Templo sa Kirtland, ni Al Rounds

Agosto 30–Septyembre 5

Doktrina ug mga Pakigsaad 94–97

“Alang sa Kaluwasan sa Zion”

Unsa nga mga baruganan ug doktrina ang nakadani kanimo samtang ikaw nagtuon sa Doktrina ug mga Pakigsaad 94–97? Siguroha ang pagrekord sa imong mga pagbati.

I-rekord ang Imong mga Pagbati

Sa dihang gimandoan sa Ginoo si Moises sa pagtukod og tabernakulo, gisultihan Niya si Moises nga “tanan pagahimoon nga mahisubay sa sumbanan nga gipakita [kaniya] didto sa bukid” (Mga Hebreohanon 8:5; tan-awa usab sa Exodo 25:8–9). Ang tabernakulo mao ang mahimong sentro sa kampo sa Israel sa kamingawan (tan-awa sa Numeros 2:1–2). Sa kadugayan, gimandoan sa Dios si Solomon ug ang iyang mga katawhan sa pagtukod og usa ka templo sumala sa sumbanan nga Iyang gipadayag (tan-awa sa 1 Cronicas 28:12, 19).

Samtang gipahiuli sa Ginoo ang ebanghelyo, gimandoan Niya si Joseph Smith sa pagtukod og mga templo sumala sa gipadayag nga sumbanan. “Himoa ang pagtukod sa balay, nga dili sama sa paagi sa kalibutan,” mipahayag ang Ginoo. “Himoa nga kini matukod sama sa paagi nga Ako mipakita” (Doktrina ug mga Pakigsaad 95:13–14; tan-awa usab sa 97:10). Sama sa tabernakulo diha sa kamingawan, ang templo gituyo nga mahimong labing mahinungdanon nga timaan diha sa Kirtland (tan-awa sa Doktrina ug mga Pakigsaad 94:1).

Karon ang mga balay sa Ginoo makaplagan sa tibuok kalibutan. Bisan og wala sila sa sentro sa atong mga siyudad, kini mahimo nga sentro sa atong mga kinabuhi. Bisan og ang mga templo nagkalahi og dagway, diha niini kita nakakat-on sa samang balaan nga sumbanan––usa ka langitnong plano sa pagdala og balik kanato ngadto sa presensya sa Dios. Sagrado, mahangturon nga mga ordinansa nagtabang kanato sa pagtukod sa atong mga kinabuhi ug sa paglig-on sa atong mga pamilya nga “dili sama sa paagi sa kalibutan” apan sama sa paagi nga Ako mipakita kaninyo.

Tan-awa sa Mga Santos, 1:193–94; “A House for Our God,” Revelations in Context, 165–73.

Mga Ideya alang sa Personal nga Pagtuon sa Kasulatan

Doktrina ug mga Pakigsaad 94; 97:15–17

Ang Ginoo makauban kanako sa akong matag adlaw nga kinabuhi.

Ang mga panudlo diha sa Doktrina ug mga Pakigsaad 94 ug 97 gihatag sa samang adlaw—Agosto 2, 1833. Seksyon 97 naghisgot og gamay sa usa ka templo nga giplano alang sa Jackson County, Missouri, samtang ang seksyon 94 naghisgot sa administratiba nga mga gambalay sa Kirtland, Ohio. Tingali imong mamatikdan ang pipila ka mga pagkasusama sa unsay gisulti sa Ginoo mahitungod niining nagkalainlaing mga matang sa mga gambalay (tan-awa sa Doktrina ug mga Pakigsaad 94:2–12; 97:10–17). Samtang ikaw mamalandong niini nga mga panudlo, hunahunaa unsay imong mabuhat sa pagsinati og mas kanunay sa himaya ug presensya sa Ginoo, sa sulod sa mga gambalay sa Simbahan ug sa imong inadlaw-adlaw nga kinabuhi.

Doktrina ug mga Pakigsaad 95

Ang Ginoo nagpanton niadtong Iyang gihigugma.

Mga lima ka mga bulan ang milabay sukad sa Enero 1833, sa dihang gimandoan sa Ginoo ang mga Santos sa Kirtland sa pagtukod og usa ka balay sa Dios ug sa paghimo og solemne nga panagtigum (tan-awa sa Doktrina ug mga Pakigsaad 88:117–19). Sa dihang ang pagpadayag nga girekord sa seksyon 95 nadawat sa Hunyo 1833, wala pa nila lihoka kana nga sugo. Unsay imong nakat-unan gikan sa paagi ang Ginoo mipanton sa mga Santos diha niini nga pagpadayag? Aduna bay mga sugo o mga pulong sa pagtambag nga wala pa nimo lihoka? Unsa ang gibati nimong gidasig nga buhaton?

Tan-awa usab sa D. Todd Christofferson, “Ako Nagabadlong ug Nagapanton sa Akong Gihigugma,” Liahona, Mayo 2011, 97–100.

Doktrina ug mga Pakigsaad 95:8, 11–17; 97:10–17

Diha sa templo ang Dios nagpanalangin sa Iyang mga katawhan.

