Pangandam alang sa mga Panalangin sa Templo

Ni Elder Russell M. Nelson

Sa Korum sa Napulog Duha ka mga Apostoles

Ingon nga ang mga templo giandam alang sa mga tawo, ang mga tawo gikinahanglan nga mangandam sa ilang mga kaugalingon alang sa templo

Kinulit diha sa matag templo ang mga pulong “pagkabalaan sa Ginoo.”¹ Kana nga pamahayag nagpasabut nga ang templo ug mga katuyoan niini mga balaan. Kinsa kadtong mosulod sa templo naghupot usab sa kinaiya sa pagkabalaan.² Ingon nga ang mga templo giandam alang sa mga tawo, ang mga tawo gikinahanglan nga mangandam sa ilang mga kaugalingon alang sa templo.

Ang usa ka templo lahi sa uban nga mga balay alampuanan. Dili sama sa mga chapel, ang templo sirado sa Igpapahulay aron ang mga tawo makatambong sa simbahan ug makauban sa ilang mga pamilya nianang gibalaan nga adlaw. Ang mga templo abli alang sa sagrado nga buhat sa laing mga adlaw sa semana. Ang templo tinuod nga balay sa Ginoo, gigahin alang sa mga ordinansa nga may mahangturong kamahinungdanon. Kadto nga mga ordinansa naglakip sa mga bunyag, mga kasal, mga endowment, ug mga sealing.

Ang matag templo mao ang simbolo sa atong hugot nga pagtuo sa Dios ug ebidensya sa atong pagtuo sa kinabuhi human sa kamatayon. Ang templo mao ang tumong sa matag kalihokan, matag leksyon, matag naglambo nga pamaagi diha sa Simbahan. Ang tanan natong mga paningkamot sa pagsangyaw sa ebanghelyo, paghingpit sa mga Santos, ug pagtubos sa mga patay mopaingon ngadto sa balaan nga templo. Ang mga ordinansa sa templo hilabihan gayud ka mahinungdanon. Dili kita makabalik ngadto sa presensya sa Dios kon wala kini.

Ang matag ordinansa sa templo usa ka buhat sa paghimo og maligdong nga mga saad

Sa templo atong madawat ang endowment, nga, sa laing pagkasulti, usa ka gasa. Gikinahanglan natong masabtan ang espirituhanong kamahinungdanon niini ug ang kaimportante sa pagsunod sa sagrado nga mga pakigsaad ug mga obligasyon nga atong himoon sa pagdawat niini nga gasa. Ang matag “ordinansa sa templo dili lamang usa ka ritwal nga kinahanglang masinati, usa kini ka buhat sa paghimo og maligdong nga mga saad.”³

Ang endowment sa templo gihatag pinaagi sa pinadayag. Busa, kini labing masabtan pinaagi sa pinadayag, madasigong gipangita uban sa putli nga kasingkasing. Si Presidente Brigham Young mipasabut nga “ang inyong endowment mao, ang pagdawat sa tanan nianang mga ordinansa sa balay sa Ginoo, nga kinahanglanon ninyo, human kamo mobiya niining kinabuhia, aron sa paghimo kaninyo sa pagbalik ngadto sa presensya sa Amahan, moagi sa mga anghel kinsa nagbarug isip mga gwardya, … ug maangkon ang inyong mahangturong kahimayaan.”⁴

Ang pagkamasulundon sa sagrado nga mga pakigsaad nga gihimo diha sa mga templo mopasarang kanato sa kinabuhing dayon

Diha sa matag templo ang awtoridad sa priesthood sa pag-seal gigamit. Si Presidente Gordon B. Hinckley mipasabut nga “walay hari, walay presidente sa usa ka nasud, walay opisyal sa bisan unsa nga butang sa kalibutan diin kabahin kita ang adunay awtoridad ibabaw sa mga butang lapas sa lubnganan. Ang tanan walay mahimo kondili mamatay gayud, apan ang labing mapainubsanon, maayo, matarung nga high priest kinsa nakadawat sa awtoridad sa pag-seal mahimong mobugkos didto sa kalangitan nianang gibugkos dinhi sa yuta.”⁵

