usab sa Sharon Eubank, “Kristo: Ang Kahayag nga Nagdan-ag taliwala sa Kangitngit,” Liahona, Mayo 2019, 73–76.

Ang mga kasulatan naglangkob sa balaod ni Kristo.

Doktrina ug mga Pakigsaad 88:62–126

Andama ang matag butang nga kinahanglanon.

Sa pipila ka mga paagi, nagpuyo kita sa panahon nga gihulagway sa Ginoo sa dihang ang “tanan nga mga butang magkaguliyang; ug sa pagkatinuod, ang mga kasingkasing sa mga tawo mopakyas kanila” (Doktrina ug mga Pakigsaad 88:91). Samtang magbasa ka sa mga bersikulo 62–126, ikonsiderar kon sa unsang paagi nga ang tambag sa Ginoo makatabang nimo nga maandam alang sa Ikaduhang Pag-anhi sa Manluluwas. Ania ang pipila ka mga pangutana nga ikonsiderar:

Mga bersikulo 62–76.Samtang namalandong ka niining mga bersikulo, unsay gidasig nga imong buhaton aron “mopaduol” ngadto sa Dios? (bersikulo 63). Ikonsiderar kon unsa kaha ang kahulugan alang nimo sa gisugo sa Ginoo nga “ibalaan ang inyong mga kaugalingon” (bersikulo 68).

Mga bersikulo 77–80, 118–26.Ngano kaha nga “angay alang kaninyo sa pagsabut” sa parehong doktrinal ug temporal nga mga hilisgutan? (bersikulo 78). Giunsa nimo pagsunod sa tambag nga “pangitaa ang pagtulun-an”? (bersikulo 118). Unsa kaha ang gipasabut nga magkat-on “pinaagi sa pagtuon ug usab pinaagi sa hugot nga pagtuo”?

Mga bersikulo 81–116.Ikonsiderar ang paghinumdom sa mga panagna mahitungod sa Ikaduhang Pag-anhi sa Manluluwas dinhi niining mga bersikulo. Ngano kaha nga ang Ginoo gusto nga ikaw masayud mahitungod niining mga butanga?

Mga bersikulo 117–26.Ikonsiderar ang pagbasa niining mga bersikulo nga maghunahuna sa templo; unsay imong nakit-an dinhi nga makatabang nimo aron makasulod sa balay sa Ginoo?

Tan-awa usab sa D. Todd Christofferson, “Pagpangandam alang sa Pagbalik sa Ginoo,” Liahona, Mayo 2019, 81–84; David A. Bednar, “Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 17–24; Mga Santos, 1:187-189.

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 88:14–33, 95–101.Unsay imong nakat-unan mahitungod sa Pagkabanhaw gikan niining mga bersikulo? Sa unsa kaha nga paagi nga kining mga kamatuoran makaimpluwensya sa mga pagpili nga atong himoon?

Doktrina ug mga Pakigsaad 88:33.Mahimo kang mosugod og usa ka panaghisgutan bahin niining bersikulo pinaagi sa paghangyo sa mga sakop sa pamilya sa paghisgot mahitungod sa mga gasa nga gihatag ngadto nila—kadtong ilang nadawat sa malipayong paagi ug sa uban nga wala. Sa unsang paagi nato mapakita sa Ginoo nga nagmalipayon kita sa gasa sa celestial nga himaya nga Iyang gitanyag kanato? Sa unsang paagi kita magmalipayon sa “naghatag sa gasa”?

Doktrina ug mga Pakigsaad 88:63, 68.Kining mga bersikulo naglangkob sa pipila ka mga action word nga siguro makapadasig nimo nga maghunahuna sa mamugnaong mga paagi sa pagtudlo sa mga mensahe diha sa mga bersikulo ngadto sa imong mga anak. Pananglitan, siguro makadula mo og tago-tago aron sa paghisgot sa hugpong sa mga pulong nga “pangita kanako nga makugihon ug kamo makakita kanako” (bersikulo 63; italics gidugang).

Doktrina ug mga Pakigsaad 88:81.Isip usa ka pamilya, hibaloi ang pipila ka mga timailhan sa pasidaan sa sulod ug sa palibut sa inyong panimalay, sama sa mga label sa pasidaan diha sa mga tambal o sa mga timailhan sa trapiko alang sa mga drayber. Sa unsang paagi nga kining mga pasidaan makatabang kanato? Unsay gusto sa Langitnong Amahan nga atong “[ipasidaan] sa [atong] silingan”?

Doktrina ug mga Pakigsaad 88:119.Aron sa pagdasig sa imong pamilya nga himoon ang inyong panimalay sama sa deskripsyon diha sa bersikulo 119, sulayi ang sama niini: Isulat ang mga hugpong sa mga pulong gikan niining bersikulo diha sa mga ginunting nga papel, ug gamita kini sa pagtabon sa hulagway sa usa ka templo. Basaha og dungan ang Doktrina ug mga Pakigsaad 88:119, ug ipatangtang sa mga sakop sa pamilya ang matag usa sa ginunting nga papel samtang ilang madungog ang nagkatakdo nga hugpong sa mga pulong diha sa bersikulo. Unsa ang atong mabuhat aron sa paghimo sa atong panimalay nga usa ka “balay sa Dios”? (bersikulo 119).

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Mas Magpaduol Ko Dios Kanimo,” Mga Himno, nu. 55.

Pagpalambo sa Atong Pagtudlo

Tuguti ang mga bata nga mopadayag sa ilang pagkamamugnaon. Kon imong dapiton ang imong mga anak sa pagmugna og usa ka butang nga may kalabutan sa usa ka baruganan sa ebanghelyo, imo silang gitabangan nga mas makasabut sa baruganan, ug imo silang gihatagan og usa ka mahikap nga pahinumdom sa unsay ilang nakat-unan (tan-awa sa Pagtudlo sumala sa Pamaagi sa Manluluwas, 25).

Si Jesukristo mitanyag kanato og kalinaw. Kaninyo Ibilin Ko ang Kalinaw, ni Walter Rane