Na Vunau ena Ulunivanua, mai vei Jorge Cocco

Feperueri 18–24.

Maciu 5; Luke 6

“Dou sa Kalougata”

Yadrava vinaka na vakila eso o ciqoma ni o wilika tiko na Maciu 5 kei na Luke 6, ka qai vola ena ivola ni veisiga ni vuli. Na vakasama ni vuli eso e tiko ena idusidusi oqo ena rawa ni vukei iko mo kila eso na ivakavuvuli bibi ka veiganiti duadua ena veiwase oqo.

Vola na Nomu Veivakasama

Ena gauna oqo ni nona veiqaravi, e sa matata ni ivakavuvuli i Jisu Karisito ena sega ni tautauvata kei na ka era dau rogoca tiko mai o ira ena Nona gauna. Era na ciqoma na matanitu ni Kalou na dravudravua? Era na taukena na yalomalua na vuravura? Sa kalougata ko ira era vakacacani? Era sega ni vakatavulica tiko o ira na vunivola kei na Farisi na veika oqo. Ia, vei ira na kila vinaka na lawa ni Kalou, era vakila ni donu nai vunau oqo. “Me kenai sau ni mata na mata” kei na “cata na nomu meca” e lawa lalai (Maciu 5:38, 43), e soli vei ira na tamata era sega ni via bulataka na lawa cecere. Ia, a lako mai o Jisu Karisito me vakayacora na lawa lalai ka vakatavulica na lawa cecere (raica na 3 Nifai 15:2–10) e namaki me vukei keda meda rawa ni “dou qai vinaka sara, me vaka sa vinaka sara na Tama[da] sa tiko mai lomalagi” (Maciu 5:48).

Vakasama eso ni Vuli iVolanikalou Yadua

Maciu 5:1-12; Luke 6:20–26

Na marau tudede e lako mai ni da bulataka na sala e vakatavulica o Jisu Karisito.

Na tamata kece era via marau, ia e sega ni tautauvata na vanua eda vakasaqara kina na marau. Eso era vakasaqara ena veikaukauwa kei nai tutu vakavuravura, eso tale ena iyau se ena kena vakamamautaki na veigagadre vakayago. E lako mai o Jisu Karisito me vakatavulica na sala ki na marau tudede, ka me vakatavulica talega nai balebale dina ni kalougata. Na cava o sa vulica me baleta na marau tudede ena Maciu 5:1–12 kei na Luke 6:20–26? E duidui beka vakacava na kena oqo mai na rai nei vuravura ena marau?

Na taro se vakanananu cava e yaco mai vei iko ni o wilika tiko na tikina yadua? Na cava e vakatavulica vei iko na veitikina oqo me baleta na bula vakatisaipeli i Jisu Karisito? Na cava o vakauqeti mo vakayacora me rawa ni o tauyavutaka nai vakarau ni bula e vakamacalataki ena veitikina oqo?

Raica talega na Joni 13:17; 3 Nifai 12:3–12; “Sermon on the Mount: The Beatitudes” (video, LDS.org).

Maciu 5:13

Na cava e vakatautauvatataka kina na iVakabula na masima kei ira Nona tisaipeli?

Na masima e dau vakayagataki tu mai vakadede me dauvakabalavutaki kina na maroroi ni kakana, vakaikanakanataka, ka vakasavasavataka. E a vakaibalebale tale tu ga vakalotu vei ira na kawa i Isireli na masima. E a daucokoti vata kei na ivakarau makawa ni sorovaki na manumanu ena lawa i Mosese (raica na Vunau ni Soro 2:13; Tiko Voli ena Lekutu 18:19). Ni sa seyavu mai na masima na kena tuituina, e sa sega na kena yaga, se “sa qai sega ni yaga ena dua na ka” (Maciu 5:13). E yaco oqo ni sa waki vata se sa dukadukali mai na ka tani. Ni da sa tisaipeli i Karisito, eda maroroya na keda “tuituina” ni da lako tani mai na dukadukali kei vuravura. Ena vakatara oqo meda vakabulabalavutaka ka vakasavasavataka na cakacaka ni da masima kei vuravura—me ivakaraitaki, ni da wasea na kosipeli ka dauveivakayarayarataki ni vinaka e vuravura (raica na VV 103:9–10).

“Oi kemudou na masima kei vuravura” (Maciu 5:13).

Maciu 5:17–48; Luke 6:27–35

Na lawa i Karisito e cerecere cake mai na lawa i Mosese.

Era a kidroa beka na tisaipeli i Jisu ni ra rogoci Jisu ni tukuna ni gadrevi me vakalevutaki cake na nodra bula dodonu mai vei ira na vunivola kei na Farisi (raica na Maciu 5:20), era dokadokataka na nodra bulataka na lawa i Mosese. Ia, e vakatavulica o Jisu na lawa cecere ka sega walega ni laveta cake na noda ivakarau ia, na noda vakasama kei na veika eda vakila ka dau vakauqeti keda. Na lawa cecere oqo e gadrevi kina e levu cake: na loma, na yalo, kei na nanuma. (raica na Maciu 22:37).

