Pagtubag sa mga Panginahanglan sa Mas Gagmay nga mga Bata

Ang gagmay nga mga bata andam ug mahinamon nga makakat-on sa ebanghelyo kon ipresentar kini sa paagi nga ilang masabtan. Ilabi na kon nagtudlo ka og mas gagmay nga mga bata, ikonsiderar ang paggamit sa mosunod nga matang sa mga kalihokan aron sa pagtabang kanila nga makakat-on.

• Manganta. Ang mga Himno ug mga awit gikan sa Songbook sa mga Bata nagtudlo og doktrina sa gamhanan nga paagi. Gamita ang indeks sa mga hilisgutan sa luyo sa Songbook sa mga Bata aron mangita og mga kanta nga may kalabutan sa mga baruganan sa ebanghelyo nga imong gitudlo. Tabangi ang mga bata nga makonektar ang mensahe sa mga kanta ngadto sa ilang kinabuhi. Sama pananglit, mahimo kang mangutana kalabut sa mga pulong o hugpong sa mga pulong diha sa kanta. Agig dugang sa pagkanta, ang mga bata makahimo og mga aksyon nga mobagay sa mga kanta o maminaw lang sa mga kanta isip background nga musika samtang nagtrabaho sila sa usa ka pahina sa kalihokan.

• Maminaw o i-aksyon ang usa ka istorya. Ang gagmay nga mga bata ganahan og mga istorya sa gugma, mosaysay niini ug maminaw niini. Ipaambit ang mga istorya gikan sa mga kasulatan, gikan sa imong kinabuhi, gikan sa kasaysayan sa Simbahan, o gikan sa mga magasin sa Simbahan, ug ipasaysay sa mga bata ang mga istorya gikan sa ilang kinabuhi. Pangita og mga paagi nga maapil sila sa pagsaysay sa istorya. Mahimo silang maggunit og mga litrato o mga butang, modrowing og mga hulagway sa unsay ilang nadunggan, mo-aksyon sa istorya, o motabang sa pagsaysay sa istorya. Tabangi ang mga bata nga makaila sa mga kamatuoran sa ebanghelyo diha sa mga istorya nga imong gipaambit.

• Magbasa og usa ka kasulatan. Ang gagmay nga mga bata tingali dili pa kaayo makamao nga mobasa, apan mahimo gihapon nimo silang ilakip sa pagkat-on gikan sa mga kasulatan. Posibling gikinahanglan nimo ang pagtutok sa usa ka bersikulo, o importante nga hugpong sa mga pulong, o pulong. Samtang kusgon nimo pagbasa ang usa ka kasulatan, mahimo kang modapit og mga bata sa pagbarug o pag-isa sa ilang mga kamot kon makadungog sila og piho nga pulong o hugpong sa mga pulong nga gusto nimong tutukan. Basin makahimo pa sila sa pagsag-ulo og mubo nga mga hugpong sa mga pulong gikan sa mga kasulatan kon balikon nila kini og sulti sa pipila ka mga higayon. Samtang maminaw sila sa pulong sa Dios, bation nila ang Espiritu.

• Magmainabtikon. Tungod kay ang gagmay nga mga bata kanunay nga lagsik, pagplano og mga paagi nga matugutan sila sa paglihok-lihok—pagmartsa, paglukso-lukso, pagyuko, paglakaw, ug ubang mga lihok nga may kalabutan sa baruganan o istorya nga imong gitudlo. Kini nga mga lihok mahimong epektibo usab samtang dungan kamo nga manganta.

• Magtan-aw og hulagway o magtan-aw og usa ka video. Kon mopakita ka sa mga bata og usa ka hulagway o video nga may kalabutan sa baruganan sa ebanghelyo o istorya sa kasulatan, pangutan-a sila og mga pangutana nga makatabang kanila nga makakat-on gikan sa unsay ilang nakita. Sama pananglit, mahimo ka nga mangutana, “Unsa ang nahitabo niini nga hulagway o video?” o “Unsa ang inyong gibati niini?” Ang Gospel Library nga app, medialibrary.ChurchofJesusChrist.org, ug children.ChurchofJesusChrist.org maayo nga mga dapit nga pangitaan og mga video.

• Magpaambit og mga kasinatian ug pagpamatuod. Ang gagmay nga mga bata tingali wala pa kaayoy mapaambit sama sa mas dagkong mga bata, apan kon hatagan nimo sila og piho nga giya, makahimo sila sa pagpaambit sa ilang mga kasinatian ug mga pagpamatuod kabahin sa unsay ilang nakat-unan.

