“Maji 25-31. Maciu 14-15; Marika 6–7; Joni 5–6: ‘Dou Kakua ni Rere’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“Maji 25-31. Maciu 14-15; Marika 6–7; Joni 5–6,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
Feed Them, mai vei Jorge Cocco
25–31 ni Maji
Maciu 14–15; Marika 6–7; Joni 5–6
“Dou Kakua ni Rere”
Ni o wilika na Maciu 14–15; Marika 6–7; kei na Joni 5–6, vakasaqara na dina e vakaibalebale vei iko. O na vakatarogi iko na taro me vaka na “E semati iko vakacava na itukutuku ni veiwase oqo ki na veika o sotava tiko?” “Nai tukutuku cava au kunea me baleta noqu bula?” se “Na cava au via wasea kei na noqu matavuvale kei ira na tani?”
Vola na Nomu Veivakasama
Na cava e vakauqeti Pita me biuta na veitaqomaki ni nona waqa ena loma donu ni Wasawase e Kaleli ena gauna ni cava? Na cava e vakavuna me vakabauta o koya kevaka e rawa ni taubale ena wai o Jisu, ena rawa talega vua? E sega ni rawa ni da kila deivaki, ia de kila vinaka o Pita ni a sega walega ni lako mai na Luveni Kalou me vakayacora na veika totoka vei ira na tamata ia, me mai vueti ira na tamata vakataki Pita me vakayacora na veika totoka. Na veisureti i Jisu, sai koya, meda “Lako Mai, Mo Muri Au (Luke 18:22). E a ciqoma oti vakadua na veisureti oqo o Pita, ka sa tu vakarau me ciqoma tale, kevaka sara madaga e kena ibalebale me na sotava na veika e daurerevaka ka vakayacora na veika e vaka ena sega ni rawa. Ena sega beka ni kerei keda meda buta tani mai ena dua na waqa ena loma donu ni dua na cava se solia na ivurevure ni kakana kece me vakani kina na udolu, ia, ena kerei keda beka o Koya me ciqoma na veidusimaki ena gauna sara madaga e sega ni matata kina. Na cava ga e Nona veisureti vei keda, ena rawa ni veivakakidacalataki ena so na gauna se vakarerevaki. Ia ena rawa ni yaco na caka mana kevaka eda, vakataki Pita, meda biuta vakatikitiki na noda rere, vakatitiqa, kei na noda kila e lailai ka muri Koya ena vakabauta.
Vakasama eso ni Vuli iVolanikalou Yadua
E Rokova na Tamana o Jisu Karisito.
Na isema mai vua na Tamada Vakalomalagi kei ira yadua na Luvena e dodonu me dua e vakatabui. Ena veitikina oqo, e solia vei keda o Jisu Karisito e dua na ivakaraitaki meda muria ena noda veiwekani kei na Tamada Vakalomalagi. Wilika na Joni 5:17–47, ka qai makataka se toqa toka na veigauna e basika mai na vosa na Tamaqu. E vakarokorokotaka vakacava na Tamana o Luvena, ko na muria vakacava na Nona ivakaraitaki? Na cava o vulica me baleta na veika e nanuma na Tamana baleti Luvena? Ena rawa ni vaqaqacotaki vakacava na nomu veiwekani kei na Tamada Vakalomalagi ena nomu lomasoli mo vakasaqara na Nona lewa?
Raica talega na Joni 17; Jeffrey R. Holland, “Na Cecere ni Kalou,” Ensign se Liaona, Nove. 2003, 70-73
Maciu 14:16–21; Marika 6:33–44; Joni 6:5-14
E rawa ni vakalevutaka na noqu soli ka malumalumu meu rawata na Nona inaki.
O sa bau yalolailai ka vakila ni o sega ni veiganiti me sotava na veigagadre kece o raica wavoliti iko—ena nomu vale, nomu isema ni veimaliwai, se ena bula raraba? Era vakila beka na nodra sega ni veiganiti o ira na tisaipeli i Jisu ena gauna e kerei iratou kina me vakania e sivia ni lima na udolu na tamata era via kana (raica na Maciu 14:21) ena gauna e tiko ga kina e lima na ibuli madrai ka rua na ika. Ni o wilika na caka mana e qai yaco tarava, vakasamataka vakatitobu ena vakayagataka beka vakacava na Kalou na nomu isolisoli ni veiqaravi malumalumu mo vakalougatataki ira era wavoliti iko. Ena rawa vakacava ni vakalevutaka na nomu sasaga o Koya ni o veiqaravi ena Lotu? Vakasamataka na itukutuku oqo mai vei Peresitedi James E. Faust: “E lewevuqa na tamata ka sega ni cavuti na yacadra era sa soli ka ni loloma ka tautauvata kei na lima nai buli madrai kei na rua na ika lalai era sa veiqaravi ka sega ni kila se vakavinavinakataki, ka vakania vakaidina e udolu vakaudolu” (Five Loaves and Two Fishes,” Ensign, Me 1994, 5).
