“Feperueri 25–March 3. Maciu 6–7: ‘Ni Sa Vakatavulici Ira me Vaka E Dua sa Tu Ga Vua na Lewa’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“Feperueri 25–March 3. Maciu 6-7,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019
Vakavulici ira na Tamata o Jisu ena Bati ni Baravi, mai vei James Tissot.
25 ni Feperueri–Maji 3
Maciu 6–7
“Ni Sa Vakatavulici Ira me Vaka E Dua sa Tu Ga Vua na Lewa”
Ni da wilika nai volanikalou ka taro ena noda vakasama ena yalo dina me kilai vinaka na veika e vinakata meda kila, eda sureta na Yalo Tabu me vakauqeti keda. Ni o wilika na Maciu 6–7, yadrava vinaka na veivakasama o vakila.
Vola na Nomu Veivakasama
Nai Vunau ena Ulunivanua e dua vei ira na itukutuku cavuti kilai levu duadua ena Lotu va-Karisito. E veivakatavulici nai Vakabula ena iyaloyalo e momona ka matata, me vaka na koro sa toka ena ulunivanua, na viavia ni veikau, na olifa e vakamatavulotaki tu me vaka na sipi. Ia, na Vunau ena Ulunivanua e uasivi sara mai na dua ga na ivunau totoka. Na kaukauwa ni vakavuvuli ni Vakabula vei ira na Nona tisaipeli ena rawa ni veisautaka na noda bula, vakabibi ena gauna eda bulataka kina. Sa qai levu cake mai na vosa walega na Nona vosa; era sa yaco me ra yavu ni bula ka na, vaka na vale ni tamata vuku ena rawa ni vorata na cagi kei na waluvu ni vuravura (raica na Maciu 7:24–25).
Vakasama eso ni Vuli iVolanikalou Yadua
E dodonu meu vakatikora na lomaqu ena veika vakalomalagi.
E sega ni dau rawarawa me vakaliuci na veika ni Kalou mai na veika ni vuravura. Na ivakavuvuli cava ni Vakabula ena Maciu 6–7 e vukei iko mo vakanamata ki na veika vakalomalagi? Na vakasama cava se veika cava soti e vakilai e yaco mai vei iko ni o vulica tiko na Nona vosa? Na cava o sa vakauqeti mo cakava? Navuca mo vola na veika o vakila. Me kena ivakaraitaki:
|
E dodonu meu kauwaitaka vakalevu cake ga na veika e nanuma na Kalou me baleti mai na nodra nanuma na tani. | |
E rawa niu toro voleka yani vua na Kalou ena masu yalomalumalumu ka yalodina.
Na Vunau ena Ulunivanua e tiko kina e vuqa na ulutaga, o na raica ena vakatau, ena dua na ivakatagedegede ki na veika o sotava tiko ena nomu bula ena gauna oqo kei na veika ena via tukuna vei iko na Turaga.
E dua na ulutaga ena Maciu 6–7 sai koya na masu. Taura e dua na gauna mo vakadikeva kina nomu masu. Na cava o bau vakila me baleta nomu sasaga mo toro voleka vua na Kalou ena masu? Na ivakavuvuli cava ena Maciu 6–7 e vakauqeti iko me vakavinakataki na nomu masu? Vola na veivakasama o ciqoma mai na Yalotabu. Me kena ivakaraitaki:
|
Niu masu, e dodonu meu vakarokorokotaka na yacana na Tamada Vakalomalagi. | |
|
Ni’u masu, e dodonu me’u vakaraitaka na gagadre me yaco ga na nona lewa na Turaga. | |
Ena rawa ni o navuca mo wilika vakadua tale nai Vunau ena Ulunivanua, ena gauna oqo me vaqarai e dua tale na iulutaga se itukutuku e basika wasoma ka sa baleti iko saraga. Vola na veika o kunea ena nomu volaniveisiga ni vuli lesoni, ka salavata kei na nomu vakasama kei na veika o vakila.
E rawa niu toro voleka yani vua na Kalou ena masu.
Na cava na kena ibalebale ni vakayagataki na “vosa balavu” ena masu?
Era kila na tamata ni ibalebale ni “vosa balavu” oya na cavuti tiko ni vosa vata ga ena vica vata na gauna. Ia, na vosa na vosa balavu e rawa ni vakamacalataki ni dua na ka e sega na kenai balebale. Na vakayagataki ni “vosa balavu” ena masu e rawa ni vakaibalebale ki na masu ka sega ni vakaidina, se sega ni mai vuniyaloda (raica na Alama 31:12–23).
Na cava eda sega ni dau cavuta kina na masu ni Turaga?
