Templo sa Kirtland, ni Al Rounds

Agosto 30–Septyembre 5

Doktrina ug mga Pakigsaad 94–97

“Alang sa Kaluwasan sa Zion”

Pagtinguha og inspirasyon aron masayud kon unsa nga mga baruganan gikan sa mga seksyon 94–97 ang hatagan og gibug-aton samtang magtudlo ka. Mahimo nimong mapahiangay ang mga ideya sa kalihokan alang sa mas gagmay nga mga bata samtang magtudlo ka sa mas dagko nga mga bata, ug vice versa.

Irekord ang Imong mga Impresyon

Dapita ang Pagpaambit

Ipakita sa mga bata ang usa ka hulagway sa templo, ug dapita sila sa pagpaambit sa unsay ilang nahibaloan mahitungod sa mga templo. Mahimo usab silang moistorya kon unsay ilang bation kon makakita sila og templo.

Itudlo ang Doktrina: Mas Gagmay nga mga Bata

Doktrina ug mga Pakigsaad 95:8; 97:15–16

Ang templo mao ang balay sa Ginoo.

Bisan ang mga bata didto sa Kirtland mitabang, sa ginagmay apan sa makahuluganong mga paagi, sa pagtukod sa Templo sa Kirtland. Tabangi ang mga bata nga imong gitudloan nga mapalig-on ang ilang gugma alang sa balaan nga balay sa Ginoo.

Posible nga mga Kalihokan

• Pagpakita og hulagway sa Templo sa Kirtland (tan-awa ang outline niini nga semana diha sa Dali, Sunod Kanako—Alang sa mga Indibidwal ug mga Pamilya). Gamita ang mga hugpong sa mga pulong gikan sa Doktrina ug mga Pakigsaad 95:8 sa pagtudlo sa mga bata mahitungod sa sugo sa Ginoo nga magtukod niini nga templo. Papuli-puliha ang mga bata sa paggunit sa hulagway ug magsulti og “Ang templo mao ang balay sa Ginoo.”

  

  Ang mga Santos nagtukod og templo aron mas mahiduol sa Dios.

• Sultihi ang mga bata nga sa matag templo nakasulat ang “Pagkabalaan ngadto sa Ginoo. Ang Balay sa Ginoo.” Kon mahimo, pakit-a sila og litrato niining mga pulong diha sa usa ka templo. Nganong ang templo usa man ka espesyal nga dapit? Basaha ang mga hugpong sa mga pulong gikan sa Doktrina ug mga Pakigsaad 97:15–16 nga nagtudlo mahitungod sa templo isip balay sa Ginoo, ug ipaambit ang imong mga pagbati mahitungod sa templo.

• Dapita ang mga bata nga magpakaaron-ingnon nga sila nagtabang sa pagtukod og usa ka templo (namutol og kahoy, nagdukdok og mga lansang, namintal og mga bong-bong, ug uban pa). Ipasabut kon unsa kaimportante ang templo ngadto sa Ginoo, giunsa pagkugi og trabaho sa mga Santos aron matukod ang Templo sa Kirtland, ug unsa kadako ang ilang gisakripisyo alang niini (tan-awa sa Mga Santos, 1:210).

• Manganta og dungan sa usa ka awit aron matabangan ang mga bata nga mobati og balaang pagtahud alang sa balay sa Ginoo, sama sa “Gusto Ko nga Makita ang Templo” (Songbook sa mga Bata, 99). Tuguti ang mga bata nga mopaambit sa ilang mga pagbati mahitungod sa templo.

Doktrina ug mga Pakigsaad 97:8

Mahimo akong magmatinuoron.

Diha sa Doktrina ug mga Pakigsaad 97:8, ang Ginoo miila sa pagkamatinuoron isip usa ka hiyas niadtong “pagadawaton ngari kanako.”

