Katubaleka iloilo buto ni Valetabu mai Nauvu Ilinoi, mai vei Tom Holdman

28 ni Janueri–3 ni Feperueri

Maciu 3; Marika 1; Luke 3

“Dou Caramaka na Sala i Jiova”

Ni o wilika me baleti Joni na Dauveipapitaisotaki kei na papitaiso nei Jisu Karisito, vola na veivakauqeti kece vakayalo o ciqoma. Lako Mai, Mo Muri Au—Baleta na Tamata Yadua kei na Matavuvale e rawa ni vukei iko mo kila na ivolanikalou eso oqo, ka na vukei iko mo tokona na vuli era dui cakava tiko vakataki ira na lewe ni kalasi.

Vola na Veika o Uqeti Kina

Sureta na Veiwasei

Me soli e dua na madigi vei ira na gone me ra wasea na veika era sa vulica oti, vakaraitaka e dua na iyaloyalo ni nona papitaiso ko Jisu, ka kerei ira me ra tukuna vei iko na cava e yaco tiko ena iyaloyalo kei na cava nodra nanuma me baleta na papitaiso.

Vakavulica na iVunau

Gone Sobu

Maciu 3:13–17

Au rawa ni papitaiso me vakai Jisu.

E rawa beka ni o vakayagataka vakacava na itukutuku ni papitaiso i Jisu me vukea na nodra vakarau na gone me ra papitaiso?

iTaviqaravi e Rawa ni Caka

• Umana na italanoa ni papitaiso ni iVakabula (raica Maciu 3:13–17; raica talega “Wase 10: Sa Papitaisotaki ko Jisu,” iTalanoa ni Veiyalayalati Vou, 26–29, se na kena vidio ena LDS.org). Taleva vakavica na italanoa ka sureti ira na gone me ra wasea na veika matailalai era nanuma rawa. Vakamacalataka ni o Jisu a papitaiso ena tabadromuci mai vua e dua ka tu vua na lewa ni matabete.

• Vakaraitaka e dua na iyaloyalo ni nona papitaiso o Jisu kei na tabana ni itaviqaravi ni macawa oqo. Me ra dusia na gone na veika e tautauvata ena iyaloyalo e rua oqo.

• E rawa ni o railesuva na yalayala era na vakayacora na gone ni ra papitaiso (raica na Mosaia 18:8–10; V&V 20:37; Tudei ena Vakabauta, 23). Taroga se o cei vei ira oqo era sa vakayacora tiko.

• Sureta e dua na lewe ni matabisopi me tukuna vei ira na gone na veivakatarogi ni papitaiso ena caka ni ra se bera ni papitaiso.

• Lagata “Baptism,” ena iVolanisere ni Lalai, 100–101, vata kei ira na gone. Vakasamataka mo kerea e dua na gone e kila vinaka na sere me liutaki ira na vo ni gone ni ra lagasere.

E rawa ni da muria na ivakaraitaki nei Jisu ena noda papitaiso.

Maciu 3:11, 16

E vukei au na Yalo Tabu.

Me ikuri ni vakavakarau ki na papitaiso, era sa vakarau tale tikoga na gone me ra ciqoma na isolisoli ni Yalo Tabu. E rawa vakacava mo vukei ira?

iTaviqaravi e Rawa ni Caka

• Vakayagataka na Maciu 3:11, 16 mo vakavulici ira na gone ni a sobuti Jisu na Yalo Tabu ena gauna a papitaiso kina (a rairai mai e dua na ruve me ivakatakilakila ni kena yaco oqo). Vakaraitaka na iyaloyalo Na iSolisoli ni Yalo Tabu (iVola ni Yaloyalo Vakosipeli naba 105), ka vakamacalataka ni da ciqoma na isolisoli ni Yalo Tabu ena gauna eda vakadeitaki kina.

• Kauta mai e dua na kateni ka tu kina eso na ka vaka na iyaloyalo kei Jisu, dua na itutuvi lomavinaka, kei na dua na kabasi. Sureti ira na gone me ra digia e dua na iyaya qai wasea se matataka vakacava e dua na ivakarau e rawa ni vukei keda kina na Yalo Tabu—e vakadinadinataki Jisu o Koya, vakacegui keda (raica Joni 15:26), ka vakaraitaka vei keda na sala donu (raica 2 Nifai 32:5).

• Wasea na veika o sa sotava ena nomu vukei mai vua na Yalo Tabu.

• Sureti ira na gone me ra vakarogoca na ivakarau e vukei ira kina na Yalo Tabu ni ra lagata “The Holy Ghost,” Children’s Songbook, 105.

Vakavulica na iVunau

Gone Qase Cake

Maciu 3

Au sa vakalougatataki mai na veicakacaka vakalotu ni Matabete i Eroni.

