“Septyembre 13–19. Doktrina ug mga Pakigsaad 102–105: ‘Human sa Dako nga Kalisdanan … Moabut ang Panalangin,’” Dali, Sunod Kanako—Alang sa mga Indibidwal ug mga Pamilya: Doktrina ug mga Pakigsaad 2021 (2020)
“Septyembre 13–19. Doktrina ug mga Pakigsaad 102–105,” Dali, Sunod Kanako—Alang sa mga Indibidwal ug mga Pamilya: 2021
C. C. A. Christensen (1831–1912), Kampo sa Zion, mga 1878, daling mauga nga pintura diha sa panapton nga hilo, 78 × 114 ka pulgada. Brigham Young University Museum of Art, gasa sa mga apo ni C. C. A. Christensen, 1970
Septyembre 13–19
Doktrina ug mga Pakigsaad 102–105
“Human sa Dako nga Kalisdanan … Moabut ang Panalangin”
Unsa nga mga baruganan gikan sa Doktrina ug mga Pakigsaad 102–5 mga makahuluganon kanimo? Hunahunaa ang pagrekord sa imong mga hunahuna ug mga pagbati mahitungod niini nga mga baruganan.
I-rekord ang Imong mga Pagbati
Ang mga Santos sa Kirtland mga magul-anon kaayo nga ang ilang mga kaigsoonan sa Jackson County, Missouri, giabug gikan sa ilang mga panimalay. Kini tingali kaha makapadasig gayud, kaniadto, sa dihang gipahayag sa Ginoo nga “ang katubsanan sa Zion” mahitabo “pinaagi sa gahum” (Doktrina ug mga Pakigsaad 103:15). Naghunahuna mahitungod niana nga saad, sobra sa 200 ka mga lalaki, dugangan og mga 25 ka mga babaye ug mga bata, mipalista sa unsay ilang gitawag nga Kampo sa Israel, sa kadugayan nailhan isip Kampo sa Zion. Ang misyon niini mao ang pag-adto sa Missouri ug pagtubos sa Zion.
Ngadto sa mga miyembro sa kampo, ang pagtubos sa Zion mipasabut sa pagpabalik sa mga Santos ngadto sa ilang yuta. Apan sa wala pa moabut ang kampo sa Jackson County, misulti ang Ginoo ni Joseph Smith sa paghunong ug pagbungkag sa Kampo sa Zion. Pipila ka mga miyembro sa kampo naglibug ug naguol niining bag-o nga panudlo; ngadto kanila, kini mipasabut nga ang panaw napakyas ug ang mga saad sa Ginoo wala matuman. Ang uban, hinoon, nakahunahuna niini sa lahi nga paagi. Samtang ang gipapahawa nga mga Santos wala gayud makabalik ngadto sa Jackson County, ang kasinatian midala og pipila ka bahin sa “katubsanan” sa Zion, ug kini “pinaagi sa gahum.” Matinud-anon nga mga sakop sa Kampo sa Zion, kadaghanan kinsa sa wala madugay nahimong mga lider sa Simbahan, mipamatuod nga ang kasinatian mipalig-on sa ilang pagtuo diha sa gahum sa Dios, diha sa balaang tawag ni Joseph Smith, ug sa Zion––dili ang Zion usa lamang ka lugar apan Zion ang katawhan sa Dios. Kay sa magduda sa kaayohan niining ingon og napakyas nga buhat, nakat-unan nila nga ang tinuod nga buhat mao ang pagsunod sa Manluluwas, bisan og kita wala makasabut sa tanan. Ingon niini unsaon ang Zion, sa katapusan, pagatubson.
Tan-awa sa Mga Santos, 1:222-235; “The Acceptable Offering of Zion’s Camp,” Revelations in Context, 213-18.
Kampo sa Zion mipuyo subay sa daplin sa Little Fishing River, nga gihulagway dinhi.
Mga Ideya alang sa Personal nga Pagtuon sa Kasulatan
Doktrina ug mga Pakigsaad 102:12–23
Unsa ang katuyoan sa mga panudlo dinhi niining mga bersikulo?
Seksyon 102 naglangkob sa detalye nga sulat sa miting didto sa Kirtland, Ohio, diin ang unang halangdong konseho [high council] sa Simbahan na-organisar. Mga bersikulo 12–23 naghulagway sa mga pamaagi nga gisunod sa halangdong konseho kon nagdumala og mga konseho sa pagdisiplina alang niadtong kinsa nakahimo og seryosong mga kalapasan.
