C. C. A. Christensen (1831–1912), Ang mga Santos Giabug gikan sa Distrito sa Jackson sa Missouri, c. 1878, tempera diha sa muslin nga panapton, 77 ¼ × 113 ka pulgada. Brigham Young University Museum of Art, gasa sa mga apo ni C. C. A. Christensen, 1970

Septyembre 6–12

Doktrina ug mga Pakigsaad 98–101

“Pagmalinawon ug Hibaloi Nga Ako Mao Ang Dios”

Unsa nga mga mensahe ang kinahanglang madunggan sa mga bata sa imong klase karong semanaha? Sa unsa kaha nga paagi nga ang mga baruganan diha sa Doktrina ug mga Pakigsaad 98–101 makatabang kanila nga mahimong mas maayo nga mga disipulo ni Jesukristo?

Irekord ang Imong mga Impresyon

Dapita ang Pagpaambit

Awhaga ang mga bata sa pagpaambit og butang nga ilang nakat-unan gikan sa Doktrina ug mga Pakigsaad diha sa panimalay o sa Primary. Pangutan-a sila kon unsay labi nilang nalingawan mahitungod sa pagkat-on gikan sa Doktrina ug mga Pakigsaad.

Itudlo ang Doktrina: Mas Gagmay nga mga Bata

Doktrina ug mga Pakigsaad 98:39–40

Makapasaylo ko niadtong dili mabination kanako.

Gihangyo sa Ginoo ang mga Santos kinsa gipanggukod didto sa Distrito sa Jackson, Missouri, sa pagpasaylo niadtong mipasakit kanila. Samtang nagtudlo ka sa mga bata sa kaimportante sa pagpasaylo, siguroa nga nakasabut usab sila nga kon adunay tawo nga mopasakit kanila, kinahanglan silang mosulti kanunay sa usa ka sinaligan nga hamtong.

Posible nga mga Kalihokan

• Aron matabangan ang mga bata nga makasabut sa mga hagit nga giatubang sa mga Santos sa Zion, ipaambit kanila ang “Kapitulo 34: Ang Dios Nagpahimatngon sa mga Katawan sa Zion” (Mga Istorya sa Doktrina ug mga Pakigsaad, 128–31, o ang katukma nga video diha sa ChurchofJesusChrist.org). Basaha ang Doktrina ug mga Pakigsaad 98:39–40, ug hangyoa ang mga bata sa pagpaminaw sa unsay gisulti sa Ginoo nga buhaton sa mga Santos kon ang ilang mga kaaway mangayo og pasaylo. Nganong gusto man ni Jesus nga mopasaylo kita sa mga tawo, bisan niadtong dili mabination kanato?

• Pagbutang og hulagway sa usa ka malipayon nga nawong diha sa usa ka bong-bong ug usa ka magul-anon nga nawong sa pikas nga bong-bong. Ipaambit ngadto sa mga bata ang lain-laing mga sitwasyon diin ang usa ka tawo dili mabination (mahimong makakita ka og pipila ka istorya diha sa Liahona). Isugyot ang mga paagi nga mahimo natong itubag sa dili mabination nga mga aksyon, ug tabangi ang mga bata sa pagdesisyon kon ang matag tubag makapalipay ba nila o makapaguol. Dapita ang mga bata sa pagtudlo ngadto sa haum nga nawong diha sa bong-bong.

Doktrina ug mga Pakigsaad 101:16

Si Jesukristo makahatag kanako og kalinaw.

Sa dihang ang mga Santos nagsagubang og pagpanggukod, gihupay sila sa Ginoo pinaagi sa pag-ingon, “Pagmalinawon ug hibaloi nga Ako mao ang Dios.” Ikonsiderar kon sa unsang paagi nga kining tambag makatabang sa mga bata nga imong gitudloan.

