Distrito sa Daviess, Missouri

Hunyo 14–20

Doktrina ug mga Pakigsaad 64–66

“Ang Ginoo Nagkinahanglan sa Kasingkasing ug sa usa ka Andam nga Hunahuna”

Si Presidente Henry B. Eyring miingon: “Kanunay kong modangup sa mga kasulatan uban sa mga pangutana nga ‘Unsay gusto sa Dios nga akong buhaton?’ o ‘Unsay gusto Niya nga akong bation?’ Matag higayon makakita ko og bag-ong mga ideya ug mga hunahuna nga wala pa gayud nako mabatuni kaniadto” (“How God Speaks to Me through the Scriptures,” Peb. 6, 2019, blog.ChurchofJesusChrist.org).

Irekord ang Imong mga Impresyon

Sa init kaayo nga Agosto sa 1831, pipila ka mga elder ang nagbiyahe pabalik ngadto sa Kirtland human ma-survey ang yuta sa Zion didto sa Missouri sigun sa gimando sa Ginoo. Dili kadto usa ka nindot nga biyahe. Ang mga nagbiyahe—sila si Joseph Smith, Oliver Cowdery, Sidney Rigdon, Ezra Booth, ug uban pa—init na og ulo ug nangaluya, ug ang mga tensyon nahimong mga panag-away. Morag ang pagtukod sa Zion, nga usa ka siyudad sa gugma, panaghiusa, ug kalinaw, magkinahanglan pa og taas nga panahon.

Swerte lang, kay ang pagtukod sa Zion—didto sa Missouri pagka-1831 o diha sa atong kasingkasing ug mga ward karon—wala magkinahanglan nga kita mahimong perpekto. Hinoon, “kamo gikinahanglan nga mopasaylo,” miingon ang Ginoo (Doktrina ug mga Pakigsaad 64:10). Nagkinahanglan Siya “sa kasingkasing ug sa usa ka andam nga hunahuna” (bersikulo 34). Ug nagkinahanglan Siya sa pagpailub ug kakugi, kay ang Zion tukuron diha sa pundasyon sa “gagmay nga mga butang,” nga pagatumanon niadtong walay “[pagkaluya] diha sa maayo nga buhat” (bersikulo 33).

Tan-awa usab sa Mga Santos, 1:152–53, 155–57.

Mga Ideya alang sa Personal nga Pagtuon sa Kasulatan

Doktrina ug mga Pakigsaad 64:1–11

Gikinahanglan kong mopasaylo sa tanan.

Samtang magbasa ka sa Doktrina ug mga Pakigsaad 64:1–11, hunahunaa ang usa ka higayon sa dihang gipasaylo ka sa Ginoo. Mahimo usab nga maghunahuna ka mahitungod sa usa ka tawo nga kinahanglan nimong pasayluon. Sa unsang paagi nga ang kalooy sa Manluluwas makaapekto sa imong mga pagbati mahitungod sa imong kaugalingon ug sa uban? Ngano kaha nga ang Ginoo mimando man kanato nga “mopasaylo sa tanan”? (bersikulo 10). Kon nanglimbasug ka sa pagpasaylo, ikonsiderar kon unsay gitudlo sa mosunod nga mga kapanguhaan kon sa unsang paagi nga makatabang ang Manluluwas: Jeffrey R. Holland, “Ang Pangalagad sa Pagpasig-uli (Reconciliation),” Liahona, Nob. 2018, 77–79; Giya ngadto sa mga Kasulatan, “Pasaylo,” scriptures.ChurchofJesusChrist.org.

Doktrina ug mga Pakigsaad 64:31–34

Ang Ginoo nagkinahanglan sa akong kasingkasing ug andam nga hunahuna.

Mibati ka ba og “[pagkaluya]” sa tanang “maayo nga buhat” nga gisulayan nimo sa pagkab-ot? Pangitaa ang mensahe sa Ginoo alang kanimo diha sa Doktrina ug mga Pakigsaad 64:31–34. Unsay buot ipasabut sa paghatag sa imong “kasingkasing ug sa usa ka andam nga hunahuna” ngadto sa Dios? (bersikulo 34).

Doktrina ug mga Pakigsaad 64:41–43

Ang Zion mahimong “bandila ngadto sa mga katawhan.”

Ang bandila “usa ka sumbanan diin ang mga katawhan magpundok sa hiniusa nga tuyo o ilhanan” (Giya ngadto sa mga Kasulatan, “Bandila,” scriptures.ChurchofJesusChrist.org). Sa unsang paagi nga ang Zion—o ang Simbahan sa Ginoo—nahimong sama sa usa ka bandila nganha nimo? Ikonsiderar kining ubang mga ehemplo sa mga butang nga giisa, sama sa usa ka bandila, sa pagpanalangin sa mga tawo: Numeros 21:6–9; Mateo 5:14–16; Alma 46:11–20. Unsa ang gitudlo niining mga bersikulo kanimo kon sa unsang paagi ka makatabang sa Simbahan nga mahimong usa ka bandila kon asa ka nagpuyo? Pangitaa ang laing mga paagi nga gihulagway sa Ginoo ang Zion diha sa Doktrina ug mga Pakigsaad 64:41–43.

Si Kapitan Moroni nga Nagdala sa Bandila sa Kalingkawasan, ni Gary E. Smith

Doktrina ug mga Pakigsaad 65

“Andama ninyo ang dalan alang sa Ginoo.”