Si Presidente M. Russell Ballard mitudlo, “Ang mga miyembro usahay mangutana nganong ang mga konseho sa Simbahan sa pagdisiplina gihimo. Ang mga katuyoan adunay tulo ka bahin: sa pagluwas sa kalag sa mga malapason, sa pagpanalipod sa walay sala, ug sa pagpanalipod sa kalimpyo, kaligdong, ug sa maayong ngalan sa Simbahan” (“A Chance to Start Over: Church Disciplinary Councils and the Restoration of Blessings,” Ensign, Sept. 1990, 15).
Tan-awa usab sa Gospel Topics, “Church Disciplinary Councils,” topics.ChurchofJesusChrist.org.
Doktrina ug mga Pakigsaad 103:1–12, 36; 105:1–19
Ang Zion mahimong matukod lamang diha sa mga baruganan sa pagkamatarung.
Ngano nga ang mga Santos nawad-an sa ilang gisaad nga yuta sa Missouri? Ug nganong wala motugot ang Ginoo sa Kampo sa Zion sa pagpapauli kanila ngadto sa ilang mga yuta? Sa tinuod ang mapintas nga mga lihok sa manggugubot may kalabutan, ug ang gobernador sa Missouri misaad og suporta alang sa mga Santos apan wala gayud mihatag niini. Apan miingon ang Ginoo “kon dili pa tungod sa mga kalapasan sa akong mga katawhan,” ang Zion “unta matubos” (Doktrina ug mga Pakigsaad 105:2). Samtang ikaw magbasa sa Doktrina ug mga Pakigsaad 103:1–12, 36; 105:1–19, makamatikod ka og mga butang nga nagpugong sa pagkatukod sa Zion sa Missouri ug sa uban nga makatabang pa unta. Unsa ang imong nakat-unan nga makatabang kanimo sa pagtukod sa Zion diha sa imong kasingkasing ug sa panimalay?
Doktrina ug mga Pakigsaad 103:12–13; 105:1–6, 13–19
Mga panalangin moabut human sa mga kasakit ug mga pagsulay sa hugot nga pagtuo.
Sa daghang mga paagi, ang pag-apil sa Kampo sa Zion maoy usa ka pagsulay sa hugot nga pagtuo. Ang panaw dugay, ang panahon init, ug ang pagkaon ug ang tubig usahay nihit. Ug human sa tanan nilang paglahutay, ang mga Santos sa gihapon wala makahimo sa pagbalik ngadto sa ilang yuta. Hunahunaa unsaon sa mga baruganan diha sa Doktrina ug mga Pakigsaad 103:12–13 ug 105:1–6, 13–19 pagtabang unta sa mga miyembro sa Kampo sa Zion kinsa nagduda kon ang sugo sa pag-organisar una sa tanan gikan ba gayud sa Dios. Unsaon niini nga mga baruganan pagtabang kanimo sa imong kaugalingong mga pagsulay sa hugot nga pagtuo?
Mahimo usab nga imong basahon ang mga kasinatian sa mga miyembro sa Kampo sa Zion diha sa “Mga Tingog sa Pagpahiuli” sa katapusan niini nga latid. Unsa ang nakapadani kanimo mahitungod niini nga mga kinaiya? Unsay imong nakat-unan gikan sa ilang mga ehemplo?
Tan-awa usab sa David A. Bednar, “Dapig sa Ginoo: Mga Leksyon gikan sa Kampo sa Zion,” Liahona, Hulyo 2017, 30.
Doktrina ug mga Pakigsaad 104:11–18; 78–83
Ako mao ang “tinugyanan ibabaw sa yutan-on nga mga panalangin.”
Agi og dugang sa mga pagsulay didto sa Missouri, niadtong 1834 ang Simbahan miatubang og pinansyal nga mga kalisud, lakip ang dakong mga utang ug mga galastuhan. Diha sa seksyon 104 mihatag ang Ginoo og tambag sa pinansyal nga sitwasyon sa Simbahan. Unsaon nimo paggamit ang mga baruganan diha sa mga bersikulo 11–18 ug 78–83 nganha sa imong kaugalingong pinansyal nga mga desisyon?
Aron sa pagkat-on mahitungod sa usa sa mga paagi nga ang Ginoo miandam alang sa kaluwasan sa Simbahan gikan sa pagkaulipon sa utang, tan-awa ang “Treasure in Heaven: The John Tanner Story” (video, ChurchofJesusChrist.org).