Maciu 14:22–33; Marika 6:45–52; Joni 6:15–21
E sureti au o Jisu Karisito meu vakatikitikitaka na noqu rere kei na vakatitiqa ka vakaraitaka na vakabauti Koya.
Raitayaloyalotaka ena nomu vakasama na itukutuku matailalai ni veika e yaco ena Maciu 14:22–33; Mark 6:45–52; Joni 6:15–21. Vakasamataka mada na veika eratou a vakila o Pita kei iratou na vo ni tisaipeli. Na cava o vulica baleta na bula vakatisaipeli mai na nona vosa kei na veika e cakava na iVakabula mai na veitikina oqo? Na cava o vulica mai na vosa kei na ivakarau nei Pita? (Raica talega na 1 Nifai 3:7.) Na cava e sa sureti iko kina na Turaga ena rawa ni vaka na butu tani mai na waqa? Na cava o kunea ena veitikina oqo ka solia vei iko na yaloqaqa mo vakaraitaka na nomu vakabauti Jisu Karisito?
Niu sa tisaipeli i Jisu Karisito, sa dodonu meu vakabauta ka ciqoma na dina, ena gauna sara madaga e dredre kina me caka.
Ni oti na cakacaka mana ni vakarautaka na madrai o Jisu vei ira na lewe vuqa ena lekutu, era vakasaqarai Koya o ira na daumuri Koya ka vinakata tale eso na kakana. Ia, era curu ni a solia vei ira o Koya e dua na isolisoli vakayalo me ra vakani kina—na “madrai ni bula” (Joni 6:48). E lewe vuqa era rogoca era kaya ni sa “rui vosa dredre oqo” (Joni 6:60).
Esa bau dua na gauna o vakila ni sa rui “dredre” e dua na ka e vakatavulica na iVakabula se o ira na Nona italai se ivunau dredre me ciqomi? Vakasamataka mada na veika o sotava ni o wilika nai tukutuku oqo, vakabibi na vosa nei Pita ena tikina e 68–69. Na cava eso na “vosa ni bula tawamudu” (Joni 6:68) ka na vukei iko mo tudei tiko ena nomu vakamuria nai Vakabula?
Raica talega na M. Russell Ballard, “Keitou na Lako Vei Cei?” Ensign se Liaona, Nove. 2016, 90-92.
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Ni o wilika na veika me baleta na veivakani vei ira na lewe lima na udolu, e rawa ni o kania na madrai kei na ika ka qai vakasamataka ena vica beka ena veirauti ki na lima na udolu na tamata. Esa vakani vakacava na nomu vuvale mai vei Karisito? Esa vakayagataki iko vakacava me vakani ira na tani?
A cakacaka mana o Jisu ena vakani ni 5,000 na tamata ena lima na ibuli kei na rua na ika.
Eratou na marautaka beka na nomu matavuvale na kena vakabulabulataki tale na italanoa ena veitikina oqo. Na cava ena rawa ni ratou a rerevaka na tisaipeli? E qai vuabaleta vakacava o Pita na nona rere ka biuta na waqa? E vakaraitaka vakacava na vakabauta ni sa tekivu me luvu? Eda vakataki Pita vakacava ena so na gauna?
Sureti ira na lewe ni matavuvale me ra raica na veigauna ena malanivosa oqo “sa vakabulai” ena veitikina oqo. Ena sala cava ena rawa ni vakabulai ira kina na tamata o Jisu Karisito? Ena gauna cava kei na sala cava ena rawa ni vakabulai keda kina o Koya?
Solia vei ira na lewe ni matavuvale yadua na tikini madrai me ra kania, ka qai veitalanoataka na vinaka eda ciqoma mai na madrai kei na kakana bulabula tale eso. Ka qai vakasaqara vata na veitikina oqo, me raica na cava e vakatokai Koya kina me “madrai ni bula” o Jisu Karisito (Joni 6:35).
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakavinakataki ni Vuli Yadudua
Vakasaqara na nomu veivakasama titobu vakayalo. Ena nomu vuli yadua, ka vakakina kei na nomu vuvale, kakua ni yalana na nomudou vuli ki na veitikini volanikalou era tiko ena idusidusi oqo. E tiko beka eso na nona itukutuku na Turaga me baleti iko ena veiwase oqo ka sega ni vulici. Vasaqara ena masumasu.
Vorata na Cagi, mai vei Liz Lemon Swindle