Ni o wilika na Maciu 5:21–48 kei na Luke 6:27–35, nanuma mo makataka na ivakarau ruarua oqo ena lawa i Mosese (“Dou sa rogoca ni sa kainaki vei ira eliu …”) kei na veika e vakatavulica o Jisu me laveti ira cake.

Me ivakaraitaki, na cava e vakatavulica o Jisu ena Maciu 5:27–28 esa noda itavi me baleta na noda vakanananu? Ena rawa vakacava mo lewa na veivakanananu e lako mai ena nomu vakasama kei na lomamu? (raica na VV 121:45).

Raica talega na “Sermon on the Mount: The Higher Law” (vidio, LDS.org).

Maciu 5:48

E namaka dina vei au na Tamada Vakalomalagi me’u vinaka taucoko?

E vakatavulica o Peresitedi Russell M. Nelson:

“Na vosa na vinaka taucoko e vakadewataki mai ena vosa vaka-Kiriki na teleios, ka kena i balebale mo ‘taucoko.’ … Na vosa tawacava ni ivosavosa e vakayagataki wasoma na teleiono, e kena ibalebale me ‘yacova tale yani na muana e tai ka dua, me rawa ni taucoko na vakatoroicaketaki, me vakataucokotaki, se me vakaotia.’ Yalovinaka, mo kila ni vosa oqo e sega ni tukuna me ‘galala ena cala’; e tukuna tiko ni ‘na rawati e dua na inaki ena kena cakacakataki tiko yani.’ …

“… E vakatavulica na Turaga, ‘Dou sa sega ni tu ena iserau ni Kalou ena gauna oqo … ; o koya mo dou vosota tikoga me yacova ni dou sa vinaka sara’[VV 67:13].

“Me da kakua ni yalolailai kevaka e sa veivakaocai se dredre na noda sasaga gumatua ki na vinaka sara. Na vinaka sara ena dau veiwaraki tiko ga. Ena qai rawa ni yaco mai vakataucoko ni sa oti na Tucake tale kei na vukuna ga na Turaga. E waraki ira kece era lomani koya ka muria na nona ivunau” (“Perfection Pending,” Ensign, Nove. 1995, 86, 88).

Raica talega na Filipai 3:13–15; 2 Pita 1:3–11; Vakatakila 3:21–22; 3 Nifai 27:27; Moronai 10:32–33; Vunau kei na Veiyalayalati 76:69.

Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:

Maciu 5:1–9

Na ivakavuvuli cava e vakatavulici ena Maciu 5:1–9 e rawa ni vukea nomu vale me itikotiko marautaki? Ena rawa ni o vakanamata ki na dua se rua ni o vulica tiko nai Vunau ena Ulunivanua e veimacawa ka tarava. Me ivakaraitaki, nai vakavuvuli cava e rawa ni ra kunea na nomu vuvale ka na rawa ni vukei ira me ra dautataro? (raica na Maciu 5:21–25, 38–44). Na iyacoyaco cava so e rawa ni o tuva? O na talemuria vakacava?

Maciu 5: 14–16

Me vukea nomu vuvale me kila vinaka nai balebale ni “rarama kei vuravura,” sa rawa ni o vakasaqara eso nai vurevure ni rarama ena nomu vale, nai tikotiko era tiko wavoliti iko, kei na vuravura. Ena rawa ni veivuke ni o vakaraitaka na veika ena yaco ni o vunitaka na rarama. Na cava na kena ibalebale ni veika e kaya o Jisu, “Oi kemudou na rarama kei vuravura”? (Maciu 5:14). Ocei e sa bau vaka na rarama ena noda vuvale? Eda sa vakacava e dua na rarama kivei ira tale eso? (raica na Veiyalyalati 103 VV 9–10).

Maciu 5:43–44

Na cava e vinakata kina na Kalou meda masulaki ira era sega ni dau caka vinaka vei keda? E rawa vakacava ni da bulataka na ivakavuvuli oqo ena noda matavuvale?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakatorocaketaki ni Noda Veivakavulici

Dau vakaraica vakavinaka na ka. Ni o yadrava na veika e yaco tiko ena nodra bula na luvemu, o na raica na veimadigi vakasakiti ni veivakatavulici. Na ka era kaya kei na taro era taroga ena loma ni siga na luvemu ena rawa ni veimuataki ki na veigauna totoka ni veivakatavulici. (Raica na Veivakavulici ena iVakarau ni iVakabula, 16.)

“Oi kemudou na rarama kei vuravura” (Maciu 5:14).