“Maji 4-10. Maciu 8–9; Marika 2–5: “Sa Vakabulai Iko Na Nomu Vakabauta” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)

“Maji 4-10. Maciu 8–9; Marika 2–5,” Lako Mai, Mo Muri Au—Me Baleti Ira na Tamata Yadua kei na Matavuvale: 2019

iVakatakilakila

E vakabula na tamata lokiloki o Jisu

Veivakabulai ena Tabana, mai vei Jon McNaughton

Maji 4–10.

Maciu 8–9; Marika 2–5

“Sa Vakabulai Iko Na Nomu Vakabauta”

Ni o wilika na Maciu 8–9 kei na Marika 2–5, mo vakamuria na veivakauqeti o ciqoma mai na Yalo Tabu. Navuca mo vola na veivakauqeti o ciqoma kei na veika o rawa ni cakava mo cakacakataka na veivakauqeti eso oqori.

Vola na Nomu Veivakasama

E dredre meda wilika na Veiyalayalati Vou ka sega ni vakila na veivakauqeti mai na itukutuku ni veivakabulai ni iVakabula—vei ira kece mai vua na marama e tauvimate kivua na goneyalewa esa mate. Na itukutuku cava beka e tiko me noda ena cakamana eso oqo me baleta na veivakabulai vakayago? Sa dina sara e dua vei ira na itukutuku kilai levu ni o Jisu Karisito sa Luveni Kalou, ka tu vua na kaukauwa ena veika kece, ka wili kina na noda mosi vakayago kei na noda malumalumu. Ia, e dua tale na kena ibalebale e tiko ena Nona vosa vei ira na vunivola daulelewa: “Ia mo dou kila kina ni sa rawata na Luve ni tamata e vuravura me bokoca nai valavala ca” (Marika 2:10). Ni o wilika me baleta na tamata mataboko se na vukavuka ka vakabulai, e rawa ni o vakasamataka na veivakabulai—vakayalo ka vakayago—o rawa ni ciqoma mai vua na iVakabula ka rogoca Nona kaya vei iko, “Sa vakabulai iko na nomu vakabauta” (Marika 5:34).

iVakatakilakila

ivakatakilakila ni vuli yadua

Vakasama eso ni Vuli iVolanikalou Yadua

Maciu 8–9; Marika 2; 5

E rawa ni vakabula na iVakabula na malumalumu vakayago kece kei na tauvimate cava ga.

E vica na wase oqo e volaitukutukutaka e levu na veivakabulai mana e vakayacora na iVakabula. Ni o vulica na veivakabulai oqo, vakaraica na itukutuku eso me baleti iko. E rawa ni o tarogi iko: Na cava e vakavulica na itukutuku oqo me baleta na vakabauta? Na cava e vakavulica na itukutuku oqo me baleta na iVakabula? Na cava e vinakata na Kalou me’u vulica mai na cakamana oqo?

E dua na vukavuka (Maciu 8:1-4)
Na turaga ni valu (Maciu 8:5–13)
Na tinai wati Pita (Maciu 8:14–15)
E rua na tamata mataboko (Maciu 9:27–31)
Na tamata paralasi (Marika 2:1–12)
Na tamata ka curumi yalo velavela (Marika 5:1–20)
Na luvei Jairo yalewa (Marika 5:22–23, 35–43)
Na marama ka turidrabalavu (Marika 5:24–34)

Raica talega na Dallin H. Oaks, Vakabulai ni Tauvimate Ensign se Liaona, Me 2010, 47–50.

E Vakabulai Ira Na Tauvimate o Jisu, mai vei Joseph Brickey, ni oti o Heinrich Hofmann

Maciu 8:5–13; Marika 5:24-34

Au rawa ni vakasaqara na veivuke ni Kalou ena gauna madaga au vakila ni’u sega ni veiganiti kaya.

Na turaga ni valu, e dua na kai matanitu tani, a vakila ni sega ni kilikili me tiko na iVakabula ena nona vale. Na marama ka turidrabalavu e vakatokai me tawasavasava ka kaliraki tani mai vei ira na Jiu. Ia, e vakalougatataki rau ruarua na iVakabula. Na cava o vulica mai na rua na italanoa oqo me baleta na kena vakasaqarai na veivuke ni Turaga?

Maciu 8:18-22; Marika 3:31–35

Ni da tisaipeli i Jisu Karisito e kena ibalebale meu vakaliuci Koya ena noqu bula.

Ena veitikina oqo, e vakavulica o Jisu ni da sa Nona tisaipeli e dodonu meda vakaliuci Koya ena noda bula, kevaka sara madaga e kena ibalebale ni so na gauna eda na vakuwai keda mai na veika eda vakamareqeta. Ni o vulica na veitikina oqo, vakasamataka vakatitobu na nomu bula vakatisaipeli. Na cava e dodonu kina me ra dau vakaliuca na iVakabula o ira na tisaipeli? Na cava sa dodonu mo na vakuwai iko kina me rawa ni o vakaliuci Jisu? (Raica talega na Luke 9:57 - 62.)

