C. C. A. Christensen (1831–1912), Mga Santos Giabug gikan sa Jackson County Missouri, mga 1878, pintal diha sa muslin nga panapton, 77 ¼ × 113 ka pulgada [196x287 sentimetro]. Brigham Young University Museum of Art, gasa sa mga apo ni C. C. A. Christensen, 1970

Septyembre 6–12

Doktrina ug mga Pakigsaad 98–101

“Pagmalinawon ug Hibaloi nga Ako Mao ang Dios”

Samtang ikaw nagbasa sa Doktrina ug mga Pakigsaad 98–101, paminaw ngadto sa mga hunahuna ug mga pagbati nga moabut. Unsaon kaha nga ang paglihok niini motabang kanimo nga mahimong ang tawo nga ang Dios gusto kanimo nga mahimo?

I-rekord ang Imong mga Pagbati

Alang sa mga Santos sa mga 1830, ang Indepencence, Missouri, mao sa tinuod ang gisaad nga yuta. Kini mao ang “tunga-tunga nga dapit” sa Zion (tan-awa sa Doktrina ug mga Pakigsaad 57:3)––ang siyudad sa Dios sa yuta–– diin sila mihimo og dakong sakripisyo sa pagtukod. Ngadto kanila, ang pagpundok sa mga Santos didto usa ka makapaukyab ug mahimayaon nga pasiuna sa Ikaduhang Pag-anhi. Apan ang ilang mga silingan sa lugar nakakita sa mga butang sa lahi nga paagi. Sila misupak sa pangangkon nga gihatag sa Dios ang yuta ngadto sa mga Santos, ug sila wala mahimutang sa politikal, ekonomiya, ug sosyal nga mga sangputanan sa daghang mga tawo gikan sa wala mailhi nga relihiyon nga mibalhin og dali ngadto sa lugar. Wala madugay ang kabalaka nahimong mga hulga, ug ang mga hulga nahimong mga panggukod ug kapintas. Sa Hulyo 1833, ang opisina nga imprintahanan sa Simbahan giguba, ug sa pagka-Nobyembre gipugos ang mga Santos sa pagbiya sa ilang mga panimalay sa Jackson County, Missouri.

Si Joseph Smith sobra sa 800 ka milya [1,288 ka kilometro] ka layo sa Kirtland, ug kini nga balita mokabat og mga semana nga moabut kaniya. Apan nasayud ang Ginoo unsa ang nanghitabo, ug gipadayag Niya ngadto sa Iyang Propeta ang mga baruganan sa kalinaw ug pag-awhag nga mohupay sa mga Santos––mga baruganan nga makatabang usab kon kita nagsinati og pagpanggukod, kon ang atong matarung nga mga tinguha wala matuman, o kon kita nanginahanglan og pahinumdum nga ang atong inadlaw-adlaw nga mga kasakit mahimo sa kadugayan, sa usa ka paagi, “molihok alang sa [atong] kaayohan” (Doktrina ug mga Pakigsaad 98:3).

Tan-awa sa Mga Santos, 1:195–206; “Waiting for the Word of the Lord,” Revelations in Context, 196–201.

Mga Ideya alang sa Personal nga Pagtuon sa Kasulatan

Doktrina ug mga Pakigsaad 98:1–3, 11–14; 101:1–16

Ang akong mga pagsulay magkahiusa sa paglihok alang sa akong kaayohan.

Ang pipila sa atong mga kasakit sa kinabuhi naingon pinaagi sa atong kaugalingon nga mga pagpili. Ang uban naingon pinaagi sa mga pagpili sa uban. Ug usahay walay usa nga mabasol––ngil-ad nga mga butang mahitabo lang gyud. Walay pagsapayan sa nakaingon, ang kalisdanan makatabang sa pagtuman sa balaang mga katuyoan. Samtang ikaw nagbasa unsay gisulti sa Ginoo mahitungod sa mga kalisud sa mga Santos diha sa Doktrina ug mga Pakigsaad 98:1–3, 11–14 ug 101:1–16, unsa ang imong nakaplagan nga makatabang kanimo sa imong mga pagsulay? Unsaon niini nga mga bersikulo pag-impluwensya sa paagi nga ikaw nagtan-aw sa mga hagit nga imong gisinati? Pamalandonga giunsa sa imong mga pagsulay paghiusa sa paglihok alang sa imong kaayohan ug pagtuman sa mga katuyoan sa Dios diha sa imong kinabuhi.

Tan-awa usab sa 2 Nephi 2:2; Doktrina ug mga Pakigsaad 90:24.

Doktrina ug mga Pakigsaad 98:23–48

Ang Ginoo gusto kanako nga mangita og kalinaw diha sa Iyang paagi.

Bisan dili ang tanan diha sa Doktrina ug mga Pakigsaad 98:23–48 magamit sa imong personal nga pakigdait ngadto sa uban, unsa nga mga baruganan ang imong makaplagan nga makagiya kanimo kon ang ubang mga tawo mobugal-bugal kanimo? Kini mahimo nga makatabang sa pagmarka sa mga pulong o hugpong sa mga pulong nga naghulagway kon unsa ka gusto sa Ginoo nga modumala sa panagbangi sa Missouri.

Tan-awa usab sa Jeffrey R. Holland, “Ang Pangalagad sa Pagpasig-uli (Reconciliation),” Liahona, Nob. 2018, 77–79.

Detalye gikan sa Christ and the Rich Young Ruler [Si Kristo ug ang Adunahan nga Batan-ong Magmamando], ni Heinrich Hofmann

Doktrina ug mga Pakigsaad 100

Ang Ginoo nag-amuma niadtong kinsa nagserbisyo Kaniya.

