Ang Paggamit sa Dali, Sunod Kanako—Alang sa Primary

Pagpangandam sa Pagtudlo sa Primary

Ang personal ug pamilya nga pagtuon sa panimalay kinahanglang mao ang sentro sa pagkat-on sa ebanghelyo. Tinuod kini alang kanimo ug sa mga bata nga imong gitudloan. Samtang mangandam ka sa pagtudlo, sugdi pinaagi sa pag-angkon og kaugalingon nimong mga kasinatian sa mga kasulatan. Ang imong labing importante nga pagpangandam mahitabo samtang magsiksik ka sa mga kasulatan ug magtinguha sa inspirasyon sa Espiritu Santo.

Ang Dali, Sunod Kanako—Alang sa mga Indibidwal ug mga Pamilya usa usab ka importante nga bahin sa imong personal nga pagtuon ug sa imong pagpangandam sa pagtudlo. Makatabang kini kanimo nga makaangkon og mas lawom nga pagsabut sa doktrinal nga mga baruganan nga makita diha sa mga kasulatan.

Panahon sa imong pagpangandam, mga hunahuna ug mga impresyon moabut kanimo mahitungod sa mga bata nga imong gitudloan. Makadawat ka og mga panabut kon sa unsang paagi ang mga baruganan diha sa mga kasulatan mopanalangin sa ilang mga kinabuhi. Magiyahan ka sa pagdasig kanila sa pagdiskubre niadto nga mga baruganan samtang magkat-on sila gikan sa mga kasulatan alang sa ilang mga kaugalingon ug uban sa ilang mga pamilya. Hinumdumi nga magmahimong sensitibo ngadto sa mga bata kansang mga kahimtang sa pamilya tingali wala magsuporta sa regular nga pamilya nga pagtuon sa mga kasulatan ug sa family home evening.

Mga Ideya sa Pagtudlo

Samtang mangandam ka sa pagtudlo, mahimong makaangkon ka og dugang nga inspirasyon pinaagi sa pagsuhid sa mga outline sa pagtudlo niini nga kapanguhaan. Ayaw hunahunaa kini nga mga ideya isip nakahan-ay nga mga instruksyon apan isip mga sugyot sa pagdasig sa kaugalingon nimong inspirasyon. Nakaila ka niining mga bataa—ug mas mailhan nimo sila samtang makig-uban ka nila sa klase. Ang Ginoo nakaila usab kanila, ug Siya modasig kanimo sa pinakamaayo nga mga paagi sa pagtudlo ug pagpanalangin kanila.

Daghan pa ang mga kapanguhaan nga mahimo nimong gamiton samtang mangandam ka, lakip sa mga ideya diha sa Dali, Sunod Kanako—Alang sa mga Indibidwal ug mga Pamilya ug sa mga magasin sa Simbahan. Alang sa dugang nga impormasyon kabahin niini ug ubang kapanguhaan, tan-awa sa “Dugang nga mga Kapanguhaan alang sa Pagtudlo sa mga Bata” niini nga kapanguhaan.

Pipila ka Butang nga Angay Hinumduman

• Ang mga ginikanan adunay labing dako nga responsibilidad sa pagtudlo sa ilang mga anak. Isip magtutudlo, ikaw adunay importanting responsibilidad sa pagsuporta, pag-awhag, ug paglig-on sa pagkat-on sa ebanghelyo diha sa panimalay. Magmahimong sensitibo sa mga bata kansang mga ginikanan wala magtudlo sa ebanghelyo diha sa ilang panimalay. Ilakip ang tanang mga bata sa mga panaghisgutan sa ebanghelyo, bisan unsa pa ang mga kahimtang sa ilang panimalay.

• Ang mga bata makakat-on pinaagi sa pagpaambit sa unsay ilang nahibaloan. Usahay ang labing gamhanang mga gutlo sa pagtudlo mahitabo kon ang mga bata motudlo sa usag usa og butang nga ilang nakat-unan gikan sa mga kasulatan. Hatagi og daghang oportunidad ang mga bata aron mopaambit.

• Ang pagsabut sa mga pagtulun-an diha sa Doktrina ug mga Pakigsaad mas sayon alang sa mga bata kon nahibalo sila sa konteksto sa kasaysayan alang niadtong mga pagtulun-an. Mahimo nimong makit-an ang konteksto sa kasaysayan diha sa Dali, Sunod Kanako—Alang sa mga Indibidwal ug mga Pamilya ug Mga Istorya sa Doktrina ug mga Pakigsaad.

• Ang pagbalik-balik maayo. Ang mga bata makakat-on sa mga kamatuoran sa ebanghelyo sa mas epektibong paagi kon kini nga mga kamatuoran ibalik-balik sa pagtudlo pinaagi sa lain-laing mga kalihokan. Kon imong makita nga ang usa ka kalihokan sa pagkat-on epektibo ngadto sa mga bata, ikonsiderar ang pagbalik-balik niini, ilabi na kon nagtudlo ka sa mas gagmay nga mga bata. Ikaw mahimo usab nga magribyu og usa ka kalihokan gikan sa miaging leksyon.

• Ang Langitnong Amahan gusto nga molampus ka isip usa ka magtutudlo. Mihatag Siya og daghang kapanguhaan sa pagtabang nimo, lakip na ang mga miting sa teacher council. Niining mga miting mahimo kang magpakitambag sa ubang mga magtutudlo mahitungod sa mga hagit nga imong giatubang. Mahimo usab nimong hisgutan ug sundon ang mga baruganan sa Kristohanon nga pagtudlo.

• Kon nagtudlo ka sa mas gagmay nga mga bata ug nagkinahanglan og dugang nga tabang, tan-awa ang “Pagtubag sa mga Panginahanglan sa Mas Gagmay nga mga Bata” dinhi niini nga kapanguhaan.

• Kini nga kapanguhaan naglakip sa mga outline alang sa kada semana sa tibuok tuig. Sa mga Dominggo nga walay ipahigayon nga Primary tungod sa kinatibuk-ang komperensya, komperensya sa stake, o sa bisan unsang rason, ang mga pamilya kinahanglang magpadayon sa pagbasa sa Doktrina ug mga Pakigsaad diha sa panimalay sumala sa iskedyul nga gilatid. Ayaw kabalaka bahin sa mga leksyon nga wala nimo mahimo; itudlo ang gi-assign nga sinemanang outline.