Stap Mitim Nid blong Ol Pikinini wetem Disabiliti

Ol lida blong Praemeri oli responsibol blong tijim gospel blong Jisas Kraes long evri pikinini, we i tekem tu ol pikinini we oli gat disabiliti. Long Praemeri, oli mas welkamem evri pikinini, oli mas lavem olgeta, fidim olgeta mo mekem olgeta oli kam pat blong Praemeri. Long ples olsem ia, hem i isi blong evri pikinini oli andastanem lav blong Papa blong yumi long Heven mo blong Jisas Kraes, mo blong filim mo luksave paoa blong Tabu Spirit. Ol aedia we oli kam afta, oli save helpem yu blong lukluk long ol nid blong ol pikinini we oli gat disabiliti.

• Lanem abaot stret nid blong pikinini ia. Bes wei blong mekem hemia, i blong toktok long papa o mama, o olgeta we oli lukaot long pikinini ia. Faenemaot wanem i bes wei we pikinini ia i save lanem samting mo wanem nao ol teknik we i help moa. Yu save kaonsel tu wetem ol nara lida mo tija blong Praemeri we oli gat eksperiens mo ol niu tingting blong serem.

• Mekem wan ples we i gud tumas, blong evri pikinini i filim se hem i sef mo oli lavem hem. Lanem ol nem blong evri pikinini insaed long klas blong yu, mo helpem olgeta blong filim se oli akseptem, lavem mo mekem olgeta i kam pat blong klas o aktiviti. Ol pikinini we oli gat disabiliti, plante taem, oli stap tokbaot nogud olgeta, mekem se yu mas lukaotem ol wei blong presem olgeta from ol gud fasin blong olgeta. Helpem ol pikinini blong gat lav mo save akseptem ol narawan.

• Stretem ol samting blong mekem se evriwan i save tekpat. Yu save mekem ol smol jenis long ol aktiviti blong meksua se evri pikinini oli save lanem samting, wetem tu olgeta we oli no save mekem tumas samting, o oli faenem i had blong lanem samting. Eksampol. Sapos i gat wan aktiviti we insaed, oli mas soem wan pikja, yu save singsing wan singsing we i go wetem pikja ia blong mekem se pikinini we i no save luk samting, bae i save tekpat tu.

• Setemap ol klasrum fasin mo fasin blong wok. Wan wei blong mekem hemia i blong krietem wan posta blong klas taemtebol we i aotlaenem olsem wanem klas bae i go. Long taemtebol, i gat ol prea, taem blong tij, mo taem blong aktiviti. Hemia i save mekem se ol pikinini oli nomo stap askem olgetawan se wanem bae i hapen mo mekem wari blong sam pikinini i kam moa bigwan.

• Yusum samting o kwaet taem we pikinini i save luk Ol pikinini we oli gat ol disabiliti blong lanem samting, o jalenj long fasin blong olgeta, bae oli glad long ol samting o kwaet taem ia: olsem ol pikja we i soem ol stret fasin, olsem wan i leftemap han bifo hem i ansarem kwestin.

• Andastanem from wanem ol jalenj long saed blong fasin i stap hapen. Lanem abaot ol disabiliti o ol situesen we i save mekem se wan pikinini bae i no mekem samting i stret. Luklukgud long wanem i stap hapen taem ol fasin olsem oli stap kamap. Prea mo tingting long wei blong jenisim situesen blong save sapotem pikinini ia i moa gud.

• Helpem wanwan pikinini blong groap mo progres. Josef Smit i bin tijim se: “Evri maen mo spirit we God i stap sendem i kam long wol ia, oli save kam antap mo kam blong save moa” (Teachings of Presidents of the Church: Joseph Smith [2007], 210). Yu no ting se wan pikinini we i gat disabiliti i no save lanem samting, o tekpat long wan samting. Askem Lod blong helpem yu blong save olsem wanem blong helpem ol pikinini blong kasem ful paoa we oli save kasem long saed blong spirit.