Nganong Adunay mga Templo?
Ang mga templo sa Ang Simbahan ni Jesukristo sa mga Santos sa Ulahing mga Adlaw sagrado nga mga istraktura diin ang mahangturon nga mga pangutana matubag.
Ang mga templo mao ang mga dapit diin ang atong mga pangutana mahitungod sa kinabuhi makadawat sa mga tubag kalabut sa kahangturan
Aduna bay usa ka lalaki o babaye kinsa, sa panahon sa hilum nga paghunahuna, wala makapamalandong sa lawom nga mga misteryo sa kinabuhi?
Wala ba siya makapangutana, “Diin man ako gikan? Nganong ania man ako dinhi? Asa man ako padulong? Unsa man ang akong relasyon sa akong Magbubuhat? Ang kamatayon makahikaw ba kanako sa bililhong pagpakig-uban niining kinabuhia? Unsa man ang mahitabo sa akong relasyon uban sa pamilya? Aduna pa bay laing kinabuhi human niini, ug, kon aduna man, magkaila pa ba kami sa usag usa didto?”
Ang mga tubag niini nga mga pangutana dili makita diha sa kaalam sa kalibutan. Makita lamang kini diha sa gipadayag nga pulong sa Dios. Ang mga templo sa Ang Simbahan ni Jesukristo sa mga Santos sa Ulahing mga Adlaw sagrado nga mga istraktura diin kini ug uban pang mahangturon nga mga pangutana matubag. Ang matag usa gipahinungod isip balay sa Ginoo, usa ka dapit sa kabalaan ug usa ka dapit nga gilain gikan sa kalibutan. Dinhi ang mga kamatuoran gitudlo ug ang mga ordinansa gipahigayon nga nagdala og kahibalo mahitungod sa mga butang nga mahangturon ug nagdasig sa mga partisipante sa pagpuyo nga may panabut mahitungod sa atong balaanon nga panulundon isip mga anak sa Dios ug usa ka kahibalo sa atong potensyal isip mahangturon nga mga binuhat.
Ang mga templo talagsaon diha sa katuyoan ug kagamitan kay sa uban nga mga edipisyo kalabut sa relihiyon
Kini nga mga building, lahi kay sa liboan ka mga kasagarang balay alampoanan sa Simbahan nga mikatap sa tibuok kalibutan, talagsaon diha sa katuyoan ug kagamitan kay sa uban nga mga building kalabut sa relihiyon. Dili ang gidak-on niini nga mga building o ang kaanindot sa paghimo niini ang nakapahimo niining talagsaon. Kondili ang buhat nga gipahigayon sa sulod sa mga bong-bong niini.
Ang paglain sa piho nga mga building alang sa espesyal nga mga ordinansa, nga lahi sa kasagaran nga mga dapit sa pagsimba, dili bag-o. Mao na kini ang gibuhat sa karaang Israel, diin ang mga tawo kanunay nga nagsimba diha sa mga sinagoga. Ang ilang mas sagrado nga dapit mao, una, ang tabernakulo didto sa kamingawan nga adunay Balaan sa mga Balaan niini, ug dayon ang sunod-sunod nga mga templo, diin ang espesyal nga mga ordinansa gipahigayon ug diin kadto lamang kinsa nakaabut sa gikinahanglan nga mga kwalipikasyon ang makaapil niini nga mga ordinansa.
Ingon usab niana karon. Sa dili pa ang pagpahinungod sa usa ka templo, Ang Simbahan ni Jesukristo sa mga Santos sa Ulahing mga Adlaw nagdapit sa publiko sa pagsulod sa building ug sa pagtan-aw sa nagkalain-laing mga pasilidad niini. Apan sa higayon nga kini gipahinungod mahimo na kining balay sa Ginoo, gihatagan sa matang nga hilabihan ka sagrado nga ang mga miyembro lamang sa Simbahan nga takus ang gitugutan nga makasulod. Dili kini mahitungod sa pagkasekreto. Mahitungod kini sa pagkasagrado.
Ang buhat sa templo may kalabutan sa matag usa kanato isip mga sakop sa mahangturon nga pamilya sa Dios
Ang buhat nga gipahigayon niini nga mga building nagpakita sa mahangturon nga mga katuyoan sa Dios nga may kalabutan sa tawo, kinsa anak ug nilalang sa Dios. Ang labing mahinungdanon nga bahin, ang buhat sa templo may kalabutan sa pamilya, uban sa matag usa kanato isip mga sakop sa mahangturon nga pamilya sa Dios ug uban sa matag usa kanato isip mga sakop sa yutan-on nga mga pamilya. May kalabutan kini sa pagkasagrado ug mahangturong kinaiya sa pakigsaad sa kaminyoon ug mga relasyon sa pamilya.