Posible nga mga Kalihokan

• Ipasabut ngadto sa mga bata nga ang Dios nagtudlo nga kon matinuoron kita, Siya modawat kanato (tan-awa sa Doktrina ug mga Pakigsaad 97:8). Ipaambit ngadto kanila ang pipila ka istorya nga makatabang kanila nga makasabut kon unsay buot ipasabut sa mamahimong matinuoron. Kining mga istorya mahimong magagikan sa kaugalingon nimong kinabuhi, gikan sa kinabuhi sa usa ka tawo nga imong nailhan, o gikan sa Liahona. Tabangi ang mga bata nga mosaysay pag-usab sa mga istorya nganha kanimo o mopaambit og mga kasinatian kalabut sa pagkamatinuoron gikan sa ilang kinabuhi.

• Tabangi ang mga bata nga makakat-on sa unang hugpong sa mga pulong sa ikatrese nga artikulo sa hugot nga pagtuo: “Kami nagtuo sa pagkamatinuoron.” Tabangi ang mga bata nga i-drama ang mga ehemplo sa pagkahimong matinuoron ug pagkadili matinuoron. Sama pananglit, ang mga bata mahimong modrama sa pagkuha og usa ka butang gikan sa usa ka igsoon ug mosulti sa ilang mga ginikanan nga wala sila magkuha niini. Dayon tabangi ang mga bata sa pagdrama sa samang sitwasyon diin mosulti sila sa tinuod ngadto sa ilang mga ginikanan. Ipasabut nga kini matinuoron.

Itudlo ang Doktrina: Mas Dagko nga mga Bata

Doktrina ug mga Pakigsaad 95:1–3, 8, 11–17; 97:10–17

Ang templo mao ang balay sa Ginoo.

Pamalandungi kon unsaon nimo paggamit kining mga bersikulo aron matabangan ang mga bata nga makasabut kon unsa kaimportante ang templo ngadto sa Ginoo—ug unsa gayud kini kaimportante ngari natong tanan.

Posible nga mga Kalihokan

• Hangyoa ang mga bata sa paghisgot mahitungod sa mga higayon diin angay unta silang mobuhat og usa ka butang apan wala dayon nila kini buhata. Tabangi ang usa ka bata sa pagbasa sa Doktrina ug mga Pakigsaad 95:3, 8, ug pangutan-a ang mga bata kon unsa nga sugo ang giingon sa Ginoo nga wala tumana sa mga Santos. Basaha og dungan ang bersikulo 11. Unsa ang kinahanglang buhaton sa mga Santos aron makatukod sila sa templo? Unsa ang atong makat-unan gikan sa saad sa Ginoo ngadto kanila?

• Diha sa mga kard, isulat ang mga baruganan mahitungod sa templo nga makita sa Doktrina ug mga Pakigsaad 95 ug 97, uban sa tukma nga mga pakisayran sa kasulatan, ug ibutang ang mga kard diha sa usa ka bag. Sama pananglit: Ang pagtukod sa mga templo nagkinahanglan og sakripisyo (Doktrina ug mga Pakigsaad 97:11–12) ug Kinahanglan gayud nga takus kita nga mosulod sa templo (Doktrina ug mga Pakigsaad 97:15–17). Bahina ang mga bata ngadto sa mga parisan. Tuguti ang matag parisan nga mokuha og usa ka kard gikan sa bag ug dayon magtinabangay sa pagbasa sa kasulatan diha sa kard ug maghisgot kon unsay kahulugan sa baruganan ngadto kanila. Tabangi ang mga bata nga makasabut kon unsay ilang gibasa kon gikinahanglan.

• Dapita ang usa ka batan-on gikan sa inyong ward o branch kinsa nakaadto na sa templo sa pagpaambit sa iyang kasinatian ug mosulti sa mga bata kon unsay ilang mahimo sa pagpangandam alang sa templo.

• Gamita ang artikulo nga “Ang Inyong Agianan Padulong sa Templo” (sa Mga Templo sa Ang Simbahan ni Jesukristo sa mga Santos sa Ulahing mga Adlaw [espesyal nga isyu sa Liahona, Okt. 2010], 72–75) aron pagtabang sa mga bata nga makasabut kon unsay mahitabo sa sulod sa mga templo ug unsaon nila pag-andam. Ikonsiderar ang paghatag sa matag bata og usa ka seksyon sa artikulo nga basahon ug tugutan sila nga mopaambit sa unsay ilang nakat-unan.

