Springhill, Daviess County, Missouri, ni Garth Robinson Oborn

Hunyo 7–13

Doktrina ug mga Pakigsaad 63

“Kana nga Moabut gikan sa Kahitas-an Sagrado”

Ang mga kamatuoran nga gitudlo sa Doktrina ug mga Pakigsaad 63 makatabang sa mga bata nga imong gitudloan sa paglig-on sa ilang pagtuo sa Langitnong Amahan ug ni Jesukristo. Tungod kay limitado ang imong panahon kanila, ikonsiderar unsa nga mga kamatuoran ang labing makahuluganon ngadto kanila, base sa ilang mga panginahanglan.

Irekord ang Imong mga Impresyon

Dapita ang Pagpaambit

Paghunahuna og yano, mamugnaong paagi sa paghatag sa mga bata og mga oportunidad sa pagpakigbahin unsay ilang nakat-unan. Sama pananglit, pag-andam og lain-laing gidak-on sa gilis sa papel, ug random nga papilia ang matag bata og usa. Dapita ang bata nga adunay labing taas nga papel nga mopakigbahin pag-una.

Itudlo ang Doktrina: Mas Gagmay nga mga Bata

Doktrina ug mga Pakigsaad 63:23

Ang Langitnong Amahan gusto nga makat-on ko sa ebanghelyo.

Ang mga bata kanunay nga nagkat-on. Tabangi sila nga makakita nga ang Langitnong Amahan motabang nila nga makat-on mahitungod Kaniya kon sila mosunod sa Iyang mga sugo.

Posible nga mga Kalihokan

• Basaha ang Doktrina ug mga Pakigsaad 63:23 ngadto sa mga bata, ug hangyoa sila sa pagpaminaw unsay ihatag sa Dios kanato kon kita motuman sa mga sugo. Tabangi sila nga makasabut nga ang “mga misteryo” mao ang mga butang nga dugang itudlo sa Dios kanato, sama kon unsaon nga mahimong sama ni Jesukristo.

• Pagdala og mga litrato ngadto sa klase nga nagrepresentar sa mga hilisgutan sa ebanghelyo nga mahimong makat-unan pa sa mga bata, sama sa bunyag, sa Manluluwas, sa mga templo, ug uban pa. Ibutang ang mga litrato nga magkulob diha sa salog, ug tuguti ang mga bata sa pagpuli-puli sa pag-ukab niini. Hangyoa sila sa pagpakigbahin unsay ilang nahibaloan ug ilang bisan unsa nga mga pangutana mahitungod sa matag hilisgutan.

Doktrina ug mga Pakigsaad 63:49

Ako mabanhaw.

Karon o sa umaabut, ang mga bata nga imong gitudloan mahupay nga makahibalo nga tungod sa Pag-ula sa Manluluwas, ang tanan kinsa namatay mabanhaw sa umaabut.

Posible nga mga Kalihokan

• Ipakita sa mga bata ang usa ka litrato sa usa sa imong minahal nga namatay, ug ipakigbahin ang istorya mahitungod niana nga tawo. Basaha ang Doktrina ug mga Pakigsaad 63:49 ngadto sa mga bata, ug ipamatuod nga moabut ang adlaw nga kana nga tawo “mobangon gikan sa patay” ug dili na gayud mamatay pa pag-usab. Pangutan-a ang mga bata kon aduna ba silay nailhan nga usa ka tawo nga namatay. Ipamatuod nga kitang tanan mabanhaw tungod ni Jesukristo.

• Ipakita ang mga litrato sa lubong ug Pagkabanhaw sa Manluluwas (tan-awa sa Libro sa Hulagway sa Ebanghelyo, nu. 58, 59). Dapita sila sa paghisgot unsay nahitabo diha sa mga hulagway. Dapita ang mga bata nga mohigda samtang ikaw maghisgot mahitungod sa lubong ni Jesus ug sa pagbarug kon ikaw maghisgot sa Iyang Pagkabanhaw. Basaha ang Doktrina ug mga Pakigsaad 63:49, ug ihatag ang imong pagpamatuod nga kitang tanan mabanhaw sa umaabut sama sa nahitabo ni Jesus.

