Usa ka Katawhan nga Nadasig sa Templo
Paghupot og usa ka litrato sa templo diha sa inyong panimalay aron makita sa inyong mga anak. Tudloi sila mahitungod sa mga katuyoan sa balay sa Ginoo.
Ang templo usa ka mahinungdanong simbolo sa atong pagkamiyembro
Unsa ka mahimayaon nga butang kini alang kanato nga makabaton og pribilehiyo sa pag-adto sa templo alang sa atong kaugalingong mga panalangin. Dayon human sa pag-adto sa templo alang sa atong kaugalingong mga panalangin, unsa ka mahimayaon nga pribilehiyo ang pagbuhat alang niadtong kinsa namatay na. Kini nga aspeto sa buhat sa templo usa ka dili hinakog nga buhat. Apan sa higayon nga kita mohimo sa buhat sa templo alang sa ubang mga tawo, adunay panalangin nga mobalik ngari kanato. Busa dili nato ikatingala nga ang Ginoo nagtinguha nga ang Iyang katawhan mahimong usa ka katawhan nga nadasig sa templo.
Ang Ginoo Mismo kinsa, diha sa Iyang mga pinadayag ngari kanato, mihimo sa templo nga mahinungdanong simbolo alang sa mga miyembro sa Simbahan. Hunahunaa ang mga batasan ug matarung nga mga kinaiya nga gipasabut sa Ginoo nga kinahanglan natong palamboon diha sa tambag nga Iyang gihatag ngadto sa mga Santos sa Kirtland pinaagi ni Propeta Joseph Smith samtang nangandam sila sa pagtukod og templo. Kini nga tambag magamit gihapon:
“Han-aya ninyo ang inyong mga kaugalingon; andama ang matag butang nga kinahanglanon; ug pagtukod og usa ka balay, gani usa ka balay sa pag-ampo, usa ka balay sa pagpuasa, usa ka balay sa hugot nga pagtuo, usa ka balay sa pagtulun-an, usa ka balay sa himaya, usa ka balay sa kahusay, usa ka balay sa Dios” (Doktrina ug mga Pakigsaad 88:119). Kini ba nga mga pamatasan ug mga kinaiya sa tinuoray nagpakita sa unsay gitinguha ug gipangita sa matag usa kanato?
Ang tanan natong mga paningkamot sa Simbahan mopaingon ngadto sa balaan nga templo
Ang tanan natong mga paningkamot sa pagsangyaw sa ebanghelyo, paghingpit sa mga Santos, ug pagtubos sa mga patay mopaingon ngadto sa balaan nga templo. Kini tungod kay ang mga ordinansa sa templo hilabihan gayud ka mahinungdanon; dili kita makabalik ngadto sa presensya sa Dios kon wala kini.
Sa pagkatinuod, ang Ginoo nagtinguha nga ang Iyang katawhan mahimong usa ka katawhan nga nadasig sa templo. Mao unta gayud kini ang labing tinguha sa akong kasingkasing nga ang matag miyembro sa Simbahan mahimong takus sa templo. Manghinaut unta ako nga ang matag hamtong nga miyembro mahimong takus—ug adunay—usa ka magamit nga rekomend sa templo, bisan ang gilay-on sa templo dili makatugot sa miyembro nga magamit dayon o sa kanunay ang rekomend.
Ang templo balaan ngadto sa Dios; kinahanglan nga kini balaan ngari kanato
Himoa nga kita usa ka katawhan nga kanunayng moadto sa templo ug mahigugmaon sa templo. Magdali kita og adto ngadto sa templo ingon ka kanunay kon itugot sa panahon ug salapi ug personal nga mga kahimtang. Dili lamang kita moadto alang sa atong mga nangamatay nga kaliwat, apan kita usab moadto alang sa personal nga panalangin sa pagsimba sa templo, alang sa pagkasagrado ug kaluwasan nga ihatag sulod niadtong gibalaan ug gipahinungod nga mga bong-bong. Ang templo usa ka dapit sa katahum, usa kini ka dapit sa pinadayag, usa kini ka dapit sa kalinaw. Balay kini sa Ginoo. Kini balaan ngadto sa Ginoo. Kinahanglan nga kini balaan ngari kanato.
