Janueri 7–13.

Maciu 1; Luke 1

“Me Yaco Ga Vei Au me vaka na Nomuni Vosa”

Tekivu ena wiliki ni Maciu 1 kei na Luke 1. Lako Mai, Mo Muri Au—Baleta na Tamata Yadua kei na Matavuvale e rawa ni vukei iko mo kila na veiwase oqo, ka rawa ni solia vei iko na ituvatuva oqo na vakasama ni veivakavulici eso. Kevaka o gadreva na ikuri ni veivuke ena nodra vakavulici na gone sobu, raica na “Sotava Nodra Gagadre na Gone Sobu” ena itekivu ni ivurevure oqo.

Vola na Veika o Uqeti Kina

Sureta na Veiwasei

Kerei ira na gone me ra dabe ena dua na iwirini, qai kerea e dua na gone me wasea na ka e sa vulica mai na ivolanikalou ena macawa oqo se dua tale na gauna. E rawa ni vaqiqica na polo na gone oya se dusia e dua tale na gone ena iwirini, ka sa nona gauna me veiwasei.

Vakavulica na iVunau

Gone Sobu

Maciu 1:18–25; Luke 1:26–38

Era kacivaka na agilosi na sucu i Jisu.

Rau a sikovi yadua o Josefa kei Meri mai vua e dua na agilosi ka mai tukuna na sucu nei Jisu Karisito. Na veika oqo sa rawa ni vukei ira na gone me ra raica na bibi ni sucu i Karisito.

iTaviqaravi e Rawa ni Caka

• Sureta na itubutubu ni dua na gone me rau lako mai ki na kalasi ka vakaisulu tu me vakataki Meri kei Josefa. Kerei rau me rau wasea na veika erau sotava me vaka e volai ena Maciu 1:18–25 kei na Luke 1:26–38.

• Tukuna na italanoa ni agilosi era rairai kivei Meri kei Josefa, me vaka e volai ena veitikina oqo. (Raica talega na “Wase 2: Mary and the Angel” kei na “Wase 4: Joseph and the Angel,” New Testament Stories, 8–9, 12, se na kena vidio ena LDS.org.) E rawa ni o vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Sureti ira na gone me ra tokaruataka lesu tale vei iko na italanoa.

• Sureti ira na gone me ra droinitaka na iyaloyalo ni talanoa eso e kune ena Maciu 1:18–25 kei na Luke 1:26–38.

Luke 1:5–20, 57–63

E dau sauma na noqu masu na Tamada Vakalomalagi.

O Sakaraia kei Ilisapeci rau a rairai masuta tiko ena vuqa na yabaki me dua na luvedrau. Sa qai mani sauma na Tamada Vakalomalagi na nodrau masu ena kena soli e dua na luvedrau tagane, o Joni na Dauveipapitaiso. O rawa ni vakayagataka vakacava na italanoa oqo mo vakavulici ira kina na gone ni dau sauma na Tamada Vakalomalagi na masu?

iTaviqaravi e Rawa ni Caka

• Ena nomu vosa ga, wasea na italanoa mai na Luke 1:5–20, 57–63. O na rairai vinakata mo tokaruataka vakavica na italanoa. Lesi ira na gone me ra matataka na tikina eso ni agilosi, Sakaraia, kei Ilisapeci ka matanataka na italanoa. Vakadreta ni a sauma na Tamada Vakalomalagi na masu nei Ilisapeci kei Sakaraia, ka wasea e dua na gauna a sauma kina na Tamada Vakalomalagi na nomu masu.

• Vakayagataka na “We Bow Our Heads,” Children’s Songbook, 25, se dua tale na sere mo vakavulica kina vei ira na gone na ivakarau ni masu. E rawa talega mo ni lagata vata “A Child’s Prayer,” Children’s Songbook, 12–13. Ena veigauna era lagata na gone na vosa “pray” se “prayer,” sureti ira me ra cuvaulu ka roqoliga.

• Kerei ira yadua na gone me cakava eso na ivukivuki e matataka e dua na ka e rawa vua ni masulaka. Me ra vakilakila na vo ni gone na ka era matataka na ivukivuki oya. E rawa ni ra raica na vakasama eso ena tabana ni itaviqaravi ena macawa oqo.

Luke 1: 31–35

O Jisu Karisito na Luve ni Kalou.

O Jisu Karisito na Luvena na Tamada Vakalomalagi kei Meri. Na cava o rawa ni cakava me vukei ira na gone me vulici Koya vakalevu cake?

iTaviqaravi e Rawa ni Caka

• Tukuna vei ira na gone ni a tukuna vei Meri na agilosi ni na vakatokai na luvena me Luve ni Kalou (raica na Luke 1:35). Vukei ira na gone me ra tokaruataka na malanivosa “o Jisu Karisito na Luve ni Kalou.” Vukei ira na gone me ra kila na itubutubu nei Jisu ena nodra sureti me ra droinitaka na iyaloyalo ni nodra itubutubu. Ni ra vakayacora oqo, tukuna vei ira ni tiko talega na itubutubu i Jisu—o Meri kei Tamada Vakalomalagi. Me kena ikuri, o Josefa a kerei me taqomaki ka qarauni Jisu ni a bula tu e vuravura.

