Praemeri klas we i stap mekem wan aktiviti

Stap Yusum Kam Folem Mi—Blong Praemeri

Stap Rere blong Tij long Praemeri

Stadi blong wanwan man, woman, mo famli long hom i mas stap olsem senta blong stap lanem gospel. Hemia i tru blong yu, mo blong Pikinini we yu stap tijim olgeta. Taem yu stap rere blong tij, stat wetem eksperiens blong yuwan wetem ol skripja. Fasin blong yu blong rere we i impoten moa, bae i hapen taem yu luklukgud insaed long ol skripja mo taem yu stap lukaotem insperesen blong Tabu Spirit.

Kam Folem Mi—Blong Wanwan Man, Woman mo Famli i wan impoten pat blong stadi blong yuwan, mo wok blong rere blong tij. Bae i helpem yu kasem wan moa dip andastaning abaot ol doktrin prinsipol we oli stap long ol skripja.

Long taem blong stap rere, ol tingting mo ol filing bae oli kam long yu abaot ol pikinini we yu stap tijim. Bambae yu kasem sam niu lukluk abaot hao ol prinsipol long ol skripja bae oli blesem laef blong olgeta. Bae oli gaedem yu blong givim insperesen long olgeta blong oli faenem, olgetawan, mo wetem famli blong olgeta, olgeta prinsipol ia taem oli stap lan aot long ol skripja. Gat tingting long olgeta pikinini we situesen blong famli i no save sapotem wan famli skripja stadi taem we i tekem ples evri dei, mo tu, oli no save gat famli haos naet oltaem.

Sam Aedia blong Tij

Taem yu stap rere blong tij, yu save kasem moa insperesen taem yu lukluk tru long ol tijing aotlaen insaed long buk ia. Yu no tekem se ol aedia ia oli wan instraksen we yu mas folem wanwan step blong hem, be oli sam tingting nomo blong mekem yu gat insperesen. Yu save ol pikinini ia— mo bae yu kam blong save olgeta gud moa taem yu stap mekem samting wetem olgeta insaed long klas. Lod i save olgeta tu; mo bae Hem i givim insperesen long yu blong yu save ol bes wei blong tijim mo blesem olgeta.

Plante nara risos oli stap blong yu yusum taem yu stap rere, mo ol tingting ia oli stap long Kam Folem Mi—Blong Wanwan Man, Woman mo Famli mo long ol magasin blong Jos. Blong gat moa infomesen abaot risos ia mo ol nara risos, luk long “Sam Moa Risos blong Tijim Ol Pikinini” insaed long lesenbuk ia.

Sam Samting blong Kipim long Maen

• Papa mo mama, tufala i gat fas wok ia blong tijim ol pikinini blong tufala. Olsem wan tija, yu gat wan impoten responsabiliti blong sapotem, leftemap tingting mo bildimap fasin blong oli lanem gospel insaed long hom. Gat tingting long olgeta pikinini ia we papa mo mama blong olgeta oli no stap tijim gospel insaed long hom blong olgeta. Meksua se evri pikinini i gat wan pat blong toktok raon long gospel, i nomata long situesen blong hom blong olgeta.

• Ol pikinini oli save lanem samting taem oli serem wanem we oli save. Samtaem, ol taem blong tij we oli gat moa paoa, oli hapen taem ol pikinini oli tijtijim wan samting long olgeta wanwan bakegen; taem oli tijim wan samting we oli lanem aot long ol skripja. Givim plante janis long pikinini blong oli serem samting.

• Bae i isi moa long ol pikinini blong andastanem ol tijing we oli stap long Doktrin mo Ol Kavenan taem oli save histri biaen long ol tijing ia. Bae yu save faenem ol histri insaed long Kam Folem Mi—Blong Wanwan Man, Woman mo Famli, mo Ol Doktrin mo Kavenan Stori.

• Blong ripripitim samting, hem i gud. Ol pikinini oli lanem ol trutok blong gospel moa gud taem oli ripripitim tijing blong ol trutok ia tru long ol defren aktiviti. Sapos yu faenem se wan aktiviti blong lanem samting i wok gud long ol pikinini, tingting blong ripitim aktiviti ia, speseli sapos ol pikinini we yu stap tijim oli ol smol pikinini. Yu save luklukbak tu long wan aktiviti we yu bin mekem long wan lesen bifo.

• Papa long Heven i wantem yu blong gat sakses olsem wan tija. Hem i givim yu plante risos blong helpem yu, mo wan hem i tija kaonsel miting. Long ol miting ia, yu save kaonsel wetem ol nara tija abaot ol jalenj we yu stap fesem. Mo tu, yu save toktok raon mo praktisim ol prinsipol blong stap tij olsem Kraes i bin tij.

• Sapos yu yu stap tijim ol smol pikinini mo yu nidim moa help, luk long “Lukluk long Ol Nid blong Ol Yangfala Pikinini” insaed long lesenbuk ia.

• Insaed long buk ia i gat ol aotlaen blong evri wik blong yia. Long ol Sandei ia we i no gat Praemeri from se i gat stek konfrens o eni nara risen, ol famli oli gohed blong ridim Doktrin mo Ol Kavenan long hom folem taemtebol we i stap long aotlaen. Yu no wari long ol lesen we yu mestem o no tijim; tijim ol lesen we i stap long aotlaen long wik.

woman we i stap stadi long skripja