Atong ipakigbahin sa atong mga anak ang espirituhanon nga mga pagbati nga atong gibati diha sa templo. Ug tudloan nato sila og maayo ug sa mas komportable nga paagi sa mga butang nga mahimo natong isulti sa tukmang paagi mahitungod sa mga katuyoan sa balay sa Ginoo. Paghupot og usa ka litrato sa templo diha sa inyong panimalay aron makita sa inyong mga anak. Tudloi sila mahitungod sa mga katuyoan sa balay sa Ginoo. Ipaplano nila gikan sa ilang bata pa nga pangidaron sa pag-adto didto ug sa pagpabiling takus niana nga panalangin.
Makapahimuot sa Ginoo kon kita takus nga moadto sa templo
Makapahimuot kini sa Ginoo nga ang atong mga kabatan-onan takus nga moadto sa templo ug mopahigayon gitugyan nga mga bunyag alang niadtong walay oportunidad nga mabunyagan sa buhi pa. Makapahimuot kini sa Ginoo kon kita takus nga moadto sa templo aron personal nga mohimo sa atong kaugalingong mga pakigsaad ngadto Kaniya ug ma-sealed isip mga magtiayon ug mga pamilya. Ug makapahimuot kini sa Ginoo kon kita takus nga moadto sa templo aron sa pagpahigayon sa sama nga makaluwas nga mga ordinansa alang niadtong nangamatay, kadaghanan nila naghinamhinam nga naghulat nga makompleto kini nga mga ordinansa alang kanila.
Ang pagbaton og usa ka templo usa gayud ka simbolo ngari kanato, kinahanglan nato kining tinguhaon nga maingon niana. Kinahanglan gayud kita nga magpuyo nga takus aron makasulod sa templo. Kinahanglan gayud kita nga mosunod sa mga sugo sa atong Ginoo. Kon atong masunod ang atong kinabuhi sa Agalon, ug dawaton ang Iyang pagtulun-an ug ehemplo isip ang halangdong sundanan alang sa atong kaugalingon, dili kita maglisud nga mahimong takus sa templo, nga mahimong makanunayon ug matinud-anon sa tanang aspeto sa kinabuhi, kay kita mapasaligon ngadto sa nag-inusara, sagrado nga sumbanan sa pamatasan ug pagtuo. Sa balay man o sa merkado, nag-eskwela man o dugay nang wala nag-eskwela, nagbuhat man nga nag-inusara lamang kita o anaa sa konsyerto kauban ang laing mga tawo, ang atong tumong kinahanglang klaro ug ang atong mga sumbanan kinahanglang makita.
Ang abilidad sa pagkamatinud-anon ngadto sa mga baruganan sa usa ka tawo, ang pagpuyo nga adunay integridad ug hugot nga pagtuo sumala sa gituohan sa usa ka tawo—mao ang labing mahinungdanon. Ang debosyon ngadto sa tinuod nga baruganan— sa atong indibidwal nga mga kinabuhi, sa atong mga panimalay ug pamilya, ug sa tanang mga dapit nga atong makaila ug maimpluwensyahan ang ubang mga tawo—kana nga debosyon mao ang labing gihangyo sa Dios kanato. Nagkinahanglan kini og pasalig—tibuok kalag, gihuptan og maayo, mahangturong gihambin nga pasalig ngadto sa mga baruganan nga atong nasayran aron magmatinuoron sa mga sugo nga gihatag sa Dios. Kon kita magmatinuoron ug magmatinud-anon sa mga baruganan sa Ginoo, nan sa kanunay takus kita sa templo, ug ang Ginoo ug ang Iyang balaan nga mga templo mahimong mahinungdanong mga simbolo sa atong pagkadisipulo Kaniya.
Templo sa Kirtland. Gipahinungod Mar. 27, 1836.
Templo sa Logan Utah. Gipahinungod Mayo 17, 1884. Gipahinungod og usab Mar. 13, 1979.