karnero nga nagsunod kang Jesus

Mipauli sa Panimalay, ni Yongsung Kim

Hulyo 12–18

Doktrina ug mga Pakigsaad 77–80

“Ako Mogiya Kaninyo”

Gisultihan sa Ginoo si Joseph Smith nga Siya “mamulong diha sa [iyang] mga dunggan sa mga pulong sa kaalam” (Doktrina ug mga Pakigsaad 78:2). Unsa nga mga pulong sa kaalam ang imong nadawat samtang nagtuon ka sa Doktrina ug mga Pakigsaad 77–80?

Irekord ang Imong mga Impresyon

Wala pa kaabut og duha ka tuig human mapahiuli ang Simbahan ni Jesukristo, milambo kini ngadto sa sobra sa 2,000 ka mga miyembro ug daling mikaylap. Niadtong Marso 1832 nakighimamat si Joseph Smith sa ubang mga lider sa Simbahan “sa paghisgot og mga butang kalabut sa Simbahan”: ang panginahanglan sa pagmantala sa mga pagpadayag, pagpalit og yuta nga kapundokan, ug pag-atiman sa mga kabus (tan-awa sa Doktrina ug mga Pakigsaad 78, ulohan sa seksyon). Aron matubag kining mga panginahanglan, mitawag ang Ginoo og pipila ka mga lider sa Simbahan aron himoon ang Nagkahiusang Kapunongan [United Firm], usa ka grupo nga mohiusa sa ilang mga paningkamot sa “pagpadayon sa kahimoan” sa Ginoo (bersikulo 4) niining mga dapit. Apan bisan sa maong pang-administratibang mga butang, ang Ginoo nakatutok diha sa mga butang sa kahangturan. Sa katapusan, ang katuyoan sa imprintahanan o usa ka balay tipiganan—sama sa uban pa diha sa gingharian sa Dios—mao ang pag-andam sa Iyang mga anak aron madawat ang “usa ka dapit diha sa celestial nga kalibutan” ug “ang mga katigayunan sa kahangturan” (mga bersikulo 7, 18). Ug kon kadtong mga panalangin lisud masabtan sa pagkakaron, taliwala sa ka-busy sa inadlaw-adlaw nga kinabuhi, mipasalig Siya kanato, “Paglipay, kay Ako mogiya kaninyo” (bersikulo 18).

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 77

Ang Dios mopadayag sa Iyang mga misteryo ngadto niadtong kinsa nagtinguha nga masayud niini.

Dose ka tuig human sa Unang Panan-awon, ang pagdapit diha sa Santiago 1:5 nga “papangayoa siya sa Dios” nagpadayon sa paggiya kang Joseph Smith sa dihang nagkulang siya og kaalam. Sa dihang siya ug si Sidney Rigdon adunay mga pangutana mahitungod sa basahon sa Pinadayag samtang nagtrabaho sila sa dinasig nga hubad sa Biblia, nakinaiya na ni Joseph nga magtinguha og kaalam gikan sa Dios. Samtang magbasa ka sa Doktrina ug mga Pakigsaad 77, ikonsiderar ang pagrekord sa imong mga ideya diha sa may kalabutan nga mga kapitulo sa basahon sa Pinadayag.

Agig dugang, pamalandungi kon unsaon nimo pagsunod sa ehemplo ni Propeta Joseph kon magtuon ka sa mga kasulatan. Mahimo nimong pangutan-on ang Langitnong Amahan, “Unsa may angayan nakong masabtan?”

si Joseph Smith ug si Sidney Rigdon nga nagbasa

Hubad sa Biblia, ni Liz Lemon Swindle

Doktrina ug mga Pakigsaad 78

Unsa man ang Nagkahiusang Kapunongan?

Ang Nagkahiusang Kapunongan gi-establisar aron sa pagdumala sa mga kalihokan sa Simbahan sa pagmantala ug pagnegosyo didto sa Ohio ug Missouri. Naglangkob kini nilang Joseph Smith, Newel K. Whitney, ug uban pang mga lider sa Simbahan nga mihiusa sa ilang mga kapanguhaan aron matubag ang temporal nga mga panginahanglan sa nagtubo nga Simbahan. Walay swerte, ang Nagkahiusang Kapunongan nalubong sa utang ug nabungkag niadtong 1834 sa dihang ang mga utang dili na mabayaran.

Tan-awa usab sa “Nagkahiusang Kapunongan,” Mga Hisgutanan sa Kasaysayan sa Simbahan, ChurchofJesusChrist.org/study/church-history.

Doktrina ug mga Pakigsaad 78:1–7

Makatabang ko sa “pagpadayon sa kahimoan” sa Simbahan.

Ang Ginoo misulti ni Joseph Smith ug sa ubang mga lider sa Simbahan nga ang pagdumala og usa ka balay tipiganan ug imprintahanan makatabang sa “pagpadayon sa kahimoan, nga inyong nadawat” (Doktrina ug mga Pakigsaad 78:4). Unsa ang imong masulti nga mao ang “kahimoan” sa Simbahan? Pamalandunga kini samtang magbasa ka sa Doktrina ug mga Pakigsaad 78:1–7. Siguro ang paghunahuna mahitungod niining mga bersikulo makaimpluwensya sa paagi sa imong pagtuman sa imong calling sa Simbahan o pagserbisyo sa imong pamilya. Sa unsang paagi nga ang imong pagserbisyo “[maka]padayon sa kahimoan” sa Ginoo? Sa unsang paagi kini nag-andam kanimo alang sa “usa ka dapit diha sa celestial nga kalibutan”? (bersikulo 7).

