Ang mga Panalangin sa Templo
Ang templo naghatag og katuyoan alang sa atong kinabuhi. Nagdala kini og kalinaw sa atong mga kalag—dili ang kalinaw nga gihatag sa mga tawo apan ang kalinaw nga gisaad sa Anak sa Dios sa dihang miingon Siya, “Kaninyo ibilin ko ang kalinaw, kaninyo ihatag ko ang akong kalinaw.”
Sa templo kita mobati nga duol sa Ginoo
Sa akong hunahuna walay dapit sa kalibutan diin akong bation nga mas duol sa Ginoo kay sa usa sa Iyang balaan nga mga templo. Sa pagbatbat sa usa ka balak:
Unsa man ka layo ang langit?
Dili kaayo kini layo.
Sa templo sa Dios,
Diha ra duol nato.
Miingon ang Ginoo:
“Ayaw kamo pagtigum og mga bahandi alang kaninyo dinhi sa yuta, diin ang tangkob ug ang taya nagakutkot, ug diin ang mga kawatan nagapanakasaka ug nagapangawat:
“Hinonoa pagtigum kamog mga bahandi alang kaninyo didto sa langit, diin walay tangkob ni taya nga magakutkot ug diin walay mga kawatan nga magapanakasaka ug magapangawat:
“Kay hain gani ang imong bahandi, atua usab didto ang imong kasingkasing.”1
Alang sa mga miyembro sa Ang Simbahan ni Jesukristo sa mga Santos sa Ulahing mga Adlaw, ang templo mao ang labing sagrado nga dapit dinhi sa yuta. Mao kini ang balay sa Ginoo, ug sama sa gipahayag sa kinulit sa gawas sa templo, ang templo mao ang “pagkabalaan sa Ginoo.”
Ang templo makapabayaw ug makapahimaya kanato
Sa templo, ang bililhong plano sa Dios gitudlo. Diha sa templo ang mahangturong mga pakigsaad gihimo. Ang templo makapabayaw kanato, makapahimaya kanato, nagbarug isip usa ka banwag nga makita sa tanan, ug makapatumong kanato paingon sa celestial nga himaya. Mao kini ang balay sa Dios. Ang tanan nga mahitabo sa sulod sa mga bong-bong sa templo makapabayaw ug makapadasig.
Ang templo alang sa mga pamilya, usa sa labing mahinungdanon nga mga bahandi nga atong maangkon sa mortalidad. Ang Ginoo klaro kaayo nga namulong ngari kanatong mga amahan, nagpasabut nga kita adunay responsibilidad sa paghigugma sa atong mga asawa sa tibuok natong mga kasingkasing ug sa pagsangkap kanila ug sa atong mga anak. Iyang gipasabut nga ang labing mahinungdanong buhat nga mahimo natong mga ginikanan mao ang gihimo diha sa atong mga panimalay, ug ang atong mga panimalay mahimong langit, ilabi na kon ang atong kaminyoon gi-sealed sa balay sa Dios.
Si kanhing Elder Matthew Cowley, kinsa sakop sa Korum sa Napulog Duha ka mga Apostoles, sa makausa miasoy sa Sabado sa hapon og kasinatian sa usa ka apohang lalaki nga samtang naggunitanay midala sa iyang apo nga babaye sa usa ka pagbisita sa birthday—dili ngadto sa zoo o sa sinehan kondili ngadto sa nataran sa templo. Uban sa pagtugot sa tigbantay sa nataran, ang duha nanglakaw paingon sa dakong mga pultahan sa templo. Misugyot siya nga ipabutang ang iyang kamot sa lig-on nga bong-bong ug dayon sa baga kaayong pultahan. Dayon siya malumong miingon ngadto kaniya, “Hinumdumi nga niining adlawa gihikap nimo ang templo. Moabut ang panahon nga makasulod ka.” Ang iyang regalo ngadto sa usa ka gamayng bata dili usa ka kendi o ice cream apan usa ka kasinatian nga mas labaw ka mahinungdanon ug mahangturon—ang pagdayeg sa balay sa Ginoo. Iyang nahikap ang templo, ug ang templo nakatandog kaniya.
