Agosto 9–15

Doktrina ug mga Pakigsaad 88

“Pagtukod … og usa ka Balay sa Dios”

Ang Doktrina ug mga Pakigsaad 88:118 nagtambag nga “Magtudlo sa usag usa sa mga pulong sa kaalam.” Unsa nga “mga pulong sa kaalam” sa Doktrina ug mga Pakigsaad 88 ang ingon og labing importante ngadto sa mga bata nga imong gitudloan?

Irekord ang Imong mga Impresyon

Dapita ang Pagpaambit

Sultihi ang mga bata nga ang Langitnong Amahan ug si Jesukristo gusto nga kita magpadayon sa pagkat-on sa tibuok natong kinabuhi. Dayon hangyoa sila sa pagpakigbahin og butang nga ilang nakat-unan mahitungod sa panimalay, sa eskwelahan, o sa simbahan.

Itudlo ang Doktrina: Mas Gagmay nga mga Bata

Doktrina ug mga Pakigsaad 88:63

Ang Dios gusto nga ako magpaduol ngadto Kaniya.

Unsay imong mahimo aron matabangan ang mga bata nga imong gitudloan nga mobati sa presensya sa Dios sa ilang kinabuhi?

Posible nga mga Kalihokan

• Samtang magbasa ka sa Doktrina ug mga Pakigsaad 88:63, dapita ang mga bata sa pagdrama sa pipila ka mga pulong nga ilang madungog. Pananglitan, sila mahimong magpakaaron-ingnon nga dunay gipangita o nanuktok.

• Hangyoa ang usa ka bata nga mogunit og litrato ni Jesus diha sa atubangan sa kwarto samtang ang ubang mga bata mobarug sa luyo sa kwarto. Dapita ang mga bata sa paglakang og usa ka lakang matag higayon nga ikaw mosulti og butang nga atong mabuhat aron mas mahiduol ngadto sa Manluluwas ug sa pag-atras matag higayon nga ikaw mosulti og butang nga makapadistansya kanato gikan sa Manluluwas. Ihatag ang imong pagpamatuod nga kon kita maningkamot nga mahiduol ngadto sa Ginoo, Siya magpaduol ngari kanato.

Doktrina ug mga Pakigsaad 88:118

Gusto ang Langitnong Amahan nga ako makat-on.

“Ang edukasyon usa ka importante nga bahin sa plano sa Langitnong Amahan sa pagtabang kaninyo aron mahimong mas mahisama Kaniya. … Ang edukasyon nga inyong naangkon mahimong mahinungdanon alang kaninyo niining kinabuhia ug sa umaabut nga kinabuhi” (Alang sa Kalig-on sa Kabatan-onan, 9).

Posible nga mga Kalihokan

• Ipakita ang usa ka litrato sa usa ka eskwelahan, o pagdrowing og usa diha sa pisara, ug dapita ang mga bata sa pagpasabut unsa ang eskwelahan ug unsay mahitabo didto. Isulti ang mahitungod sa eskwelahan nga gisugdan ni Joseph Smith (tan-awa sa “Kapitulo 31: Ang Pulong sa Kaalam,” Mga Istorya sa Doktrina ug mga Pakigsaad, 119–22). Ipakita sa mga bata ang mga litrato sa usa ka panimalay, usa ka simbahan, ug usa ka templo, ug pangutan-a sila kon sa unsa nga paagi nga kini nga mga dapit sama sa mga eskwelahan.

• Pagkanta og usa ka awit mahitungod sa pagkat-on, sama sa “Pagsiksik, Pamalandong, ug Pag-ampo” (Songbook sa mga Bata, 66). Pangutan-a ang mga bata unsay ilang ganahan nga makat-unan.

• Basaha ang Doktrina ug mga Pakigsaad 88:118, ug hatagi og gibug-aton ang mga pulong “magtudlo sa usag usa.” Pagpakigbahin og pipila ka kaalam nga imong nakat-unan gikan sa matag bata sa imong klase, ug dapita sila sa pagpakigbahin og kaalam nga ilang nakat-unan.

