Dua na iVakarau ni Veivakavulici

Ena ivurevure oqo, o na raica ni dau talevi wasoma ena ituvatuva yadua na ivakarau e vica oqo: sureta na veiwasei, vakavulica na ivunau, ka vakauqeta na vuli mai vale. Ena vuqa na gauna, ni o vakavulica, ena veiulabaleti se duidui na ituvatuva ena yaco kina na veitiki eso ni ivakarau oqo. Me vaqo, vakasamataka mada ni veiwasei sa dua na madigi me da vakavulica kina na ivunau, ia na vakavuvulitaki ni ivunau sa dodonu me yaco kina na veisureti ni veiwasei. E vakakina, na veivakauqeti ni vuli mai vale e rawa ni dau yaco ena gauna taucoko ni veivosaki vakalasi. Vakatara me yaco ga na veiulabaleti vaqori, ni muri na veivakauqeti ni Yalo me sotavi nodra gagadre na gone o vakavulica.

Sureta na Veiwasei

Me tiki ni veikalasi yadua, sureti ira na gone me ra wasea nodra nanuma, vakasama, kei na veika era sa sotava me baleta na ivakavuvuli eso ena ituvatuva. Na ka era tukuna e rawa ni oka kina na veika eso era sa sotava ni ra vuli tiko mai vale. E rawa mo railesuva talega na veika era a vulica ena macawa sa oti ka taroga se sa uqeta vakacava nodra bula.

Vakavulica na iVunau

NaLako Mai, Mo Muri Au—Baleta na Tamata Yadua kei na Matavuvale e rawa ni vukei iko mo kila na ivunau o na vakavulica vei ira na gone. Vakasamataka na tiki ni ivolanikalou, vosacavuti, na veika sotavi, taro eso, kei na ivurevure tale eso ko na wasea me vukei ira na gone me ra vulica ka bulataka na ivakavuvuli ni kosipeli. Vaqara na sala buli vakamatau eso me vukei ira me ra taleitaka na veika era vulica tiko.

Vakauqeta na Vuli e Vale

Me vaka ni sa vanua ni vuli kosipeli na vuvale, e dua na ka mo sasagataka vakaqasenivuli ni Lalai o ya mo vakauqeta na vuli e vale. Ena rawa vakacava mo vukei ira na gonelalai me ra wasea ena nodra matavuvale na veika era vulica ena kalasi? Ena rawa vakacava mo vakauqeti ira na gone kei ira na nodra itubutubu me ra tomana nodra vuli mai na Veiyalayalati Vou e vale?