Nagpamatuod kini nga ang matag lalaki ug babaye nga natawo sa kalibutan usa ka anak sa Dios, natugahan og usa ka butang sa Iyang balaang kinaiya. Ang pagbalik-balik niining nag-una ug mahinungdanon nga mga pagtulun-an adunay usa ka makaayo nga epekto ngadto niadtong kinsa modawat niini, kay ingon nga ang doktrina klaro nga gipresentar diha sa pinulongan nga parehong matahum ug maanindot, ang partisipante makaamgo nga tungod kay ang matag lalaki ug babaye anak sa Langitnong Amahan, nan ang matag usa sakop sa balaang pamilya; busa, matag tawo iyang igsoon.
Sa dihang gipangutana sa escriba, “Unsa man ang sugo nga una sa tanan?” ang Manluluwas mitubag, “Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan, ug sa tibuok mong kusog: mao kini ang unang sugo.
“Ang ikaduha mao kini, Higugmaa ang imong silingan sama sa imong kaugalingon” (Marcos 12:28, 30–31).
Ang mga pagtulun-an nga gihan-ay diha sa moderno nga mga templo naghatag og gamhanang pagpasabut ngadto niining labing mahinungdanong konsepto sa atong katungdanan ngadto sa atong Magbubuhat ug ngadto sa atong mga silingan. Ang sagrado nga mga ordinansa nagpalambo niining makapadasig nga pilosopiya mahitungod sa pamilya sa Dios. Nagtudlo kini nga ang espiritu nga anaa sa sulod sa matag usa kanato mahangturon, sukwahi sa lawas, nga mortal. Wala lamang kini naghatag og panabut mahitungod niining mahinungdanon nga mga kamatuoran apan nagdasig usab sa partisipante ngadto sa paghigugma sa Dios ug nag-awhag kaniya sa pagpakita og mas pagkamahigalaon ngadto sa uban nga mga anak sa atong Amahan.
Ang pagdawat sa ideya nga ang matag tawo anak sa Dios makatabang kanato nga adunay balaang katuyoan sa mortal nga kinabuhi. Dinhi usab, ang gipadayag nga kamatuoran gitudlo diha sa balay sa Ginoo. Ang kinabuhi sa yuta kabahin sa usa ka mahangturon nga panaw. Nagpuyo kita isip espiritu nga mga anak sa wala pa kita moanhi dinhi. Ang mga kasulatan nagpamatuod niini. Patalinghugi ang pulong sa Ginoo ngadto ni Jeremias: “Sa wala pa ikaw buhata nako diha sa tiyan naila ko na ikaw; ug sa wala pa ikaw mogula sa tagoangkan gibalaan ko na ikaw, gitudlo ko ikaw nga manalagna alang sa mga nasud” (Jeremias 1:5).
Ang bililhon nga mga relasyon sa kinabuhi sa pamilya mahimong magpadayon sa kalibutan nga moabut
Mianhi kita niining kinabuhia isip mga anak sa mortal nga mga ginikanan ug isip mga sakop sa mga pamilya. Ang mga ginikanan katambayayong sa Dios sa pagpahinabo sa Iyang mahangturon nga mga katuyoan nga may kalabutan sa Iyang mga anak. Busa, ang pamilya, usa ka balaang institusyon, ang labing importante sa mortalidad ug sa kahangturan.
Kadaghanan sa buhat nga ipahigayon sa sulod sa mga templo may kalabutan sa pamilya. Ang sukaranan ngadto sa pagsabut sa kahulugan niini mao ang pag-ila sa kamatuoran nga ingon nga kita anaa na isip mga anak sa Dios sa wala pa kita matawo niining kalibutana, ingon man usab kita padayon nga mabuhi human sa kamatayon, ug ang bililhon ug makatagbaw nga mga relasyon sa mortalidad, ang labing matahum ug makahuluganon niini makita diha sa pamilya, mahimong magpadayon sa kalibutan nga moabut.
Kon ang usa ka lalaki ug usa ka babaye magminyo diha sa balay sa Ginoo, sila pagahiusahon dili lamang alang sa panahon sa ilang mortal nga kinabuhi apan alang sa kahangturan. Sila gihiusa ubos sa awtoridad dili lamang sa balaod sa yuta nga naghiusa kanila hangtud sa kamatayon apan pinaagi usab sa mahangturon nga priesthood sa Dios, nga nagbugkos sa langit nianang unsay gibugkos sa yuta. Ang magtiayon nga nagminyo sa ingon adunay kasiguroan sa balaang pinadayag nga ang ilang relasyon ug sa ilang mga anak dili matapos sa kamatayon apan mopadayon sa kahangturan, kon sila magpuyo nga takus niana nga panalangin.