Aron sa pagkat-on pa og dugang mahitungod sa “kaugalingong pamaagi” sa Ginoo (bersikulo 16) sa pagsangkap alang sa Iyang mga Santos, mahimo nimong tun-an ang mensahe ni Presidente Dieter F. Uchtdorf “Pagsangkap pinaagi sa Pamaagi sa Ginoo” ( Liahona, Nob. 2011, 53–56).
Mga Ideya alang sa Pamilya nga Pagtuon sa Kasulatan ug Family Home Evening
-
Doktrina ug mga Pakigsaad 103:12, 36; 105:9-13.Nahangyo ba sukad ang imong pamilya (o usa sa imong mga katigulangan) sa pagbuhat og usa ka butang nga wala mahimo sa unsay imong gusto? Unsa ang imong makat-unan gikan sa mga reaksyon sa mga sakop sa Kampo sa Zion sa dihang ang ilang panaw wala mahitabo ingon sa ilang gipaabut? (tan-awa sa “Mga Tingog sa Pagpahiuli” diha sa katapusan niini nga latid).
-
Doktrina ug mga Pakigsaad 104:13–18.Unsa ang nahatag sa Ginoo kanato? Unsay Iyang gipaabut kanato nga buhaton niining mga butanga?
-
Doktrina ug mga Pakigsaad 104:23–46.Ang imong pamilya makasiksik niini nga mga bersikulo aron sa pagpangita pila ka mga higayon nga ang Ginoo nagsaad nga “mopilo-pilo sa mga panalangin” (bersikulo 23) alang niadto kinsa mga matinud-anon. Tingali kini maayo nga panahon nga “iphon ang inyong mga panalangin” (“Ipha ang Inyong mga Panalangin,” Mga Himno, nu. 148) ug paghisgot unsaon sa pagbuhat sa mao makatabang kanato atol sa malisud nga mga panahon. Ang gagmay nga mga bata tingali malingaw sa pagdrowing og mga hulagway sa mga panalangin nga sila ilabi ka mapasalamaton.
-
Doktrina ug mga Pakigsaad 105:38–41.Sa unsa nga paagi kita makahimo og mga “sugyot alang sa kalinaw” (bersikulo 40) kon ang uban nagtagad kanato nga walay kalooy o dili makiangayon? Unsa ang atong mabuhat nga mahimong “usa ka bandila sa kalinaw” (bersikulo 39) diha sa atong panimalay?
Alang sa dugang nga mga ideya sa pagtudlo sa mga bata, tan-awa sa latid [outline] niini nga semana sa Dali, Sunod Kanako—Alang sa Primary.
Gisugyot nga awit: “Ipha ang Inyong Panalangin,” Mga Himno, nu. 148.
Mga Tingog sa Pagpahiuli
Kampo sa Zion
Tungod kay ang Kampo sa Zion wala gayud makapapauli sa mga Santos ngadto sa ilang mga yuta sa Jackson County, daghang mga tawo ang mibati nga ang ilang mga tinguha sa pagtubos sa Zion napakyas. Bisan pa niana, daghang mga miapil sa Kampo sa Zion nahinumdom sa ilang kasinatian ug nakakita giunsa sa Ginoo pagtuman ang usa ka mas taas nga katuyoan sa ilang mga kinabuhi ug sa Iyang gingharian. Ania ang pipila sa ilang mga pagpamatuod.
Joseph Smith
Sobra sa 40 ka mga tuig human sa Kampo sa Zion, si Joseph Young, kinsa sakop sa kampo, mi-report nga si Joseph Smith miingon sa mosunod:
“Mga kaigsoonan, ang uban kaninyo nasuko kanako, tungod kay kamo wala makig-away didto sa Missouri; apan pasultiha ako kaninyo, ang Dios dili buot nga kamo makig-away. Siya dili maka-organisar sa iyang gingharian uban sa napulog duha ka mga lalaki aron pagbukas sa ganghaan sa ebanghelyo ngadto sa mga nasud sa yuta, ug may kapitoan ka mga lalaki nga ubos sa ilang pagdumala nga mosunod sa ilang mga paggiya, gawas kon siya mopili kanila gikan sa pundok sa mga tawo nga mitugyan sa ilang mga kinabuhi, ug kinsa nakahimo og usa ka talagsaong sakripisyo sama sa gibuhat ni Abraham.
