lalaki ug babaye nga nagluto og pagkaon

Agosto 16–22

Doktrina ug mga Pakigsaad 89–92

“Usa ka Baruganan uban sa Saad”

Mainampuong magtuon sa Doktrina ug mga Pakigsaad 89–92, ug irekord ang bisan unsang espirituhanong mga impresyon nga imong madawat. Magmahimong sensitibo kon sa unsang paagi nga “ang Espiritu [magpadayag] sa kamatuoran” nganha nimo samtang magtuon ka sa (Doktrina ug mga Pakigsaad 91:4).

Irekord ang Imong mga Impresyon

Sa Tulunghaan sa mga Propeta, gitudloan ni Propeta Joseph Smith ang mga elder sa Israel mahitungod sa pagtukod sa gingharian sa Dios dinhi sa yuta. Naghisgot sila og espirituhanong mga kamatuoran, dungan nga nag-ampo, nagpuasa, ug nangandam sa pagsangyaw sa ebanghelyo. Apan adunay butang mahitungod sa palibut nga siguro morag katingad-an nato karon, ug morag dili usab kadto husto alang ni Emma Smith. Atol sa mga miting, ang kalalakin-an manigarilyo ug mag-usap og tabako, nga kasarangan nianang panahona, apan nakamantsa kini og itum sa mga salog nga kahoy ug nagpabilin og isug nga baho. Gipaambit ni Emma ang iyang mga kabalaka ngadto ni Joseph, ug nangutana si Joseph sa Ginoo. Ang resulta mao ang usa ka pagpadayag nga sobra pa sa panigarilyo ug mantsa sa tabako. Mihatag kini sa mga Santos, sulod sa mga henerasyon nga moabut og, “usa ka baruganan uban sa saad”—mga saad sa pisikal nga kahimsog, “kaalam,” ug “dako nga mga bahandi sa kahibalo” (Doktrina ug mga Pakigsaad 89:3, 19).

Tan-awa usab sa Mga Santos, 1:189–92.

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 89

Ang Pulong sa Kaalam “usa ka baruganan uban sa saad.”

Sa dihang ang mga elder sa Tulunghaan sa mga Propeta unang nakadungog nga gibasa ni Joseph Smith ang Pulong sa Kaalam, dali silang “miitsa sa ilang mga hunsoy ug mga pudyot sa usapunong tabako ngadto sa kalayo” (Mga Santos, 1:192). Nianang panahona, ang Pulong sa Kaalam mas gikonsiderar nga usa ka pasidaan kay sa usa ka sugo, apan gusto nilang ipakita ang ilang kaandam nga mosunod. Siguro imo nang “giitsa” gikan sa imong kinabuhi ang mga butang nga gipasidaan sa Pulong sa Kaalam, apan unsa pa man ang imong nakat-unan gikan niining pagpadayag? Ikonsiderar kini nga mga ideya:

• Pangitaa ang mga hugpong sa mga pulong nga wala siguro nimo mabantayi—o mahunahunai og maayo—kaniadto. Unsa ang imong nakat-unan gikan niini?

• Ang Doktrina ug mga Pakigsaad 89 naglakip sa pipila ka mga saad (tan-awa sa mga bersikulo 18–21). Unsa kaha ang buot ipasabut niining mga saad?

• Unsa ang gitudlo niining pagpadayag kanimo mahitungod sa Ginoo?

• Unsa nga mga ehemplo ang imong nakita sa “mga dautan ug sa mga laraw … diha sa mga kasingkasing sa dautan nga mga tawo”? (bersikulo 4).

• Hunahunaa ang pagpadayag isip “usa ka baruganan uban sa saad” (bersikulo 3)—malungtarong mga kamatuoran nga mogiya sa paghimo og desisyon—dili lamang kay usa ka lista sa mga angayang buhaton ug mga dili angayang buhaton. Unsa nga mga baruganan ang imong nakit-an nga makagiya sa imong mga desisyon?

Ang moderno nga mga propeta mipasidaan usab bahin sa makadaut nga mga butang ug mga kinaiya gawas niadtong gihisgutan diha sa Pulong sa Kaalam (tan-awa sa “Pisikal ug Emosyonal nga Kahimsog,” Alang sa Kalig-on sa mga Kabatan-onan, 25–27). Unsa ang giaghat nga imong buhaton aron mas maatiman ang imong hunahuna ug lawas?

Tan-awa usab sa Daniel 1; 1 Mga Taga-Corinto 6:19–20; Gospel Topics, “Word of Wisdom,” topics.ChurchofJesusChrist.org; addictionrecovery.ChurchofJesusChrist.org.

mga batang lalaki nga nanagan diha sa baybayon

Ang Pulong sa Kaalam nagtudlo kanato sa pag-atiman sa atong mga lawas.

Doktrina ug mga Pakigsaad 90:1–17

Ang Unang Kapangulohan naghupot sa “mga yawe sa gingharian.”

Diha sa seksyon 90, ang Ginoo mihatag og mga instruksyon mahitungod “sa pangalagad ug sa kapangulohan” (bersikulo 12) nila ni Joseph Smith, Sidney Rigdon, ug Frederick G. Williams—mga sakop sa unsay gitawag nato karon og Unang Kapangulohan. Unsay imong nakat-unan mahitungod sa Unang Kapangulohan gikan sa mga bersikulo 1–17? Ribyuha ang bag-ong mga mensahe gikan sa mga sakop sa Unang Kapangulohan. Sa unsang paagi nga ang ilang mga pulong “nagpakita sa mga misteryo sa gingharian” nganha nimo? (bersikulo 14). Sa unsang paagi nga sila “motukod sa kahan-ayan sa tanan nga mga kalihokan niini nga simbahan ug gingharian”? (bersikulo 16).

