Kasagarang mga Pangutana

Unsa man ang gipangbuhat sa mga tawo sulod sa templo

Sa templo tudloan kita, mohimo kita og mga pakigsaad, ug kita saaran og mga panalangin. Makadawat kita og mga ordinansa nga makahimo nato sa pagpuyo sa presensya sa Dios.

Usa sa mga ordinansa nga atong madawat sa templo mao ang endowment. Ang pulong nga endowment nagpasabut nga “gasa” o “pagtugyan.” Isip kabahin niini nga ordinansa, tudloan kita mahitungod sa katuyoan sa kinabuhi, sa misyon ug sa Pag-ula ni Jesukristo, ug sa plano sa Langitnong Amahan alang sa Iyang mga anak. Makaangkon kita og daklit nga panglantaw kon unsa ang pagpuyo didto sa Iyang presensya samtang mobati kita sa malinawon nga palibut sa templo.

Lain nga ordinansa sa templo mao ang ordinansa sa sealing, diin ang mga bana ug asawa i-sealed sa usag usa ug ang mga anak i-sealed ngadto sa ilang mga ginikanan nga mahangturong mga pamilya. Nagpasabut kini nga kon kita magmatinud-anon sa atong mga pakigsaad, ang atong relasyon sa pamilya magpadayon alang sa kahangturan.

Agi og dugang sa pagdawat niini nga mga ordinansa alang sa atong kaugalingon, makadawat kita niini alang sa atong patay na nga mga kaliwatan. Niini nga paagi, ang mga tawo nga nangamatay nga wala makadawat sa mahinungdanong mga ordinansa sama sa bunyag ug kumpirmasyon, sa endowment, ug sa sealing makaangkon sa oportunidad sa pagdawat niini nga mga ordinansa.

Unsay bation sa sulod sa templo?

Ang templo puno sa kalinaw, sagrado nga dapit, layo gikan sa mga kahasol ug kagubot sa kalibutan. Ang tanang dapit sa templo matahum kaayo ug mainampingon nga giatiman sa pagpreserbar sa diwa sa balaan nga pagtahud. Tungod kay balay kini sa Ginoo, ug tungod sa sagradong buluhaton nga ipahigayon dinhi, sa templo kita mobati sa Espiritu sa hilabihan ug mobati nga duol sa Ginoo. Didto makadawat kita og personal nga pagpadayag ug espirituhanong kalig-on sa pagtabang kanato nga makabuntog sa mga pagsulay. Lakip kini sa rason nganong kita gidasig sa regular nga pagtambong sa templo.

Unsay akong isul-ob kon moadto ko sa templo?

Pagsul-ob og tarung nga pang-Dominggo nga sinina kon mosulod ka sa templo. Likayi ang nanubra nga pagpamustura ug sa imong sininaan, moadto sama lamang sa imong pag-adto sa miting sa sakrament. Imong ikapakita ang balaang pagtahud ug respeto sa Ginoo ug sa Iyang balay ug modapit sa Espiritu pinaagi sa pagkalimpyo ug pagkapresentable.

Sa templo adunay pribado nga mga ilisanan diin imong ilisan ang imong pang-Dominggo nga sinina ug isul-ob ang puti nga sinina. Kini nga pag-ilis sa sinina nagsilbi nga pahinumdom nga ikaw temporaryo nga mibiya sa kalibutan ug misulod sa usa ka balaan nga dapit. Ang puti nga sinina nagsimbolo sa kaputli, ug ang kamatuoran nga ang tanan pareho ra og sinina diha sa templo nagmugna og pagbati sa pagkahiusa ug kaangayan.

Kanus-a man ako makadawat sa akong endowment?

Kalagmitan madawat ninyo ang inyong endowment pipila ka adlaw sa dili pa magsugod ang inyong pagserbisyo og full-time nga misyon o sa dili ka pa kaslon sa templo. Ang single nga mga miyembro kon hapit na sila mag-baynte anyos o bag-ohay pa lang nag-baynte anyos kinsa wala makadawat sa ilang mission call ug dili pa magminyo sa kasagaran dili irekomend sa pagdawat sa kaugalingon nilang endowment.

Ang bag-ong mga miyembro maghulat pinakaminos usa ka tuig human sa ilang bunyag ug kumpirma sa dili pa makadawat sa ilang endowment.

Ang pagdawat sa kaugalingon nga endowment usa ka importante nga butang. Hisguti kini kauban sa inyong bishop. Pag-ampo ug pagpamalandong aron masayud nga ikaw andam na.

Unsa ang mahimo nakong isulti ngadto sa uban mahitungod sa akong kasinatian sa templo?