  

  Tanaman nga Lubnganan, ni Jon McNaughton

Doktrina ug mga Pakigsaad 63:64

Kinahanglan nga akong tagdon ang sagrado nga mga butang uban ang balaan nga pagtahud.

Nagpuyo kita sa panahon nga ang sagrado nga mga butang sa kasagaran gibaliwala o gani gibiay-biay. Ikaw makatabang sa mga bata nga makapalambo og balaan nga pagtahud alang sa sagrado nga mga butang.

Posible nga mga Kalihokan

• Basaha ngadto sa mga bata ang Doktrina ug mga Pakigsaad 63:64: “Kana nga moabut gikan sa kahitas-an sagrado.” Hangyoa sila sa paghunahuna og usa ka butang nga espesyal nila, sama sa usa ka paborito nga dulaan o libro. Unsaon nila pag-atiman niini ug pagpanalipod niini? Tabangi sila sa paghunahuna sa mga butang nga espesyal—o sagrado—sa Langitnong Amahan. Sa unsa nga paagi kita mamulong niining mga butanga? Unsaon nato pagtagad niini?

• Kanta uban sa mga bata og awit mahitungod sa balaan nga pagtahud, sama sa “Nagtahud, Naghilum” (Songbook sa mga Bata, 11). Tabangi sila nga maghunahuna og mga paagi nga sila makapakita og balaan nga pagtahud alang sa sagrado nga mga butang.

Itudlo ang Doktrina: Mas Dagko nga mga Bata

Doktrina ug mga Pakigsaad 63:9–10

Mga timailhan moabut pinaagi sa pagtuo ug sa kabubut-on sa Dios.

Si Ezra Booth nakabig ngadto sa Simbahan human makakita ni Joseph Smith nga miayo sa bukton ni Elsa Johnson. Apan unya nawala ang pagtuo ni Ezra, ug siya nahimong kritikal sa Propeta. Ang Doktrina ug mga Pakigsaad 63 naglakip sa mga pasidaan batok sa pagsulay sa paglig-on sa atong pagtuo diha sa mga timailhan, sama sa milagroso nga mga pagkaayo, imbis sa espirituhanong kumpirmasyon sa kamatuoran.

Posible nga mga Kalihokan

• Ipakita ang litrato sa outline niining semanaha sa Dali, Sunod Kanako—Alang sa mga Indibidwal ug mga Pamilya, ug sultihi ang mga bata nga si Joseph Smith migamit sa pagkapari sa pag-ayo sa bukton ni Elsa Johnson, nga wala niya magamit sa hingpit sulod na sa duha ka tuig. Dapita ang mga bata sa pagbasa sa Doktrina ug mga Pakigsaad 63:9–10, ug hangyoa sila sa pagpakigbahin og butang nga gisulti sa Ginoo mahitungod sa pagtuo ug mga timailhan (o mga milagro).

• Dapita ang mga bata sa pagdrowing og balay nga nagpatong sa ibabaw sa usa ka rektanggulo ug laing balay nga nagpatong sa tumoy sa triangle. Sultihi ang mga bata nga ang mga balay nagrepresentar sa atong pagtuo ug mga pagpamatuod. Hangyoa sila sa pagbasa sa Doktrina ug mga Pakigsaad 63:9–10 ug Helaman 5:12. Dayon ipasulat nila diha sa rektanggulo unsay atong angay tukuran sa atong pagtuo ug diha sa triangle unsay atong dili angay tukuran sa atong pagtuo. Itudlo nga ang rektanggulo naghatag og solido nga dapit nga tukuran apan ang triangle dili luwas ug sigurado. Ngano nga importante nga atong itukod ang atong pagtuo diha ni Jesukristo kay sa ubang mga butang?

Doktrina ug mga Pakigsaad 63:23

Kon ako motuman sa mga sugo, ang Dios motudlo kanako sa Iyang mga kamatuoran.

