Ang Inyong Agianan Padulong sa Templo
Para sa mga Bata
Nakahibalo ba kamo kon unsa nga templo ang mas duol kaninyo? Pag-drawing og litrato sa templo, ug isab-it kini diin inyo kining makita kada adlaw.
Ang templo mao ang balay sa Ginoo. Usa kini ka dapit diin kita magkat-on mahitungod sa Langitnong Amahan, maghimo og mga pakigsaad (o mga saad) uban Kaniya, ug magdawat sa talagsaong mga panalangin. Sa templo, magbuhat kita sa importanting mga buluhaton alang sa atong kaugalingon ug sa atong mga sakop sa pamilya nga nangamatay na. Ang buhat nga gihimo sa templo naglakip sa bunyag alang sa mga patay, mga endowment, ug mga sealing. Gitawag kini og mga ordinansa sa templo.
Unsa ang Mahitabo sulod sa Templo
Bunyag alang sa mga Patay
Kon kamo mag-otso anyos na, mahimo kamong bunyagan ug kumpirmahan nga miyembro sa Ang Simbahan ni Jesukristo sa mga Santos sa Ulahing mga Adlaw. Daghan sa inyong mga katigulangan namatay nga wala mabunyagi ug makumpirmahi. Bisan og ang ilang mga lawas patay na, ang ilang mga espiritu buhi pa didto sa kalibutan sa espiritu, diin mahimo silang tudloan sa ebanghelyo ni Jesukristo.
Kon kamo mag-12 anyos na, mahimo kamong moadto sa templo ug motabang niini nga mga tawo pinaagi sa pagpabunyag ug pagpakumpirma alang kanila. Makapili sila kon ila bang dawaton o dili ang bunyag ug kumpirmasyon. Magsul-ob kamo og lubos puti kon kamo bunyagan alang sa mga patay, sama sa dihang gibunyagan kamo sa inyong kaugalingon.
Hangyoa ang inyong mga ginikanan sa pagtabang kaninyo sa paghimo og lista sa mga sakop sa pamilya kinsa namatay nga wala mabunyagi sa Ang Simbahan ni Jesukristo sa mga Santos sa Ulahing mga Adlaw. Tan-awa kon aduna na bay tawo nga miadto sa templo aron magpabunyag alang kanila.
Ang Endowment
Usa sa mahinugdanong mga panalangin sa templo mao ang endowment. Ang endowment nagpasabut og “gasa.” Kon makadawat kamo sa inyong endowment, kamo makakat-on og dugang pa mahitungod sa plano sa kaluwasan ug makahimo og mga pakigsaad. Ang mga pakigsaad mao ang mga saad nga atong gihimo uban sa Langitnong Amahan. Samtang sundon ninyo ang mga pakigsaad, nangandam kamo sa pagpuyo uban sa Langitnong Amahan ug ni Jesukristo sa umaabut.
Sulod sa templo mao ang matahum, malinawon nga lawak nga gitawag og celestial room. Sa celestial room bation nato nga duol sa Langitnong Amahan ug ni Jesukristo, ug mobati kita og gamay kon unsa ang bation nga magpuyo kauban Sila sa celestial nga gingharian.
Mga Sealing alang sa Karon ug sa Kahangturan
Kon ang usa ka lalaki ug usa ka babaye maminyo sa templo, moluhod sila sa altar ug i-sealed alang sa karon ug sa tanang kahangturan. Nagpasabut kini nga sila ug ang ilang mga anak magkahiusa isip usa ka mahangturon nga pamilya. Planoha nga magpakasal sulod sa templo sa umaabot. Mao kini ang labing mahinungdanon nga panalangin sa templo.
Ang Rekomend sa Templo
Ang templo usa ka sagrado nga dapit. Ang mga bishop ug mga presidente sa branch mosiguro nga kadtong mosulod sa templo andam ug takus. Sa dili pa kamo moadto sa templo, kamo adunay espesyal nga interbyu sa inyong bishop o presidente sa branch. Mangutana siya kon kamo aduna bay pagpamatuod sa Simbahan, mosunod sa mga kasugoan, mosuporta sa mga lider sa Simbahan, mosunod sa Pulong sa Kaalam, mobayad sa ikapulo ug matinuoron sa tanan nga imong gibuhat og gisulti. Siya motabang kaninyo nga mahibalo unsay buhaton nga mahimong takus sa pagsulod sa templo.
Pangandan na Karon sa Pagsulod sa Templo
Ang Langitnong Amahan mohatag og daghang panalangin niadtong kinsa nagpuyo nga matarung ug motambong sa templo. Importante ang pagpangandam sa pagsulod sa templo samtang kamo batan-on pa.
Ang Langitnong Amahan nahigugma kaninyo ug gusto nga kamo modawat sa mga panalangin sa templo. Manalangin Siya kaninyo sa pagpahigayon sa mga ordinansa sa templo alang sa inyong kaugalingon ug sa uban. Bisan kon sa pagkakaron dili ka pa makasulod sa templo, kon adunay templo sa duol, mahimo kamong mobisita sa mga nataran ug mobati sa diwa nga anaa didto. Mahimo kamong magbutang usab og litrato sa templo diha sa inyong balay sa pagpahinumdom kaninyo unsa kaimportante ang templo. Pagpuyo nga matarung aron kamo mahimong takus sa pagsulod sa balay sa Ginoo.
Tan-awa ang samin niini nga litrato. Ang pipila ka mga sealing room adunay samin nga sama niini. Tungod sa mga sealing sulod sa templo, ang atong mga pamilya, sama sa makita niini nga samin, magpadayon hangtud sa hangtud.
Tan-awa ang celestial room niini nga litrato ug sa litrato nga anaa sa pahina 64. Unsa ang inyong bation kon makakita kamo og celestial room?
Templo sa Boston Massachusetts. Gipahinungod Okt. 1, 2000.
Sealing room, Templo sa Aba Nigeria.
Celestial room, Templo sa Nuku’alofa Tonga.