Ang templo makahatag og kalinaw sa atong mga kalag
Samtang atong hikapon ang templo ug higugmaon ang templo, ang atong kinabuhi mopahayag sa atong hugot nga pagtuo. Samtang kita moadto sa balaan nga balay, samtang kita mohinumdom sa mga pakigsaad nga atong himoon didto sa sulod, kita makasugakod sa matag pagsulay ug makabuntog sa matag tintasyon. Ang templo nakahatag og katuyoan alang sa atong kinabuhi. Nakadala kini og kalinaw sa atong mga kalag—dili ang kalinaw nga gihatag sa mga tawo apan ang kalinaw nga gisaad sa Anak sa Dios sa dihang miingon Siya, “Kaninyo ibilin ko ang kalinaw, kaninyo ihatag ko ang akong kalinaw. Kinahanglan dili magkaguol ang inyong kasingkasing, ni magtalaw.”2
Adunay hugot kaayo nga pagtuo taliwala sa mga Santos sa Ulahing mga Adlaw. Ang Ginoo naghatag kanato og mga oportunidad aron makita kon kita mosunod ba sa iyang mga sugo, kon kita mosunod ba sa agianan nga gisubay ni Jesus sa Nazaret, kon higugmaon ba nato ang Ginoo sa tibuok natong kasingkasing, gahum, hunahuna ug kusog, ug higugmaon ang atong mga silingan sama sa atong kaugalingon.3
Nagtuo ako sa proverbio “Sumalig ka sa Ginoo sa bug-os mong kasingkasing; ug ayaw pagsalig sa imong kaugalingong salabutan. Sa tanan nimong mga dalan ilha siya, ug siya magamando sa imong mga alagianan.”4
Mao kana ang kanunay nga nahitabo kaniadto; mao usab kana ang kanunay nga mahitabo. Kon atong buhaton ang atong katungdanan ug hingpit nga mosalig sa Ginoo, atong mapuno ang Iyang mga templo, dili lamang sa paghimo sa buhat sa atong kaugalingong ordinansa, apan sa pagbaton usab og pribilehiyo sa paghimo sa buhat alang sa uban. Moluhod kita sa sagradong mga altar aron mahimong mga proxy sa mga sealing nga naghiusa sa mga bana ug mga asawa ug mga anak alang sa tanan nga kahangturan. Ang takus nga batan-ong mga lalaki ug batan-ong mga babaye nga nag-edad og 12 anyos mahimong mo-proxy alang niadtong kinsa namatay nga wala makadawat sa mga panalangin sa bunyag. Mao kini ang tinguha sa atong Langitnong Amahan alang kaninyo ug alang kanako.
Usa ka milagro nahitabo
Daghang katuigan ang milabay, usa ka mapainubsanon ug matinud-anon nga patriarch, si Brother Percy K. Fetzer, gitawag aron sa paghatag og patriyarkal nga mga panalangin sa mga miyembro sa Simbahan nga nagpuyo sa utlanan sa Komunista nga Nasud.
Si Brother Fetzer miadto sa yuta sa Poland nianang lisud nga panahon. Ang mga utlanan gisirad-an, ug walay mga lumulupyo ang gitugutan nga mobiya. Si Brother Fetzer mihimamat sa mga Santos nga German nga natanggong didto sa dihang ang mga utlanan giusab human sa Ikaduhang Gubat sa Kalibutan ug ang yuta diin sila nagpuyo nahimong kabahin sa Poland.
Ang atong lider uban sa tanan niadto nga mga Santos nga German mao si Brother Eric P. Konietz, nga nagpuyo didto kauban sa iyang asawa ug mga anak. Si Brother Fetzer mihatag nila ni Brother ug Sister Konietz ug sa mas magulang nga mga anak og patriyarkal nga mga panalangin.
Sa dihang si Brother Fetzer mibalik na sa Estados Unidos, mitawag siya ug nangutana kon mahimo ba siya nga mobisita kanako. Samtang milingkod siya sa akong opisina, misugod siya og hilak. Miingon siya, “Brother Monson, samtang akong gibutang ang akong mga kamot ibabaw sa ulo sa mga sakop sa pamilya Konietz, mihimo ko og mga saad nga dili gayud matuman. Misaad ko nila ni Brother ug Sister Konietz nga makabalik sila sa ilang yutang natawhan sa Germany, nga dili sila maulipon sa malupigon nga mga desisyon sa misakop nga mga nasud ug nga sila manag-uban nga ma-sealed isip usa ka pamilya sa balay sa Ginoo. Misaad ko sa ilang anak nga lalaki nga makamisyon siya, ug misaad ko sa ilang anak nga babaye nga maminyo siya sa balaan nga templo sa Dios. Ikaw ug ako nasayud nga tungod sa nasirado nga mga utlanan, dili sila makadawat sa katumanan niadto nga mga panalangin. Unsa man ang akong nabuhat?”
Miingon ako, “Brother Fetzer, nakaila kaayo ko nimo nga nasayud nga gibuhat lang nimo ang unsay gusto sa Langitnong Amahan nga imong buhaton.” Kaming duha miluhod tapad sa akong lamesa ug mipadangat sa among mga pagbati ngadto sa atong Langitnong Amahan, nagpasabut nga ang mga saad nahatag na ngadto sa usa ka mapahinunguron nga pamilya kalabut sa templo sa Dios ug sa uban nga mga panalangin nga sa pagkakaron gihikaw ngadto kanila. Siya lamang ang makapahinabo sa milagro nga among gikinahanglan.
