Janueri 7–13.

Maciu 1; Luke 1

“Me Yaco ga Vei Au me Vaka na Nomuni Vosa”

Ni o wiliwili ka vakasamataka vakatitobu na Maciu 1 kei na Luke 1, vola na veivakasama vakayalo o ciqoma. Na dina vakaivunau cava so o kunea? Na itukutuku cava ena vakamareqeti vakalevu cake vei iko kei na nomu vuvale? Na vakasama eso ni vuli e tiko ena idusidusi oqo ena rawa ni vukei iko mo kunea eso tale na rai titobu eso.

Vola na Nomu Veivakasama

Mai na rai vakayago, e sega ni rawa. E sega ni kunekune rawa na yalewa e se sega ni kila na tagane. E vakakina na marama e sega ni vakaluveni rawa ka sa sivita tu na yabaki ni kunekunetaki gone. Ia, e tiko na ituvatuva ni Kalou me sucu kina na Luvena Tagane kei Joni na Dauveipapitaisotaki, ka sa rawa kina, vei Meri kei Ilisapeci, me rau tina, e dina ga ni sega ni vakamacalataka rawa o vuravura. E rawa ni dau veivuke meda vakasamataka na veika veivakurabuitaki erau a sotava ena veigauna eda sotava kina na veika eda nanuma ni na sega ni rawa. Ena rawa beka meda ulabaleta na noda malumalumu? Ena rawa beka meda tara na yalona e dua na leweni vuvale e sega ni via tarai se vakarorogo? E rawa ni a vosa tiko vei keda o Keperieli ena nona vakananuma vei Meri, “Ni na sega ni dredre vua na Kalou e dua na ka” (Luke 1:37). Ena rawa talega nida sauma vakataki Meri ni sa vakatakila na Nona iNaki na Kalou “Me yacoga vei au me vaka na nomuni vosa” (Luke 1:38).

Vakasama eso ni Vuli iVolanikalou Yadua

Na Kosipeli i Maciu kei Luke

Ocei sara beka o Maciu kei Luke?

Ko Maciu na kai Jutia, se dau kumuni vakacavacava, ka sa kacivi koya ko Jisu me dua na Nona iApositolo (raica na Maciu 10:3; raica talega na Bible Dictionary, “Publicans”). E vola vakabibi na nona Kosipeli o Maciu vei ira na wekana na Jiu; ia, e digia o koya me vakabibitaka na parofisai mai na Veiyalayalati Makawa me baleta na Mesaia ka mai vakavatukanataki ena nona bula kei na veiqaravi nei Jisu.

E a sega ni kawa vaka Jiu o Luke ka dau lako voli kei na iApositolo o Paula. E qai vola o koya na nona Kosipeli vei ira na sega ni kawa vaka-Jiu ni sa mate oti na iVakabula. E vakadinadinataki Jisu Karisito o koya ni iVakabula vei ira na matanitu tani kei ira na Jiu. E volaitukutukutaka o koya na veika e raica e matana ena veika e yaco ena nona bula na iVakabula, ka tomana talega kina o koya na italanoa era tiko talega kina na marama ni vakatauvatani kei na Kosipeli tale eso.

Raica talega na Bible Dictionary, “Gospels,” “Maciu” “Luke.”

Maciu 1:18–25; Luke 1:28–35

Na cava e gadreva kina na iVakabula me sucu mai vua na tina ka rawa ni mate (vakayago) kei na Tama e sega ni rawa ni mate?

E vakamacalataka o Peresitedi Russell M. Nelson ni Veisorovaki i Jisu Karisito “e a vinakati kina e dua na isoro vakatamata i koya sa sega ni vesuki ena ivau ni mate. Ia, ena mate o Koya ka na qai taura cake tale na Yagona. Na iVakabula duadua ga ena rawata na veika oqo. Mai vua na Tinana e a rawata o Koya na kaukauwa me mate kina. Mai vua na Tamana e a rawata o Koya na kaukauwa me vorati mate” (“Constancy amid Change,” Ensign, Nove. 1993, 34).

Luke 1:5–25, 57–80

Na Nona veivakalougatataki na Kalou ena lako mai ena Nona gauna ga.

Ena inaki cava ga, na nona gauna na Kalou e kena ibalebale ni veivakalougatataki e rau gadreva o Ilisapeci kei Sakaraia, me rau vakaluveni, ena yaco mai vakamalua ka sega ni vaka e rau namaka. Kevaka o kunea ni o sa waraka tiko e dua na veivakalougatataki, se kevaka e sa vaka e sega ni rogoca tiko na Kalou na nomu masu, na italanoa kei Ilisapeci kei Sakaraia ena rawa ni veivakananumi ni sega ni guilecavi iko o Koya. E tiko na Nona ituvatuva me baleti iko, ka dau maroroya na Nona iyalayala vei ira na Nona Yalododonu savasava. Me vaka e yalataka o Elder Jeffrey R. Holland, “Eso na veivakalougatataki e yaco totolo, eso e yaco mai vakamalua, ka so e sega ni yaco mai me yaco i lagi; ia, vei ira era ciqoma na kosipeli i Jisu Karisito, ena yaco mai” (An High Priest of Good Things to Come,” Ensign, Nove. 1999, 38). Erau sa yalodina tikoga vakacava o Sakaraia kei Ilisapeci? (raica na Luke 1:5–25, 57–80). O raica beka ni o waraka tiko e dua na veivakalougatataki? Na cava o nanuma e namaka vei iko na Turaga ni o wawa tiko?