  

  Kinahanglang magtinguha kita og kaalam ug pagkat-on.

Doktrina ug mga Pakigsaad 88:119

Ang templo mao ang balay sa Dios.

Ikonsiderar unsaon nimo sa pagtabang ang mga bata nga mobati og gugma sa templo ug usa ka tinguha sa pagsimba sa Ginoo didto kon sila andam na.

Posible nga mga Kalihokan

• Ipakita sa mga bata unsaon sa paghimo og “spire” sa templo pinaagi sa pagpataas sa ilang mga bukton ug pagtakdo sa isig ka tumoy sa ilang mga tudlo. Basaha ang Doktrina ug mga Pakigsaad 88:119, ug hangyoa sila sa paghimo og spire matag higayon nga ikaw mosulti sa pulong nga “balay.” Ipasabut nga ang Langitnong Amahan gusto nga si Joseph Smith ug ang mga Santos motukod og usa ka templo, o usa ka “balay sa Dios.” Ipakita ang usa ka litrato sa duol nga templo samtang ikaw maghisgot sa mga kalainan tali sa usa ka templo ug sa usa ka meetinghouse sa Simbahan.

• Ipakigbahin ang imong pagpamatuod sa templo, ug kantaha pagdungan ang mahitungod sa templo, sama sa “Gusto Ko nga Makita ang Templo” (Songbook sa mga Bata, 99). Dapita ang mga bata sa pagdrowing og hulagway sa ilang kaugalingon nga miadto sa templo.

Itudlo ang Doktrina: Mas Dagko nga mga Bata

Doktrina ug mga Pakigsaad 88:68, 74

Si Jesukristo mahimong makalimpyo nako gikan sa sala.

Aron mahimong mabalaan nagpasabut nga mahimong limpyo ug putli. Unsaon nimo sa pagtabang ang mga bata nga imong gitudloan nga makasabut nga sila mahimong mabalaan kon sila mosunod ni Jesukristo?

Posible nga mga Kalihokan

• Dapita ang usa ka bata nga mobasa og kusog sa Doktrina ug mga Pakigsaad 88:68 ug lain nga mobasa sa bersikulo 74. Hangyoa ang mga bata sa pagpaminaw sa mga pulong nga anaa niining duha ka bersikulo. Unsaon man nato sa “pagbalaan” sa atong kaugalingon? (Kon gikinahanglan, tabangi ang mga bata sa pagpangita sa “Pagbalaan” diha sa Giya ngadto sa mga Kasulatan.) Pagdrowing og litrato sa usa ka kasingkasing, usa ka kamot, ug usa ka tiil diha sa pisara. Tabangi ang mga bata sa paghunahuna unsa kaha ang gipasabut sa “pagputli” ug “paglimpyo” sa atong mga kasingkasing, mga kamot, ug mga tiil. Sa unsa nga paagi ang Manluluwas makatabang kanato sa paghimo niini? Sa unsa nga paagi nato magamit ang atong mga kasingkasing, mga kamot, ug mga tiil aron mahimong mas sama ni Jesus?

• Ipasabut nga ang Ginoo gusto nga ang Iyang katawhan mabalaan sa dili pa sila moadto sa templo. Ikonsiderar ang pagdapit og usa ka batan-ong lalaki o batan-ong babaye kinsa adunay rekommend sa templo nga mobisita sa klase. Dapita siya sa pagpakita sa mga bata unsa ang hitsura sa rekommend sa templo, hisguti unsay ilang buhaton aron magpuyo nga takus niini, ug mopakigbahin ngano nga importante nga adunay rekommend sa templo bisan kon kita wala magpuyo duol sa templo.

Doktrina ug mga Pakigsaad 88:77–80, 118

Gusto ang Langitnong Amahan nga ako makat-on.