Ang milagro nahitabo. Usa ka pakigsaad ang gipirmahan tali sa mga lider sa gobyerno sa Poland ug sa mga lider sa Federal Republic sa Germany, nga nagtugot sa mga lumulupyo nga German nga natanggong niana nga dapit sa pagbalhin ngadto sa West Germany. Sila si Brother ug Sister Konietz ug ang ilang mga anak mibalhin ngadto sa West Germany, ug si Brother Konietz nahimong bishop sa ward sa dapit nga ilang gipuy-an.
Ang tibuok pamilya Konietz miadto sa balaan nga templo sa Switzerland. Ug kinsa kaha ang presidente sa templo nga mitimbaya kanila nga nagsul-ob og puti uban sa bukas nga mga bukton? Walay lain kondili si Percy Fetzer—ang patriarch nga mihatag kanila og saad. Karon, sa iyang kapasidad isip presidente sa Templo sa Bern Switzerland, giabi-abi niya sila sa balay sa Ginoo, sa katumanan niana nga saad, ug manag-uban nga gi-sealed ang bana ug asawa ug ang mga anak ngadto sa ilang mga ginikanan.
Ang batan-ong anak nga babaye sa katapusan naminyo sa balay sa Ginoo. Ang batan-ong anak nga lalaki nakadawat sa iyang call ug nakatuman og full-time nga misyon.
“Magkita kita sa templo!”
Alang sa pipila kanato, ang atong biyahe paingon sa templo duol ra kaaayo. Alang sa uban, motabok pa og lawud ug mobiyahe pa og layo sa dili pa makasulod sa balaan nga templo sa Dios.
Pipila ka tuig ang milabay, sa wala pa mahuman ang usa ka templo didto sa South Africa, samtang nagtambong og usa ka komperensya sa district nga kaniadto mao ang Salisbury, Rhodesia, akong nakaila ang presidente sa district, si Reginald J. Nield. Siya ug ang iyang asawa ug ang matahum nga anak nga mga babaye misugat kanako samtang misulod ko sa chapel. Mipasabut sila kanako nga kanunay silang nagtigum sa ilang mga kinitaan ug nangandam alang sa adlaw nga sila makabiyahe ngadto sa templo sa Ginoo. Apan, ah, ang templo layo gayud kaayo.
Sa panapos sa miting, ang upat ka maanyag nga mga dalaga nangutana kanako mahitungod sa templo: “Unsa man ang dagway sa templo? Litrato ra man gud ang nakit-an namo.” “Unsa man ang among bation kon kami mosulod sa templo?” “Unsa man ang labing mahinumduman namo?” Sulod sa hapit usa ka oras ako adunay oportunidad sa pag-istorya sa upat ka mga babaye mahitungod sa balay sa Ginoo. Sa akong pagbiya paingon sa airport, sila mikaway kanako, ug ang kinamanghurang babaye miingon, “Magkita kita sa templo!”
Sa paglabay sa usa ka tuig nakahigayon ako sa pag-abi-abi sa pamilyang Nield didto sa Templo sa Salt Lake. Diha sa sulod sa usa ka malinawon nga sealing room ako adunay pribilehiyo sa paghiusa nila ni Brother ug Sister Nield sa kahangturan, ingon man usab sa karon. Dayon ang mga pultahan giablihan, ug kadtong matahum nga anak nga mga babaye, matag usa kanila nagsul-ob og puti nga walay buling, misulod sa lawak. Ilang gigakos ang inahan, dayon ang amahan. Ang mga luha diha sa ilang mga mata, ug ang pasalamat diha sa ilang mga kasingkasing. Anaa kami duol sa langit. Makasulti na gayud ang matag usa, “Karon usa na kami ka pamilya sa kahangturan.”
Kini ang talagsaon nga panalangin nga naghulat niadtong kinsa moadto sa templo. Unta ang matag usa kanato magpuyo og takus nga kinabuhi, uban sa limpyo nga mga kamot ug putli nga mga kasingkasing, aron ang templo mahimong motandog sa atong mga kinabuhi ug mga pamilya.
Unsa man ka layo ang langit? Ako mopamatuod nga diha sa balaan nga mga templo dili gayud kini layo —tungod kay dinhi niining sagrado nga mga dapit nga ang langit ug yuta nag-abut ug ang atong Langitnong Amahan naghatag sa Iyang mga Anak sa Iyang labing mahinungdanong mga panalangin.
Templo sa St. George Utah. Gipahinungod Abr. 6, 1877. Gipahinungod og usab Nob. 11, 1975.
Templo sa Manila Philippines. Gipahinungod Sept. 25, 1984.
Templo sa Bountiful Utah. Gipahinungod Ene. 8, 1995.
Templo sa Bern Switzerland Gipahinungod Sept. 11, 1955. Gipahinungod og usab Okt. 23, 1992.
Sealing room, Templo sa Salt Lake.