“Janueri 14-20. Luke 2; Maciu 2: Keimami Sa Lako Mai Me Masuti Koya,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“Janueri 14-20. Luke 2; Maciu 2,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
Meda Rokovi Koya, mai vei Dana Mario Wood
Janueri 14–20
Luke 2; Maciu 2
Keimami Sa Lako Mai Me Masuti Koya
Tekivu mai na wiliki ni Luke 2 kei na Maciu 2, ka vakarogoca vakamalua na rai vakayalo titobu o na ciqoma. Na vakasama ni vuli eso e tiko ena idusidusi oqo ena rawa ni vukei iko mo dusia eso na ivakavuvuli bibi ka veiganiti duadua ena wase oqo.
Vola na Nomu Veivakasama
Mai na siga ni Nona sucu, e matata sara ni a sega walega ni dua na gone o Jisu. E sega walega ni kalokalo vou ena lomalagi se na kena seretaki vaka-agilosi na itukutuku ni reki, me matalia kina na gauna vakagone dramidrami i Jisu. E dina sara talega ni o ira na tamata yalodina—mai na veimatanitu, cakacaka, kei na ituvaki ni bula—era vakila na nodra semati Vua. Ni se bera madaga ni cavuta na Nona veisureti meda “lako mai, ka muri au,” era sa lako tu mai (Luke 18:22). E sega ni tamata kece era lako mai Vua, e dina sara—e lewevuqa era sega ni kauwaitaki Koya, ka saga me vakamatei Koya e dua na daunilewa vuvu. Ia, o ira na yalomalumalumu, savasava, ka dauvakasaqara na yalododonu era kunea ni veika era vakasaqara e tiko vei Koya. Na nodra yalodina e vakauqeta na noda, me baleta na “itukutuku vinaka mo dou reki vakalevu kina” ni kau mai vei ira na ivakatawa ni sipi e sa baleti ira “kecega na tamata,” kei na “iVakabula, ko Koya na Karisito na Turaga” e sucu ena siga oya vei keda kece (raica na Luke 2:10–11).
Vakasama eso ni Vuli iVolanikalou Yadua
A sucu o Jisu ena ituvaki vakaloloma.
E dina ga ni tiko ena lagilagi o Jisu Karisito kei na Kalou na Tamana “ni sa sega ni caka ko vuravura” (Joni 17:5), e lomasoli o Koya me mai sucu vakaloloma ka bula maliwai keda e vuravura. Ni o wililka na Luke 2:1–7, na cava o raica me baleta na ituvaki lolovira ni Nona sucu? Tovolea mo dusia donu e dua na itukutuku se vakasama titobu ena italanoa oqo o a sega ni raica e liu. Na cava o vulica me baleta na iVakabula mai na ituvaki ni Nona sucu? Na cava o vakila me baleta na vakasama titobu eso oqo me baleti Koya?
Raica talega na vidio “The Nativity” (LDS.org).
E levu tu na ivakadinadina ki na sucu i Karisito.
Na sucu kei na bula vakagone i Karisito e vakatawani tu e na ivakadinadina kei na dausokalou mai na levu na veiwasewase ni bula—o ira na ivakatawa ni sipi era sikova na vale ni manumanu, na Tamata Vuku era kauta mai na iloloma ki Nona vale, e dua na yada e veiqaravi ena valetabu, kei na dua na tisaipeli yalodina e namaka ena vakanuinui na lako mai ni Mesaia. Ni o vakadikeva na kedra italanoa, na cava o vulica me baleta na sala eso ni sokalou kei na vakadinadinataki i Karisito?
|
iVakadinadina i Karisito |
Na cava au vulica me baleta na sokalou kei na ivakadinadina? |
|---|---|
iVakadinadina i Karisito Vakatawa ni Sipi (Luke 2:8-20) | Na cava au vulica me baleta na sokalou kei na ivakadinadina? |
iVakadinadina i Karisito Simione (Luke 2:25-35) | Na cava au vulica me baleta na sokalou kei na ivakadinadina? |
iVakadinadina i Karisito Ana (Luke 2: 36–38 | Na cava au vulica me baleta na sokalou kei na ivakadinadina? |
iVakadinadina i Karisito Tamata Vuku (Maciu 2:1-12) | Na cava au vulica me baleta na sokalou kei na ivakadinadina? |
Raica talega na 1 Nifai 11:13–23; 3 Nifai 1:5–21; “Shepherds Learn of the Birth of Christ” kei na “The Christ Child Is Presented at the Temple” (vidio, LDS.org).
E rawa ni ra ciqoma na itubutubu na ivakatakila me taqomaka na nodra vuvale.