Doktrina ug mga Pakigsaad 78:17–22

Ang Ginoo mogiya kanako.

Mibati ka na ba sukad nga sama sa usa ka gamayng bata, siguro tungod sa butang nga ikaw “wala pa gihapon makasabut” o “dili makaantus”? (Doktrina ug mga Pakigsaad 78:17–18). Pangita og tambag niining mga bersikulo nga makatabang nimo sa “paglipay” (bersikulo 18) sa maong mga higayon. Ngano kaha nga ang Ginoo motawag man usahay sa Iyang mga sumusunod nga “gagmay nga mga bata”? (bersikulo 17). Makapamalandong usab ikaw kon giunsa sa Ginoo “[pag]giya kaninyo” (bersikulo 18).

Doktrina ug mga Pakigsaad 79–80

Ang tawag sa pagserbisyo sa Dios mas mahinungdanon kay sa kon asa ko nagserbisyo.

Kalabut sa Doktrina ug mga Pakigsaad 80, si Elder David A. Bednar nagtudlo, “Tingali usa sa mga leksyon nga gitudlo sa Manluluwas kanato niini nga pagpadayag mao nga ang buluhaton sa pag-alagad sa piho nga dapit mahinungdanon ug importante apan ikaduha lang sa tawag ngadto sa buhat” (“Gitawag ngadto sa Buhat,” Liahona, Mayo 2017, 68). Hunahunaa ang imong kasamtangan o nangaging mga calling sa Simbahan. Unsa nga mga kasinatian ang nakatabang nimo nga makakat-on nga ang mga pulong ni Elder Bednar tinuod? Unsa ang dugang nga mga leksyon nga imong makita diha sa Doktrina ug mga Pakigsaad 79–80 nga makatabang sa usa ka tawo kinsa mao pa ang pagkadawat og bag-ong calling?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 77:2.Human makabasa niining bersikulo, ang mga sakop sa pamilya mahimong magdrowing og mga hulagway sa ilang paborito nga “mga mananap, … mga butang nga nagkamang, … [o] mga mananap sa kahanginan” nga gilalang sa Dios. Unsay atong makat-unan mahitungod sa mga gilalang sa Dios gikan niining bersikulo? (tan-awa usab sa Doktrina ug mga Pakigsaad 59:16–20). Mahimo usab kamo nga mokanta og usa ka awit mahitungod sa mga gilalang sa Dios, sama sa “Gihigugma Ako sa Langitnong Amahan” (Songbook sa mga Bata, 16–17), ug ipakita ang painting nga nag-uban niining outline.

Doktrina ug mga Pakigsaad 77:14.Kining bersikulo nagpasabut nga si Juan mikaon og usa ka basahon nga nagrepresentar sa iyang misyon sa pagpundok sa Israel. Unsay gisugyot sa simbolismo nga magkaon kon unsaon nato ang atong tahas sa pagpundok sa Israel o pagbuhat sa ubang mga butang nga gusto sa Ginoo nga atong buhaton? Ania ang uban pang mga kasulatan diin ang magkaon gigamit aron pagtudlo og usa ka espirituhanong kamatuoran: Juan 6:48–51; 2 Nephi 32:3; Moroni 4. Siguro makahimo mo og usa ka paboritong pagkaon sa pamilya nga dungan nga kaunon atol niining panaghisgutan.

Doktrina ug mga Pakigsaad 78:17–19.Ang mga sakop sa pamilya mahimong magdrowing og mga hulagway sa mga panalangin gikan sa Dios nga sila mapasalamaton. Unsay atong gibuhat sa pagpahayag sa atong pagkamapasalamaton alang niining mga panalangin? Mahimo usab ninyong hisgutan kon giunsa sa inyong pamilya pagsunod ang tambag nga modawat sa “tanan nga mga butang uban sa pagpasalamat” (bersikulo 19). Unsa ang gisaad sa Ginoo alang niadtong kinsa mobuhat niini?

Doktrina ug mga Pakigsaad 79:1.Ipaambit ang imong pagpamatuod bahin “sa gahum” nga imong nadawat sa dihang giordinahan ka o gi-set apart ngadto sa mga calling diha sa Simbahan. Unsa ang piho nga mga gasa ug inspirasyon nga gipanalangin sa Ginoo kanimo samtang ikaw nagserbisyo?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Ipha ang Inyong Panalangin,” Mga Himno, nu. 148.

Pagpalambo sa Atong Pagtudlo

Pagdrowing og litrato. Isip usa ka pamilya, mahimo kamong magbasa og pipila ka mga bersikulo ug dayon hatagi og panahon ang mga sakop sa pamilya sa pagdrowing og butang nga may kalabutan sa unsay ilang gibasa. Ipakita ang mga hulagway palibut sa inyong panimalay aron sa pagpahinumdom sa inyong pamilya sa mga baruganan nga inyong nakat-unan.

usa ka tanaman nga adunay mga hayop

Tanaman sa Dios, ni Sam Lawlor