Gihulagway ni Mateo si Juan Bautista isip ang usa nga mituaw, “Andama ninyo ang dalan alang sa Ginoo” (Mateo 3:3; tan-awa usab sa Isaias 40:3). Diha sa Doktrina ug mga Pakigsaad 65, gigamit sa Ginoo ang susama nga pinulongan sa paghulagway sa Iyang buhat sa ulahing mga adlaw. Unsa nga mga pagkasusama ang imong nakit-an tali sa unsay gibuhat ni Juan Bautista (tan-awa sa Mateo 3:1–12) ug unsay gusto sa Ginoo nga atong buhaton karon? Unsay imong nakit-an niini nga pagpadayag nga makapadasig nimo nga makatabang sa pagtuman sa mga panagna nga anaa niini? Pamalandungi ang mga paagi nga ikaw “[makahimo] nga mahibaloan ang kahibulongan nga mga buhat [sa Ginoo] diha sa mga katawhan” (bersikulo 4).

Doktrina ug mga Pakigsaad 66

Ang Ginoo nasayud sa mga tinguha sa akong kasingkasing.

Sa wala madugay human mipasakop sa Simbahan, si William E. McLellin mihangyo ni Joseph Smith nga ipadayag ang kabubut-on sa Dios alang kaniya. Wala masayud si Joseph niini, apan si William adunay lima ka personal nga mga pangutana nga iyang gilauman nga tubagon sa Ginoo pinaagi sa Iyang Propeta. Wala kita masayud kon unsa ang mga pangutana ni William, apan nasayud kita nga ang pinadayag nga gitumong alang kaniya, nga karon mao ang Doktrina ug mga Pakigsaad 66, mitubag sa matag pangutana alang sa “hingpit ug kinatibuk-ang katagbawan” ni William (“William McLellin’s Five Questions,” Revelations in Context, 138).

Samtang magbasa ka sa seksyon 66, hunahunaa kon unsay nasayran sa Ginoo mahitungod ni William McLellin ug sa mga gikabalak-an ug mga tinguha sa iyang kasingkasing. Sa unsang paagi nga gipadayag sa Ginoo nga nakaila Siya nimo? Kon ikaw adunay patriyarkal nga panalangin, ikonsiderar ang pagtuon niini. Sa pagbuhat nimo sa ingon, unsay gitabangan og pasabut sa Espiritu Santo kanimo mahitungod sa kabubut-on sa Dios alang kanimo?

Tan-awa usab sa Mga Santos, 1:158–60; Gospel Topics, “Patriarchal Blessings,” topics.ChurchofJesusChrist.org.

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 64:8–10.Ang mga relasyon sa pamilya nakahatag og daghang mga oportunidad nga makakat-on sa pagpasaylo. Siguro ang mga sakop sa pamilya makahisgot kon sa unsang paagi nga ang pagpasaylo sa usag usa nakapanalangin sa inyong pamilya. Sa unsang paagi nga ang Ginoo nakatabang kanato sa pagpasaylo sa usag usa? Sa unsang paagi nga kita “gisakit” (bersikulo 8) kon dili kita mopasaylo sa uban?

Doktrina ug mga Pakigsaad 64:33.Unsay gusto sa Langitnong Amahan nga buhaton sa inyong pamilya aron mahitabo ang Iyang “mahinungdanon nga buhat”? Siguro kini ang pag-adto sa templo, pagpaambit sa ebanghelyo sa usa ka silingan, o pagbuntog sa panagbingkil. Tingali ang matag sakop sa pamilya mahimong mokolekta og gagmay nga mga butang, sama sa mga bato o mga butones o mga piraso sa puzzle, ug gamiton kini aron sa pagrepresentar sa “gagmay nga mga butang” nga atong mabuhat matag adlaw sa “[pagpahimutang] sa tukuranan” alang sa mahinungdanon nga buhat sa Dios. Isip usa ka pamilya, pagkuha og usa niining gagmay nga mga butang nga trabahuon karong semanaha.

Doktrina ug mga Pakigsaad 66:3.Unsaon nimo pagtudlo ang kaimportante sa paghinulsol? Mahimo kang mohatag og pagkaon diha sa usa ka plato nga limpyo ang usa ka bahin ug basaha ang mga pulong sa Ginoo ngadto ni William McLellin: “Ikaw limpyo, apan dili tanan.” Dayon mahimo nimong limpyuhan ang plato ug ipaambit ang pagkaon samtang maghisgot kon giunsa paghimong posible ni Jesukristo aron mahimo kitang limpyo sa espirituhanong paagi.

Doktrina ug mga Pakigsaad 66:10.Unsaon sa inyong pamilya pagsunod sa tambag sa Ginoo nga “ayaw pagtinguha nga masamok,” o mabug-atan sa daghang mga butang nga buhatunon? Mahimo ninyong hisgutan ang istorya ni Maria ug Marta (tan-awa sa Lucas 10:38–42), ug hisguti kon sa unsang paagi nga ang inyong pamilya makalikay nga masamok tungod sa mga butang nga walay mahangturong bili.

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Tabangi Ako, Mahal nga Amahan,” Songbook sa mga Bata, 52.

Pagpalambo sa Atong Pagtudlo

Pagmahimong anaa ug dali nga maduol. Ang pipila sa labing maayo nga mga higayon sa pagtudlo magsugod sa mga pangutana o kabalaka diha sa kasingkasing sa usa ka sakop sa pamilya. Pahibaloa ang mga sakop sa pamilya pinaagi sa imong mga pulong ug mga lihok nga matinguhaon ka sa pagpamati kanila. (Tan-awa sa Pagtudlo sumala sa Pamaagi sa Manluluwas, 16.)

Forgiven [Gipasaylo], ni Greg K. Olsen. Gigamit nga adunay pagtugot. www.GregOlsen.com