E vakatavulica o Peresitedi Russell M. Nelson: “E a vakamacalataka taumada na Turaga na Nona masu ena nona kerei ira na dauvakamuri Koya me ra vakuwai ira mai na ‘vosa balavu’ [Maciu 6:7ka ‘mo dou qai masu vakaoqo’ [Maciu 6:9]. Ia, sa dua na ivakarau ni masu meda vakamuria na Masu ni Turaga ka sega ni dua na tikina meda vulica ka qai cavuqaqataka se cavuta vakawasoma. E vinakata na iVakavuvuli meda masu me vukei keda na Kalou ka da sasaga tiko meda vorata na ca ka bula dodonu” (“Lessons from the Lord’s Prayers,” Ensign se Liaona, Me 2009, 46–47).
E dodonu meda vakalewa vakadodonu.
Ena Maciu 7:1, e vaka e tukuna tiko na iVakabula meda kua ni daulelewa, ia ena so tale na ivolanikalou (oka kina eso tale na tikina ena iwase oqo), e solia o Koya na idusidusi meda vakalelewa kina. Kevaka e sega ni matata oya, na iVakadewa i Josefa Simici ena rawa ni veivuke: “Kakua ni vakalewa ena ivalavala tawasavasava, mo na sega ni lewai kina; ia vakalewa ena yalododonu” (ena Maciu 7:1, ivakamacala e ra a). Na cava o raica ena Maciu 7:1–5, vakakina na vo ni wase oqo, e vukei iko mo kila na “lewa ena lewa dodonu”?
Raica talega na “lewai ira na tani,” tudei ena vakabauta, 90–91; Lynn G. Robbins, Na dodonu ni lewa,” Ensign se Liaona, Nove. 2016, 96 – 98.
Sa yaco meu kilai Jisu Karisito ni’u sa cakava na Lomana.
Na malanivosa na “Au sa sega sara ni kilai kemudou” ena Maciu 7:23 e a veisau ena Vakadewa i Josefa Simici ki na “Ko sa sega ni kilai au” (Maciu 7:23, ivakamacala e ra a). E vukei iko vakacava na veisau oqo mo kila vinaka cake na veika e vakatavulica na Turaga ena tikina 21–22 me baleta na kena vakayacori na Lomana? E vakacava na nomu kila na Turaga? Na cava o rawa ni cakava mo kilai Koya vakavinaka cake?
Raica talega na David A. Bednar, Kevaka Dou sa Kilai Au” Ensign se Liaona, Nove. 2016, 102–5.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o vulica tiko kei na nomu vuvale nai Vunau ena Ulunivanua, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
E dua na sala e rawa ni dou vuli mai na Maciu 6–7 vakamatavuvale sai koya me saravi nai yaloyalo ni “Sermon on the Mount: Treasures in Heaven” (LDS.org). E rawa ni ra vakamuria na lewe ni vuvale nai volanikalou ka qai cegu tu vakalailai na toso ni yaloyalo ena gauna era rogoca kina e dua na ka era vinakata me ra veitalanoataka. E rawa ni taura e vica vata na siga nai taviqaravi oqo, kevaka e gadrevi.
Na cava eda rawa ni vulica mai na sala ni nona masu nai Vakabula? Ena rawa vakacava ni da vakayagataka na ivakarau ni Nona masu me noda idusidusi me vakavinakataki na noda masu yadua vakakina vakamatavuvale? (Raica talega na Luke 11:1–13.) Kevaka e tiko na luvemu lalai, e rawa ni o vakatovotovo ena masu kei ira.
Cava na ibalebale ni “vakasaqara … taumada na matanitu ni Kalou”? Eda sa kitaka tiko vakacava na ka oqo ena noda matavuvale?
E rawa ni o vakayagataka e dua na tiki ni kau lailai kei na dua na ka levu me matataka na malamala kei na kau ni dou sa veitalanoataka na ivakavuvuli ni Vakabula me baleta na dauvakalewai ira na tani. Navuca mo wilika na “Dauvakalewai ira na Tani,” ena Tudei ena Vakabauta, 90–91, me tiki ni veitalanoa.
Me vukea na nomu vuvale me kila vakavinaka na vosa vakaibalebale ni Vakabula me baleta na tamata vuku kei na tamata lialia, e rawa ni o cakava me ra sova na wai ena nuku kei na vatu. Ena rawa vakacava meda tara na noda yavu ena vatu?
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Wasea na raikiloma. Na veitalanoataki ni vakavuvuli o vulica ena nomu vuli yadua e sega walega ni sala vinaka mo vakatavulici ira na tani; ia e vaqaqacotaka na nomu kila na veika o wilika. Tovolea mo wasea e dua nai vakavuvuli o vulica mai na wiliwili ni macawa oqo kei na nomu vuvale se lewe ni kalasi ena Lotu.
Au Sa Masuti Kemuni, mai vei Del Parson