matavuvale sara ivolanitaba

31 ni Tiseba--6 ni Janueri

Sa Noda Dui iTavi na Noda Vuli

Ni o wilika na ivolanikalou ena ituvatuva oqo, vola na veivakauqeti vakayalo o ciqoma. O na raica ni ituvatuva yadua ena ivolavakarau oqo e tiko kina na itaviqaravi baleti ira na gone sobu kei na qase cake, ia e rawa ni o moica e dua ga na itaviqaravi e rawa me baleta nomu kalasi.

Vola na Veika o Uqeti Kina

ivakatakilakila ni veiwasei

Sureta na Veiwasei

Ena itekivu ni veikalasi yadua, solia na madigi vei ira na gone me ra wasea na veika era sa vulica me baleta na kosipeli. Me ivakaraitaki, ena macawa oqo e rawa ni o sureti ira me ra wasea nodra italanoa taleitaki baleti Jisu Karisito.

ivakatakilakila ni veivakavulici

Vakavulica na iVunau

Gone Sobu

E vinakati au o Jisu Karisito meu muri Koya.

O na wilika vata kei ira na gone e levu na italanoa mai na bula nei Jisu Karisito ena yabaki oqo. Vukei ira na gone me ra kila na vuna eda vulica tiko kina na italanoa oqo baleta me da muria vakavinaka cake kina na ivakaraitaki uasivi nei Jisu Karisito.

iTaviqaravi e Rawa ni Caka

• Wilika na veisureti ni iVakabula, “Lako Mai, Mo Muri Au,” kunei ena Luke 18:22. Me caka e dua na qito, e dua na gone me cakava e dua na ivukivuki qai tukuna vei ira na vo ni gone, “Lako mai, mo muri au.” Sureti ira na vo ni gone me ra cakava talega na ivukivuki vata oya.

• Vakaraitaka na iyaloyalo ni tamata era muria na iVakabula ena sala duidui eso, ena Nona gauna ni veiqaravi vakayago kei na noda gauna oqo. E rawa ni o kunea na iyaloyalo ena iVola ni iYaloyalo Vakosipeli se mekesini ni Lotu. E rawa talega ni o vakaraitaka na vidio “Light the World” (LDS.org). Me ra raica na gone na ivakarau era muria tiko kina na iVakabula ko ira na tamata.

• Vukei ira na gone me ra vakasamataka eso na ka era sa cakava tiko me ra muria na iVakabula. Ni ra lagata “Seek the Lord Early,” Children’s Songbook, 108, e rawa ni solia vei ira eso na vakasama. Me ra droinitaka eso na kedra iyaloyalo ni ra cakava tiko na veika oqo.

E dina na ivolanikalou:

E rawa ni ra rawata na gone e dua na ivakadinadina ni dina na ivolanikalou kevaka sara mada ga era se bera ni wilika rawa. Ni o vulica vata kei ira na gone ena yabaki oqo na ivolanikalou, e rawa ni o vukei ira me ra kila vakataki ira ni dina na ivolanikalou.

iTaviqaravi e Rawa ni Caka

• Sureti ira na gone me ra tukuna na isolisoli taleitaki era sa ciqoma ena nodra siganisucu se ena so tale na gauna. Kauta mai e dua na ilavelave ni ivolanikalou olo vakailoloma, me dolava e dua na gone, ka vakadinadinataka ni ivolanikalou era sa iloloma vei keda mai vei Tamada Vakalomalagi.

• Vakaraitaka vei ira na gone eso na ivola e tu kina eso na italanoa, ka taroga vei ira baleta nodra italanoa taleitaki. Vakaraitaka vei ira na ivolanikalou, ka vakadinadinataka ni ivolanikalou e tu kina na vosa ni Kalou baleti keda ka tukuni ira na tamata era a bula dina kei na veika a yaco dina.

• Wasea na itukutuku e kunei ena 2 Timoci 3:15 kei na Moronai 10:3–5, ka vukei ira na gone me ra tokaruataka e vica na qaqana. Vukei ira me ra kila ni ra rawa ni kila vakataki ira ni dina na ivolanikalou.

• Vunia e dua na iyaloyalo ni iVakabula, ka solia vei ira na gone eso na ivakatakilakila me vukea nodra kunea. Vukei ira na gone me ra kila na ivakarau ena vukei keda kina na vakasaqaqara ena ivolanikalou me da kilai Jisu Karisito. Me ra veivuke na gone ena vunitaki ni iyaloyalo ka soli veivuke vei ira eso tale na gone.

• Lagata vata “Seek the Lord Early” kei na “Search, Ponder, and Pray,” Children’s Songbook, 108–9, ka vukei ira na gone me ra bulia na matana me salavata kei na qaqana. Wasea vata kei ira na gone e dua se rua na nomu ivolanikalou taleitaki, ka tukuna vei ira na sala a yaco kina mo kila ni dina na ivolanikalou. Kevaka e tiko nodra ivolanikalou taleitaki na gone, sureti ira me ra wasea.

wili ivolanikalou tiko na gonetagane

E rawa ni ra rawata na gone na nodra ivakadinadina ena dina ni ivolanikalou.

ivakatakilakila ni veivakavulici

Vakavulica na iVunau

Gone Qase Cake

E vinakata o Jisu Karisito meu vulici Koya ka muri Koya.