Ang “mga misteryo sa gingharian sa [Dios]” mahibaloan lamang niadtong kinsa nagtuman sa mga sugo sa Dios. Mao nga kini mga misteryo ngadto sa daghang mga tawo. Kini nga baruganan makatabang sa mga bata sa ilang pagpangita sa kamatuoran.

Posible nga mga Kalihokan

• Isulat diha sa pisara Kon ako motuman sa mga sugo, dayon , ug hangyoa ang mga bata sa pagsulat diha sa pisara sa lain-laing mga paagi sa pagtapos sa kapahayag. Hangyoa sila sa pagbasa sa Doktrina ug mga Pakigsaad 63:23 ug mangita og butang nga ilang ikadugang sa ilang lista. Ipakita sa mga bata ang usa ka baso sa tubig, ug hangyoa sila kon sa unsa nga paagi ang mga kamatuoran sa ebanghelyo sama sa tubig ngari nato.

• Ipakita sa mga bata ang usa ka litrato sa usa ka atabay, ug hangyoa sila sa pagdrowing og lain. Human magdungan og basa sa Doktrina ug mga Pakigsaad 63:23, tabangi sila sa paghunahuna sa mga kamatuoran nga ilang nahibaloan mahitungod sa ebanghelyo, ug dapita sila sa pagsulat niini nga mga kamatuoran libut sa ilang mga atabay. Sa unsa nga paagi nga kini nga mga kamatuoran sama sa “buhing tubig”?

Doktrina ug mga Pakigsaad 63:58–64

Kinahanglan nga dili ako mopasipala sa ngalan sa Dios.

Ang mga bata nga imong gitudloan mahimong makadungog sa uban nga naggamit sa ngalan sa Dios sa walay tahud ug sa panamastamas nga mga paagi. Unsaon nimo sa pagtabang kanila nga makasabut nga ang mga ngalan sa Langitnong Amahan ug ni Jesukristo “kinahanglan gayud ipamulong uban sa pag-amping”? (Doktrina ug mga Pakigsaad 63:64).

Posible nga mga Kalihokan

• Basaha ngadto sa mga bata ang Doktrina ug mga Pakigsaad 63:58: “Kini mao ang adlaw sa pagpasidaan.” Hangyoa sila sa paghisgot mahitungod sa mga pasidaan nga ilang nadungog gikan sa ilang mga ginikanan, mga magtutudlo, ug mga lider sa Simbahan. Dayon tabangi sila sa pagpangita og mga pasidaan gikan sa Ginoo sa mga bersikulo 58–64. Unsa ang pipila ka angay nga mga paagi sa “paggamit sa ngalan sa Ginoo”? (bersikulo 62).

• Ribyuha pagdungan ang “Pinulongan” sa Alang sa Kalig-on sa Kabatan-onan (mga pahina 20–21). Hangyoa ang mga bata sa paghimo og gamay nga mga poster nga magpahinumdom nila sa butang nga ilang nakat-unan kon unsaon sa paggamit sa mga ngalan sa Langitnong Amahan ug ni Jesukristo.

• Kanta pagdungan sa usa ka kanta mahitungod sa balaang pagtahud, sama sa “Ang Pagtahud Usa ka Gugma” (Songbook sa mga Bata, 12). Sa unsa nga paagi kita makasiguro nga kita adunay balaan nga pagtahud kon kita maghisgot mahitungod sa Langitnong Amahan ug ni Jesukristo?

Awhaga ang Pagkat-on diha sa Panimalay

Kon ikaw walay panahon sa paghimo sa pahina sa kalihokan niining semanaha diha sa klase, ikonsiderar ang paghatag og kopya sa matag bata nga dad-on sa ilang balay aron kompletuhon uban sa ilang mga pamilya.

Pagpalambo sa Atong Pagtudlo

Lig-una ang pagsalig sa mga bata. Ang ubang mga bata tingali walay pagsalig nga makakat-on sa ebanghelyo sa ilang kaugalingon. Usa ka paagi sa pagtabang kanila mao ang pagdayeg kanila kon sila moapil sa klase. Saari ang mga bata nga ang Espiritu Santo motabang kanila samtang sila magkat-on.