Human napanton sa wala pagtukod og usa ka balay sa Ginoo sa Kirtland, ang mga lider sa Simbahan mipili og usa ka luna sa umahan sa trigo diin sila motukod. Si Hyrum Smith, ang igsoong lalaki sa Propeta, dihadiha midagan aron pagkuha og sanggot ug misugod sa paglimpyo sa umahan. “Nangandam kami sa pagtukod og usa ka balay sa Ginoo,” miingon siya, “ug ako determinado nga maoy makauna sa pagtrabaho” (sa Mga Pagtulun-an sa mga Presidente sa Simbahan: Joseph Smith [2007], 329). Pamalandunga ang kahinam ni Hyrum samtang magbasa ka sa Doktrina ug mga Pakigsaad 95:8, 11–17; 97:10–17. Unsa ang imong nakaplagan nga nagdasig og susama nga determinasyon diha kanimo sa pagdawat sa mga panalangin sa templo?

Hyrum Smith Naghawan sa Yuta, ni Joseph Brickey

Doktrina ug mga Pakigsaad 97:18–28

Ang Zion mao “ang putli og kasingkasing.”

Si Propeta Joseph Smith mipahayag, “Maoy atong tinguha nga matukod ang Zion isip atong pinakamahinungdanon nga katuyoan” (Mga Pagtulun-an: Joseph Smith, 221). Ngadto sa mga Santos sa mga 1830, ang Zion usa ka dapit, ang tinuod nga “dakbayan sa atong Dios” (Doktrina ug mga Pakigsaad 97:19). Apan diha sa pagpadayag nga girekord sa seksyon 97, gipauswag sa Ginoo kana nga panan-aw. Ang Zion usab naghulagway og katawhan—“ang putli og kasingkasing” (bersikulo 21). Samtang ikaw magbasa sa mga bersikulo 18–28, hunahunaa ang mahitungod niini nga katin-awan kon imong basahon ang pulong “Zion.” Unsa ang kahulugan niini nganha kanimo nga magputli og kasingkasing? Giunsa sa templo pagtabang nga matuman “ang kaluwasan sa Zion”? (bersikulo 12).

Tan-awa usab sa Moises 7:18; Gospel Topics, “Zion,” topics.ChurchofJesusChrist.org.

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 95:8.Giunsa nga ang paghimo ug pagsunod og mga pakigsaad sa templo nagdala og “gahum gikan sa kahitas-an” nganhi sa atong mga kinabuhi? Tingali ang mga sakop sa pamilya makahimo sa pagpakigbahin kon unsa ang ilang gibati mahitungod sa templo o sa pagpakigbahin og mga kasinatian kon ilang gibati nga napanalanginan og “gahum gikan sa kahitas-an” pinaagi sa pagsimba diha sa templo.

Aron sa pagtabang niadtong nangandam sa pagsulod sa templo, mahimo kang moribyu sa mga video, litrato, ug mga panudlo diha sa temples.ChurchofJesusChrist.org. Aron sa pagtabang sa mga kabataan sa pagkat-on mahitungod sa templo, mahimo kang mogamit sa “Ang Inyong Agianan Padulong sa Templo” (sa Mga Templo sa Ang Simbahan ni Jesukristo sa mga Santos sa Ulahing mga Adlaw [espesyal nga isyu sa Liahona, Okt. 2010], 72–75).

Doktrina ug mga Pakigsaad 95:1–11.Unsa ang atong makat-unan mahitungod sa pagpanton gikan niini nga mga bersikulo? Unsa ang atong nakat-unan mahitungod sa Ginoo? Giunsa niini nga mga panabut pag-apekto sa paagi nga kita modawat sa pagpanton o mopanton sa uban?

Doktrina ug mga Pakigsaad 97:8.Sumala niini nga mga bersikulo, unsaon nato nga kita “pagadawaton” sa Ginoo? Sa unsa nga paagi kana lahi gikan sa pagadawaton sa kalibutan? Unsa ang gipasabut sa “pagtuman sa [atong] mga pakigsaad pinaagi sa sakripisyo”? Giunsa nato paghimo niini?

Doktrina ug mga Pakigsaad 97:10–21.Si Propeta Joseph Smith mitudlo, “Bisan asa nga dapit diin ang mga Santos nagpundok mao ang Zion, diin ang matag matarung nga tawo nagtukod og dapit sa kaluwasan alang sa iyang mga anak” (Mga Pagtulun-an: Joseph Smith, 221). Unsaon nato pagtukod og Zion sa atong panimalay? Unsa nga mga baruganan ang atong makaplagan sa Doktrina ug mga Pakigsaad 97:10–21? Isip usa ka pamilya, pagpili og usa ka baruganan nga hatagan og importansya niini nga semana.

Alang sa dugang nga mga ideya sa pagtudlo sa mga bata, tan-awa sa latid [outline] niini nga semana sa Dali, Sunod Kanako—Alang sa Primary.

Gisugyot nga awit: “Gusto ko nga Makita ang Templo,” Songbook sa mga Bata, 99.

Pagpalambo sa Personal nga Pagtuon

I-rekord ang imong mga kasinatian. I-rekord ang mga kasinatian nga ikaw aduna sa mga baruganan ug doktrina nga ikaw nagkat-on. Kini nga mga kasinatian mahimong kabahin sa usa ka personal nga kasaysayan nga mopanalangin sa umaabut nga mga henerasyon.

Pagtukod sa Templo sa Kirtland, ni Walter Rane