Maciu 8:23-27; Marika 4:35-41

E tiko vei Jisu Karisito na kaukauwa me kauta mai na vakacegu ena loma ni cava ni bula.

E bau dua na gauna o vakila kina na veika eratou a vakila na tisaipeli i Jisu ena draki ca mai wai—ni ratou sa raica na kena vodo tiko ena loma ni waqa na ua ka qai vakataroga, “Vakavuvuli, ko sa wele beka ga ni da sa mate?”

Ena Marika 4:35–41, o na kunea kina e va na taro. Vola yadua, ka vakasamataka vakatitobu na cava e vakavulici iko kina me baleta na sotavi ni bolebole ni bula ni da vakabauti Jisu Karisito. E kauta mai vakacava na vakacegu na iVakabula ena cava ni nomu bula?

Maciu 9:1–13; Marika 2:15-17

Au rawa ni tutaka na noqu vakabauta ena vakavulici ni ivakavuvuli dina.

E dau dredre ena so na gauna meda kila na veika meda cakava se tukuna ena gauna era vakalewai keda kina na tamata me baleta na noda vakabauta kei na ivakarau. Ni o wilika na Maciu 9:1–13 kei na Marika 2:15–17, vakaraica na nodra vakalelewa na dau veibeitaki kei na veika e kaya na iVakabula. Navuca mo rokataka ena roka duidui na vakalelewa kei na kena isau se vola. Na cava o raica rawa baleta na sala e veivakavulici kina na iVakabula? Ena vukei iko vakacava na ivakaraitaki ni iVakabula kevaka e yaco mai na gauna mo na tutaka na ivakavuvuli ni kosipeli se na ivakarau eso ni Lotu?

Raica talega na vidio “Na iVakaraitaki ni Veisiga Ni Sa Vakalewai na Vakabauta” (LDS.org).

Maciu 9:1–8

Baleta na veivutuni, au rawa ni marau.

Ni sa kau mai na tamata paralasi vua na iVakabula, e kilai levu vei ira na lewe vuqa ni sa gadrevi me vakabulai vakayago o koya. Ia, e qarava rawa e liu o Jisu na nona gagadre levu na turaga oqo—na vosoti ni valavala ca. Kevaka sara madaga e sega ni vakabulai vakayago na turaga oqo, e rawa tikoga vua me vakamuria na ivakasala i Jisu ni a kaya “mo vakacegu” (Maciu 9:2). Ena gauna cava o sa vakila kina na reki ni o vosoti? (Raica talega na Alama 36:18–24.)

iVakatakilakila

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti

Ni tomani tiko nomu vulica na bula ni iVakabula kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:

Maciu 8–9; Marika 2; 5

Navuca mo cakava e dua na ituvatuva ni cakamana ena wase oqo ka vaqara na itaba eso (raica na Gospel Art Book se LDS.org). E rawa ni o kerea na lewenivuvale yadua me talanoataka e dua na cakamana (vakayagataka na itaba ke tiko) ka wasea na veika era vulica mai kina. E rawa ni o wasea eso na ivakaraitaki ni cakamana o sa vakadinadinataka se wilika me baleta na kena e yaco ena gauna oqo ena itukutuku makawa ni Lotu.

Maciu 9:10–13

Na cava eda vulica me baleta na sala e vakarautaka na iVakabula vei ira na dau kumuni vakacavacava kei ira na valavala ca, era sa biligi mai vei ira na tani? Ena rawa vakacava meda muria na Nona iVakaraitaki ni da veimaliwai kei ira na tani?

Maciu 9:36–38

Ena rawa vakacava mo vukea na nomu vuvale me ra kila deivaki na vakatakekere ni iVakabula me levu cake era veivuke ena wasei ni kosipeli? E rawa ni dou cakava vata na itavi rawarawa ka na taura vakabalavu na gauna kevaka e cakava ga e dua na tamata, me vaka na kena samaki na valenikuro ni oti na vakayakavi. Na cava eda rawa ni cakava meda wasea kina na itukutuku ni kosipeli?

Marika 4:35–41

Ena rawa beka ni vukei ira na leweni vuvale na itukutuku oqo ena gauna era rere kina? E rawa beka ni ra wilika na tikina 39 ka wasea na veika era sotava ena gauna e vukei ira kina na iVakabula me ra vakila na vakacegu ena gauna era vakayavalati kina se rere.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Vakatorocaketaki ni Noda Veivakavulici

Meda dau tu voleka ka rawarawa ni tarai. Eso na gauna uasivi ni veivakatavulici e tekivu ena taro se kauwai ni yalona e dua na lewe ni vuvale. Vakatakila vei ira na lewe ni vuvale ena nomu vosa kei na ivalavala ni o sa tu vakarau mo rogoci ira (raica na Veivakavulici ena iVakarau ni iVakabula, 16).