Na itukutuku cava tale beka e vinakata na Turaga me nomu mai na italanoa oqo?

Ni rau wawa toka ena yalodina, erau sa vakalougatataki o Ilisapeci kei Sakaraia ni sa dua na luvedrau tagane.

Maciu 1:18–25; Luke 1:26-38

O ira na yalodina era na vakamuria na inaki ni Kalou.

Me vakataki Meri, eda na raica ni so na gauna na ituvatuva ni Kalou me baleta na noda bula e duidui mai na noda ituvatuva. Na cava o vulica mai vei Meri me baleta na nomu ciqoma na nona inaki na Kalou? Ena ivola ka tarava, vola na veika e tukuna na agilosi kei Meri (raica na Luke 1:26–38), ka salavata talega na itukutuku o raica ena veika oqori:

Na nona vosa na agilosi vei Meri	Tukutuku vei au
Na nona vosa na agilosi vei Meri “Sa tiko vei iko na Turaga” (tikina 28).	Tukutuku vei au E kila tiko na Turaga noqu itutu kei na dredre.
Na nona vosa na agilosi vei Meri	Tukutuku vei au
Na nona vosa na agilosi vei Meri	Tukutuku vei au

Na ka e cakava o Meri	Tukutuku vei au
Na ka e cakava o Meri “Ena yaco vakabeka evei na ka oqo?” (tikina 34).	Tukutuku vei au E sega ni dua na ka kevaka au taro, niu sega ni kila vinaka.
Na ka e cakava o Meri	Tukutuku vei au
Na ka e cakava o Meri	Tukutuku vei au

Ni o sa wilika me baleta na ivakaraitaki yalododonu i Josefa ena Maciu 1:18–25, na cava o vulica me baleta na nomu ciqoma na inaki ni Kalou? Na cava o vulica mai na veika e rau sotava o Sakaraia kei Ilisapeci? (raica na Luke 1).

Raica talega na Mosaia 3:19; Luke 22:42; Ilamani 10:4–5; Bible Dictionary, “Gabriel.”

Luke 1:46–55

E vakadinadinataka o Meri na nona inaki o Jisu Karisito.

Na nona vosa o Meri ena Luke 1:46–55 e tukuni kina na inaki ni iVakabula. Na cava o vulica baleti Jisu Karisito mai na nona itukutuku o Meri? Na cava eso na rai titobu o vulica me baleta na veivakalougatataki e solia na iVakabula ni veidutaitaki vata na veitikina oqo kei na nona vosa o Ana ena 1 Samuela 2:1–10 kei na ivunau ni Kalougata i Jisu ena Maciu 5:4–12? Na cava e vakavulica vei iko na Yalo ni o vakasamataka vakatitobu na rai titobu eso oqo?

Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:

Maciu 1:1–17

Ni wilika na nomu vuvale na ituvatuva ni kawa i Jisu, ena rawa ni o vakamacalataka ni muria lesu tale na Nona kawa vakatui na kawa mai vei Josefa ki vua na Tui o Tevita. Na kawa oqo e bibi baleta ni a parofisaitaki ni na lako mai ena kawa i Tevita na Mesaia (raica na Jeremaia 23:5–6). Oqo e dua na madigi vinaka e rawa ni o veitalanoataka na ituvatuva ni nomu kawa vakavuvale ka wasea eso na italanoa me baleti ira na nomu qase eliu. Ena vakalougataki iko vakacava na nomu kila na nomu kawa?

Maciu 1:20; Luke 1:13, 30

Na cava era rerevaka o ira na tamata ena veitikina oqo? Na cava e dau vakavuna na noda vakila na rere? Na cava e kaya tiko vei keda na Kalou meda “kakua ni rere”?

Luke 1:37

Mo vukea na nomu vuvale me taracake na vakabauta ni “sega ni dredre vua na Kalou e dua na ka,” e rawa ni vakasaqarai vata na Luke 1 ka raica na ka e cakava na Kalou ka rawa ni vakatokai me dredre. Na italanoa cava tale era rawa ni wasea—mai na ivolanikalou se nodra bula—ni a cakava na Kalou na veika e dredre? Vakasaqaqara ena Gospel Art Book me rawa ni vukei ira me ra vakananuma eso tale na vakasama.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakatorocaketaki ni Noda Veivakavulici

Bulataka na ivolanikalou ena noda bula. Ni o wilika oti e dua na tikina mai na ivolanikalou, sureti ira na leweni vuvale me ra bulataka (raica na Veivakatavulici ena iVakarau ni iVakabula, 21). Me ivakaraitaki, ena rawa vakacava meda bulataka na veika eda vulica me baleta na noda rogoca na kaci ni Turaga mai na veika era cakava o ira na tamata yadua oqo ena Maciu 1 kei na Luke 1?

Ko Ni Sa Kalougata Mai Vei Ira Kecega Na Marama, mai vei Walter Rane