Tan-awa usab sa Henry B. Eyring, “Ang Kalig-on nga Naggikan sa Hugot nga Pagtuo diha sa Pagpaluyo,” Liahona, Mayo 2019, 58–60.

Doktrina ug mga Pakigsaad 90:24

“Ang tanan nga mga butang maghiusa sa paglihok alang sa [akong] kaayohan.”

Pamalandunga ang bisan unsa nimong mga kasinatian nga nagpamatuod sa saad sa Ginoo diha sa Doktrina ug mga Pakigsaad 90:24. Ikonsiderar ang pagrekord sa imong mga kasinatian ug ipaambit kini ngadto sa usa ka sakop sa pamilya o minahal sa kinabuhi—siguro usa ka tawo nga nagkinahanglan og kasiguroan o pag-awhag. Kon adunay mga panalangin nga imo pang gihulat, pamalandungi kon unsay imong mabuhat aron magpabiling matinud-anon samtang maghulat ka aron makita kon sa unsang paagi nga ang “tanan nga mga butang maghiusa sa paglihok alang sa imong kaayohan.”

Doktrina ug mga Pakigsaad 90:28–31

Kinsa man si Vienna Jaques?

Si Vienna Jaques natawo niadtong Hunyo 10, 1787, didto sa Massachusetts. Usa ka babaye nga adunay hugot nga pagtuo kinsa adunay daghang salapi, unang nahimamat ni Vienna ang mga misyonaryo niadtong 1831. Human makabaton og espirituhanong pagsaksi nga ang ilang mensahe tinuod, mibiyahe siya aron mahimamat ang Propeta didto sa Kirtland, Ohio, diin siya nabunyagan.

Gituman ni Vienna ang tambag sa Ginoo ngadto kaniya diha sa Doktrina ug mga Pakigsaad 90:28–31. Ang iyang pagpahinungod ngadto sa Ginoo, lakip na sa mga donasyon nga iyang gihatag sa sayo pa didto sa Kirtland, miabut sa mahinungdanong panahon alang sa Simbahan, sa dihang ang mga lider misulay sa pagpalit sa yuta diin pagatukuron ang Templo sa Kirtland. Si Vienna usa ka “matinud-anon, ug dili … tapulan” sa tibuok niyang kinabuhi ug sa katapusan nakahimo sa “[pag]pahimutang diha sa kalinaw” (bersikulo 31) didto sa Walog sa Salt Lake, diin siya namatay sa edad nga 96.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 89.Ang mga sakop sa imong pamilya mahimong malingaw nga magdrowing o mangita og mga litrato sa mga pagkaon ug ubang mga butang nga gihisgutan diha sa Doktrina ug mga Pakigsaad 89. Dayon mahimo kamong magdula—ang mga sakop sa pamilya mahimong magpuli-puli sa pagpili og bisan unsang mga litrato, nga mosulod sa mga butang nga kinahanglang dili nato buhaton diha sa basurahan ug sa mga butang nga kinahanglan natong gamiton diha sa usa ka plato. Sa unsang paagi nga ang mga saad sa mga bersikulo 18–21 natuman diha sa atong kinabuhi?

Ang pagbasa sa “Pisikal ug Emosyonal nga Kahimsog” sa Alang sa Kalig-on sa mga Kabatan-onan (25–27) makapaaghat og panaghisgutan mahitungod sa ubang mga paagi sa pag-atiman sa atong kahimsog ug mahitungod sa mga panalangin nga gisaad sa Dios.

Doktrina ug mga Pakigsaad 90:5.Hisguti kon giunsa nimo “[pag]dawat sa mga orakulo [mga pagpadayag o mga propeta] sa Dios.” Unsaon nato pagpakita nga kini dili “usa ka butang nga walay bili” ngari nato?

Doktrina ug mga Pakigsaad 91.Mahimo nimong hisgutan kon sa unsang paagi nga ang tambag sa Ginoo mahitungod sa Apokripa (tan-awa sa mga bersikulo 1–2) magamit sa media nga gisagubang karon sa imong pamilya (tan-awa usab sa Giya ngadto sa mga Kasulatan, “Apokripa,” scriptures.ChurchofJesusChrist.org). Mahimo usab nimong ipaambit ang personal nga mga kasinatian sa dihang ang “[pag]kadawat og kahibalo pinaagi sa Espiritu” (bersikulo 5) nakatabang nimo nga maila ang kamatuoran ug sayop.

Doktrina ug mga Pakigsaad 92:2.Unsay gipasabut sa pagkahimong “usa ka madasigon nga sakop” sa Simbahan?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Ang Ginoo Naghatag Kanako og Templo,” Songbook sa mga Bata, 73.

Pagpalambo sa Atong Pagtudlo

Gamita ang nagkadaiyang klase. Pangita og lain-laing mga paagi sa pagpaapil sa imong pamilya sa pamilya nga pagtuon sa kasulatan. Pananglitan, ang mga sakop sa pamilya mahimong mokanta og mga himno o mga awit sa mga bata nga may kalabutan sa usa ka bersikulo, magdrowing og mga hulagway bahin sa unsay ilang nabasa, o mo-summarize og usa ka bersikulo sa ilang kaugalingong mga pulong.

mga prutas ug mga utanon

“Ang tanan nga mga santos kinsa … [mo]buhat niini nga mga panultihon, maglakaw nga masulundon sa mga sugo, makadawat og maayo nga panglawas ug uyok sa ilang mga kabukogan” (Doktrina ug mga Pakigsaad 89:18).