• Maghimo. Ang mga bata makabuhat, makadrowing, o makakolor og usa ka butang nga may kalabutan sa istorya o baruganan nga ilang gikat-unan. Awhaga sila sa pagdala sa ilang mga hinimo ngadto sa panimalay ug sa pagpaambit niini ngadto sa mga sakop sa pamilya aron sa pagtabang sa mga bata sa paghinumdom sa unsay ilang nakat-unan.

• Moapil sa mga leksyon nga naggamit og mga butang. Ang usa ka yano nga leksyon nga naggamit og butang makatabang sa mga bata nga makasabut sa baruganan sa ebanghelyo nga lisud sabton. Kon mogamit og mga butang sa leksyon, pangita og mga paagi nga makaapil ang mga bata. Mas makakat-on sila gikan sa usa ka kasinatian diin makaapil sila kay sa magtan-aw lang og pasundayag kon unsaon paghimo ang usa ka butang.

• Magdrama-drama [role-play]. Kon idrama-drama sa mga bata ang usa ka sitwasyon nga malagmit ilang masugatan sa tinuod nila nga kinabuhi, mas dali nilang masabtan kon sa unsang paagi ang usa ka baruganan sa ebanghelyo magamit sa ilang kinabuhi.

• Ibalik-balik ang mga kalihokan. Ang gagmay nga mga bata tingali kinahanglang makadungog sa mga konsepto sa makadaghang higayon aron makasabut niini. Ayaw kahadlok nga balikon sa makadaghan ang mga istorya o mga kalihokan, bisan atol sa samang leksyon. Sama pananglit, mahimo nimong ipaambit ang usa ka istorya sa kasulatan sa pipila ka higayon sa lain-laing mga paagi panahon sa usa ka leksyon—pinaagi sa pagbasa gikan sa mga kasulatan, pag-summarize sa imong kaugalingong mga pulong, pagpasalida og video, pagtugot sa mga bata nga motabang kanimo sa pagsaysay sa istorya, pagdapit kanila nga i-aksyon ang istorya, ug uban pa. Kon ang usa ka kalihokan nga gigamit diha sa klase balikon usab diha sa panimalay, ang pagbalik-balik makatabang sa mga bata nga makakat-on ug makahinumdom.

• Makighalubilo [Interact] sa uban. Ang mga bata nagpalambo og sosyal nga mga kahanas ug sa kasagaran malingaw nga magkat-on ug magdula uban sa ilang mga kaedad. Paghimo og mga oportunidad alang kanila nga ipaambit, magpuli-puli, ug motabang samtang magkat-on sila.

• Moapil sa lain-laing mga kalihokan. Ang gagmay nga mga bata kasagaran mubo ra og atensyon, ug sila adunay lain-laing mga estilo sa pagkat-on. Paggamit og lain-laing mga kalihokan, ug hatagi og pagtagad ang mga timailhan nga ang mga bata nagkinahanglan og lain na pod nga kalihokan. Sama pananglit, kinahanglan tingali nimong puli-pulihon sa makadaghan ang hilum ug alegre nga mga kalihokan.

Kabahin sa imong tahas isip magtutudlo sa gagmay nga mga bata—agig dugang sa pagtudlo sa mga baruganan sa ebanghelyo—mao ang pagtabang sa mga bata nga makakat-on unsaon sa pag-apil sa husto nga paagi diha sa usa ka klase sa Simbahan. Sama pananglit, mahimo silang magkinahanglan nga magkat-on mahitungod sa pagpuli-puli, pagpaambit, pagrespeto sa uban, ug uban pa. Ang ubang mga magtutudlo mohimo og mga tsart nga adunay buhatunon alang sa matag bata sa pag-apil sa klase sa piho nga paagi (sama sa pag-ampo, paggunit og litrato, o pagpasa og mga papel). Ang mga buhatunon mahimong mausab matag semana. Makatabang kini sa mga bata nga magpuli-puli ug motutok sa angay nga pamatasan diha sa lawak klasehanan.

Ang mga bata—ilabi na ang mas gagmay nga mga bata—kasagaran makabenepisyo sa usa ka permanente, naandang buluhaton. Tungod kay ang gagmay nga mga bata mubo ra og atensyon ug usahay maglisud sa pagtutok sa tibuok klase, labing maayo kon kini nga buluhaton maglakip og daghang kausaban gikan sa usa ka kalihokan ngadto sa lain. Sama pananglit, ang naandan nga buluhaton sa inyong klase tingali maglakip og panagsa nga paghunong aron magdula, magkolor og hulagway, manganta, ug uban pa.