“Agosto 2–8. Doktrina ug mga Pakigsaad 85–87: ‘Barug Kamo sa Balaan nga mga Dapit,’” Dali, Sunod Kanako—Alang sa Primary: Doktrina ug mga Pakigsaad 2021 (2020)
“Agosto 2–8. Doktrina ug mga Pakigsaad 85–87,” Dali, Sunod Kanako—Alang sa Primary: 2021
Agosto 2–8
Doktrina ug mga Pakigsaad 85–87
“Barug Kamo sa Balaan nga mga Dapit”
Tungod kay ang imong oras uban sa mga bata limitado, pagtinguha og espirituhanong giya aron makahibalo unsa nga mga baruganan nga gikan sa mga kasulatan ang imong hatagan og gibug-aton. Salig sa mga pag-aghat nga imong nadawat.
Irekord ang Imong mga Impresyon
Dapita ang Pagpaambit
Ipakita sa mga bata ang pipila ka mga litrato o mga pahina sa kalihokan nga imong nagamit sa mga leksyon karong bag-o, ug dapita ang mga bata sa pagpakigbahin unsay ilang nahinumduman mahitungod niini sa klase o sa panimalay.
Itudlo ang Doktrina: Mas Gagmay nga mga Bata
Doktrina ug mga Pakigsaad 85:6
Ang Espiritu Santo mosulti sa usa ka “ligdong nga hinagawhaw nga tingog.”
Si Elder Richard G. Scott miingon, “Kon ikaw walay mahimo sa imong relasyon sa imong mga estudyante kay sa pagtabang nila nga makaila ug makasunod sa mga pag-aghat sa Espiritu, ikaw mopanalangin sa ilang kinabuhi sa walay sukod ug sa kahangturan” (“To Learn and to Teach More Effectively” [Brigham Young University Education Week nga debosyunal, Ago. 21, 2007], 5, speeches.byu.edu).
Posible nga mga Kalihokan
-
Basaha ngadto sa mga bata giunsa ni Joseph Smith paghulagway ang Espiritu: “Oo, sa ingon miingon ang ligdong nga hinagawhaw nga tingog” (Doktrina ug mga Pakigsaad 85:6). Hangyoa ang mga bata sa paghingalan sa pipila ka butang nga gagmay (ipakita ang mga litrato kon sila nagkinahanglan og tabang). Dapita sila sa pagtikubo ngadto sa yuta aron mahimong gamay ug dili maglihok kutob sa ilang mahimo. Tabangi sila sa paghunahuna sa unsa nga paagi nga ang tingog mahimong hinay, ug tuguti sila nga magbansay sa pagpaminaw ug sa pagsulti sa hinay nga tingog. Isulti ang mga higayon sa dihang ang Espiritu namulong kanimo sa hinay, hinagawhaw nga tingog.
-
Tudloi ang mga bata og kanta mahitungod sa Espiritu, sama sa “Ang Espiritu Santo” (Songbook sa mga Bata, 56). Dapita sila sa pagkanta niini dungan nimo nga pinahagawhaw. Unsa ang gitudlo niini nga kanta mahitungod sa Espiritu Santo? Tabangi ang mga bata nga makaila kon sila mibati sa Iyang impluwensya (sama kon mag-ampo, magkanta og mga himno, o magtabang sa uban).
Doktrina ug mga Pakigsaad 86:11
Mahimo akong kahayag ngadto sa uban.
Ang Seksyon 86 naghulagway sa importante nga buhat nga gusto sa Ginoo nga buhaton sa Iyang mga sulugoon sa ulahing mga adlaw. Usa sa paagi nga ang mga bata makatabang niini nga buhat mao ang pagkahimong kahayag ngadto sa mga tawo nga naglibut kanila.
Posible nga mga Kalihokan
-
Basaha ngadto sa mga bata ang mosunod nga mga pulong gikan sa Doktrina ug mga Pakigsaad 86:11: “Bulahan kamo kon kamo magpadayon diha sa akong pagkamaayo, usa ka kahayag ngadto sa mga Hentil [o sa mga tawo kinsa wala pay ebanghelyo].” Sa unsang paagi ang kahayag makapanalangin nato? Unsa kini mahisama kon kita walay kahayag? Sa unsa nga paagi kita mahimong kahayag ngadto sa ubang mga tawo kinsa wala makahibalo sa ebanghelyo? Tabangi ang mga bata nga maghunahuna og mga paagi nga kita makapaambit sa kaayo ni Jesus ngadto sa uban.
