31 ni Tiseba--6 ni Janueri

E sa noda iTavi na Noda Dui Vulika

Na inaki ni Lako Mai, Mo Muria Au—Me Baleta na Tamata Yadua kei na Matavuvale sai koya me vukei iko mo lako mai vei Karisito ka qai saumaki vakatitobu ki na Nona kosipeli. Na veivurevure oqo e rawa ni vukei iko mo kila vakavinaka nai volanikalou ka kunea mai kina na veivaqaqacotaki o gadreva o iko kei na nomu vuvale. Ena nomu kalasi ena Lotu, o na vakavakarau mo wasea na veivakanananu titobu e veivakauqeti vei ira na Yalododonu ena nodra sasaga me muri Karisito.

Vola na Nomu Veivakasama

“A cava dou sa vakasaqara?” E tarogi ira na Nona tisaipeli o Jisu (Joni 1:38). Ena rawa ni o tarogi iko na taro vata ga oya—na cava o kunea ena Veiyalayalati Vou ena yabaki oqo e vakatau vakalevu saraga ena veika o vakasaqara. “Dou vakasaqara, ka dou na kunea” a iyalayala ni Vakabula (Maciu 7:7). Mo taroga na taro e votu mai na nomu vakasama ni o vulica tiko, ka qai vakasaqara ena yalogu na kena isau. Ena Veiyalayalati Vou o na wilika na veika vakayalo kaukauwa era sotava na tisaipeli i Jisu Karisito. Ni o nona tisaipeli yalodina nai Vakabula, ena rawa ni o sotava talega na veika vakayalo kaukauwa ni o ciqoma na veisureti ni Vakabula, e kune tu ena loma ni tukutuku tabu oqo, “Lako Mai, Mo Muri Au” (Luke 18:22).

Vakasama eso ni Vuli iVolanikalou Yadua

Me’u vuli vakaidina mai vua na iVakabula, e dodonu me’u ciqoma na Nona veisureti, “Lako Mai, Mo Muri Au.”

Na veisureti ni iVakabula, “Lako Mai, Mo Muri Au,” e baleti keda kece—kevaka eda se qai ka vou mai ena salatu ni bula vakatisaipeli se eda sa taubaletaka tiko ena noda bula taucoko. Oqo na Nona veisureti kivua edua na cauravou vutuniyau e sasaga tiko vagumatua me muria nai vunau (raica na Maciu 19:16–22). Na cava e vulica o koya—kei na veika e dodonu meda vulica kece—sai koya ni da tisaipeli e kena ibalebale meda solia na yaloda taucoko vua na Tamada Vakalomalagi kei Jisu Karisito. Eda toso cake tiko ena noda bula vakatisaipeli ni da liaca na veika eda leqa tiko kina, veisau, ka qai vakasaqara meda vakamuri Rau vakataucoko.

Noda vuli mai vua na iVakabula e tekivu ena noda sasaga meda kila vakavinaka na veika e vakavulica o Koya. Me ivakaraitaki, e vakatitobutaki vakacava na nomu kila vinaka na veivosoti ena nomu vakadikeva na veika oqo?

Na iVakavuvuli ni iVakabula (raica na Maciu 6:14–15; 18:21–35)

E dua nai vakaraitaki mai na Nona bula (raica na Luke 23:33–34)

Ia, e sega ni taucoko na vuli me yacova ni da muria nai Vakabula ena noda bulataka na veika e vakatavulica o Koya. E rawa vakacava mo veivosoti vakalevu cake?

Kevaka o via vulica vakalevu cake, tovolea na itaviqaravi oqo ki na dua tale nai vakavuvuli vakosipeli, me vaka na loloma se yalomalumalumu.

E sa noqu itavi na noqu vuli vakai au.

E vakatavulica o Elder David A. Bednar: “Ni da vuli tiko, e dodonu meda cakacakataka ka vakayacora ka sega walega ni dau vakarorogo ka waraka tu ga me qai vakayacori vei keda. O iko beka kei au e daru mata e cakacaka ka vakasaqara na vuli ena vakabauta, se waraka me daru vakavulici se qaravi mai? … E dua na dau vuli ka cakacakataka nona galala ena qaravi vakadodonu ni ivakavuvuli e sa dolava na lomana ki na Yalo Tabu ka sureta na Nona veivakavulici, vakadinadinataka na kaukauwa, ka sa ivakadei dinati. Na vuli ena vakabauta e gadrevi kina na sasaga vagumatua kei na sega ni ciqoma vakarawarawa na ka” (“Seek Learning by Faith,” Ensign, Sept. 2007, 64).

Na cava e kena ibalebale ni noda itavi na noda vuli yadudua? Vakasaqara na isau ni taro eso ena itukutuku nei Elder Bednar ena ivolanikalou eso oqo: Joni 7:17; 1 Cesalonaika 5:21; Jemesa 1:5–6, 22; 2:17; 1 Nifai 10:17–19; 2 Nifai 4:15; Alama 32:27; kei na Vunau kei na Veiyalayalati 18:18; 58:26–28; 88:118. Na cava o vakauqeti kina mo cakava me rawa ni o vulica vagumatua na kosipeli?