Pipila ka semana lamang human nahibaloan ni Joseph ang kabahin sa pagpanggukod didto sa Missouri, usa ka bag-o nga kinabig mihangyo kaniya sa pagbiyahe ngadto sa Canada aron sa pagpakigbahin sa ebanghelyo uban sa iyang mga anak nga lalaki. Misugot si Joseph, bisan og siya naguol mahitungod sa pagbiya sa iyang pamilya, ilabi na tungod sa pagpanggukod ug mga pagpanghulga ngadto sa iyang pamilya ug sa Simbahan. Sa ilang pagpadulong ngadto sa Canada, si Joseph ug ang iyang kauban, si Sidney Rigdon, nag-ampo alang sa kahupayan, ug ang seksyon 100 mao ang tubag sa Ginoo ngadto kanila. Unsa ang imong nakaplagan diha sa tubag sa Ginoo nga mahimong mipaniguro ug mitabang kanila?

Tingali ikaw usab adunay mga kasinatian nga gikinahanglan ang imong pagtimbang-timbang sa imong kabalaka alang sa imong mga responsibilidad sa Simbahan ug sa kabalaka alang sa imong pamilya. Unsaon kaha sa mga pulong sa Ginoo diha sa seksyon 100 pagtabang kanimo sa ingon nga mga sitwasyon?

Tan-awa usab sa “A Mission to Canada,” Revelations in Context, 202–7.

Doktrina ug mga Pakigsaad 101:43–65

Ang pagsunod sa tambag sa Dios nagtabang kanako nga luwas.

Ang sambingay diha sa Doktrina ug mga Pakigsaad 101:43–62 gihatag aron sa pagpasabut kon ngano ang Ginoo mitugot sa mga Santos nga pagaabugon gawas sa Zion. Samtang nagbasa ka niini nga mga bersikulo, nakakita ka ba og mga pagkasusama sa imong kaugalingon ug sa mga sulugoon diha sa sambingay? Mahimo nimong pangutan-on ang imong kaugalingon: Ako ba sukad nagduha-duha sa mga sugo sa Dios? Sa unsang paagi nga ang kakulang sa hugot nga pagtuo o pasalig nagtugot “sa kaaway” sa pagbaton og impluwensya sa akong kinabuhi? Unsaon nako pagpakita sa Dios nga ako “andam nga magiyahan sa matarung ug tukma nga paagi alang sa [akong] kaluwasan”? (tan-awa sa mga bersikulo 63–65).

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 98:16, 39–40.Unsay ania niini nga mga bersikulo nga makatabang kanato sa pagbaton og dugang pa nga kalinaw diha sa atong pamilya? Mahimo kang moawit mahitungod sa kalinaw o pagpasaylo. Ang gagmay nga mga bata mahimong mag-role-play sa pagpinasayloay sa usag usa.

Doktrina ug mga Pakigsaad 99.Sa dihang gitawag si John Murdock sa pagbiya sa iyang panimalay “sa pagsangyaw [sa] walay katapusan nga ebanghelyo” (bersikulo 1), bag-o pa lamang siya mipauli gikan sa usa ka malisud, dugay nga tuig nga misyon sa Missouri (tan-awa sa “John Murdock’s Missions to Missouri,” Revelations in Context, 87–89). Unsa ang atong makaplagan diha sa seksyon 99 nga mahimong makatabang o makaawhag ngadto ni Brother Murdock? Unsa ang mensahe sa Ginoo alang kanato niini nga pagpadayag?

Doktrina ug mga Pakigsaad 100:16; 101:3–5, 18.Human mabasa kini nga mga bersikulo, mahimo ninyong hisgutan kon unsaon sa mga panday sa puthaw sa pagpabaga gyud og maayo ang metal aron sa pagkuha sa mga hugaw ug dayon hulmahon kini pinaagi sa pagsige og dukdok niini ug balik-balik (tan-awa ang video nga “The Refiner’s Fire” diha sa ChurchofJesusChrist.org). Mahimo usab nga magdungan kamo sa pagkat-on mahitungod kon unsaon sa ubang mga butang nga madalisay, sama sa tubig ug asin. Tingali madalisay o malimpyo ninyo og maayo ang usa ka butang isip pamilya. Nganong kita gusto nga mahimong putli? Unsa ang gitudlo niini nga mga ehemplo kanato mahitungod kon giunsa sa atong mga pagsulay pagtabang kanato nga mahimong “usa ka putli nga katawhan”?

Doktrina ug mga Pakigsaad 101:22–36.Giunsa kaha niini nga mga bersikulo pagtabang sa mga Santos kinsa nagsinati og pagpanggukod? Unsaon kaha niini pagtabang sa mga katawhan kinsa nahadlok mahitungod sa mga kahimtang sa atong kalibutan karon?

Alang sa dugang nga mga ideya sa pagtudlo sa mga bata, tan-awa sa latid [outline] niini nga semana sa Dali, Sunod Kanako—Alang sa Primary.

Gisugyot nga awit: “Tabangi Ako, Mahal nga Amahan,” Songbook sa mga Bata, 52.

Pagpalambo sa Personal nga Pagtuon

Pangita og mga baruganan. Si Elder Richard G. Scott mitudlo: “Samtang kamo magtinguha og espirituhanon nga kahibalo, siksika ang mga baruganan. … Ang mga baruganan mao ang dalisay nga kamatuoran, gitumong alang sa paggamit ngadto sa nagkalainlain nga mga kahimtang” (“Acquiring Spiritual Knowledge,” Ensign, Nob. 1993, 86).

Missouri Nasunog, ni Glen S. Hopkinson