Aduna bay usa ka tawo nga tinuoray nga nahigugma sa usa ka babaye, o usa ka babaye nga tinuoray nga nahigugma sa usa ka lalaki, nga wala mag-ampo nga ang ilang relasyon magpadayon unta lapas pa sa lubnganan? Aduna bay ginikanan nga naglubong sa usa ka anak nga wala mangandoy sa kasiguroan nga ang ilang minahal mailaha pag-usab sa kalibutan nga moabut? Bisan kinsa nga nagtuo sa kinabuhing dayon magduhaduha pa ba nga ang Dios sa langit mohatag sa Iyang anak nga mga lalaki ug mga babaye nianang labing bililhon nga kinaiya sa kinabuhi, nga mao ang gugma nga makaplagan ang labing makahuluganon nga pagpahayag niini diha sa mga relasyon sa pamilya? Dili, ang rason mopatigbabaw nga ang relasyon sa pamilya magpadayon human sa kamatayon. Ang tawhanong kasingkasing nangandoy niini, ug ang Dios sa langit mipadayag og usa ka paagi aron kini mahinabo. Ang sagrado nga mga ordinansa sa balay sa Ginoo naghatag niini.
Ang mga panalangin sa templo alang sa tanan
Apan kining tanan makita nga dili gayud makiangayon kon ang mga panalangin niini nga mga ordinansa alang lamang niadtong kinsa mga miyembro karon sa Ang Simbahan ni Jesukristo sa mga Santos sa Ulahing mga Adlaw. Ang kamatuoran mao nga ang oportunidad nga moadto sa templo ug moambit sa mga panalangin niini bukas sa tanan nga modawat sa ebanghelyo ug magpabunyag sa Simbahan. Tungod niini nga rason, ang Simbahan nagpakatap og usa ka lapad kaayong misyonaryo nga programa sa daghang bahin sa kalibutan ug magpadayon sa pagpadako niini nga programa kutob sa mahimo, tungod kay kini adunay responsibilidad, ubos sa balaang pinadayag, sa pagtudlo sa ebanghelyo ngadto sa matag nasud, kaliwatan, pinulongan, ug katawhan.
Apan adunay dili maihap nga mga minilyon kinsa naglakaw sa yuta ug kinsa wala gayuy oportunidad nga makapaminaw sa ebanghelyo. Sila pagahikawan ba sa ingon nga mga panalangin sama sa gitanyag diha sa mga templo sa Ginoo?
Pinaagi sa buhi nga mga proxy nga mobarug alang sa mga patay, ang sama nga mga ordinansa madawat niadtong nangamatay na. Sa kalibutan sa espiritu kining sama nga mga indibidwal gawasnon sa pagdawat o pagsalikway niadtong yutan-on nga mga ordinansa nga gipahigayon alang kanila, lakip ang bunyag, kasal, ug ang pagsilyo sa mga relasyon sa pamilya. Walay pagpamugos diha sa buhat sa Ginoo, apan kinahanglan gayud nga adunay oportunidad.
Ang buhat sa sulod sa templo usa ka buhat sa gugma sa bahin sa mga buhi alang sa mga patay
Kining gitugyan nga buhat naglangkob og talagsaon nga buhat sa gugma sa bahin sa mga buhi alang sa mga patay. Nakahimo kining mahinungdanon sa dakong buhat sa pagsiksik sa family history aron sa pagpangita ug pag-ila niadtong nangamatay na. Sa pagtabang niini nga pagsiksik, ang Simbahan nagtukod og usa ka programa sa family history ug nagmintinar og mga pasilidad sa pagsiksik nga dili hitupngan diha sa tibuok kalibutan. Ang mga rekord niini abli ngadto sa publiko ug gigamit na sa daghang dili mga miyembro sa Simbahan sa pagpangita sa ilang mga kaliwatan. Kini nga programa gidayeg sa mga genealogist sa tibuok kalibutan ug gigamit sa nagkalain-laing mga nasud sa pagpreserbar sa ilang kaugalingong mga rekord. Apan ang nag-unang katuyoan niini mao ang paghatag sa mga miyembro sa Simbahan og mga kapanguhaan nga gikinahanglan aron sa pag-ila sa ilang mga katigulangan nga sila unta makapaabut ngadto kanila sa mga panalangin nga natagamtaman nila mismo. Makaingon sila sa ilang kaugalingon, “Kon akong gihigugma sa hilabihan ang akong asawa ug mga anak nga gusto nako silang maangkon sa tibuok kahangturan, nan ang akong namatay na nga apohang lalaki ug apohang lalaki sa tuhod ug ang uban pa nga mga katigulangan wala bay oportunidad nga madawat ang sama nga mahangturong mga panalangin?”