Posible nga mga Kalihokan

• Dapita ang mga bata nga paspas nga molihok-lihok diha sa ilang mga lingkuranan. Dayon hangyoa sila sa paghunong kon imong iisa ang usa ka hulagway sa Manluluwas ug mosulti sa hugpong sa mga pulong nga “Pagmalinawon ug hibaloi nga Ako mao ang Dios” (Doktrina ug mga Pakigsaad 101:16). Balika kini nga kalihokan sa pipila ka mga higayon. Ipasabut nga sa dihang lisud ang kinabuhi alang sa mga Santos sa panahon ni Joseph Smith, gusto ni Jesus nga magmalinawon sila ug mosalig Kaniya imbis nga mabalaka. Sa unsang paagi nga makatabang si Jesus kanato kon magkalisud kita?

• Dungan nga manganta sa usa ka kanta mahitungod sa balaang pagtahud, sama sa “Nagtahud, Naghilum” (Songbook sa mga Bata, 11). Tabangi ang mga bata nga makaila sa malinawong mga pagbati nga moabut kon magmalinawon kita ug maghunahuna mahitungod ni Jesus—sama pananglit, kon mag-ampo kita o moambit sa sakramento.

• Tabangi ang mga bata sa pagtrabaho sa pahina sa kalihokan niining semanaha. Samtang magkolor sila, sultihi sila kon sa unsang paagi nga ang paghunahuna bahin ni Jesukristo nakatabang kanimo nga mobati og kalinaw, bisan atol sa lisud nga mga panahon.

  

  Detalye gikan sa Christ and the Rich Young Ruler [Si Kristo ug ang Adunahan nga Batan-ong Magmamando], ni Heinrich Hofmann

Itudlo ang Doktrina: Mas Dagko nga mga Bata

Doktrina ug mga Pakigsaad 98:1–3, 11–14; 101:16

Ang akong mga pagsulay makatabang kanako nga mas mahisama kang Jesukristo.

Samtang magsagubang ang mga bata og mga hagit sa tibuok nilang kinabuhi, magkinahanglan sila og hugot nga pagtuo nga ang Manluluwas makatabang kanila panahon sa ilang mga pagsulay ug nga kadtong mga pagsulay “molihok alang sa [ilang] kaayohan” (Doktrina ug mga Pakigsaad 98:3).

Posible nga mga Kalihokan

• Hangyoa ang mga bata nga motabang kanimo sa paghimo og lista diha sa pisara sa pipila ka hagit nga mahimong sagubangon sa usa ka bata nga kapareho nila og edad. Sultihi ang mga bata mahitungod sa pipila ka hagit sa mga Santos didto sa Distrito sa Jackson, Missouri, niadtong 1833 (tan-awa sa mga kapitulo 34 ug 35 sa Mga Istorya sa Doktrina ug mga Pakigsaad, 128–34). Unsa nga tambag ang ilang ikahatag sa usa ka bata nga nakasinati niining mga hagit? Hangyoa ang mga bata sa pagbasa sa Doktrina ug mga Pakigsaad 98:1–3, 11–14, nga mangita sa giya nga gihatag sa Ginoo. Unsaon nila pagsunod kini nga tambag samtang nagsagubang sila og mga hagit sama sa mga nalista diha sa pisara?

• Dapita ang mga bata nga magmalinawon ug maghilum kutob sa mahimo sulod sa pipila ka minutos samtang nagtan-aw sa hulagway sa Manluluwas o maminaw sa usa ka kanta mahitungod Kaniya. Dayon dapita sila nga mopaambit sa unsay ilang gibati ug nasinati atol sa ilang pagmalinawon. Basaha ang Doktrina ug mga Pakigsaad 101:16. Sa unsang paagi nga ang pagkamalinawon ug paghunahuna bahin ni Jesus makatabang kanato? Tabangi ang mga bata nga makasabut sa koneksyon tali sa pagmalinawon sa balaanong paagi ug sa atong abilidad nga mobati sa Espiritu ug sa paghunahuna mahitungod ni Jesus.

Doktrina ug mga Pakigsaad 98:23, 39–40

Gusto ni Jesus nga pasayloon nako kadtong dili mabination ngari kanako.

Gisugo kita nga maghigugmaay sa usag usa, mopasaylo sa uban “kapitoan ka pito,” ug sa pagtahan sa pikas natong aping (tan-awa sa Mateo 5:39, 43–44; 18:21–22). Unsaon man nimo paggamit kining mga bersikulo sa pagtudlo sa mga bata niining mga kamatuoran?

