Septyembre 20–26

Doktrina ug mga Pakigsaad 106–108

“Aron Maabli ang Kalangitan”

Mitudlo si Elder Ulisses Soares, “Kinahanglan kita nga magpabilin diha [sa Manluluwas], isubsub ang atong mga kaugalingon diha sa mga kasulatan, magmaya diha niini, magkat-on sa Iyang doktrina, ug magpakabuhi sa paagi sa Iyang pagpakabuhi” (“Unsaon Nako Pagsabut?” Liahona, Mayo 2019, 7). Samtang nagsubsub ka sa imong kaugalingon diha sa Doktrina ug mga Pakigsaad 106–8, irekord ang mga paagi nga ikaw makapaninguha sa pagpuyo sa mga kamatuoran nga imong nadiskubrehan.

I-rekord ang Imong mga Pagbati

Sa unang pagtan-aw, ang Doktrina ug mga Pakigsaad 107 tingali ingon lamang og mahitungod sa pag-organisar sa mga katungdanan sa pagkapari ngadto sa usa ka estraktura sa pagpangulo alang sa Simbahan sa Ginoo. Sa tinuod, sa panahon kini nga pagpadayag namantala, ang ginsakupan milabaw na sa kapasidad sa diyutay nga mga lider sa lugar niini. Busa ang paglatid sa mga tahas ug mga responsibilidad sa Unang Kapangulohan, sa Korum sa Napulog Duha, sa Kapitoan, mga bishop, ug mga presidente sa korum sa tinuod gikinahanglan ug makatabang. Apan adunay daghan pa kaayo sa balaang panudlo diha sa seksyon 107 kay sa unsaon lamang sa pag-organisar sa mga katungdanan ug mga korum sa pagkapari. Dinhi ang Ginoo nagtudlo kanato mahitungod sa usa ka karaang kapunongan sa pagkapari nga “natukod sa panahon ni Adan” (bersikulo 41). Ang katuyoan niini gikan sa sinugdan mao ang paghimo niini nga posible alang sa mga anak sa Dios—lakip kanimo—sa pagdawat sa makaluwas nga mga ordinansa sa ebanghelyo ug magpahimulos sa “tanan nga espirituhanon nga mga panalangin sa simbahan—aron makaangkon sa kahigayunan sa pagdawat sa mga misteryo sa gingharian sa langit, [ug] aron maabli ang kalangitan ngadto kanila” (mga bersikulo 18–19).

Mga Ideya alang sa Personal nga Pagtuon sa Kasulatan

Doktrina ug mga Pakigsaad 106; 108

Ang Ginoo nagtudlo, nag-awhag, ug nagsuporta niadtong Iyang gitawag sa pagserbisyo.

Sa Doktrina ug mga Pakigsaad 106 ug 108, ang Ginoo mihatag ug tambag ug mga saad ngadto sa duha ka mga miyembro kinsa gitawag sa pagserbisyo diha sa Simbahan. Unsa nga hugpong sa mga pulong niini nga mga pagpadayag nagtanyag og pag-awhag ug mga panabut mahitungod sa imong kaugalingong serbisyo diha sa gingharian sa Dios? Aniay duha nga hunahunaon:

• Giunsa nimo pagdawat og “grasya og kasiguroan” nga makahimong “mobarug”? (Doktrina ug mga Pakigsaad 106:8).

• Unsaon nimo “pagmabinantayon gikan karon sa pagsunod sa imong mga panumpa,” o mga pakigsaad? (Doktrina ug mga Pakigsaad 108:3).

Unsa ang ubang hugpong sa mga pulong gikan sa mga seksyon 106 ug 108 nga mga makahuluganon nganha kanimo?

Tan-awa usab sa Russell M. Nelson, “Ang Pagpangalagad uban sa Gahum ug Katungod sa Dios,” Liahona, Mayo 2018, 68–75.

Doktrina ug mga Pakigsaad 107

Ang Ginoo nangulo sa Iyang Simbahan pinaagi sa awtoridad sa pagkapari.

Samtang imong natun-an ang Pagpahiuli sa ebanghelyo, tingali namatikdan nimo nga ang Ginoo dili kasagaran mopasabut og hingpit sa doktrina diha sa usa ka pagpadayag. Hinoon, nagpadayag Siya og mga butang “pagtulun-an ngadto sa lain nga pagtulun-an” (Doktrina ug mga Pakigsaad 98:12) kon ang kahimtang nagkinahanglan niini. Bisan og ang Ginoo kaniadto nakahatag og panudlo mahitungod sa pagkapari ingon ka sayo sa 1829 (tan-awa, sama pananglit, mga seksyon 20 ug 84), mihatag Siya og dugang nga panudlo ngadto sa mga Santos kaniadtong 1835 mahitungod sa piho nga mga katungdanan sa pagkapari nga gikinahanglan sa pagdumala ug paggiya sa Iyang nagkadaghan nga mga sumusunod.

Kon ikaw magbasa mahitungod sa mosunod nga mga katungdanan sa pagkapari, hunahunaa kon unsaon nimo nga makasuporta niadtong nagserbisyo niini nga mga calling pinaagi sa imong “pagsalig, hugot nga pagtuo, ug pag-ampo[mga]” (Doktrina ug mga Pakigsaad 107:22).