Vakasamataka na sala sa yaco kina mo kilai Jisu Karisito. Na cava e rawa ni o cakava me vukei ira na gone me ra vulici Koya ka muri Koya?

iTaviqaravi e Rawa ni Caka

• Sureti ira na gone me ra tukuna e dua na nodra itokani voleka era kila ka vakamacalataka na sala e yaco kina me itokani na tamata oqo. Wilika ka veivosakitaka na Joni 5:39 kei na Joni 14:15 mo kunea na sala eda rawa ni voleka kina vei Jisu. Kerei ira na gone me ra wasea na gauna era vakila kina ni ra a voleka Vua.

• Kauta nomu kalasi ka taubale wavokita na valenilotu. Sureti ira na gone me ra laveta na ligadra ni ra raica e dua na ka ena nodra lako tiko ka vakananuma vei ira e dua na sala e rawa ni ra muria kina na iVakabula (me vaka na tobu ni papitaiso se dua na iyaloyalo).

• Laga vata kei ira na gone “Muri Au Mai,” Sere ni Lotu, naba 63. Sureti ira na gone me ra wasea na veigauna eso era muria kina na ivakaraitaki ni iVakabula.

Au rawa ni vulica na ivolanikalou me baleti au ga.

Ni o wilika na ivolanikalou kei ira na gone ka tarogi ira, e rawa ni o vakadeitaki ira ni rawa ni ra vuli mai na ivolanikalou ka kunea na iyautalei ni kilaka.

iTaviqaravi e Rawa ni Caka

• Wilika i cake na Joni 5:39 kei na Cakacaka 17:10–11, ka tarogi ira na gone ena cava era sa vulica me baleta na ivakarau ni kena vulici na ivolanikalou.

• Digitaka e vica na ivolanikalou rawarawa ka mana mai na Veiyalayalati Vou, volai ira ena dua na tikinipepa, ka vunia na pepa. Vakavurea na ivakatakilakila eso ena muataki ira na gone ki na dua na “vaqaqara” ena loma ni valenivuli se valenilotu me ra kunea na ivolanikalou oqo. Ni ra sa kunea na ivolanikalou yadua, veivosakitaka na ibalebale ni ivolanikalou kei na vuna sa rui iyautalei kina.

• Wasea e vica na ivolanikalou o dau vakamareqeta ka vakamacalataka na vuna era sa rui vakaibalebale kina vei iko. Ni maroroya toka vakalasi e dua na lisi ni ivolanikalou vakamareqeti era kunea na gone ena Veiyalayalati Vou ena yabaki oqo—mai vale se ena Lalai.

• Veivosakitaka kei ira na gone na vuna e dau dredre kina ena so na gauna me da wilika na ivolanikalou. Kerei ira na gone me ra veivakasalataki vakaiira me baleta na vuli ivolanikalou. Kerei ira talega me ra wasea na veika vinaka era sa sotava ena ivolanikalou.

• Vukei ira na gone me ra cakava na ivolanivula e rawa ni ra vakayagataka me vakatakilakilataka na veigauna era wilika kina na ivolanikalou. E rawa ni vakananuma vei ira na ivolanivula oqo me ra dau wili ivolanikalou e veisiga.

Au gadreva na noqu ivakadinadiina vakataki au.

Era na gadreva na gone o vakavulica na nodra dui vakadinadina vakataki ira me rawa ni qaqaco tikoga nodra vakabauta ni yaco mai na veitemaki. Na cava e rawa ni o cakava mo vakauqeti ira kina me ra vulica vakataki ira na dina?

iTaviqaravi e Rawa ni Caka

• Wasea na italanoa ni goneyalewa le tini (raica na Maciu 25:1–13; raica talega na “Wase 47: The Ten Virgins,” New Testament Stories, 118–20, se na kena vidio ena LDS.org). Tarogi ira na gone: E tautauvata vakacava kei na cina vakawaiwai na noda ivakadinadina? Na cava na vuna e bibi kina me tu na noda ivakadinadina?

• Veivosakitaka na cava eda rawa ni cakava meda vaqaqacotaka kina na noda ivakadinadina? Baleta na vakasama eso, sureti ira na gone me ra vaqaqara ena Joni 7:17 kei na Moronai 10:3–5. Sureti ira me ra wasea na veika era kila ni dina.

• Kerei ira na gone me ra vukei iko me vakayacani na buloko ni taravale ena malanivosa e vakamacalataka na veika eda cakava me taraicake kina noda ivakadinadina, me vaka na masu. Me ra tara na gone e dua na vale me matataka na ivakadinadina ena kena vakayagataki na buloko.

ivakatakilakila ni vuli

Vakauqeta na Vuli e Vale

E rawa vakacava ni o vakauqeti ira na gone kei na nodra itubutubu me ra vulica na Veiyalayalati Vou e vale? Me ivakaraitaki, e rawa ni o vakauqeti ira na gone me ra cavuqaqataka e dua na ivolanikalou o ni sa veivosakitaka ena kalasi (ena veivuke beka me vidai na ivolanikalou ena veimalanivosa leleka) ka wasea na tikina ki na matavuvale.

Vakatorocaketaki Noda Veivakavulici

Moica na itaviqaravi me ganita nodra yabaki na gone o vakavulica. O ira na gone sobu era gadreva na ivakamacala matailalai ka dau vuli mai na iwalewale duidui ni veivakavulici. Ni ra sa matua na gone e rawa ni ra cau vakalevu cake ka rawa ni vinaka sara ni wasea nodra vakasama. Solia vei ira na madigi me ra wasea, vakadinadinataka, ka vakaitavi, ka veivuke me vaka e gadrevi. (Raica na Veivakavulici ena iVakarau ni iVakabula, 25–26.)

tabana ni itaviqaravi: I’m Trying to Be like Jesus