Ingon nga ang priesthood mahangturon—walay sinugdanan o katapusan —mao usab ang awtoridad niana nga priesthood.⁶ Isip resulta, ang mga ordinansa ug mga pakigsaad sa priesthood molapas pa usab sa panahon. Ang unang pinadayag nga gihatag ni anghel Moroni ngadto kang Propeta Joseph Smith nagpasabut niini nga awtoridad sa priesthood.⁷ Sa misunod nga mga instruksyon ngadto sa Propeta kalabut sa templo, ang Ginoo miingon:

“Himoa kini nga balay nga matukod ngadto sa akong ngalan, aron Ako mopadayag sa akong mga ordinansa diha niini ngadto sa akong mga katawhan;

“Kay Ako mopahiangay sa pagpadayag ngadto sa mga butang sa akong simbahan nga gitago gikan sa wala pa ang katukuran sa kalibutan, mga butang nga mahitungod ngadto sa kapaigoan sa kahingpitan sa panahon.”⁸

Nagpuyo kita niana nga dispensasyon. Ang mga templo, mga ordinansa, mga pakigsaad, mga endowment, ug mga sealing gipahiuli na, sa tukma nga paagi sigun sa gipanagna. Ang mga ordinansa sa templo nagsangkap alang sa pakig-uli ngadto sa Ginoo ug nag-seal sa mga pamilya hangtud sa kahangturan. Ang pagkamasulundon sa sagrado nga mga pakigsaad nga gihimo diha sa mga templo naghimo kanato nga sarang alang sa kinabuhing dayon—ang labing mahinungdanon nga gasa sa Dios ngadto sa tawo.⁹

Bisan kinsa nga matinguhaong mangandam og maayo mahimong mosulod sa templo

Tungod kay ang templo sagrado, ang Ginoo naghangyo nga kini panalipdan nga dili mapasipad-an. Bisan kinsa nga matinguhaong mangandam pag-ayo alang niana nga kahigayunan mahimong makasulod. Ang konsepto sa pagpangandam mopatigbabaw sa uban nga mga buluhaton. Nahinumdom ako sa dihang bata pa ako, gisultihan nako ang akong mga ginikanan nga buot kong mopadayon sa unibersidad. Miingon sila nga mahimo nako, pero kon maninguha lamang ako og maayo sa unang ang-ang sa pag-eskwela ug makapasar sa tanang mga kinahanglanon aron madawat sa unibersidad. Sa samang paagi, kinahanglan gayud nga takus kita nga mosulod sa templo. Kinahanglan nga andam kita sa pisikal, intelektwal, ug sa espirituhanon nga paagi. Ang pagkaangayan gitino nga tinagsa-tagsa alang sa matag tawo nga mokuha og usa ka rekomend.

Kinsa kadtong naghupot sa mga yawe sa awtoridad ug responsibilidad sa priesthood nagtabang kanato nga mangandam pinaagi sa pagpahigayon og mga interbyu alang sa rekomend sa templo. Kini nga mga lider nagpakabana kanato ug nagtabang kanato nga motino kon kita andam nga motambong sa templo. Nahigugma usab sila sa Ginoo ug nagsiguro “aron walay mahugaw nga butang nga makahimo sa pagsulod sa [Iyang] balay.”¹⁰ Sa ingon, kini nga mga interbyu gipahigayon diha sa diwa sa pagkamay-tulubagon.

Unsaon man ninyo pagpangandam alang sa usa ka rekomend sa templo? Mahimo kamong mokonsulta sa inyong bishopric, ingon man usab sa inyong mga ginikanan, pamilya, kapangulohan sa stake, magtutudlo, o adviser sa korum. Ang mga kinahanglanon yano lamang. Sa mubo nga pagkasulti, ang indibidwal kinahanglan nga mosunod sa mga sugo Niya kinsa mao ang nanag-iya niini nga balay. Iyang gitakda ang mga sumbanan. Mosulod kita sa templo isip Iyang mga bisita.