• Ipaambit ang video nga “Two Apostles Lead a Virtual Tour of the Rome Italy Temple” (ChurchofJesusChrist.org), ug dapita ang mga bata sa pagpaambit kon unsay ilang bation nga moadto sa templo sa umaabut nga adlaw.

• Manganta og dungan sa usa ka awit mahitungod sa templo, sama sa “Gusto Ko nga Makita ang Templo” (Songbook sa mga Bata, 99). Unsa nga mga hugpong sa mga pulong niini nga awit ang nagtudlo kanato nganong sagrado ang templo?

Doktrina ug mga Pakigsaad 97:1–2, 8–9, 21

Ang Zion mao “ang putli og kasingkasing.”

Tabangi ang mga bata nga makasabut nga ang Zion dili lang usa ka dapit; kini usab “ang putli og kasingkasing” (Doktrina ug mga Pakigsaad 97:21).

Posible nga mga Kalihokan

• Dapita ang mga bata sa pagbasa sa Doktrina ug mga Pakigsaad 97:21, ug pangutan-a sila kon unsay gipasabut sa pulong nga “putli.” Sa paghulagway, ipakita kanila ang usa ka baso nga dunay limpyong tubig, ug hisguti kon nganong importante nga adunay limpyo nga tubig. Butangi ang tubig og makapahimo niini nga dili limpyo (sama sa yuta o paminta). Dapita ang mga bata sa pagbasa pag-usab sa Doktrina ug mga Pakigsaad 97:21 ug sa pagbutang sa ilang tudlo diha sa pulong nga “putli.” Unsa ang buot ipasabut sa atong mga kasingkasing nga mamahimong putli? Tabangi ang mga bata nga makasabut nga ang pagkahimong putli wala magpasabut nga dili gayud kita makahimo og mga sayop. Unsa ang atong mabuhat aron mas mahimong putli og kasingkasing? Sa unsang paagi nga ang Manluluwas makatabang kanato?

• Tabangi ang mga bata sa pagsiksik sa Doktrina ug mga Pakigsaad 97:1–2, 8–9, 21, nga mangita sa mga pulong o mga hugpong sa mga pulong nga naghulagway kon unsaon aron mamahimong putli og kasingkasing. Hangyoa sila sa pagpili og usa ka pulong o hugpong sa mga pulong, isulat kini sa gamay nga piraso sa papel, ug ibutang kini sa usa ka sudlanan. Magkuha og usa ka piraso sa matag higayon, ug hangyoa ang mga bata sa pagsugyot og mga butang nga ilang mabuhat aron magamit kana nga ideya sa ilang kinabuhi. Sama pananglit, unsay atong mabuhat aron “makakita sa kamatuoran” (bersikulo 1) o mamahimong mas “matinuoron” (bersikulo 8)?

Awhaga ang Pagkat-on diha sa Panimalay

Dapita ang mga bata sa paggamit sa pahina sa kalihokan niining semanaha aron mapaambit ngadto sa ilang mga pamilya ang ilang nakat-unan karon mahitungod sa templo.

Pagpalambo sa Atong Pagtudlo

Awhaga ang mga bata sa pagpangutana. “Paningkamuti nga makita [sa mga bata] ang mga pangutana isip mga oportunidad, dili nga makabalda o mga babag sa imong leksyon. … Ang ingon nga mga pangutana maghatag kanimo og bililhon nga mga panabut kon unsay gihunahuna sa mga bata, unsay ilang mga kabalaka, ug unsay ilang mga reaksyon sa mga butang nga ilang nakat-unan. Tabangi sila nga makakita nga ang mga tubag sa ilang mga pangutana makita diha sa mga kasulatan ug sa mga pulong sa buhing mga propeta” (Pagtudlo sumala sa Pamaagi sa Manluluwas, 25).