Nakakita si Esteban sa Dios ug ni Jesukristo

Akong Nakita ang Anak sa Tawo nga Nagbarug sa Tuo nga Kamot sa Dios, ni Walter Rane

Agosto 23–29

Doktrina ug mga Pakigsaad 93

“Makadawat sa Iyang Kahingpitan”

Doktrina ug mga Pakigsaad 93 nagtudlo nga ang “kamatuoran mao ang kahibalo sa mga butang ingon nga sila mao karon, ug ingon nga sila mao sa kaniadto, ug ingon nga sila mao sa umaabut” (bersikulo 24). Samtang ikaw magtuon niini nga seksyon, pangita og kamatuoran ug i-rekord unsay imong nakat-unan. Unsay andam nimong buhaton aron makadawat og kamatuoran? (tan-awa sa mga bersikulo 27–28).

I-rekord ang Imong mga Pagbati

“Kon ikaw mosaka og hagdanan,” si Joseph Smith mitudlo, “ikaw kinahanglan magsugod sa ubos, ug motikang sa kada ang-ang, hangtud ikaw moabut sa ibabaw; ug ingon usab niini ang mga prinsipyo sa ebanghelyo—kinahanglan nga ikaw magsugod sa sinugdanan, ug mopadayon hangtud nga ikaw makakat-on sa tanang mga prinsipyo sa kahimayaan” (Mga Pagtulun-an sa mga Presidente sa Simbahan: Joseph Smith [2007], 323).

Usahay kana nga hagdanan sa kahimayaan ingon og imposible ka taas, apan kita gipakatawo sa pagsaka ngadto sa tumoy. Bisan unsa pa ang mga babag nga atong makita sa atong mga kaugalingon, ang Langitnong Amahan ug ang Iyang Anak nakakita og usa ka butang nga mahimayaon diha kanato, usa ka butang nga diosnon. Sama lamang nga si Jesukristo “diha na sa sinugdanan uban sa Amahan,” busa “kamo usab” (Doktrina ug mga Pakigsaad 93:21, 23). Sama lamang nga Siya “nakaangkon og grasya ug dugang pa nga grasya, hangtud nga siya nakadawat og kahingpitan,” busa usab “ikaw makaangkon og grasya ug dugang pa nga grasya” (mga bersikulo 13, 20). Ang gipahiuli nga ebanghelyo nagtudlo kanato mahitungod sa tinuod nga kinaiyahan sa Dios, ug busa kini nagtudlo usab kanato mahitungod sa atong mga kaugalingon ug unsa kita mamahimo. Bisan pa sa mga paningkamut sa “usa ka dautan” (bersikulo 39)—ug bisan pa unsay imong gibati nga kulang kanimo—ikaw sa tinuod anak sa Dios nga adunay kahimoan nga “sa tukma nga higayon makadawat sa iyang kahingpitan” (bersikulo 19).

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 93

Atong gisimba ang Dios nga Amahan ug ang Iyang Anak, si Jesukristo.

Namulong kabahin sa pagpadayag diha sa Doktrina ug mga Pakigsaad 93, ang Ginoo mipasabut sa katuyoan sa pagpadayag, “Ako mihatag nganha kanimo niini nga mga sanglitanan aron ikaw masayud ug makahibalo unsaon sa pagsimba, ug masayud unsa ang imong gisimba, nga aron ikaw makaadto ngadto sa Amahan diha sa akong ngalan, ug sa tukma nga higayon makadawat sa iyang kahingpitan” (bersikulo 19). Samtang ikaw magtuon niini nga pagpadayag, markahi ang mga kamatuoran nga imong makaplagan mahitungod sa mga Binuhat nga atong gisimba: Dios nga Amahan ug ang Iyang Anak, si Jesukristo. Unsa ang imong nakat-unan mahitungod kon “unsaon sa pagsimba” Kanila? mahitungod kon unsaon sa “pagduol ngadto sa Amahan”?

Mitudlo si Propeta Joseph Smith, “Kon ang mga tawo dili makasabut sa kinaiya sa Dios, sila wala makasabut sa ilang kaugalingon” (Mga Pagtulun-an: Joseph Smith, 46–47). Samtang kamo nagkat-on mahitungod sa Manluluwas pinaagi sa pagtuon sa Doktrina ug mga Pakigsaad 93, pangita usab unsay imong nakat-unan mahitungod sa imong kaugalingon. Sama pananglit, unsay imong nakat-unan mahitungod Kaniya gikan sa mga bersikulo 3, 12, 21, ug 26? Unsa nga susamang mga kamatuoran ang imong nakaplagan mahitungod sa imong kaugalingon diha sa mga bersikulo 20, 23, ug 28–29? (Tan-awa usab sa 1 Juan 3:2; 3 Nephi 27:27; Dean M. Davies, “Ang mga Panalangin sa Pagsimba,” Liahona, Nob. 2016, 93–95.)

Doktrina ug mga Pakigsaad 93:1–39

Ang himaya sa Dios mao ang kahayag ug kamatuoran.

Tingali imong namatikdan nga ang himaya, kahayag, ug kamatuoran kanunay mahisgutan niini nga pagpadayag. Samtang imong gitun-an ang mga bersikulo 21–39 sa piho, paghimo og lista sa mga kamatuoran nga imong nakat-unan mahitungod sa himaya, kahayag, ug kamatuoran. Giunsa niini nga mga kamatuoran pagdasig kanimo sa pagpaningkamot og mas dako nga kahayag ug kamatuoran? Sa unsa nga paagi kaha kini nga mga kamatuoran nakaapekto sa paagi nga ikaw nagpuyo sa imong inadlaw-adlaw nga kinabuhi?

bildo nga bintana

Madawat nato ang kahayag ug kamatuoran kon mosunod kita sa mga sugo sa Dios.