Ang Ginoo mahimuot kon ang matag hamtong nga miyembro mahimong takus—ug makaangkon—og magamit nga rekomend sa templo. “Ang mga interbyu … alang sa mga rekomend sa templo, uban sa [mga sakop sa inyong bishopric] ug mga sakop sa inyong kapangulohan sa stake bililhon nga mga kasinatian. Ug, sa usa ka paagi, mahimo kining makonsiderar nga makahuluganong ‘dress rehearsals’ alang nianang mahinungdanong panagtagbo kon mobarug kamo sa atubangan sa Halangdon nga Maghuhukom.”¹¹

Pangandam sa pisikal nga paagi sa pag-adto sa templo

Karon, kay aduna na may rekomend sa templo nga gihuptan, andam na kamo alang sa dugang nga pagpangandam. Mangandam kamo sa pisikal nga paagi pinaagi sa pagsinina og tarung sa pag-adto sa templo. Dili kini usa ka dapit alang sa ordinaryong pagsinina. Ang mga propeta sa ulahing mga adlaw mihatag og gibug-aton sa pagtahud sa kaugalingon alang sa atong pisikal nga mga lawas. Kana nga pagtahud kinahanglang sundon ilabi na niadtong kinsa mosulod sa balaan nga templo.¹²

Sa templo, ang tanan nagsul-ob og puti nga walay buling. “Ang simblo sa kaputli sa puti nagpahinumdom usab kanato nga ang Dios nagkinahanglan og putli nga katawhan.”¹³ Ang edad, nasyonalidad, pinulongan—bisan ang katungdanan diha sa Simbahan—ikaduha lamang sa kamahinungdanon. Nakatambong na ko og daghang mga sesyon sa endowment diin ang Presidente sa Simbahan miapil. Ang matag tawo diha sa kwarto gihatagan sa samang taas nga pagtagad nga gihatag ngadto sa Presidente. Ang tanan tapad nga naglingkod ug gikonsiderar nga parehas diha sa atubangan sa Ginoo. Pinaagi sa kagawasnon sa pagsinina, ang pagtambong sa templo nagpahinumdom kanato nga “ang Dios wala diay pinalabi sa mga tawo.”¹⁴

Ang mga pangasaw-unon ug mga pamanhunon mosulod sa templo aron kaslon niini nga kinabuhi ug sa tibuok kahangturan. Sa templo, ang mga pangasaw-unon magsul-ob og mga sinina nga puti, taas og bukton, tarung og desinyo ug panapton, ug walay hilabihan nga pag-adorno. Ang mga lalaki dili magsul-ob og mga tuxedo o pormal nga sinina. Si Presidente Boyd K. Packer, karon Presidente sa Korum sa Napulog Duha ka mga Apostoles, misulat: “Makapahimuot sa Ginoo kon atong kaligoon ang atong mga lawas ug magsul-ob og limpyo nga sinina, bisan unsa pa man ka barato ang sinina. Kinahanglan kita nga magsinina sa paagi nga tingali komportable kita nga motambong og sakrament miting o sa panagpundok nga tukma ug ligdong.”¹⁵

Naghisgut mahitungod sa isul-ob diha sa templo, ang mga inahan ug mga apohang babaye makahimo og dakong impluwensya alang sa kaayo diha sa ilang mga anak ug mga apo. Kon itugot sa ilang kahanas ug mga kahimtang, makahatag sila og makita nga pag-awhag sa ilang pamilya. Ang gasa sa inahan nga binurdahan sa kamot nga panyo o laing mga butang sa sinina sa templo mahimong usa ka gamhanang pagpasidungog sa usa ka mahigugmaong anak o apo.

Ang temple garment nagsimbolo sa padayon nga pasalig

Ang pagsul-ob sa temple garment nagdala og dako nga simbolo sa kamahinungdanon ug nagrepresentar og padayon nga pasalig. Ingon nga ang Manluluwas mihatag kanato og ehemplo sa Iyang abilidad sa paglahutay ngadto sa katapusan, ang pagsul-ob og garment mao ang usa ka paagi nga atong mapakita ang mapadayunong pagtuo diha Kaniya ug sa Iyang mahangturong mga pakigsaad ngari kanato.

Ang Unang Kapangulohan miandam og sulat ngadto sa Simbahan kalabut niini nga hilisgutan. Sila misulat:

“Ang mga buluhaton nga kanunayng gibuhat sa mga miyembro sa Simbahan nagsugyot nga ang pipila sa mga miyembro wala makasabut sa hingpit sa pakigsaad nga ilang gihimo diha sa templo nga isul-ob ang garment sumala sa diwa sa balaan nga endowment.

“Ang mga miyembro sa Simbahan kinsa gisul-oban sa garment didto sa templo mihimo og pakigsaad sa pagsul-ob niini sa tibuok nilang kinabuhi. Gihubad kini nga nagpasabut nga kini sul-ubon tibuok adlaw ug gabii isip saput nga pang-ilawom. … Ang saad nga panalipod ug mga panalangin gikondisyon sa pagkatakus ug pagkamatinud-anon sa pagsunod sa mga pakigsaad.

