Janueri 21–27.

Joni 1

Keitou sa Kunea na Mesaia

Ni o wilika na Joni 1, vola na veivakauqeti vakayalo o ciqoma. Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e rawa ni vukei iko mo kila na wase oqo. Na itaviqaravi vakaturi oqo e rawa ni solia eso na vakasama ena ivakarau mo vukei ira kina na gone me ra vulica na ivakavuvuli ena Joni 1. Na itaviqaravi baleti ira na gone qase cake e rawa ni moici, kevaka e gadrevi, me baleti ira na gone sobu.

Vola na Veika o Uqeti Kina

Sureta na Veiwasei

Mo vukei ira na gone me ra wasea na veika era kila me baleti Jisu, e rawa ni o vakaraitaka na kena iyaloyalo ni qarava tiko eso na Nona itavi ka vakamacalataki ena Joni 1. Qai kerei ira me ra vakamacalataka na cava e yaco tiko (me vaka na buli ni vuravura se na vakavulici ni kosipeli).

Vakavulica na iVunau

Gone Sobu

Joni 1:1–2

A bula tu kei na Tamada Vakalomalagi o Jisu ni se bera ni mai sucu.

E vakavuvulitaka o Joni ni a bula tu kei na Kalou o Jisu Karisito ni se bera ni mai bula eke. O keda talega eda a bula tu vata kei na Kalou ni se bera ni da sucu mai (raica “Na Matavuvale: Ai Vakaro ki Vuravura Raraba,” Ensign se Liaona, Nove. 2010, 129). O na vakavulica vakacava vei ira na gone na dina oqo?

iTaviqaravi e Rawa ni Caka

• Vakamacalataka ni “na Vosa” ena Joni 1:1 e tukuni Jisu. Wilika i cake na tikina, ka kerei ira na gone me ra kaya “Jisu” ena veigauna kece o wilika kina “na Vosa.” Vakaraitaka na laini droini Premortal Life (LDS.org). Vakamacalataka ni a bula tiko kei Tamada Vakalomalagi o Jisu Karisito ni se bera ni lako mai ki vuravura.

• Vakavulica vei ira na gone ni da a bula tale tu ga vata kei na Kalou ni se bera ni da lako mai ki vuravura. O na vinakata beka mo vakayagataka na “Introduction: Our Heavenly Father’s Plan,” New Testament Stories, 1–5; na kena vidio (LDS.org); se na iDusidusi ki na iVolanikalou, “Premortal Life,” scriptures.lds.org.

• Sureta e dua na itubutubu me kauta mai e dua na gone dramidrami ki na kalasi, qai vakayagataka oqo me dua na madigi mo vakavulica kina ni da a bula tu mai lomalagi vaka luvena vakayalo na Tamada Vakalomalagi ni se bera ni da mai sucu.

Joni 1:3

A bulia ko Jisu na ka kecega.

E levu na gone era dau marautaka me ra maliwana tu na ibulibuli ni Turaga. Ni ra kila na itavi Vakadauveibuli nei Karisito e rawa ni vakalevutaka nodra rokovi Koya.

iTaviqaravi e Rawa ni Caka

• Wilika na Joni 1:3 vata kei ira na gone, ka vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Vukei ira na gone me ra cavuqaqataka na malanivosa “sa bulia na ka kecega ko [Jisu Karisito].”

• Taubale vata kei ira na gone e tautuba. Me ra veivuke na gone ena vakamacalataka e dua na ibulibuli era raica, ka kerei ira ena kalasi me ra kilakila na ka e vakamacalataki tiko.

• Kerei ira na gone me ra vakasamataka eso na sala e rawa ni ra maroroya kina na veibulibuli e wavoliti ira tu (me vaka, na lomani ira na manumanu).

Ko Jisu Karisito a bulia na vuravura kei na veika kecega sa tu kina.

Joni 1:35–51

Au rawa ni sureti ira na tani me ra lako mai vei Jisu Karisito ka vuli Vua.

Joni 1 e tu kina na kedra itukutuku na tisaipeli era a sureti ira na tamata me ra “lako mai ka raica” ni o Jisu na Luve ni Kalou. O ira sara mada ga na gonelalai e rawa ni ra muria na ivakaraitaki oqo.

iTaviqaravi e Rawa ni Caka

• Vakamacalataka na ivakarau ni nona vakavulici Adriu o Joni baleti Jisu, ka tukuna na nona qai vakavulici Pita o Adriu (raica na Joni 1:35–42). Wasea na sala o kila kina na Lotu, se sureta e dua na lewenilotu vou me wasea na ivakarau e kila kina na Lotu.

• Wasea na italanoa kei Filipe ena nona sureti Nacanieli me “lako mai ka raica” (Joni 1:43–51). Vunia toka e dua na itaba kei Jisu ena dua na kateni, ka sureta e dua na gone me “lako mai ka raica” me qai tukuna vei ira na vo ni gone na ka a raica.

• Me ra rokataka na gone na tabana ni itaviqaravi ena macawa oqo, ka vakayaloqaqataki ira me ra vakayagataka me ra sureta kina e dua me vulici Jisu.