Posible nga mga Kalihokan

• Sultihi ang mga bata mahitungod sa mga pagpanggukod nga nahitabo didto sa Distrito sa Jackson, Missouri, niadtong 1833 (tan-awa sa mga kapitulo 34 ug 35 sa Mga Istorya sa Doktrina ug mga Pakigsaad, 128–34). Pangutan-a ang mga bata kon unsay ilang bation kon sila mga miyembro sa Simbahan nianang panahona. Dapita sila sa pagbasa sa Doktrina ug mga Pakigsaad 98:23, 39–40 aron mahibalo kon unsay gustong ipabuhat sa Ginoo sa mga Santos. Nganong lisud man ang pagpasaylo niadtong mipasakit kanato? Sa unsang paagi nga kita mapanalanginan kon buhaton nato kini?

• Pangutan-a ang mga bata kon makahunahuna ba sila og usa ka higayon sa dihang si Jesukristo o laing tawo diha sa mga kasulatan mibuhat sa unsay gitudlo sa Doktrina ug mga Pakigsaad 98:23. Aron mahatagan sila og usa ka ehemplo, ipakita ang usa ka hulagway sa Paglansang sa Krus (sama sa Libro sa mga Hulagway sa Ebanghelyo, nu. 57). Hangyoa ang mga bata sa pagpaambit sa unsay ilang nahibaloan mahitungod sa Paglansang sa Krus sa Manluluwas (tan-awa sa Lucas 23). Dapita sila sa pagbasa sa Lucas 23:34. Unsaon nato pagsunod sa mga ehemplo ni Jesukristo?

Doktrina ug mga Pakigsaad 101:23–32, 36, 38

Pinaagi ni Jesukristo makakita ko og hingpit nga kalipay.

Ang kinabuhi wala gitumong nga mahimong gawasnon sa kalisdanan, apan makatabang ka sa mga bata nga makadiskubre nga makakita gihapon sila og kahingpitan sa kalipay pinaagi ni Jesukristo.

Posible nga mga Kalihokan

• Butangi og tubig ang tasa. Hangyoa ang mga bata sa paghingalan og mga butang nga gibuhat sa Manluluwas alang kanato aron makabaton kita og hingpit nga kalipay, ug dapita sila sa paghulog og gamay nga bato ngadto sa tasa alang sa matag butang nga ilang mahingalan hangtud nga mapuno ang tasa. Basaha uban sa mga bata ang Doktrina ug mga Pakigsaad 101:36, ug hangyoa sila sa pagpangita kon unsaon nato pagbaton og kahingpitan sa kalipay. Unsa ang pipila ka butang nga atong mahimo sa “[pagpangita] … sa Ginoo” (bersikulo 38) aron makabaton kita og hingpit nga kalipay nga gusto Niyang ihatag kanato?

• Ipasabut nga ang Doktrina ug mga Pakigsaad 101:23–32 nagtudlo mahitungod kon unsa ang matang sa kinabuhi kon moanhi pag-usab si Jesukristo. Samtang magbasa kamo og dungan niining mga bersikulo, hisguti ang mga butang nga makit-an sa mga bata nga makahatag kanato og hingpit nga kalipay kon moanhi Siya. Nganong makatabang man nga mahibalo mahitungod niining mga butanga kon magkalisud kita?

Awhaga ang Pagkat-on diha sa Panimalay

Tabangi ang mga bata sa pagpili og usa ka bersikulo gikan sa Doktrina ug mga Pakigsaad 98–101 nga gusto nilang ipaambit sa ilang mga pamilya. Tabangi sila sa pagplano kon unsaon nila sa pagpaambit kon unsa ang ilang ganahan mahitungod niana nga bersikulo.

Pagpalambo sa Atong Pagtudlo

Paglambo isip usa ka magtutudlo nga sama kang Kristo. Pamalandungi ang mga paagi nga mahimo ka nga usa ka magtutudlo nga sama kang Kristo. Ikonsiderar ang paggamit sa personal nga mga pangutana sa pagtimbang-timbang diha sa pahina 37 sa Pagtudlo sumala sa Pamaagi sa Manluluwas aron sa pagtabang kanimo nga molambo.