Vakabula o Jisu e dua na tamata lokiloki

Veivakabulai ena Tabana, mai vei Jon McNaughton

Maji 4–10.

Maciu 8–9; Marika 2–5

“Sa Vakabulai Iko na Nomu Vakabauta”

Tekivu ena wiliki ni Maciu 8–9 kei na Marika 2–5. Lako Mai, Mo Muri Au—Baleta na Tamata Yadua kei na Matavuvale e rawa ni vukei iko mo kila na veiwase oqo, ka rawa ni solia vei iko na ituvatuva oqo eso na vakasama ni veivakavulici.

Vola na Veika o Uqeti Kina

ivakatakilakila ni veiwasei

Sureta na Veiwasei

Kerei ira na gone me ra wasea e dua na italanoa kei Jisu ni cakamana voli (raica na ituvatuva ni cakamana ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). E rawa talega ni o vakaraitaka na iyaloyalo veisemati eso (raica na iVola ni Yaloyalo Vakosipeli, naba 40, 41, se LDS.org).

ivakatakilakila ni veivakavulici

Vakavulica na iVunau

Gone Sobu

Maciu 8–9; Marika 2; 5

E tu vei Jisu na kaukauwa me cakamana.

Ni o wilika na cakamana ni veivakabulai ni iVakabula, vakananuma vakatitobu na cakamana mo wasea. O na vukei ira vakacava na gone o vakavulica me ra kila na itavi ni vakabauta ena cakamana nei Jisu?

iTaviqaravi e Rawa ni Caka

• Wasea na italanoa ni tamata tauvi paralase ena Marika 2:1–12. Me veivuke, raica “Wase 23: The Man Who Could Not Walk,” New Testament Stories, 57–58, se na kena vidio (LDS.org). Tukuna vei ira na gone ni tamata ka tauvi paralase e sega ni rawa ni lako. Vukei ira me ra vakila ni a vakabula ka vosota na tamata oqo na iVakabula.

• Sureti ira na gone me ra vakalasutaki “yadra mai” me vaka na luvei Jairo yalewa ni o wilika na Marika 5:22–23, 35–43. Vukei ira me ra kila ni sa vakayacora o Jisu na veika taucoko sara me da rawata kina na bula tawamudu.

• Wilika na Marika 5:34. Vukei ira na gone me ra cavuqaqataka na malanivosa “Sa vakabulai iko na nomu vakabauta,” ena nomu solia beka vei ira yadua e dua na vosa ka me ra qai cavuta na gone na nodra vosa ena kena ituvatuva dodonu. E dua beka era kila e sa bau vakabulai mai na tauvimate?

• Kerei ira na gone me ra bobo ka vakarorogo ni o wilika na Maciu 9:27–30. Ni o wilika na nona vakabula na tamata mataboko o Jisu, sureti ira na gone me ra rai. Ena vakaevei beka nodra nanuma na gone kevaka a vakabulai ira ko Jisu?

• Sureti ira na gone me ra tukuna mada e dua na gauna era a tauvimate kina. Tukuna e dua na italanoa ni nona vakabulai ira na tauvimate o Jisu, ka vakadinadinataka ni kaukauwa nei Jisu e rawa ni vakabulai keda ka vakalougatataki keda ni da masu ka ciqoma na veivakalougatataki ni matabete. Vakamacalataka ni dina ga ni sega ni dau solia vei keda ena so na gauna na Turaga na cakamana eda gadreva, e sa lomani keda o Koya ka kila tu na noda leqa. Ena solia vei keda o Koya na vakacegu eda gadreva.

Marika 4:35–41

Niu rere se tu ena dua na ituvaki rerevaki, e rawa ni vukei au o Jisu meu loma vakacegu.

Na italanoa kei Jisu ni vakarota na cava e rawa ni vukei ira na gone me ra kila ni rawa ni solia vei ira o Koya na vakacegu ena gauna era loma rere kina.

iTaviqaravi e Rawa ni Caka

• Vukei ira na gone me ra raitayaloyalotaka ni ra vodo tiko ena waqa ni o wilika na Marika 4:35–41. (Raica talega na “Wase 21: Jesus Commands the Winds and the Waves,” New Testament Stories, 53-31, se na kena vidio ena LDS.org.) Kerei ira na gone me ra vakamacalataka se na vakaevei tu na ituvaki ni lomadra ke ra a tiko e kea. Na gauna cava beka era a rere kina na gone? Era sa kune vakacegu vakacava?

• Sureti ira na gone me ra cakava na rorogo ni cava ka cegu ni dua e tukuna mai “Mo cegu, mo maravu mai.” Vakadinadinataka me vaka na nona rawa ni solia vei keda na vakacegu o Jisu ni liwa tiko na cava e tautuba, sa rawa Vua me vakaceguya na yaloda ni da yaloca e loma.

• Vakasamataka na ivukivuki eso me salavata kei na ikatolu ni tikina ni “Tell Me the Stories of Jesus,” Children’s Songbook, 57.

Vakaruruya na cava o Karisito

Vakaruruya na Cava o Karisito, mai vei Robert T. Barrett

ivakatakilakila ni veivakavulici

Vakavulica na iVunau

Gone Qase Cake

Marika 2; 5

E rawa ni caka mana ki na noqu bula o Jisu niu vakabauti Koya.

