Vakayagataki ni Lako Mai, Mo Muri Au—Me Baleti Ira na Lalai

Vakavakarau ni Veivakavulici ena Lalai

Sa dodonu me vanua ni veivakavulici vakosipeli na vuvale. E dina sara oqo me baleti iko kei ira na gone o vakavulica. Ni o vakavakarau mo veivakavulici, tekivu ena nomu vakila vakataki iko na veika sotavi ena ivolanikalou. Na vakavakarau bibi duadua vei iko ena yaco ni o segata na veivakauqeti ni Yalo Tabu.

NaLako Mai, Mo Muri Au—Baleta na Tamata Yadua kei na Matavuvale sa dua talega na tiki bibi ni nomu vakavakarau. Ena vukea nomu rawata e dua na kilaka titobu ena ivakavuvuli vakaivunau e kunei ena ivolanikalou.

Ena nomu gauna ni vakavakarau, ena yaco mai vei iko eso na vakanananu kei na veivakauqeti me baleti ira na gone o vakavulica. O na ciqoma na vakasama eso e baleta na ivakarau ena vakalougatataka kina nodra bula na ivakavuvuli ni ivolanikalou. O na dusimaki mo uqeti ira me ra kunea na ivakavuvuli oqori ni ra vuli tiko vakataki ira vakakina kei na nodra matavuvale mai na ivolanikalou. Nanuma mo kauwaitaki ira na gone ka sega ni dau rawa ena nodra matavuvale na vuli ivolanikalou vakamatavuvale e veigauna.

Vakatutu ni Vuli

Ni o vakavakarau tiko mo veivakavulici, o na rairai rawata na ikuri ni veivakauqeti ena nomu vadikeva na ituvatuva ena ivurevure ni vuli oqo. Kakua ni raica na veivakasama oqo me idusidusi muri vakamatailalai ia me ra sa vakatutu ga ni kena vakayadrati na nomu veivakauqeti. O kilai ira na gone oqo, ka sa kilai ira talega na Turaga—oka kina nodra gagadre kei na veika e rawa ni ra ciqoma. Ena uqeti iko o Koya ena ivakarau vinaka duadua mo vakavulici ira ka vakalougatataki ira kina na gone.

E levu tale tu na ivurevure ni vuli ena nomu vakavakarau, oka kina na vakasama eso ena Lako Mai, Mo Muri Au—Baleta na Tamata Yadua kei na Matavuvale kei na mekesini ni Lotu. Me baleta eso tale na itukutuku ni ivurevure ni vuli oqo kei na so tale, raica na “Additional Resources for Teaching Children.”

Eso na Ka Me Nanumi Tiko

• Sa nodra itavi taumada na itubutubu me ra vakavulici ira na luvedra. Ni o qasenivuli, sa dua na nomu itavi bibi mo tokona, vakayaloqaqataka ka tara cake na vuli kosipeli ena vuvale. Dau kauwaitaki ira na gone e sega ni dau vakavulici ena nodra vuvale na kosipeli mai vei ira na itubutubu. Dau vakaitavitaki ira na gone kece sara ena veivosaki vakosipeli veitalia na ituvaki ni nodra bula vakavuvale.

• E vinaka na veivakatokaruataki. Dau mana cake nodra vulica na dina vakosipeli na gone ni dau tokaruataki na veidina oqo ena veimataqali itaviqaravi. Kevaka o raica ni mana vei ira na gone e dua na itaviqaravi vakavuli, tovolea mo tokaruataka, vakauasivi ni o vakavulici ira era gone sobu. E rawa tale beka ga ni o railesuva e dua na itaviqaravi ni dua na lesoni sa oti.

• E vinakata na Tamada Vakalomalagi mo qaqa ena nomu itavi vaqasenivuli. Sa vakarautaka tu o Koya e vuqa na ivurevure me vukei iko mo qaqa, okati kina na soqoni ni matabose ni qasenivuli. Ena soqoni oqo ena rawa mo veitalanoataka kina kei ira eso tale na qasenivuli na bolebole cava ga o sotava tiko. E rawa talega ni o veitalanoataka ka vakatovolea na ivakavuvuli eso ni veivakavulici va-Karisito.

• Kevaka o vakavulici ira tiko na gone sobu ka gadreva na ikuri ni veivuke, raica na “Sotava Nodra Gagadre na Gonelalai Sobu” ena ivurevure ni vuli oqo.

• Sa okati ena ivurevure ni vuli oqo na ituvatuva vakamacawa ni yabaki vakavo ga na Sigatabu e rua ena yaco tiko kina na koniferedi raraba. Ena Sigatabu e sega ni vakayacori kina na Lalai ena vuku ni koniferedi ni iteki se dua tale na ka, me ra qai tomana tiko mai vale na veimatavuvale na wiliwili ena Veiyalayalati Vou me vaka sa tuvalaki taumada. Me rawa ni donu tiko na toso ena kalasi ni Lalai, e rawa ni o digitaka mo levea e dua na lesoni se cokota vata e rua na lesoni. Me levei na veilecayaki, era na gadreva beka na peresitedi ni Lalai me ra vakasalataki ira taumada na qasenivuli ena veika oqo ni se bera na gauna.