O Iko e Dua Nodra Qasenivuli na Gone

Sa kacivi iko na Kalou mo vakavulici ira na Luvena ena Nona ivakarau ni Vakabula. O sa lesi ka vakatikori ki na veikacivi oqo ena lewa ni Nona matabete tabu. Kevaka mada ga e sega ni tu vei iko na kilaka vakaqasenivuli, ia ni ko bula kilikili tikoga, dau masu e veisiga, ka vulica na ivolanikalou, ena solia vei iko na Kalou na veivakayarayarataki kei na mana ni Nona Yalo Tabu (raica 2 Nifai 33:1).

O sa na nuitaki mo veiqaravi vei ira na luvena na Tamada Vakalomalagi, ka sa kila tu o Koya na nodra gagadre kei na sala uasivi duadua mo tarai ira kina. Ena qai tuberi iko na Kalou, ena Nona Yalotabu ena gauna ni nomu vakavakarau ka vakakina ena gauna ni nomu veivakavulici. Ena vakatakila vei iko ko Koya na ka dodonu mo tukuna ka cakava.

Ena veiyasana kece sara ena nodra bula, era sa dau ciqoma mai kina na gone mareqeti oqo na vei itukutuku eso, me yavutaki kina ka tara cake talega kina na nodra vakasama, ka vakatautaki mai kina na veika era cakava ka wasea yani na veika vovou era sa qai mai kila rawa. E dina sara oqo ena kosipeli, ni ra sa tu vakarau ka nanamaki tu na gone me ra vulica na kena dina matailalai ka rawarawa eso. E kaukauwa ka savasava vuka na nodra vakabauta na veika vakayalo, ka ra okata na veigauna kecega me gauna ni vuli. Era lomasoli tu mera na bulataka na veika era sa vulica rawa, kevaka sara mada ga e se sega ni taucoko sara nodra kila ka. Oqo na ivakarau e dodonu vei keda kece sara, me da ciqoma kina na kosipeli. Me vaka a mai vakatavuvulitaka noda iVakabula, “O koya ena sega ni vakabauta na matanitu ni Kalou me vaka na gonelailai, ena sega sara ni curu kina” (Luke 18:17).

Sa dua na itavi bibi na veikacivi ni veivakavulici vei ira na gone ka tu kina na veivakabauti tabu ka cecere. E sa kena ivakarau tu ni da na kurabui ena so na gauna. Ia mo nanuma tiko ni kacivi iko tiko na Tamamu Vakalomalagi, ka na sega vakadua ni laivi iko o Koya. Oqo na Nona cakacaka na Turaga, ia ni o veiqaravi “ena yalomudou taucoko, igu, vakasama kei na kaukauwa” (V&V 4:2), ena vakalevutaka ko Koya na nomudou kaukauwa, ena solia vakalevu vei kemudou na isolisoli, kei na taledi, ka ra na vakalougatataki na nodra bula na gone o vakavulici ira tiko ena igu ni nomu veiqaravi.