E sega ni rawa ni cakava o Josefa na veika e a kerei me cakava—taqomaki Jisu ena gauna ni nona gone—ke sega na veivuke mai lomalagi. Me vakataki iratou na Tamata Vuku, e a ciqoma o koya e dua na ivakatakila ni veivakaroti me baleta na veika vakarerevaki. Ni o wilika na veika e sotava o Josefa, vakasamataka na veika vakarerevaki vakayago ka vakayalo era sotava tu na veivuvale nikua. Vakasamataka vakatitobu eso na veika o sotava o vakila kina na veidusimaki ni Kalou e veitaqomaki vei iko, nomu matavuvale kei ira nomu daulomani. Navuca mo wasea na veika o sotava oqo kei ira na tani. Na cava o rawa ni vakayacora mo ciqoma kina na idusidusi vakaoqo ena veisiga mai muri?
Me kena ikuri, e rawa ni o navuca mo sarava na vidio “The First Christmas Spirit” (LDS.org) me ivakaraitaki ni veika a vakila o Josefa ni sotava na itavi me sa na qarauna na Luveni Kalou.
Ena gauna madaga vakaitabagone, e sa vakanamata tu o Jisu me vakayacora na lewa i Tamana.
Ni se cauravou gone voli, na iVakabula e vakatavulica ena kaukauwa na kosipeli ka ra kidroa na qasenivuli ena valetabu ena Nona “vuku kei na nona vosa” (Luke 2:47). Na cava o rawa ni vulica mai na veitikina oqo baleta na iVakabula ni se cauravou voli? E sa cakava tiko beka vakacava o ira na itabagone o kila me ra sa “tiko ena vale ni Tama[dra]”?? (Luke 2:49). Era sa vukei iko vakacava o ira na itabagone kei na gone ena nomu rawata mo kila vakatitobu na kosipeli? Na cava tale o vulica me baleta na ivakaraitaki ni nona bula vakagone o Jisu ena Luke 2:40–52 kei na iVakadewa i Josefa Simici, Maciu 3:24–26 ( ena Bible appendix)?
“Drau sa sega beka ni kila ni sa kilikili kei au meu tiko ena vale nei Tamaqu?” (Luke 2:49).
Na cava na iVakadewa i Josefa Simici?
Baleta ni “sa kau tani mai kina e vuqa na tikina macala vinaka ka talei” na dina era sa kau tani mai na iVola Tabu ena veitabagauna sa oti (1 Nifai 13:28; raica talega na Mosese 1:41), e vakaroti Josefa Simici na Turaga me cakava na railesu veivakauqeti ni Vola Tabu, ka sa vakatokai na iVakadewa i Josefa Simici. E vuqa na railesu e cakava na Parofita e tiko talega ena appendix ni ivolanikalou era vakayagataka na Yalododonu Edaidai. Na kena ivakarau ni King James ena YDE e tiko talega kina na idusidusi e toka e ra kei na railesu ni Parofita. iVakadewa nei Josefa Simici ena Maciu 24, e kilai na Josefa Simici—Maciu, e rawa ni kune ena Mataniciva Talei. Me ikuri ni itukutuku, raica na Bible Dictionary, “iVakadewa nei Josefa Simici”; “Bible, Inerrancy of,” Ulutaga Vakakosipeli, topics.lds.org.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Sureta na leweni vuvale me ra digia e dua na tamata e vakamacalataki tiko ena Luke 2, wilika e vica na tikina me baleta na nona veimaliwai na tamata oya kei na iVakabula, ka wasea e dua na ka era vulica e vakalevutaka cake nodra vakabauti Jisu Karisito. Lagata vata na “Mary’s Lullaby” se “The Nativity Song,” Children’s Songbook, 44–45, 52–53. Na cava e rawa ni da vulica mai na veisere oqo baleta na sucu ni iVakabula?
Na cava e na “inaki i Tamaqu”? (raica Mosese 1:39). Na cava tale eda rawa ni vulica mai na italanoa oqo kei na veika tale eso e cakava ka vakatavulica o Jisu ena Nona bula? Navuca mo vola e so na sala e rawa ni vakaitavi kina na nomu vuvale ena Nona inaki na Tamada ka qai biuta ena loma ni dua na tavaya. Ena macawa ka tarava, ni sa vakasaqara tiko na nomu vuvale me ra cakava na cakacaka ni Tamada Vakalomalagi, e rawa ni ra vilika mai loma ni tavaya. Tuva e dua na gauna mo wasea kina na veika o sotava.
Na cava eda rawa ni vulica mai na Luke 2:52 me baleta na Nona vakatorocaketaka na Nona bula o Jisu? Na sala cava e rawa ni tubucake kina na vuvale ena “vuku kei na yagona talega, a sa vinakati koya vakalevu cake tikoga na Kalou kei ira talega na tamata.”?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Vakayagataka na veivuke ni vulici ni ivolanikalou Mo rawata na rai titobu ena nomu vulica na ivolanikalou, vakayagataka na ivurevure me vaka na idusidusi e toka ena botoni draunipepa ni ivolanikalou, Topical Guide, Bible Dictionary, iDusidusi ni iVolanikalou, kei na veivuke ni vuli tale eso me vaka na LDS.org kei na iVola Vakarautaki ni Gonevuli ni Veiyalayalati Vou (iVola Vakarau ni iVakarau ni Vuli ni Lotu, 2014).
Na iVakabula i Vuravura e lako mai ki vuravura ena ituvaki lolovira.