“Ang sukaranang baruganan mao gayud ang pagsul-ob sa garment ug dili mangita og mga rason nga mohubo niini. Busa, ang mga miyembro kinahanglang dili mohubo sa tanan o sa bahin sa garment aron sa pagtrabaho sa nataran o pagpahayahay libut sa panimalay nga nagsul-ob og igkakaligo o sa dili tarung nga sinina. Ni ila kining hubuon aron sa pag-apil og makalingaw nga mga kalihokan nga pwede ra gayud nga adunay garment nga isul-ob ilawom sa kasarangan nga sinina. Kon ang garment kinahanglan gayud nga hubuon, sama sa paglangoy, kinahanglan kining ibalik sa labing madaling panahon kutob sa mahimo.

“Ang mga baruganan sa kaligdong ug angay nga pagtabon sa lawas gipasabut diha sa pakigsaad ug kinahanglan nga mao ang modumala sa kahimtang sa tanang mga sinina nga isul-ob. Ang endowed nga mga miyembro sa Simbahan nagsul-ob og garment isip pahinumdom sa sagrado nga mga pakigsaad nga ilang gihimo ngadto sa Ginoo ug isip panalipod usab batok sa tintasyon ug sa dautan. Kon giunsa kini pagsul-ob mao ang usa ka dayag nga pagpahayag sa tinuoray nga pagsalig sa pagsunod sa Manluluwas.”¹⁶

Pangandam sa hunahuna ug sa espirituhanong paagi sa pag-adto sa templo

Agig dugang sa pisikal nga pagpangandam, kinahanglan kita nga mahimong andam sa hunahuna ug sa espirituhanong paagi. Tungod kay ang mga ordinansa ug mga pakigsaad sa templo sagrado, ubos kita sa hingpit nga obligasyon nga dili hisgutan sa gawas sa templo kanang unsay nahitabo sa sulod sa templo. Ang sagradong mga butang angayan lamang sa sagradong konsiderasyon.

Dinhi niining balay sa pagkat-on, gitudloan kita sa paagi sa Ginoo. Ang Iyang mga paagi dili atong mga paagi.¹⁷ Dili kita mahibulong kon ang mga pamaagi sa pagtudlo lahi kay sa niadtong gigamit sa mga kalihokan sa edukasyon nga mas pamilyar ngari nato. Ang mga ordinansa ug mga pakigsaad sa templo nahimong importante nga bahin sa ebanghelyo sukad pa sa kapanahunan nila ni Adan ug Eva. Sa karaang panahon, ang mga simbolo gigamit aron sa pagtudlo og tulukibon nga mga kamatuoran, ug kini nga panudlo gigamit sa sulod sa templo karon.

Busa, kini mahinungdanon, nga mamalandong kita sa mga simbolo nga gipresentar diha sa templo ug tan-awon ang dagko nga mga kamatuoran nga gibarugan sa matag simbolo.¹⁸ “Ang mga ordinansa sa templo puno kaayo sa makahuluganong simbolo ingon sa paghatag og tibuok kinabuhi nga mabungahong pamalandong ug pagkat-on.”¹⁹ Ang mga pagtulun-an sa templo yano sa matahum nga paagi ug sa yanong paagi matahum. Kini nasabtan niadtong kinsa adunay gamay nga oportunidad sa edukasyon, apan makapadasig kini sa salabutan sa taas og kinaadman.

Akong irekomendar nga ang mga miyembro nga moadto sa templo sa unang higayon mobasa sa mga sulod sa Ang Giya ngadto sa mga Kasulatan nga adunay kalabutan sa templo, sama sa “Dihog,” “Pakigsaad,” “Sakripisyo,” ug “Templo, Balay sa Ginoo.” Ang usa ka tawo mahimo usab nga mobasa sa Exodo, mga kapitulo 26–29, ug Levitico, kapitulo 8. Ang Daang Tugon, ingon man usab ang mga basahon sa Moises ug Abraham diha sa Perlas nga Labing Bililhon, mihatag og gibug-aton sa pagkakaraan sa buhat sa templo ug sa malahutayon nga kahimtang sa mga ordinansa niini.

