Ikaw Usa ka Magtutudlo sa mga Bata

Gitawag ka sa Dios aron sa paghigugma ug pagtudlo sa Iyang mga anak sa pamaagi sa Manluluwas. Gi-set apart ka niini nga calling pinaagi sa awtoridad sa Iyang balaan nga pagkapari. Bisan kon dili ka eksperyensyado nga magtutudlo, samtang magpakabuhi ka nga takus, mag-ampo kada adlaw, ug magtuon sa mga kasulatan, ang Langitnong Amahan mohatag kanimo sa impluwensya ug gahum sa Balaang Espiritu aron pagtabang kanimo nga molampus (tan-awa sa 2 Nephi 33:1).

Kadtong gisalig sa imong pag-atiman mga anak sa Langitnong Amahan, ug nasayud Siya kon unsa ang ilang gikinahanglan ug kon unsaon pagtabang kanila sa labing maayong paagi. Pinaagi sa Espiritu Santo, ang Dios mogiya kanimo sa imong pagpangandam ug samtang magtudlo ka. Ipadayag Niya kanimo kon unsay kinahanglan nimong isulti ug unsay kinahanglan nimong buhaton (tan-awa sa 2 Nephi 32:5).

Sa tanang aspeto sa ilang kinabuhi, kining bililhon nga mga bata kanunay nga makadawat og impormasyon, magmugna ug maghashas sa ilang mga opinyon, ug maghimo ug magpaambit sa ilang mga nadiskubrihan. Tinuod gayud kini ilabi na sa ebanghelyo, tungod kay ang mga bata kanunayng andam ug mahinamon nga makakat-on sa yano nga mga kamatuoran niini. Ang ilang hugot nga pagtuo sa espiritwal nga mga butang lig-on ug putli, ug ilang gitan-aw ang matag higayon isip usa ka kahigayunan sa pagkat-on. Andam silang mobuhat sa unsay ilang nakat-unan, bisan kon ang ilang panabut dili pa kompleto. Kinahanglan nga ingon niini ang pagdawat natong tanan sa ebanghelyo. Sama sa gitudlo sa Manluluwas: “Bisan kinsa nga dili modawat sa gingharian sa Dios maingon sa dinawatan sa gamayng bata, siya dili makasulod niini” (Lucas 18:17).

Ang calling sa pagtudlo sa mga bata usa ka sagradong pagsalig, ug normal ra kini nga mobati nga mabug-atan usahay. Apan hinumdumi nga ang imong Langitnong Amahan mitawag kanimo, ug dili gayud Siya mosalikway kanimo. Kini ang buhat sa Ginoo, ug samtang ikaw moserbisyo “sa tibuok [nimo] nga kasingkasing, gahum, hunahuna ug kusog” (Doktrina ug mga Pakigsaad 4:2), Iyang padak-an ang imong mga kapasidad, mga gasa, ug mga talento, ug ang imong pagserbisyo mopanalangin sa kinabuhi sa mga bata nga imong gitudloan.