“Karon, ang Ginoo nakakuha sa Iyang Napulog Duha ug ang iyang Kapitoan, ug adunay mahimong uban nga mga korum sa mga Kapitoan nga gitawag, kinsa mao ang mohimo sa sakripisyo, ug kadtong kinsa wala makahimo sa ilang mga sakripisyo ug mga halad karon, mohimo niini sa umaabut.”1
Brigham Young
“Sa dihang kami miabut sa Missouri ang Ginoo namulong ngadto sa iyang sulugoon nga si Joseph ug miingon, ‘Akong gidawat ang inyong halad,’ ug kami adunay pribilehiyo sa pagpauli pag-usab. Sa akong pagpauli daghang mga higala nangutana unsay kaayohan sa pagtawag sa mga lalaki sa pagbiya gikan sa ilang trabaho aron sa pag-adto sa Missouri unya mopauli, nga sa dayag walay bisan unsa nga natuman. ‘Kinsa ang nahatagan og kaayohan niini?’ nangutana sila. ‘Kon ang Ginoo tinuod nga nagsugo niini nga pagabuhaton, unsa ang tumong nga iyang napanan-aw sa pagbuhat sa mao?’ … Gisultihan nako kadto nga mga kaigsoonan nga gigantihan ako og dako kaayo––gibayran og sobra nga kantidad––tinuod nga ang akong kaayohan nga nadawat hilabihan sa kadako uban sa kahibalo nga akong nadawat pinaagi sa pagbiyahe kauban sa Propeta.”2
Wilford Woodruff
“Didto ako sa Kampo sa Zion uban sa Propeta sa Dios. Nakita nako ang mga pagdumala sa Dios diha kaniya. Nakita nako ang gahum sa Dios diha kaniya. Nakita nako nga siya usa ka Propeta. Unsa ang gipakita kaniya pinaagi sa gahum sa Dios niana nga misyon dako og bili ngari kanako ug sa tanang nakadawat sa iyang mga panudlo.”3
“Sa dihang ang mga miyembro sa Kampo sa Zion gitawag, daghan kanamo wala pa gayud sukad magkakita; dili gyud kami kaila ug daghan ang wala makakita sa propeta. Nagkatag gyud mi sa kayutaan, sama sa mais sa ayagan, sa tibuok nasud. Kami mga batan-on nga mga lalaki, ug gitawag kami nianang sayo nga panahon aron moadto ug moluwas sa Zion, ug kon unsa ang among gibuhat amo kining gibuhat pinaagi sa hugot nga pagtuo. Nagpundok kami gikan sa nagkalainlaing mga dapit sa Kirtland ug miadto aron sa pagluwas sa Zion, agig katumanan sa sugo sa Dios kanamo. Ang Dios midawat sa among mga buhat sama sa Iyang gihimo sa mga buhat ni Abraham. Daghan mi og nahimo, bisan kon ang namiya sa kamatuoran [apostates] ug ang mga wala motuo nangutana sa daghang mga higayon, ‘Unsay inyong nahimo?’ Nakabaton mi og kasinatian nga dili gayud namo unta maangkon [diha] sa bisan unsang paagi. Nakabaton mi og kahigayunan sa pagsud-ong sa nawong sa propeta, ug nakahigayon mi pagbiyahe og liboan ka mga milya uban kaniya, ug nakakita sa mga gibuhat sa Espiritu sa Dios diha kaniya, ug ang mga pagpadayag ni Jesukristo nganha kaniya ug sa katumanan niadto nga mga pagpadayag. Ug gipundok niya ang mga duha ka gatus ka mga elder gikan sa tibuok nga nasud nianang sayo nga yugto sa kasaysayan sa Simbahan ug gipadala kami ngadto sa tibuok kalibutan aron sa pagsangyaw sa ebanghelyo ni Jesukristo. Kon ako wala pa mokuyog uban sa Kampo sa Zion wala unta ako dinhi niining adlawa [sa Siyudad sa Salt Lake, nagserbisyo diha sa Korum sa Napulog Duha]. … Pinaagi sa pag-adto didto kami dihadiha nahatagan og oportunidad sa pagsangyaw sa ebanghelyo, ug gidawat sa Ginoo ang among mga kahago. Ug sa among tanan nga mga kahago ug sa mga pagpanggukod, kasagaran nagbutang sa among mga kinabuhi sa kuyaw, kinahanglan kami nga motrabaho ug mopuyo pinaagi sa hugot nga pagtuo.”4
“Ang kasinatian nga [among] nakuha sa pagbiyahe sa Kampo sa Zion mas bililhon pa kay sa bulawan.”5
Kampo sa Zion (Kampo sa Zion sa Fishing River), ni Judith A. Mehr