Ang pagsunod sa pakigsaad ngadto sa Dios parehong mapanalipdon ug makapahimong posible sa mga butang

Adunay duha ka mga konsepto nga labi gayud nato nga kinahanglang hunahunaon samtang mangandam kita alang sa templo. Ang una mao ang pakigsaad. Kinahanglan natong hinumduman nga ang pakigsaad usa ka saad. Ang pakigsaad nga gihimo uban sa Dios kinahanglan nga isipon nga dili madid-anon apan isip mapanalipdon. Ang mga pakigsaad ngadto Kaniya manalipod kanato gikan sa kakuyaw.

Kini nga konsepto dili bag-o. Kon ang atong sangkap sa tubig kwestyonable og kalidad, pananglitan, atong salaon ang tubig. Sa samang paagi, ang balaang mga pakigsaad mopanalipod kanato gikan sa kadaut. Kon mopili kita sa paglimud sa atong kaugalingon sa tanang pagkadili diosnon,²⁰ walay nawala nato nga bililhon ug makaangkon og himaya nga nailhan lamang niadtong kinsa makabaton og kinabuhing dayon. Ang pagsunod sa pakigsaad sa templo dili mapugnganon apan makapahimong posible sa mga butang. Mobayaw kini kanato lapas pa sa mga limitasyon sa atong kaugalingong panglantaw ug gahum. Sama kini sa kalainan tali sa pag-aginud agi sa lapukon nga uma ug dali nga paglupad agi sa kawanangan sa usa ka supersonic jet. Ang pagsunod sa pakigsaad ngadto sa Dios parehong mapanalipdon ug makapahimong posible sa mga butang.

Ang ikaduhang konsepto nga angayang ipasabut og maayo sa pag-andam sa atong hunahuna mao ang Pag-ula. Ang Pag-ula ni Jesukristo mao ang pinakasentro nga buhat sa tibuok tawhanong kasaysayan. Mao kini ang kinauyokan sa plano sa kaluwasan. Kon wala ang walay kinutuban nga Pag-ula, ang tanang katawhan mahanaw hangtud sa kahangturan. Ang mga ordinansa ug mga pakigsaad sa templo nagtudlo sa matubsanong gahum sa Pag-ula.

Ang kinabuhing dayon atong madawat pinaagi sa atong pakamasulundon sa mga pakigsaad nga gihimo diha sa templo

Ang pagserbisyo diha sa templo makadala og mga panalangin ngari kanato niining kinabuhia ingon man usab sa kahangturan. Si Elder Neal A. Maxwell sa Korum sa Napulog Duha ka mga Apostoles miingon nga “ang buhat sa templo dili usa ka paglikay gikan sa kalibutan apan usa ka suporta sa atong panginahanglan sa pagpalambo sa kalibutan samtang nangandam sa atong mga kaugalingon alang sa lain ug mas maanindot nga kalibutan. Busa, ang pagkaanaa sa balay sa Ginoo makatabang kanato nga mahimong lahi sa kalibutan aron sa paghimo nga dugang kalainan diha sa kalibutan.”²¹

Kon kita matinuoron ug matinud-anon niining kinabuhia, mahimo natong maangkon ang kinabuhing dayon. Ang imortalidad mao ang pagpuyo hangtud sa kahangturan. Ang kinabuhing dayon nagpasabut nga mas labaw pa kay sa mahimo lamang nga imortal. Ang kinabuhing dayon mao ang pag-angkon og kahimayaan diha sa kinatas-an nga langit ug magpuyo diha sa yunit sa pamilya. Ang Dios mipadayag nga ang Iyang pamahayag sa mahinungdanong misyon nga —“akong buhat ug ang akong himaya”—mao “ang pagpahinabo sa pagka-imortal ug sa kinabuhi nga dayon sa tawo.”²² Ang iyang gasa sa imortalidad walay kondisyon—usa ka libre nga gasa sa kaluwasan ngadto sa tanang katawhan. Ang posibilidad sa kinabuhing dayon—gani ang kahimayaan— atong madawat pinaagi sa atong pakamasulundon sa mga pakigsaad nga gihimo diha sa templo ug sa mga ordinansa nga atong nadawat diha sa balaan nga mga templo sa Dios.

