Katubaleka iloilo buto ni Valetabu mai Nauvu Ilinoi, mai vei Tom Holdman

28 ni Janueri–3 ni Feperueri

Maciu 3; Marika 1; Luke 3

“Dou Caramaka na Sala i Jiova”

Tekivu ni o wilika na Maciu 3; Marika 1; kei na Luke 3. Ni ko sa masulaka me vukei iko na Yalo Tabu mo kila vinaka na veiwase ni ivola oqo, ena solia vei iko na rai titobu ka baleti iko vakatabakidua saraga. Vola na ka era vakila oqo, ka buli ituvatuva mo vakayacori ira.

Vola na Nomu Veivakasama

Ko Jisu Karisito kei na Nona kosipeli e rawa ni veisautaki iko. E a cavuqaqataka ko Luke e dua na parofisai makawa nei Aisea ka vakamacalataka na ilesilesi i Joni na Dauveipapitaisotaki kei na revurevu ni tadu mai ni iVakabula: “Ena vakaceceretaki na buca kecega,ka na vakalolovirataki na ulunivanua kei na vanua cecere kecega; ka na vakadodonutaki na ka sa veve, ka na vakalogalogavinakataki na sala sa sukusukura” (Luke 3:5; raica talega Aisea 40:4) Oqo na itukutuku me baleti keda kece, wili kina o ira ka ra nanuma ni ra sega ni rawa ni veisau se ra sega ni gadreva mera veisau. Kevaka e dua na ka e tudei me vaka na ulunivanua e rawa ni vakatautauvatataki, e dina ga e rawa ni vukei keda na Turaga me vakadodonutaka na noda gaunisala veve eso (raica na Luke 3:4–5). Ni da sa ciqoma na veisureti nei Joni na Dauveipapitaisotaki me da veivutuni ka veisau, eda sa vakarautaka na noda vakasama kei na lomada me da ciqomi Jisu Karisito ka sa rawa talega vei keda me da “raica talega na vu ni bula mai vua na Kalou” (Luke 3:6)

Vakasama eso ni Vuli iVolanikalou Yadua

Na Kosipeli i Marika

O cei o Marika?

Vei ira na dauvolaivola ni Kosipeli, e lailai duadua na ka eda kila baleti Marika. Eda kila ni a itokani kaulotu i Paula, o Pita, kei na so tale na kaulotu. E levu na dauvulica na iVolatabu era vakabauta ni o Pita e a vakaroti Marika me vola na ka e yaco ena bula ni iVakabula. E kena irairai ni a volai e liu na Kosipeli i Marika vei iratou na tolu na kena vo.

Raica talega na Bible Dictionary, “Mark.”

Maciu 3:1–12; Marika 1:1–8; Luke 3:2–18

Na veivutuni e dua na veisau cecere ni vakasama kei na lomada.

Sa ilesilesi nei Joni na Dauveipapitaisotaki me vakarautaka na lomadra na tamata me ra ciqoma na iVakabula ka yaco me vakataki Koya. E cakava li vakacava? E a kacivaka, “Dou veivutuni” (Maciu 3:2). E a vakayagataka na iyaloyalo ni vuanikau kei na witi me vakabibitaka na mana ni veivutuni me rawa ni ra ciqomi Karisito (raica na Luke 3:9, 17).

Na iyaloyalo cava tale o rawa ni kunea ena itukutuku ni veiqaravi nei Joni na Dauveipapitaisotaki? Nanuma mo toqai ira ena nomu ivolanikalou se mo droinitaka na kedra i yaloyalo ena dua na ivolatukutuku. Na cava era vakatavulica na iyaloyalo oqo me baleta na ivakavuvuli kei na bibi ni veivutuni?

Na veivutuni dina o ya na veisau ni vakasama, noda raica vou na Kalou, o ikeda, kei na vuravura.… [Sa kena ibalebale] na tavuki ni loma kei na lewa vua na Kalou” (Bible Dictionary, “Repentance”). Ena Luke 3:7–14, na veisau cava e sureta o Joni mera vakayacora na tamata mera vakarau kina ni ciqomi Karisito? Ena rawa vakacava ni vakaibalebale talega vei iko na ivakasala oqo? O na vakaraitaka vakacava ni ko sa veivutuni dina? (raica na Luke 3:8).

Raica talega na Joseph Smith Translation, Luke 3:4 – 11 (ena Bible appendix); Bible Dictionary, “O Joni na Dauveipapitaiso”; D. Todd Christofferson, “Na iSolisoli Vakalou ni Veivutuni,” Ensign se Liaona Nove. 2011, 38–41.

Maciu 3:7; Luke 3:7

Ko cei ko ira na Farisi kei na Luvei Setoki?

Ko ira na Farisi era lewe ni dua na isoqosoqo ni lotu vaka-Jiu ka ra dau dokai ira ena nodra dau vakamuria vakamatailalai na vunau i Mosese. Era dau malele ki na kena vakalailaitaki na lotu ki na kena muri na ivalavala vakavanua. O ira na luvei Setoki era dua na ilawalawa vaka-Jiu vutuniyau ka tu na nodra idre vakalotu kei na politiki. Era sega ni vakabauta na ivakavuvuli ni tucaketale mai na mate. O irau na ilawalawa ruarua oqo erau sa lako sese mai na inaki taumada ni ivakavuvuli ni Kalou, ka levu vei ira na lewena era besetaka na itukutuku ni parofita ni Kalou, ko Joni na Dauveipapitaisotaki.