-
Hangyoa ang mga bata sa paghunahuna nga ang usa ka higala naningkamot sa paglakaw diha sa kangitngit (pagnga ang mga suga kon kini makatabang). Nganong lisud man maglakaw sa kangitngit? Unsay atong mahimo sa pagtabang sa atong higala? Ipasabut nga kon kita mosunod sa Manluluwas, sama kini sa nagdan-ag nga kahayag nga nagpakita sa uban sa dalan nga pagalaktan.
-
Ang Liahona ug Friend nga mga magasin sa kasagaran adunay mga istorya mahitungod sa mga bata kinsa mga maayong ehemplo. Pangita og usa nga ipakigbahin sa mga bata nga makadasig nila nga mahimo usab nga maayong mga ehemplo.
Ang atong mga panimalay mahimong “balaan nga mga dapit.”
Walay panimalay nga hingpit, apan adunay mga butang nga atong mga panimalay mahimong balaan nga mga dapit sa kalinaw.
Posible nga mga Kalihokan
-
Ipasabut ngadto sa mga bata nga si Joseph Smith nabalaka mahitungod sa mga butang nga nanghitabo sa kalibutan. I-summarize ang ulohan sa seksyon 87, o basaha ang “Kapitulo 30: Usa ka Pagpadayag kalabut sa Gubat” (Mga Istorya sa Doktrina ug mga Pakigsaad, 117–18; tan-awa usab ang video sa ChurchofJesusChrist.org). Hangyoa ang mga bata sa pagpaminaw sa mga butang nga nakapabalaka ni Joseph. Sa pagtudlo unsay gisulti sa Ginoo nga kinahanglan natong buhaton mahitungod niadtong mga problema, basaha ang Doktrina ug mga Pakigsaad 87:8.
-
Ipakita ang usa ka litrato sa usa ka templo, ug ipakigbahin ngano nga ang templo usa ka balaan nga dapit. Ipakita ang usa ka litrato sa usa ka panimalay, ug tabangi ang mga bata sa paghunahuna og mga paagi nga sila makahimo sa ilang mga panimalay nga balaan sama sa templo (tan-awa sa pahina sa kalihokan karong semanaha). Ngano nga kita gusto nga anaa sa balaan nga mga dapit?
Itudlo ang Doktrina: Mas Dagko nga mga Bata
Doktrina ug mga Pakigsaad 85:6
Ang Espiritu Santo mosulti sa usa ka “ligdong nga hinagawhaw nga tingog.”
Ang kalibutan adunay daghang mga makabalda nga makapahimong lisud sa pagdungog sa Espiritu. Unsaon nimo sa pagtabang ang mga bata nga maminaw sa tingog sa Espiritu?
Posible nga mga Kalihokan
-
Pangutan-a ang mga bata unsay ilang isulti kon ang usa ka tawo mangutana nila kon giunsa nila pagkahibalo kon ang Espiritu Santo nakigsulti kanila. Dapita sila sa pagbasa mahitungod sa usa ka paagi nga gihulagway ni Joseph Smith ang tingog sa Espiritu diha sa Doktrina ug mga Pakigsaad 85:6.
-
Pagpatukar og hinay nga himno o kanta sa mga bata, ug hangyoa ang usa sa mga bata sa pagtag-an unsa nga kanta kini samtang ang uban mohimo og mga makabalda nga mga kasaba, sama sa pagpakpak o pag-undak-undak. Dayon hangyoa ang mga bata sa paghunong, ug hisguti kon sa unsa nga paagi kini sama sa pagpaminaw sa Espiritu Santo sa dihang atong kuhaon ang mga makabalda gikan sa atong kinabuhi. Tabangi ang mga bata sa paghunahuna sa mga makabalda nga ilang makuha aron mobati sa Espiritu kanunay.