Ang mga templo nagtanyag og oportunidad sa pagkat-on sa tinuoray nga makahuluganong mga butang sa kinabuhi
Ug busa kining sagrado nga mga building mga talan-awon sa talagsaong kalihokan, nga napadayon sa hilum nga paagi ug may balaang pagtahud. Nakapahinumdom kini kanato sa usa ka bahin sa panan-awon ni Juan ang Tigpadayag diin narekord kini nga pangutana ug kini nga tubag: “Kinsa man kini sila nga nanagsul-ob og mga bisting maputi ug tag-as? ug diin man sila gikan? …
“Mao kini sila nga nanagpakalabang sa dagkong kasakitan, ug ang ilang tag-as nga bisti gilabhan nila, ug gipaputi diha sa dugo sa Kordero.
“Tungod niini anaa sila sa atubangan sa trono sa Dios, ug nagaalagad kaniya sa maadlaw ug sa magabii sa iyang templo” (Pinadayag 7:13–15).
Kadtong kinsa mosulod niining balaan nga mga balay managsul-ob og puti samtang sila moapil didto sa sulod. Moadto lamang sila sigun sa rekomendasyon sa ilang lokal nga eklesyastikanhong mga awtoridad, gipamatud-an sa ilang pagkatakus. Sila gilauman nga moadto nga limpyo ang hunahuna, limpyo ang lawas, ug limpyo ang sinina nga mosulod sa templo sa Dios. Sa ilang pagsulod gilauman sila nga biyaan sa gawas ang kalibutan ug mopokus sa balaang mga butang.
Kini nga kalihokan, kon mao man ang tawag niini, adunay kaugalingon nga mga kaayohan, kay kinsa man kaha niining panahon sa kakapoy ang dili mohangup sa oportunidad nga ihiklin ang kalibutan ug mosulod sa balay sa Ginoo, didto hilum nga mamalandong sa mahangturon nga mga butang sa Dios? Kining sagrado nga mga templo nagtanyag og oportunidad, nga dili makit-an bisan asa, sa pagkat-on ug pagpamalandong mahitungod sa tinuoray nga makahuluganong mga butang sa kinabuhi—ang atong relasyon sa atong Dios ug ang atong mahangturon nga panaw gikan sa kinabuhi nga wala pa dinhi sa yuta nga kahimtang nganhi niining kinabuhia ug ngadto sa umaabut nga kahimtang diin atong makaila ug makauban ang usag usa, lakip ang atong kaugalingong mga minahal ug ang atong mga kaliwatan kinsa nag-una kanato ug maoy gigikanan sa atong panulundon sa mga butang sa lawas, hunahuna, ug espiritu.
Sa sulod sa templo hatagan kita og saad sa walay katapusan nga mga panalangin sa Dios
Sa tinuoray kini nga mga templo talagsaon taliwala sa tanan nga mga building. Mga balay kini sa pagpanudlo. Mga dapit kini sa mga pakigsaad ug mga saad. Sa mga altar niini kita moluhod atubangan sa Dios, ang atong Tiglalang, ug hatagan og saad sa Iyang walay katapusan nga mga panalangin. Diha sa pagkasagrado niining mga dapit sa templo kita makigsulti Kaniya ug mamalandong mahitungod sa Iyang Anak, nga atong Manluluwas ug Manunubos, si Ginoong Jesukristo, kinsa nagsilbing proxy alang sa matag usa kanato sa gitugyan nga sakripisyo alang kanato. Dinhi atong ihiklin ang atong pagkahakog ug moserbisyo niadtong kinsa dili makaserbisyo sa ilang mga kaugalingon. Dinhi, ubos sa tinuod nga gahum sa priesthood sa Dios, kita pagahiusahon diha sa labing sagrado sa tanan nga tawhanong mga relasyon—isip mga bana ug mga asawa, isip mga anak ug mga ginikanan, isip mga pamilya ubos sa sealing nga ang panahon dili makaguba ug ang kamatayon dili makaputol.
Kining sagrado nga mga building gitukod bisan sa panahon niadtong malisud nga katuigan sa dihang ang mga Santos sa Ulahing mga Adlaw walay hunong nga gipalayas ug gigukod. Gitukod kini ug gipadayon sa mga panahon sa kakabus ug kalamboan. Nagagikan kini sa talagsaong hugot nga pagtuo sa nagkadaghang mga tawo nga nagpamatuod sa buhi nga Dios, sa nabanhaw nga Ginoo, sa mga propeta ug sa pinadayag, ug mahitungod sa kalinaw ug kasiguroan sa mahangturon nga mga panalangin nga makita lamang diha sa balay sa Ginoo.
Bunyaganan, Templo sa Papeete Tahiti.
Templo sa Stockholm Sweden. Gipahinungod Hulyo 2, 1985.
Templo sa Manti Utah. Gipahinungod Mayo 21, 1888. Gipahinungod og usab Hunyo 14, 1985.