A taura tu o Joni na Dauveipapitaisotaki na Matabete i Eroni, oqo e dua na madigi vinaka me vakavulici vei ira na gone me baleta na Matabete i Eroni ka vukea me ra vakadinadinataka na veivakalougatataki kei na mana ena yaco mai vei keda na tagane kei na yalewa ena vuku ni matabete oqo.

iTaviqaravi e Rawa ni Caka

• Sureti ira na gone me ra cakava e dua na ituvatuva ni itavi ni Matabete i Eroni, ni vakayagataki na Vunau kei na Veiyalayalati 20:46, 58–60; 84:111. Vakamacalataka ni o ira na bete ena Matabete i Eroni e rawa ni ra “veipapitaisotaki, ka qarava na sakaramede.” O ira na bete, ivakavuvuli, kei na dikoni me ra “veivakavulici, ka veisureti ki na tamata kecega me ra lako mai vei Karisito” (V&V 20:46, 59). Kerei ira na gone me ra raica na Maciu 3 ena ivakaraitaki ni nona qarava o Joni na veiitavi oqori. E rawa vakacava vei keda kece me da sureti ira na tani me ra lako mai vei Karisito, me vaka a vakayacora o Joni?

• Vakaraitaka eso na iyaloyalo ni Matabete i Eroni era qarava tiko na cakacaka vakalotu ni papitaiso kei na sakaramede (raica iVola ni iYaloyalo Vakosipeli, naba 103, 108). Veitalanoataka na ivakarau era vakarautaki keda kina na cakacaka vakalotu oqo me da ciqomi Jisu Karisito kei na Nona Veisorovaki.

• Wilika vata na Vunau kei na Veiyalayalati 13:1, ka vakamacalataka ni a vakalesuya mai o Joni na Dauveipapitaisotaki na Matabete i Eroni vei Josefa Simici. Tarogi ira na gone era a vakalougatataki vakacava ena kena vakalesui mai na Matabete i Eroni.

Maciu 3:13–17; Luke 3:2–18

Au rawa ni maroroya na noqu veiyalayalati ni papitaiso.

Na itukutuku ni papitaiso i Jisu sa dua na madigi vinaka me ra vukei kina na gone ni railesuva nodra veiyalayalati ni papitaiso ka vakadeitaka na kena muri.

iTaviqaravi e Rawa ni Caka

• Kerei rau e rua na gone me rau wilika na Luke 3:7–9, 15–17, me dua e wilika na vosa nei Joni na Dauveipapitaisotaki kei koya kadua me wilika na kena vo ni vosa. NI oti na tikina yadua, cegu vakalailai ka vukei ira na gone me ra kila na ibalebale ni tikina.

• Railesuva na veiyalayalati era a cakava na gone ena nodra papitaiso, me vaka e kune ena Mosaia 18:8–10 kei na Vunau kei na Veiyalayalati 20:37. (Raica talega na Tudei ena Vakabauta, 23–26.) Sureti ira na gone me ra vola na idusidusi eso ena tabana ni itaviqaravi ni macawa oqo.

• Vakarautaka e vicavata na kadi veisa kei na malanivosa veisotari se iyaloyalo ka matataka noda veiyalayalati ni papitaiso. Vakatoboicutaka na kadi. Sureti ira na gone me ra veivukevuke ni vakatadraicaketaka yarua ena dua na gauna, me ra vakaraica na veisa erau sota vata. Ni rau sa sota rawa e rua, sureti ira na gone me ra wasea na sala era sa rokova tiko kina na veiyalayalati oya.

• Wasea na ivakarau sa vakalougatataki iko kina na rokovi ni nomu veiyalayalati ni papitaiso.

Maciu 3:11, 16

E rawa ni tuberi iko na Yalo Tabu.

Era sa vulica tiko na gone na ivakarau me ra vakila ka muria kina na veituberi ni Yalo Tabu. E rawa vakacava ni o vakavulici ira ni kena maroroi voli na nodra veiyalayalati ni papitaiso ena vukei ira me ra bula kilikili ni ciqoma na veidusimaki oqo?

iTaviqaravi e Rawa ni Caka

• Kerei ira yadua na gone me ra digitaka e dua vei ira na ivolanikalou oqo me wilika ka vakamacalataka na ivakarau e vosa kina vei keda na Yalo Tabu: Vunau kei na Veiyalayalati 6:23; 8:2–3.

• Sureta e dua na gone me wilika na Maciu 3:11 E tautauvata vakacava kei na bukawaqa na Yalo Tabu? Taura mada, na bukawaqa e veivakacegui, ka solia vei keda na rarama me dusimaki keda (raica Joni 15:26; 2 Nifai 32:5).

• Sureti ira na gone me ra bobo ka dulaka mai na ligadra. Qai masia vakamalua na qeteqete ni ligadra ena dua na vutinimanumanu se wa. Sureti ira me ra tukuna mai na gauna era sa vakila kina. Na cava e vakavuvulitaka na itaviqaravi oqo me baleta na vakilai ni veivakauqeti ni Yalo Tabu?

• Sureti ira na gone me ra wasea na veika eso era sa sotava kei na Yalo Tabu. Cava na vuna e vukei keda kina na tikori ni veituberi ni Yalo Tabu mai na rokovi ni noda veiyalayalati?

Vakauqeta na Vuli e Vale

Vakauqeti ira na gone me ra taroga nodra itubutubu se so tale na lewe ni matavuvale me baleta nodra papitaiso.

Vakatorocaketaki Noda Veivakavulici

Vakasaqara na veika e uqeti iko. Kakua ni raica na veituvatuva oqo me ivakaro e dodonu mo muria ni o veivakavulici. Ia, vakayagataka me ra ivurevure ni nomu vakauqeti ni o vakasamataka vagumatua na nodra gagadre na gone o vakavulica. Raica na Veivakavulici ena iVakarau ni iVakabula 7.)