Ang mga panalangin sa templo mahimong labing makahuluganon kon ang atong mga minahal sa kinabuhi mitaliwan sa atong mga pamilya. Ang pagkasayud nga ang atong panahon sa panagbulag temporaryo lamang nakahatag og kalinaw nga molapas sa ordinaryo nga panabut.²³ Si Presidente Joseph Fielding Smith misulat, “Pinaagi sa gahum niining priesthood nga gihatag ni Elijah, ang bana ug ang asawa mahimong ma-sealed, o maminyo sa kahangturan; ang mga anak mahimong ma-sealed ngadto sa ilang mga ginikanan sa kahangturan; sa ingon ang pamilya nahimong mahangturon, ug ang kamatayon dili makabulag sa mga sakop.”²⁴ Napanalanginan sa mahangturon nga mga sealing, makaatubang kita sa kamatayon isip usa ka importanting bahin sa mahinungdanong plano sa kalipay sa Dios.²⁵

Ang mahangturon nga panglantaw nga atong madawat diha sa templo makahatag kanato og kalig-on sa paglahutay sa mga pagsulay sa kinabuhi

Ang mahangturon nga panglantaw makatabang kanato nga mapabilin ang hingpit nga kamaunungon ngadto sa mga pakigsaad nga atong himoon. Si Presidente Packer mipasabut og maayo nga “ang mga ordinansa ug mga pakigsaad nahimong atong mga diploma aron makasulod ngadto sa presensya sa [Dios]. Ang takus nga pagdawat niini mao ang tibuok kinabuhi nga tinguha; ang paghupot niini human sa pagdawat mao ang hagit sa mortalidad.”²⁶

Ang mga ordinansa sa templo dili lamang may kalabutan sa atong mahangturong himaya apan ngadto usab sa atong nangamatay na nga mga katigulangan. “Kay ang ilang kaluwasan gikinahanglan ug mahinungdanon sa atong kaluwasan, … sila kon wala kita dili mahingpit—ni kita kon wala ang atong mga patay mahingpit.”²⁷ Ang pagserbisyo alang kanila makahatag og oportunidad alang sa atong padayon nga pagsimba diha sa templo, nga gihatag nga dili hinakog isip usa ka tinugyan nga buluhaton nga gisunod nianang gibuhat sa Ginoo samtang Iyang gipahinabo ang Pag-ula aron sa pagpanalangin sa tanan nga matawo.

Usa ka adlaw sigurado gayud nga atong mahimamat ang atong Magbubuhat ug mobarug sa Iyang atubangan diha sa hukmanan. Ang kasulatan nagtudlo kanato nga “ang magbalantay sa ganghaan mao ang Usa nga Balaan sa Israel; ug wala siya mogamit og sulugoon didto; ug walay lain nga agianan gawas kon kini sa ganghaan; kay siya dili malimbongan, kay ang Ginoong Dios mao ang iyang ngalan.”²⁸ Ang Ginoo Mismo ang motino kon kita nagmatinuoron ba sa mga pakigsaad nga atong gihimo ngadto Kaniya diha sa templo ug sa ingon nahimong angayan sa mahimayaon nga mga panalangin nga Iyang gisaad niadtong kinsa nagsunod sa ilang mga pakigsaad.

Kini nga panglantaw naghatag kanato og kalig-on sa paglahutay sa mga pagsulay sa kinabuhi. Si Presidente Packer namahayag, “Ang labing mahinungdanong katuyoan sa tanan nga atong gitudlo mao ang paghiusa sa mga ginikanan ug mga anak diha sa pagtuo kang Ginoong Jesukristo, nga sila nagmalipayon sa panimalay, na-sealed sa usa ka mahangturon nga kaminyoon, nasumpay sa ilang mga henerasyon, ug nasiguro sa kahimayaan didto sa presensya sa atong Langitnong Amahan.”²⁹

Ang matag templo nagbarug isip simbolo sa atong pagkamiyembro sa Simbahan, isip timaan sa atong hugot nga pagtuo sa kinabuhi human sa kamatayon, ug isip ang-ang ngadto sa mahangturong himaya alang kanato ug sa atong pamilya. Ako nag-ampo nga ang matag miyembro sa Simbahan mangandam alang sa talagsaon nga mga panalangin sa templo.

Templo sa Houston Texas. Gipahinungod Ago. 26, 2000.

Templo sa Johannesburg South Africa. Gipahinungod Ago. 24, 1985.

Templo sa Helsinki Finland. Gipahinungod Okt. 22, 2006.

Templo sa Recife Brazil. Gipahinungod Dis. 15, 2000.