Ako makatabang sa pagpundok sa katawhan sa Dios.
Ang sambingay sa trigo ug sa bunglayon mao ang mahitungod “sa katapusang mga adlaw, bisan karon” (Doktrina ug mga Pakigsaad 86:4). Gamita kini nga sambingay sa pagtabang sa mga bata nga mobati nga nadasig sa pag-apil “sa pagpundok sa trigo” (bersikulo 7).
Posible nga mga Kalihokan
-
Sultihi ang mga bata sa sambingay sa trigo ug sa bunglayon, o dapita ang usa ka bata sa pagsulti niini (tan-awa sa Mateo 13:24–30). Dapita ang mga bata sa pagdrowing og usa ka litrato gikan sa sambingay. Dayon basaha pagdungan ang Doktrina ug mga Pakigsaad 86:1–7, ug dapita ang mga bata sa pagsulat sa ilang mga drowing unsay girepresentahan sa butang nga ilang gidrowing.
-
Pag-andam og daghang gagmay nga mga litrato o mga drowing sa trigo, ug tagoi kini libut sa kwarto. Dapita ang matag bata sa pagtabang sa pagpundok sa trigo ug isulat diha niini ang ngalan sa usa ka tawo nga ilang “mapundok” ngadto ni Jesukristo. Unsa ang buot ipasabut sa pagpundok sa mga tawo ngadto ni Jesukristo? Unsa ang pipila ka mga paagi nga mahimo nato kini? Unsa ang gipasabut sa “pagpadayon diha sa pagkamaayo [sa Manluluwas],” ug sa unsa nga paagi kana makatabang nato sa pagpundok og katawhan ngadto Kaniya? (Doktrina ug mga Pakigsaad 86:11).
Ako “makabarug … sa balaan nga mga dapit.”
Ang mga bata nga imong gitudloan moatubang og espirituhanon ug pisikal nga mga kakuyaw sa ilang tibuok kinabuhi. Ikaw makatabang nila pag-andam sa pag-atubang niadto nga mga kakuyaw pinaagi sa pagtudlo nila sa pagpangita ug pagbarug diha sa balaan nga mga dapit.
Ang tulumanon sa templo mao ang usa ka paagi nga kita makatabang sa pagpundok sa katawhan sa Dios.
Posible nga mga Kalihokan
-
Basaha pagdungan ang Doktrina ug mga Pakigsaad 87:6 aron makat-on mahitungod sa mga butang nga gisulti sa Ginoo nga mahitabo sa katapusan nga mga adlaw. Hangyoa ang mga bata sa pagsulti mahitungod sa mga hagit nga giatubang usahay sa mga bata sa ilang pangidaron. Dapita silla sa pagpangita diha sa bersikulo 8 unsay gisulti sa Ginoo nga atong buhaton sa malisud nga mga panahon. Sultihi ang mga bata mahitungod sa balaan nga mga dapit sa inyong kinabuhi.
-
Tabangi ang mga bata nga maghimo og lista sa balaan nga mga dapit, balaan nga mga hunahuna, ug balaan nga mga aksyon nga makatabang kanila sa pag-atubang sa espirituhanong kakuyaw (alang sa mga ideya, tan-awa ang mga video “Standing in Holy Places” and “Stand Ye in Holy Places—Bloom Where You’re Planted,” ChurchofJesusChrist.org). Dapita sila sa pagtipig sa ilang lista uban nila aron matan-aw kini kon gikinahanglan.
Awhaga ang Pagkat-on diha sa Panimalay
Dapita ang mga bata sa pagpili og usa ka butang nga ilang buhaton sa paghimo sa ilang panimalay o sa ilang kinabuhi nga usa ka “balaan nga dapit.”
Pagpalambo sa Atong Pagtudlo
Gamita ang inyong pagkamamugnaon. Ayaw limitahe ang inyong kaugalingon ngadto sa mga ideya sa kalihokan nga gisugyot niini nga outline. Tuguti nga kini nga ideya makapakidlap sa inyong kaugalingong pagkamamugnaon. Hunahunaa ang mahitungod sa unsay makalingaw sa mga bata sa inyong klase ug unsay makatabang nila nga makat-on.