• Wasea na nomu ivakadinadina, ni baleta sa Luve ni Kalou o Jisu, sa rawa Vua me mate ena vuku ni noda ivalavala ca ka bula tale mai. Vakaraitaka na iyaloyalo ni nona Vakamatei ka Tucaketale o Jisu (raica na iVola ni iYaloyalo Vakosipeli, naba 57, 59).

Vakavulica na iVunau

Gone Qase Cake

Maciu 1:18–25; Luke 1:5–37

E sega ni dua na ka e dredre vua na Kalou.

Na sucu nei Jisu kei Joni na Dauveipapitaiso a rawa walega ena kaukauwa ni Kalou. Na vulici ni veicakamana oqo sa rawa ni vaqaqacotaka na nodra vakabauta na gone ni sa tu vua na Kalou na kaukauwa me cakava na cakamana eso ena nodra bula.

iTaviqaravi e Rawa ni Caka

• Ni o railesuva kei ira na gone na Maciu 1:18–25 kei na Luke 1:5–37, taroga vei ira na gone na taro eso me vaka “Na cava o na kaya kevaka o iko o Meri?” se “Ena vakacava tu na nomu vakanananu kevaka o iko o Sakaraia?”

• Ena veimalanivosa rawarawa, tukuna na italanoa ni nodrau sucu o Joni na Dauveipapitaiso kei Jisu Karisito. Kerei ira na gone me ra laveta na ligadra ni ra rogoca e dua na ka ena rairai tawarawa ni sega na kaukauwa ni Kalou. Na italanoa cava soti tale era rawa ni wasea na gone ka a cakava kina na Kalou e dua na ka e rairai tawarawa.

• Vukei ira na gone ni cavuqaqataka na Luke 1:37. Me caka oqo, sa rawa ni o vola na tikina ena papa ka sureti ira na gone me ra cavuqaqataka vakavica. Ni oti na gauna yadua, bokoca e dua na vosa.

Maciu 1:21–25; Luke 1:30–35, 46–47

O Jisu Karisito na Luve ni Kalou.

O Jisu Karisito na Luvena na Tamada Vakalomalagi kei Meri. O na vukei ira vakacava na gone me ra vulica na dina oqo?

iTaviqaravi e Rawa ni Caka

• Kerei ira na gone me ra wilika na Luke 1:30–35, ni vaqarai voli na isau ni veitaro oqo: “O cei na tinai Jisu?” kei na “O cei na Tamai Jisu?” Vukei ira me ra kila ni sai Jisu Karisito duadua ga na tamata ka sa tamana vakayago na Tamada Vakalomalagi (raica talega 1 Nifai 11:18–21).

• Ni o wilika na veitikina oqo, sureti ira na gone me ra vakasaqara na yaca se na itutu eso i Jisu Karisito. Na cava na ibalebale ni veiyaca oqo, kei na cava era vakavulica vei keda me baleti Jisu?

• Wasea na nomu ivakadinadina i Jisu Karisito, ka sureti ira na gone me ra wasea na nodra.

Na iTukutuku, mai vei John Scott

Luke 1:5–25, 57–80

Sa dau rogoca ka sauma na Tamada Vakalomalagi na noqu masu.

Sa dau sauma na Kalou na masu ia sega ga ena sala eso eda rairai namaka. O na rawa ni vakayagataka vakacava na italanoa i Sakaraia kei Ilisapeci mo vakavulica kina na dina oqo vei ira na gone?

iTaviqaravi e Rawa ni Caka

• Tarogi ira na gone se cava era na tukuna vua e dua ka a masuta e dua na veivakalougatataki ia e se bera ni ciqoma tiko. Sureti ira me ra vakasamataka tiko na taro oqo ni ra wilika vata na Luke 1:5–25, 57–80. (Raica talega na “Wase 1: Elisabeth and Zacharias” kei na “Wase 3: John the Baptist Is Born,” New Testament Stories, 6–7, 10–11, se na kena vidio ena LDS.org.) Na cava ena rairai tukuna o Sakaraia kei Ilisapeci kivua e dua ka nanuma ni sa sega ni saumi tiko mai na nona masu?

• Sureta rawa e vica na gone me ra wasea na veika era sotava ni a sauma na nodra masu na Tamada Vakalomalagi. Wasea e dua na gauna o a vakila kina ni sa saumi na nomu masu ena dua na sala tawanamaki.

• Sureti ira na gone me ra droinitaka e dua na iyaloyalo ni gauna ka a sauma kina na Tamada Vakalomalagi e dua na masu—vakauasivi e dua na nodra. Me ra wasea na nodra droini ki na kalasi.

Vakauqeta na Vuli e Vale

Sureti ira na gone me ra wasea kei na nodra matavuvale na iyaloyalo era a droinitaka ka qai kerea na lewe ni nodra matavuvale me ra wasea na gauna eso a sauma kina na nodra masu na Kalou.

Vakatorocaketaki Noda Veivakavulici

Vukei ira na gone sobu me ra vuli mai na ivolanikalou. Me vukei ira na gone sobu ni vuli mai na ivolanikalou, vakanamata ki na dua na tikina ena ivolanikalou se dua mada ga na malanivosa bibi. O na rairai sureti ira na gone me ra tucake se laveta na ligadra ni ra rgoca na vosa se malanivosa oya. (Raica na Veivakavulici ena iVakarau ni iVakabula 21.)