A cakava e levu na cakamana o Jisu ena Nona gauna ni veiqaravi ena bula oqo. O na vukei ira vakacava na gone me ra vakila ni yaco tiko nikua na cakamana?

iTaviqaravi e Rawa ni Caka

• Kerei ira na gone me ra digitaka e dua vei ira na cakamana oqo me ra wilika ka droinitaka: Marika 2:1–12; Marika 5:22–23, 35–43; se Marika 5:24–34. Sureti ira na gone me ra vakamacalataka na nodra droini ki na kalasi. Na cava era vulica me baleti Jisu mai na italanoa eso oqo?

• Kerei ira na gone me ra matanataka na ivakarau ni yalodra ni ra tauvimate, rarawa, rere, se lomaleqa. Ena vukei keda vakacava o Jisu ni vaka tu oqo na yaloda? Vakadinadinataka ni rawa ni vukei ira na gone o Jisu ena veituvaki kecega vakaoqo.

• Sureti ira na gone me ra wasea na veika era sotava ni ra se dua era kila a ciqoma e dua na veivakalougatataki ni matabete. A vakabulai se vakalougatataki vakacava na tamata oya?

Maciu 8–9; Marika 2; 5

Au rawa ni lomani ira na tani me vakataki Jisu.

A vakaraitaka na loloma cecere o Jisu ena nodra vakabulai na tauvimate kei na rarawa tu. Vakananuma titobu na ivakarau o rawa ni vakavulici ira kina na gone me ra yalololoma vei ira na tamata vakaleqai tu.

iTaviqaravi e Rawa ni Caka

• Digitaka e dua se sivia na cakamana nei Jisu mo railesuva vata kei ira na gone, me vaka na kena ena Marika 2:1–12; Marika 5:22–23, 35–43; se Marika 5:24–34. (Raica talega na vidio “Jesus Forgives Sins and Heals a Man Stricken with Palsy,” “Jesus Raises the Daughter of Jairus,” and “Jesus Heals a Woman of Faith”“ ena LDS.org.) Sureti ira na gone me ra wasea e dua na gauna era a vukea kina e dua ka leqa tu kei na cava era a vakila.

• Vakaraitaka na vidio “Gordon Hinckley: Lessons I Learned as a Boy” se “The Coat” (LDS.org). Era a muria vakacava na ivakaraitaki nei Jisu na gonetagane ena vidio oqo? Sureti ira na gone me ra wasea na ituvaki tale eso a vakaleqai tu kina e dua. Na cava eda rawa ni cakava meda vukei ira kina?

• Vakananuma vei ira na gone ni nodra vukei na tani e sa tiki ni nodra veiyalayalati ni papitaiso (raica na Mosaia 18:8–10; Alama 34:28).

Maciu 8:23–27; Marika 4:35–41

Niu rere se tu ena dua na ituvaki rerevaki, e rawa ni vukei au o Jisu meu loma vakacegu.

Era gadreva me kila na gone ni rawa ni solia vei ira na vakacegu na iVakabula ni ra sotava na cava ni bula—oqo kei na veisiga ni mataka.

iTaviqaravi e Rawa ni Caka

• Kerea e dua vei ira na gone me vakayagataka na Marika 4:35–41 kei na iyaloyalo Jesus Calms the Storm (Gospel Art Book, naba 40) me tukuna kina na italanoa ni nona vakarota na cava o Jisu. Kerei ira na gone me ra vakamacalataka se na vakaevei tu na ituvaki ni lomadra ke ra a tiko e kea.

• Sureti ira na gone me ra wasea na veika era sotava ni ra sa vakacegui ni oti na masulaki ni veivuke. Vakananuma vei ira ni vakacegu oqori sa vu mai vua na iVakabula.

• Lagata na “Jisu sa Laba na Cagi,” Sere ni Lotu, naba 57, vata kei ira na gone, ka sureti ira me ra vakasorokakana ni ra lagata “Ruru mai.”

• Solia vei ira yadua na gone e dua na pepa o ni uca, ka kerei ira me ra vola kina e dua na veivakatovolei ena sotava tiko beka e dua. Biuta taucoko na o ena papa, me robota na iyaloyalo ni iVakabula. Sureta e dua na gone me kauta tani e dua vei ira na o ka vakatura na sala eso eda rawa ni vukea kina e dua ena veivakatovolei oya me kune vakacegu. Ni ra sa kau tani kece na o, vakadinadinataka na kaukauwa ni iVakabula me vakaruruya na cava ena noda bula.

ivakatakilakila ni vuli

Vakauqeta na Vuli e Vale

Vukei ira na gone me ra vola e dua na qaravitavi era na vakayacora ena vukuna e dua ena macawa oqo.

Vakatorocaketaki Noda Veivakavulici

Era dau waribariba na gone. O na rairai nanuma ena so na gauna ni nodra igu na gone e sa veivagolei tani mai na vuli. Ia sa rawa ni o taracake na nodra itovo waribariba ena nomu sureti ira me ra matanataka e dua na italanoa se cakava eso na ivukivuki e salavata kei na ka e yaco tiko ena sere se ivolanikalou. (Raica na Veivakavulici ena iVakarau ni iVakabula 25.)

tabana ni itaviqaravi: e rawa ni caka mana o Jisu