• Ang Unang Kapangulohan ug Presidente sa Simbahan (mga bersikulo 9, 21–22, 65–66, 91–92)

• Ang Napulog Duha ka mga Apostoles (mga bersikulo 23–24, 33–35, 38, 58)

• Ang Kapitoan (mga bersikulo 25–26, 34, 93–97)

• Mga bishop (mga bersikulo 13–17, 68–76, 87–88)

Doktrina ug mga Pakigsaad 107:1–20

Ang mga ordinansa sa pagkapari naghatag og espiritwal ug temporal nga mga panalangin ngadto sa tanan nga mga anak sa Langitnong Amahan.

Si Elder Neil L. Andersen mitudlo: “Ang pagkapari mao ang gahum ug awtoridad sa Dios nga gihatag alang sa kaluwasan ug panalangin sa tanan—kalalakin-an, kababayen-an, ug kabataan. … Kon kita takus, ang mga ordinansa sa pagkapari magpalambo sa atong mga kinabuhi dinhi sa yuta ug mag-andam kanato alang sa nindot kaayong mga saad sa umaabut nga kalibutan” (“Gahum sa Priesthood,” Liahona, Nob. 2013, 92). Samtang imong gibasa ang Doktrina ug mga Pakigsaad 107:1–20 (tan-awa ilabi na ang mga bersikulo 18–20) ug ang nahibilin sa mensahe ni Elder Andersen, hunahunaa ang pagrekord sa imong mga pagbati nga imong nadawat mahitungod kon giunsa sa gahum sa Dios sa pagpabuhong sa imong kinabuhi dinhi sa yuta ug sa pag-andam kanimo alang sa kahangturan. Unsa ang imong buhaton aron mas hingpit nga makadawat––ug makatabang sa uban nga makadawat––niadto nga mga panalangin?

Tan-awa usab ang Doktrina ug mga Pakigsaad 84:19–27; Dallin H. Oaks, “Ang mga Yawe ug Awtoridad sa Priesthood,” Liahona, Mayo 2014, 49–52.

Doktrina ug mga Pakigsaad 107:41–57

Ang pagkapari nagpanalangin sa mga pamilya.

Gusto ni Adan sa iyang kaliwatan nga mapanalingan pinaagi sa pagkapari. Unsa nga mga saad ang iyang nadawat? (tan-awa ang mga bersikulo 42, 55). Samtang ikaw nagbasa mahitungod sa unsay gibuhat ni Adan, hunahunaa ang imong kaugalingon nga mga tinguha alang sa imong pamilya sa pagpahimulos sa mga panalangin sa pagkapari. Unsa ang nakadasig nimo sa pagbuhat aron sa pagtabang sa imong pamilya sa pagdawat niini nga mga panalangin?

Adan Nagpanalangin sa Iyang Kaliwatan, ni Clark Kelley Price

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 106:6.Unsa ang mabuhat sa atong pamilya nga makahimo og “kamaya sa langit”?

Doktrina ug mga Pakigsaad 107:22.Unsa ang atong buhaton aron sa pagtuboy sa atong mga lider “pinaagi sa … pagsalig, hugot nga pagtuo, ug pag-ampo”?

Doktrina ug mga Pakigsaad 107:27–31, 85.Ang mga baruganan nga naggiya sa mga konseho sa Simbahan makatabang usab kanato sa pagtinambagay isip usa ka pamilya. Unsa nga mga baruganan dinhi niini nga mga bersikulo ang atong magamit sa atong mga konseho sa pamilya? (Tan-awa sa M. Russell Ballard, “Mga Family Council,” Liahona, Mayo 2016, 63–65.)

Doktrina ug mga Pakigsaad 107:99–100.Hatagi ang usa ka sakop sa pamilya og sinulat nga mga panudlo alang sa usa ka trabaho sa panimalay, ug dapita siya sa pagpili kon unsaon sa pagbuhat sa trabaho, sa kakugi, sa tinapulan, o sa dili pagbasa sa mga panudlo. Pabantaya ang nahibilin sa pamilya kaniya nga nagbuhat sa trabaho ug tag-ana hain nga pamaagi ang gipili sa sakop sa pamilya. Dayon papuli-puliha ang ubang mga miyembro sa pamilya. Ngano nga ang Ginoo nagkinahanglan kanato sa pagtuon sa atong mga katungdanan ug sa pagbuhat niini uban sa tanang kakugi? (Tan-awa sa Becky Craven, “Mabinantayon batok sa Dili Kaayo Magtagad,” Liahona, Mayo 2019, 9–11.)

Doktrina ug mga Pakigsaad 108:7.Unsaon nato paglig-on ang usag usa sa atong mga panagsultihanay? sa atong mga pag-ampo? sa atong mga pag-aghat, o pag-awhag? sa tanan natong mga binuhatan? Mahimo kang mopili og usa niini nga buhaton isip usa ka pamilya.

Alang sa dugang nga mga ideya sa pagtudlo sa mga bata, tan-awa sa latid [outline] niini nga semana sa Dali, Sunod Kanako—Alang sa Primary.

Gisugyot nga awit: “Maminaw Kita sa Propeta,” Mga Himno, nu. 16.

Pagpalambo sa Personal nga Pagtuon

Irekord ang mga Pagbati. Kon ang espiritwal nga mga pagbati o mga panabut moabut nganha kanimo, irekord kini. Samtang ikaw nagbuhat, ipakita sa Ginoo nga imong gimahal ang Iyang direksyon. (Tan-awa sa Pagtudlo sumala sa Pamaagi sa Manluluwas, 12, 30.)

Melchizedek Nagpanalangin ni Abram, ni Walter Rane