Raica talega Maciu 23:27; Joni 1:19–24; Bible Dictionary, “Pharisees” kei na “Sadducees.”

Maciu 3:13–17; Marika 1:9-11; Luke 3:15 -16,21-22

Sa papitaisotaki o Jisu Karisito me “vakayacori kina na ivalavala dodonu kecega”.

Ena gauna ko papitaiso kina, ko sa muria na ivakaraitaki ni iVakabula. Vakatauvatana na ka o vulica mai na itukutuku ni nona papitaiso na iVakabula kei na ka e yaco ena nomu papitaiso.

O cei e a papitaisotaki Jisu, kei na kaukauwa cava e a tu vua?	Ko cei e a papitaisotaki iko, kei na kaukauwa cava e tu vua?
E a papitaiso mai vei o Jisu?	Ko a papitaiso mai vei?
E a papitaiso vakacava o Jisu?	Ko a papitaiso vakacava?
Na cava na vuna e a papitaiso kina o Jisu?	Na cava na vuni nomu papitaiso?
E a vakaraitaka vakacava na Tamada Vakalomalagi ni marautaki Jisu?	E a vakaraitaka vakacava na Tamada Vakalomalagi ni marau ena nomu papitaiso? E vakaraitaka vakacava Nona veivakadonui mai na gauna oya?

E a vola o Nifai eso na ivakavuvuli bibi me baleta na papitaiso ni iVakabula. Na cava e tu ena nona vosa ena 2 Nifai 31 e vakavulici iko? Navuca mo vola na ka o sotava ena nomu papitaiso ena nomu ivolaniveisiga.

Raica talega Joni 1:32–33; Mosaia 18:8–11; Vunau kei na Veiyalayalati 13:1; 20:37, 68–74; “The Baptism of Jesus” (video, LDS.org).

Maciu 3:16–17; Marika 1:9–11; Luke 3:21–22

E vakatavulica li na iVolatabu ni lewe ni Lewetoluvakalou e tolu na kabula duidui?

Na iVolatabu e tu kina e vuqa na ivakadinadina ni lewe ni Lewetoluvakalou e tolu na kabula duidui. Me vaka, na itukutuku ni Nona papitaiso na iVakabula e tokona na ivakavuvuli ni Kalou na Tamada, ko Jisu Karisito, kei na Yalo Tabu e tolu na kabula duidui. Na Kalou na Tamada e a vosa mai lomalagi, kei na Yalo Tabu (ka rairai me vaka na ruve) e a sirova na iVakabula ni a papitaiso tiko. Oqo eso tale na tikini ivolanikalou ka vakatavulici keda ena dina vataga: Vakatekivu 1:26–27; Maciu 17:1–5; Joni 17:20–23; Cakacaka 7:55–56; kei na Vunau kei na Veiyalayalati 130:22.

Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:

Maciu 3

E tu vei Joni na Dauveipapitaisotaki na Matabete i Eroni. Na cava eda rawa ni vulica baleta na Matabete i Eroni ni da vuli tiko me baleti koya? E rawa ni ra vukei vakacava na taura tu na Matabete i Eroni mai na ivakaraitaki i Joni mera vakayacora nodra ilesilesi? (Raica talega VV 13:1; 20:46–60.)

Maciu 3:11 –17; Marika 1:9–11; Luke 3:21–22

Mo vakatavulici ira na lewenivuvale baleta na papitaiso kei na isolisoli ni Yalo Tabu, vakananuma mo vakaraitaka e dua na ka duka ka kerea na lewenivuvale mera savata ena wai. E vakaibalebale vakacava na itaviqaravi oqo ki na papitaiso? Mo qai kerei ira na lewenivuvale mera tukuna eso na ka e dau veivakasavasavataki kina na buka. Na cava e dau vakamacalataki kina na isolisoli ni Yalo Tabu me “papitaiso ena bukawaqa”? (Raica na Bible Dictionary, “Holy Ghost.”)

Ni da sa papitaiso, na noda ivalavalaca e sa savai laivi.

Maciu 3:17; Marika 1:11; Luke 3:22

Eda a vakila beka ni naica ni a marautaki keda na Kalou? Na cava eda rawa ni vakayacora vakamatavuvale meda vakalomavinakataka kina na Kalou?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakavinakataki ni Vuli Yadudua

Kerea vua na Turaga me vukei iko. Na ivolanikalou era soli mai ena ivakatakila, ia mera kilai sara vakavinaka eda gadreva na ivakatakila yadudua. E yalataka na Turaga: “Dou kerekere ka na soli vei kemudou; dou vakasaqara ka dou na kunea; dou tukituki ka na dolavi vei kemudou” (Maciu 7:7)

Sa Papitaisotaki Jisu o Joni na Dauveipapitaisotaki mai vei Greg K. Olsen