Au gadreva meu kila vakai au na dina.

Eso beka na tamata o kila, ni veitalia na cava e yaco ena nodra bula, era na sega ni yalolailai se vakayalia nodra vakabauta. Ena rawa beka ni ra vakananumi iko ena vosa vakatautauvata ni iVakabula me baleti iratou na yalewa vuku (raica na Maciu 25:1–13). O na sega beka ni raica na nodra sasaga vagumatua me vaqaqacotaki tiko na nodra ivakadinadina ni veika e dina. E dodonu meda vakasaqara vagumatua me vaqaqacotaki na noda ivakadinadina, me vaka eratou vulica na yalewa lialia, e sega ni rawa ni da kerea mai vua e dua tale na saumaki dina.

Eda rawata ka bulataka vakacava na noda ivakadinadina? Vola na nomu vanananu eso ni o vakasamataka vakatitobu na ivolanikalou eso oqo: Luke 11:9–13; Joni 5:39; Joni 7:14–17; Cakacaka 17:10–12; 1 Korinica 2:9–11; kei na Alama 5:45–46. (Raica talega na “Testimony,” ena i Ulutaga Vakosipeli, topics.lds.org.

O keda yadua meda rawata e dua nai vakadinadina vakai keda.

Na cava meu cakava ni tiko na noqu vakatataro?

Ni o vakasaqara na kila vakayalo, ena yaco mai ena nomu vakasama na taro eso. Na ivakavuvuli eso oqo ena rawa ni vukei iko mo walia na vakatataro ena sala e tara cake na vakabauta kei na ivakadinadina:

1. Vakasaqara na kila ka ena ivurevure lesi vakalou. Sa ivurevure ni dina kece na Kalou, ka vatakila na dina mai na Yalo Tabu, na ivolanikalou, kei na Nona parofita kei na iapositolo.

2. Cakacaka ena vakabauta. Kevaka e sega ni yaco mai na kena isau ena gauna totolo, nuitaka tiko ni na vakatakila mai na isau ni taro ena kena gauna donu. Ena gauna madaga oqo, bulataka tiko na dina o sa kila tiko.

3. Maroroya e Dua na Rai Tawamudu. Tovolea mo raica na ka ena ivakarau ni rai ni Turaga, ka segai ena itovo ni rai ni vuravura. Raica na nomu taro ena ituvaki ni nona ituvatuva ni veivakabulai na Tamada Vakalomalagi.

Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:

Maciu 13:1–23

E dua na sala vinaka me vukei kina nomu vuvale me vakavakarau me vuli mai na Veiyalayalati Vou ena yabaki oqo sai koya me talevi lesu na vosa vakatautauvata ni daukakaburaki. Ena rawa ni marautaka na nomu vuvale na kena vakaraici na veimataqali qele e volekata nomu vale me rawa ni raitayaloyalotaka na veimataqali qele e vakamacalataki ena vosa vakatautauvata. Na cava e rawa ni o cakava mo teivaka kina na “qele vinaka” e loma ni nomu vale?? (Maciu 13:8).

Kalatia 5:22–23; Filipai 4:8

“Keitou vakasalataki ira na itubutubu kei ira na gonelalai me ra solia na usutu cecere duadua ki na masumasu vakamatavuvale, lotu vakamatavuvale, vulici ni kosipeli kei na ivakaro, kei na itaviqaravi vakamatavuvale era qaqaco vinaka. Ke mani vakacava na kilikili kei na dodonu ni veika tale eso se itaviqaravi cava ga, me ra kakua ni vakatarai me ra sosomitaka na itavi ni ilesilesi vakalou e rawa wale ga me vakayacora vakavinaka na itubutubu kei na matavuvale” (“iVola ni Mataveiliutaki Taumada,” Liaona, Tise. 1999, 1).

Na itekivu ni yabaki vou e gauna vinaka me vakayacori kina na matabose vakavuvale me baleta na kena caka me vakataudeitaki ena kosipeli na nomu vale. Na cava eso na vakasama e yaco mai vei iko ni o wilika na veivakalougatataki kei nai vakasala ena Kalatia 5:22–23 kei na Filipai 4:8? Ena rawa beka mo ni cakava eso na ivola kabi me lili wavoki e loma ni vale me vakananumi iko ena nomudou lalawa.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakavinakataki ni Vuli Yadudua

Vakasaqara nai vunau. Na ivunau e dua na dina tawamudu, e sega ni veisau. E cauraka o Peresitedi Boyd K. Packer ni “vunau dina, e kilai vinaka, e veisautaka na noda itovo kei na ivakarau ni bula” (Little Children,” Ensign, Nove. 1986, 17). Ni o vulica kei na nomu vuvale na ivolanikalou, vakasaqara na dina ena rawa ni vukei iko mo bula vakalevu cake vaka nai Vakabula.

Vararamataki Vuravura, mai vei Brent Borup

Sa Tucaketale o Koya, mai vei Del Parson