Mahimo kang mohisgot kon unsay dagway sa sulod sa templo, ug gawasnon ka sa pagpakigbahin sa imong mga pagbati samtang didto ka sa templo. Hinoon, ang mga pakigsaad ug ang mga ordinansa, lakip na ang mga pulong nga gipanggamit, labihan ka sagrado nga hisgutan sa detalye sa gawas sa templo. Pinaagi sa paglikay sa mga paghisgot niining sagrado nga mga butang sa gawas sa templo, gipanalipdan nato kini sa pagpamugal-bugal, sa pagpanggao-gao, og pagwagtang sa pagtahud. Ayaw himoa nga inato lang kon maghisgot mahitungod sa imong mga kasinatian sa templo.

Ngano nga simbolo ang gigamit sulod sa templo?

Atol sa Iyang yutan-ong pangalagad, ang Manluluwas sa kasagaran nagtudlo pinaagi sa sambingay sa pagrepresentar sa mahangturong mga kamatuoran pinaagi sa simbolo. Iyang gitudlo nga kita tudloan sa sama nga paagi sa templo. Adunay simbolo sa mga ordinansa sa templo ug sa mga pakigsaad, ang ilang presentasyon, sa pisikal nga pagkahan-ay, ug sa sinina nga gisul-ob. Kon hinuktukan ninyo ang kahulugan niini nga mga simbolo uban sa giya sa Espiritu Santo, makatabang kini kaninyo sa pag-ila sa kamatuoran, sa pagkat-on mahitungod sa Langitnong Amahan ug ni Jesukristo, ug pagtubo sa pagka-espirituhanon.

Aduna koy mga sakop sa pamilya nga dili mahimong mosulod sa templo. Unsay akong mahimo sa pagtabang kanila nga mobati nga sila adunay labut sa akong kasal sa templo?

Mahimo nga kini usa ka talandugon nga hilisgutan. Tungod kay ang templo balay man sa Ginoo, gipahinungod ngadto Kaniya, kadtong mosulod kinahanglan nga maghupot og magamit nga rekomend sa templo, nga nagpamatuod nga sila nagsunod sa mga sumbanan nga Iyang gitakda. Bisan pa, kadtong walay mga magamit nga rekomend sa templo welcome sila sa mga nataran sa templo, ug kadaghanan sa mga templo adunay mga lawak diin sila mahimong maghulat samtang ang mga sakop sa pamilya gi-seal. Ang magtiayon nga adunay sakop sa pamilya kinsa dili makasulod sa templo mahimong modapit sa ilang bishop o sa laing miyembro sa Simbahan sa pagkuyog kanila sa lawak hulatanan.

Ang magtiayon mahimo usab nga makigsabut sa ilang bishop sa paghimo og usa ka espesyal nga miting inig-kahuman alang sa mga kaliwat ug mga higala nga walay mga rekomend. Kini nga miting maghatag kanila og oportunidad nga mobati nga sila adunay labut ug sa pagkat-on mahitungod sa mahangturon nga kaminyoon. Bisan tuod og walay seremonyas nga gipahigayon ug walay pagbinayloay sa mga panumpa, ang pagbinayloay sa mga singsing mahimong himoon sa mao nga miting.

Unsa man ang akong buhaton sa pagpangandam nga makadawat sa mga ordinansa sa templo?

Makapangandam ka pinaagi sa regular nga pagtambong sa templo sa pag-apil sa mga bunyag alang sa mga patay, pinaagi sa pag-apil sa temple preparation seminar nga giorganisar sa inyong bishop, ug sa pagtuon sa mga kasulatan ug sa mga artikulo niini nga booklet.

Makapangandam ka pinaagi sa pagsunod sa mga sumbanan sa Ginoo sa pagkahimong takus sa templo. Amumaha ang imong pagpamatuod sa Dios nga Amahan ug ni Jesukristo ug sa Iyang gipahiuli nga ebanghelyo. Sunda ang Pulong sa Kaalam ug ang balaod sa kaputli. Paluyuhi ang imong mga lider sa Simbahan, pagbayad sa tibuok nga ikapulo, ug pagtambong sa imong mga miting sa Simbahan. Pagmatinuoron sa imong pakig-uban sa uban, ug siguroa nga ang imong pamilya nagkauyon sa mga pagtulun-an sa Simbahan. Sunda ang inyong mga pakigsaad sa bunyag aron ikaw mahimong andam sa pagdawat sa mas taas nga mga pakigsaad sa templo.

Celestial room, Templo sa Mount Timpanogos Utah.

Templo sa Jordan River Utah. Gipahinungod Nob. 16, 1981.

Templo sa Nauvoo Illinois Gipahinungod Hunyo 27, 2002.