Ikaw makatabang sa mga bata nga makasabut nga ang pagkat-on mahitungod sa espirituhanon ug temporal nga mga butang makaandam nila sa pagserbisyo sa Ginoo.

Posible nga mga Kalihokan

• Isulat diha sa pisara Unsa, Ngano, ug Unsaon. Dapita ang mga bata sa pagbasa sa Doktrina ug mga Pakigsaad 88:77–79 nga magpares-pares ug maghimo og lista sa unsa ang gusto sa Ginoo nga atong makat-unan. Dayon hangyoa sila sa pagsiksik sa bersikulo 80 aron sa pagsusi ngano nga Siya gusto nga kita makat-on. Dayon sila makasiksik sa bersikulo 118 aron sa pagsusi unsaon nga kita makat-on. Unsa ang atong makat-unan niini nga mga bersikulo mahitungod kon sa unsa nga paagi gitan-aw sa Ginoo ang edukasyon ug pagkat-on?

• Ipakita ang usa ka mapa sa kalibutan, ug basaha pagdungan ang Doktrina ug mga Pakigsaad 88:79. Nganong importante alang kanato nga makahibalo sa ubang mga nasud ug mga kultura? Kon ikaw o ang mga bata nga imong gitudloan nakabisita o nakapuyo sa laing nasud, ipakita ang mga butang nga nagrepresentar sa kultura, ug ipakigbahin ang mga butang nga imong nakat-unan.

Doktrina ug mga Pakigsaad 88:119–26

“Pagtukod … og usa ka balay sa Dios.”

Ang mga instruksyon sa Ginoo kabahin sa “balay sa Dios” mahimong makatabang nga giya alang nato samtang kita maglig-on sa atong kinabuhi ug sa atong mga panimalay.

Posible nga mga Kalihokan

• Dapita ang mga bata sa pagpili og pito ka pulong nga naghulagway sa ilang panimalay o laing panimalay nga ilang nabisitahan. Dayon hangyoa sila sa pagbasa sa Doktrina ug mga Pakigsaad 88:119 ug pagpangita sa pito ka pulong nga gigamit sa Ginoo sa paghulagway sa Iyang balay. Tabangi ang mga bata sa paghunahuna og mga paagi nga ilang mahimo ang ilang mga panimalay nga usa ka “balay sa Dios.”

• Hatagi ang matag bata og mga pulong nga gikan sa Doktrina ug mga Pakigsaad 88:119–26 nga drowingon. Kon sila mopakita sa ilang mga litrato ngadto sa usag usa, tuguti ang mga bata nga mangita sa mga bersikulo aron tag-anon unsa nga pulong ang girepresentahan sa matag litrato.

• Isulat diha sa pisara ang Buhata ug Ayaw buhata. Dapita ang mga bata nga basahon ang Doktrina ug mga Pakigsaad 88:119–26 ug ilista ang mga butang nga gusto sa Ginoo nga buhaton sa mga Santos o dili buhaton aron makaandam sa pagkat-on didto sa templo. Mahimo silang mangita sa dili pamilyar nga mga pulong sa diksyonaryo. Dapita ang mga bata sa pagpili og butang nga ilang sugdan sa pagbuhat o butang nga ilang hunungon sa pagbuhat.

Awhaga ang Pagkat-on diha sa Panimalay

Dapita ang mga bata sa pagsulat o pagdrowing og usa ka butang nga ilang nakat-unan nga gusto nilang ipakigbahin uban sa ilang mga pamilya.

Pagpalambo sa Atong Pagtudlo

Tabangi ang gagmay nga mga bata nga moapil sa mga panaghisgutan sa ebanghelyo. Kinahanglan kang maghunahuna og mamugnaong mga paagi aron adunay mga panaghisgutan sa ebanghelyo uban sa gagmay nga mga bata. Sama pananglit, ikaw mahimong magdala og butang nga magunitan sa mga bata kon turno na nila nga mosulti.