• Kerea e dua na gone me tukuna e dua na gauna a wasea kina e dua na ka, me vaka na ka ni vakatatalo se iloloma, ki na dua tale. Me da wasea beka vakacava na kosipeli? Tukuna na kena italanoa e dua na gone ka a wasea na kosipeli vua na nona itokani, me vaka na italanoa nei Elder M. Russell Ballard baleti Josua (“Taleva Lesu,” Ensign se Liaona, Me 2014, 78–81).

Vakavulica na iVunau

Gone Qase Cake

Joni 1:1–5

A bula tu kei na Tamada Vakalomalagi o Jisu Karisito ni se bera ni mai sucu.

Ni se bera sara mada ga ni sucu, sa dau vakaitavitaki ena itavi bibi sara o Jisu Karisito ena ituvatuva nei Tamada Vakalomalagi. Ni o wilika na Joni 1:1–5, na cava beka e uqeti iko me baleta na cakacaka nei Karisito ena bula taumada?

iTaviqaravi e Rawa ni Caka

• Tarogi ira na gone kevaka era kila na veika a vakayacora tu o Jisu ni se bera ni mai sucu. Sureti ira me ra vaqara isaunitaro ena Joni 1:1–5. Ena rawa ni veivuke me vaqarai ena iVakadewa nei Josefa Simici, Joni 1:1–5 (ena idusidusi vakaiulutaga ni iVolatabu).

• Wasea na “Introduction: Our Heavenly Father’s Plan,” New Testament Stories, 1–5, vei ira na gone se vakaraitaka na kena vidio (LDS.org). Taroga vei ira na gone na veika era vulica baleti Jisu Karisito.

• Sureta eso na gone me ra vakarau mai ena nodra mai kalasi me ra vakaraitaka se vakamacalataka e dua na ka era a bulia. Vakaraitaka na iyaloyalo ni so na ibulibuli ni Turaga, ka vakayagataka na Joni 1:3 me vakamacalataka ni a bulia ko Jisu na ka kecega.

Joni 1:4–9

Sa noqu rarama o Jisu Karisito.

Na ivakatakarakara ni rarama e rawa ni vukei ira na gone me ra kila na iVakabula kei na Nona kosipeli. E rawa vakacava mo vakauqeti ira na gone me ra vaqara na rarama ni iVakabula ni sa vaka me butobuto tu ko vuravura?

iTaviqaravi e Rawa ni Caka

• Sureti ira na gone me ra wilika na Same 27:1; Joni 1:4–9; Mosaia 16:9; kei na Vunau kei na Veiyalayalati 39:1–2, ka vaqara na malanivosa e tautauvata ena ivolanikalou eso oqo. E tautauvata vakacava kei na dua na cina o Jisu Karisito?

• Vakaraitaka e dua na iyaloyalo ni iVakabula kei na so na iyaya e dau solia na rarama, me vaka e dua na cinalivaliva. E tautauvata vakacava kei na dua na iyaya oqo o Jisu Karisito? E rawa vakacava ni da wasea na Nona rarama vei ira tale eso? Lagata vata “Noqu Rarama na Turaga,” Sere ni Lotu, naba 45, se dua tale na sere baleta na rarama ni kosipeli.

• Tarogi ira na gone se cava era cakava ni ra tu ena butobuto ka rere. Vakadinadinataka vei ira ni rawa ni ra gole vua na iVakabula ni ra rere.

Joni 1:35–51

Niu dua na dau muri Jisu Karisito, au sureti kemuni mo ni muri Koya.

Vakasamataka na sala o rawa ni vakayagataka kina na ivakaraitaki ena Joni 1:35–51 mo vakauqeti ira na gone me ra sureti ira tale eso me ra vulica baleta na iVakabula.

iTaviqaravi e Rawa ni Caka

• Vukei ira na gone me ra vaqaqara ena Joni 1:35–51 me ra kunea eso na ka era a kaya eso na tamata me ra sureti ira kina eso me ra vulica me baleta na iVakabula. Me ra vakatovotovotaka na ka e rawa ni ra tukuna me sureti kina e dua na itokani me vulica me baleti Koya.

• Kerei ira na gone me ra vakayagataka na tabana ni itaviqaravi ni macawa oqo me ra sureta kina e dua na itokani se lewe ni matavuvale me vulica eso tale na ka baleti Jisu Karisito.

• Solia vei ira na gone na madigi me ra tukuna vei ira na kalasi e dua na ka era dau taleitaka. Vukei ira na gone me ra raica na ivakarau e rawa ni tautauvata kina kei na wasei ni kosipeli na noda wasea na veika eda dau taleitaka. O na vinakata beka mo vakaraitaka na vidio “Good Things to Share” (LDS.org).

Vakauqeta na Vuli e Vale

Vakauqeti ira na gone me ra sureta e dua era dau lomana me vulica eso tale na ka me baleti Jisu Karisito.

Vakatorocaketaki Noda Veivakavulici

Vukei ira na gone me ra raitayaloyalotaka na italanoa. Vaqara na sala mo bulia kina e dua na iyaloyalo ni italanoa, vakakina na iyaloyalo vakosipeli, droini, vidio, matakau isulu, se na italanoa matanataki.