Doktrina ug mga Pakigsaad 93:40–50

“Mopahimutang diha sa kahusay sa imong kaugalingon nga balay.”

Mahitungod diha sa bersikulo 40, Doktrina ug mga Pakigsaad 93 ingon og nausab gikan sa pagtudlo mahitungod sa himaya sa Dios ug sa atong balaang kalagmitang mahimo ngadto sa panudlo mahitungod sa pagkaginikanan ug sa pagpahimutang sa atong mga balay sa kahusay. Giunsa sa mga pagtulun-an sa Ginoo mahitungod sa kahayag, kamatuoran, ug himaya diha sa mga bersikulo 1–39 pagtabang kanimo sa pagsabut ug pagsunod sa tambag diha sa mga bersikulo 40–50?

Tan-awa usab sa David A. Bednar, “Labaw nga Makugihon ug Mabuhaton diha sa Panimalay,” Liahona, Nob. 2009, 17–20.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 93:2.Sa unsang paagi si Jesukristo nahimong usa ka “tinuod nga kahayag” sa atong mga kinabuhi? Giunsa nimo pagkakita sa Iyang kahayag diha sa ubang mga tawo nga naglibut kanato?

Doktrina ug mga Pakigsaad 93:3–29.Sa pagtabang sa imong pamilya paghisgot unsay ilang nakat-unan diha sa seksyon 93 mahitungod sa Manluluwas ug sa ilang mga kaugalingon, makadula kamo og usa ka pares-pares nga dula. Sama pananglit, makaandam ka og usa ka pundok sa mga kard nga may mga bersikulo gikan sa seksyon 93 nga nagtudlo og mga kamatuoran mahitungod sa Manluluwas (tan-awa sa mga bersikulo 3, 12, 21, 26) ug lain nga pundok nga nagtudlo og usa ka butang nga susama mahitungod sa atong mga kaugalingon (tan-awa sa mga bersikulo 20, 23, 28–29). Ang mga sakop sa pamilya makapuli-puli sa pagpunit og kard gikan sa matag pundok, pagbasa sa mga bersikulo, ug pagpaninguha sa pagpangita og mga kamatuoran nga nagpares. Giunsa niini nga mga kamatuoran pag-impluwensya ang paagi sa atong pagbati mahitungod sa Manluluwas ug mahitungod sa atong mga kaugalingon?

Doktrina ug mga Pakigsaad 93:12–13, 20.Unsa ang buot ipasabut sa pagdawat og “grasya ug dugang pa nga grasya” ug sa pagpadayon “gikan sa grasya ug dugang pa nga grasya”? (mga bersikulo 12–13). Unsay gisugyot niini nga mga bersikulo mahitungod sa paagi nga kita magtubo ug magkat-on? Sa unsa nga paagi nga ang pagkahibalo niini makaapekto sa paagi sa atong pagtratar sa uban––ug sa atong mga kaugalingon?

Doktrina ug mga Pakigsaad 93:24.Basaha ang katin-awan sa kamatuoran nga makaplagan dinhi niini nga bersikulo, ug dapita ang mga sakop sa pamilya sa pagpakigbahin og usa ka butang gikan sa seksyon 93 nga ilang gihunahuna nga usa ka bililhong kamatuoran. Unsa ang ubang mga katin-awan sa kamatuoran nga atong makaplagan diha sa Juan 14:6; Jacob 4:13; o usa ka himno mahitungod sa kamatuoran, sama sa “Sulti, Unsa ang Kamatuoran?” (Mga Himno, nu. 170).

Doktrina ug mga Pakigsaad 93:40.Tingali kon imong basahon kini nga bersikulo, ang imong pamilya makakanta og usa ka awit mahitungod sa pagkat-on diha sa panimalay, sama sa “Tudloi Ko sa Paglakaw sa Kahayag” (Songbook sa Mga Bata, 70). Ang gagmay nga mga bata tingali mahimuot sa paghimo og mga aksyon nga motukma sa mga pulong. Unsa ang gibati nimong gidasig nga buhaton aron sa pagdapit pa og dugang nga “kahayag ug kamatuoran” ngadto sa inyong panimalay?

Doktrina ug mga Pakigsaad 93:41–50.Pagtinambagay isip usa ka pamilya mahitungod sa unsa kaha ang dili “matarung diha sa imong balay.” Unsa ang atong mabuhat nga “mopahimutang diha sa kahusay sa [atong] balay”? (mga bersikulo 43–44).

Alang sa dugang nga mga ideya sa pagtudlo sa mga bata, tan-awa sa latid [outline] niini nga semana sa Dali, Sunod Kanako—Alang sa Primary.

Gisugyot nga awit: “Ako Anak sa Dios,” Songbook sa mga Bata, 2–3.

Pagpalambo sa Atong Pagkat-on

Basaha sobra sa kausa. Mahimong pilion nimo pagbasa ang Doktrina ug mga Pakigsaad 93 sobra sa kausa sulod sa semana. Sa matag higayon nga ikaw magbasa, mahimong makamatikod ka nga lainlaing mga kamatuoran importante nganha kanimo o nagdasig kanimo sa bag-ong paagi. Ang pagbasa sa makadaghang mga higayon mohatag usab og mga oportunidad alang kanimo sa pagpamalandong pa og lawom.

Jesukristo

Kahayag ug Kamatuoran, ni Simon Dewey